يحلفوون انه مميز==> سواليف (باللهجة العامية)وشـاهـي رايـح وقـهـوه جـايـه!!

[شوشة منفوشة]

السلام عليكم ورحمة الله وبركااااااااااتوووووووووه ..
..
..
..
..


مرحبابكم << مرضعتها حجازية

بصراحة فكرت وفكرت وفكرت << أخلصي علينا لا بها العقال

الموهيم ..
قلت لازم أجيب فـكرة موضوع جـديـدة وبـنـفـس الوقت مـفـيدة و((((فكاهيه)))) << منب سهله

وجتني فكرتن مهب هينه أبد أبد يعني وش يجيب نيوتن عندي << حاقدة عليه خخخ


بسم الله نبدأ ..

الموضوع عبارة عن حلقات واليوم ( الحلقة الأولى )
وعقبال إن شاالله الحلقة الأخيرة << الله الله بالمناديل تمشون خشومكم
ويبي يصير كل مره حلقة ،، نتكلم فيها عن شيء وتكون مواضيع هامه و ((متجدده))


نرررررجع لصلبلب الموضوع ..
ياجماعة الخير وش رايكم نشن حمله !!
وهي عن : لــــــــمـــــــــاذا يا هذا تولعن ؟؟ أقصد تلعن ؟؟<< اللغة منعدمه عندها خخخ

لأن بصراحة فيه ناس الله يهديهم ،، اللعن عندهم كأنه السلام عليكم !!
شيء عادي أنه يلعن أخوه أو صديقة أو أبو الجيران !! مار ذا اللي يلعن ابو جيرانهم مهب سهل بايع الدنيا ..

كم يحزنني أني أشوف طفل عمره 4 او 5 او 7 سنين وها الكلمة على لسانه ؟؟

والسبب أهله في البيت ،،
أذكر قبل مدة كنت اسولف انا ووحدة من الصديقات المهم ما ادري وش جاب السالفة تسولف
عن ولد اخوها ابو 3سنين << لاحظوا ابو 3سنوات
قالت انه يقول لها .. نوني الله يـــلعــ...........
أنا شهقت بغت تفاحة آدم تطير لمعدتي !!<< شبعت الحمد لله
قلت بالله يقول هالكلمة؟؟ قالت أيه وليش تستغربين إذا كان اخوي اللي هو ابوه يقولها بالبيت !!

يا لله العجب والله حرام حرام طفل صغير ويردد ها الكلمة بدل ما يقول كلمات حلوة وتليق بسنه كــ طفل !!

هو مسكين ما يدري وشي ؟ لكن الشرهه مهب عليه على ابوه اللي ما يعرف وش معنى التربية ..

طيب ليش ما نكون قدوة حسنة للجميع ؟؟
مثلا أخ كبير يحذف ها الكلمة من قاموس حياته ،،لأن أخوه اللي أصغر منه وأخوانه يبي يقلدونه ،،
خاااصه خاااصه لو كان هو ..العود .. << على قول أخونا بالكويت خخخخ

شفوا وتأملوا ها الحديث - قال الرسول صلى الله علية وسلم :
((من سن في الإسلام سنة حسنة كان له أجرها وأجر من عمل بها من بعده لا ينقص ذلك من أجورهم شيئا،
ومن سن في الإسلام سنة سيئة كان عليه وزرها ووزر من عمل بها من بعده لا ينقص ذلك من أوزارهم شيئا))

فما بالك لو كان أخوانك يسمعونها منك وبعدين يقولونها لعيالهم ، وعيالهم
يقولونها لعيال عيالهم << أخلصي علينا انتي وياهم خخخ

أبعطيكم مثال
صويلح شاب خلوق لكن السبب اللي يعيبة ها الكلمة على لسانه ..
وسمعها يوم من الأيام من أخوه الصغنون حمودي قاعد يقولها..
جاااااا صويلح بسرررررررررررعه ركض << ماعنده وقت
ومسك أخوه مع غالوقته وفي رواية الأبــه وقال له من قالك تقولها هـــــــاه ؟؟<< ينفخ !!
قال له محمد : طيب وش دخلك ؟؟
صويلح : طــــــخ صطره كف ألين ضيع معالم وجه هالضعيف ..
وجاب أقرب غضاره وفي رواية سحله وقربعها في راسه ..
أخوه قام يغشي من الصياح وكشرته عيت تنصك

طيب خلونا نوقف عند هاالحد وأقول ..
بالله عليكم من تشوفون غلطان ؟؟
صويلح ولا محمد ؟؟

أكــــــــــيد وبدون تردد تبي تقولون صويلح ..
والسبب وأنتم عارفينه يقول الكلمة ألين قلده أخوه ،، وبعدين يقول ليش تقولها ؟؟<< والله ما يصير !!

وأنا متأكدة صدقوني لو خاف محمد من صويلح في ها اللحظة ،، يبي يرجع يقولها بعد يومين ..
يعني ما فاد هوشه !!
والسبب تصرفه مع أخوه تصرف غلط ( × )

بدل ما يمسك أخوه ويفهمه ويقول له كلمات طيبة ،، يجي يجلده ألين يقول ربي الله !!

وأنا متأكدة لو فهمة بأدب وهدوء ويـكلمة بعقلانية صدقوني أنه راح يطيع كلامه ويوافق


ويعالج صويلح المشكلة أنه يقول لأخوة إذا قلتها أنا ذكرني أني غلطت وإن شاء الله مره مرتين راح أنسى
ها اللفظ وأنت بعد أبذكرك .. وبــ كذا يتفقون أنهم معد يطرونها على لسانهم ..


أذكر مره من المرات سالفة طريفة مرت علي !!
وحده من الصديقات كانت تسولف لي عن أخوها الصغير تقول ..
أمي كانت تصلي المغرب المهم بعد الصلاة تسـنـنـت وجلست تستغفر ،، جاء ولدها الصغير
قال : يمه ليش تستغفرين ؟؟؟ ملعنه ؟؟>>> خخخخخ ياني مت ضحك

طبعا صاحبت القصة تقول أمي يوم شافت أخواني اللعان على لسانهم قالت لهم اللي يقولها نبي نستغفر كلبونا
عاد هو شاف أمه تستغفر جاء يسألها يقول لها ليش ملعنه !!!!!!!!!!!!!
<<<< لأنه يبي يفزع معها يستغفر
بصراحة موقف طريف لكن بحد ذاته جميل لأن الأم ما شاء الله عليها صححت الغلط بها الطريقة ..


المهم ..
أنا ما أنكر أن الشباب المراهقين والمراهقات يتأثرون بها الألفاظ من أصدقائهم لأنهم يجيبون ها الكلمات
من المدرسة أو من الأقارب المحيطين بهم ..
لأن كانت معنا بنت ما شاء الله أهلها ملتزمين بس هي الله يهديها ماشت شله مآآآش ضايعين
يعني سب - شتم - كلام مال أمه داعي ..

بعد فترة سمعتها تشتم مثلهم !!!!!!!!!!!! <<< كآآآآآآرثة !!

لذلك أنا متأكدة أن السبب الرئيسي هم الأصدقاء أو الأقارب أو المعارف أوعيال الحارة أو أو أو..الخ
<<< خخخ ما خليت احد
عشان كذا ياريت من يوم نسمع شيء منهم،، فورا نصحح الغلط مب أسكت يا فلان ،،عيب ،،أقول أسكت
لا تقول كذا ..
لاء مهب كذا الطريقة !! جب أخوك أو ولدك وفهمه ليش أنت تنهاه ما يقولها ،،
عشان تغرز في داخله قناعه داخلية أن لا يعاود لهذا الخطأ ،، وحاول تبحث أساس ها الكلمة من وين جابها ؟؟
وإذا عرفت صحح غلطة ..لكن قبل كل شيء يكون التصحيح بحكمة وعقلانية ..وبهدوء وطريقة لطيفة معه ..
عشان يتقبل منك كل اللي تبي ..

وبعد فيه شيء ثاني مهم ..
دائما وكثير من المنتديات اللي نزورها يكون قسم الفكاهة في بعض مواضيع الأعضاء الله يهديهم
بـتلعين ..
قرأت موضوع في أحد المنتديات ..وحبيت أوريكم كلامهم
شوفوا
7
7

المشاركة الأصلية كتبت بواسطة   ((يلعــــــ........ ) أبوك من قالك تكفخني خخخخخخخ

والله إني جلست أفكر أقول حرام عليك يا هذا!! وشوله تسب أبوه ؟؟ وش هو قايل لك ؟؟
عاد الثاني يرد عليه
7
7

المشاركة الأصلية كتبت بواسطة   هههههههه والله ضحكتني (يـــلعـــ....) شكلك بعد !!

قسم بالله طارت بهوتي يعني بدل ما يقول يا فلان عيب أو ما أسمح لك تقول لأبوي كذا !!
جالس يضحك معه !! ولا بعد من زين النفس يردها له ثانيه !!

وبعضهم يحسب ما يضحك الناس إلا بها !!
مادرى مسيكين أنه يأثم كل هالخلق اللي يبي يقتدون به ..


لـــكــــن أبذكر لكم قصتين وأبغاكم تشوفون الفرق قولوا تــــم <<< وأنتي تبي تغدينهم خخخخ


ذكرت لي إحدى الأخوات قصة مؤلمة جدا جدا بكل معانيها ..
وهي ..
أن فيه حرمة عجوز دائما دئما على لسانها ها الكلمة المهم سبحان الله قدر الله على ها الحرمة
وتصاب بشلل نصفي من الجهة اليمنى ..
وللمعلومية لو كان الشلل النصفي من الجهة اليمنى يأثر على الكلام معد تتكلم..
وها الحرمة أثر الشلل على كلامها ..وصارت إذا بغت شيء كود أنها تعصب عليهم
لأنكم خابرين الحمد لله على العافية محد شافيك بطلباتك وحاجاتك إلا نفسك ..
المهم
والله العظيم الكلمة ( الوحيدة ) اللي مسكت على لسانها التلعين ..
بس إذا بغت شيء وعصبت تقولها لهم
وهذي حالتها معهم ..
تخيلوا أنزعجوا منها بسبب ها اللفظ ،، والناس نقدوا عليها وش لون حرمة كبيرة تلفظ بها الحتسي ؟؟
ولكن لا تستغربون إذا كانت من صغرها أو من شبابها وهي تقولها !!
ومن شب على شيء شاب عليه <<< أسلمي

والعلم في الصغر كــ النقش بالحجر <<<< هذي مدري وش دخلها ؟؟ بس يا الله مشوها
خخخخخخخخ

والقصة الثانية شفتها بأم عيني << أم ولا جده هاها
أي والله العظيم هالقصة شفتها بعيوني ،، صحيح أنها مؤلمه لكن الحمد لله على كل حال ..
واحد من الأقارب شايب في الستين مصاب بشلل ومأثر على الكلام ..
لكن ما شاء الله عليه ..
ذكر الله على لسانه !!
إذا بغى شيء من أهله ناداهم ((بذكر الله ))
تخيلوا ما ينطق إلا الذكر !!
وما يقرى إلا سورة من القرآن ..
يعني أي شيء في حياته ما يقدر ينطقة !!

وألحين أكيد بدون ما أفصل وأشرح بالقصتين عرفتوا وفهمتوا الفرق ..!!


ممكن أحد يقول ألحين أنا وش أسوي ؟؟ عرفت أن هذا ما يصلح وأن
حكمه حرام بس وش هو الحل <<< اقول لا تقطع شعرك خخخخ

والحل عندي وأنا أم شوشة <<< لا تقولين تبي تسوينه (تكوينه)مع لسانه !!
فيه اقتراح وأبقولكم اللي بقدر عليه وان شاء الله إن الأعضاء بعد بيقترحون بأفكارهم
الرائعة اللي ما نستغني عن مساعدتهم وأهل سدير راعين فزعات ..<< من جاب طاري العجرى ؟؟

طيب عندي اقتراح //
مثلا : جيبوا أوراق طابعه وحبذا تكون ألوان صااااااارخه يعني اللي يشوفها يضيع بيتهم
هههه عشان تلفت الانتباه ..
مثلا فسفوري أو برتقاااالي زي لبس البلدية <<< أعرف أوصف خخخ
المهم
يكتب فيها :
اللعن هو الطرد والإبعاد عن رحمة الله.<< هذي الورقة الأولى


قال رسول الله صلى الله عليه وسلم : ( إن العبد إذا لعن شيئا صعدت اللعنة إلى السماء فتغلق أبواب
السماء دونها ثم تهبط إلى الأرض فتغلق أبوابها دونها ثم تأخذ يمينا وشمالا فإذا لم تجد مساغا
رجعت إلى الذي لعن فإن كان لذلك أهلا وإلا رجعت إلى قائلها) <<<< هذي الورقة الثانية

((ويكتب في كم ورقة نصائحه))

ومعليش عشان يتقبلون منه الفكرة يرسم ولد مطلع لسانه هههه وحاط خطأ علية لأنه يقول هالكلمة ..
المهم بدعوا وتفننوا بالورقة ..وإن شاء الله يكون عليها إقبال كبير ..
ولزق الأوراق في كل مكان يكون العائلة يجلسون فيه ..
مثلا مقدمة البيت في الباب ..
<<< عاد مهب أقصد باب الشارع تفضحون أعماركم !!
مثلا غرفة العائلة أو الصالة أو غرفة الطعام المهم اللي تشوفونه يصلح بالبيت ..
وأخيرا ..
الكلام في هذا يطول وهذا مختصر اللي أبقوله و((أرحب)) بجميع دكاترة منتدى سدير
يشاركونا بالموضوع ويعرف بنفسه،،، ((أقصد دكتور أيش)) ؟؟
ويطرح فكرة أو قصة قد قراها أو سمعها وعجبته أو اللي تبون ..يعني كل واحد يعتبر كأنه فاتح الموضوع ..

<<<< أقووول أحتسوا وخلصونا

أتمنى أن اللي يبينا نتحدث عن موضوع معين في الحلقة القادمه (الثانية)
يقول اقتراحه وإن شاء الله نلبي طلبة ..
يالله عاد أجدعوا أقتراحاتكم بها الكرتون ..

وأخيرا..
إن أصبت فمن الله وإن أخطأت فمن نفسي والشيطان ..
أتمنى أن الموضوع نال على رضاكم واستحسانكم والله ينفع به << عجيز رافعه يدينها تدعي

تقبلوا تحياتي وتحيات كافة طاقم منتدى سدير <<< صبابات على غفله خخخخ


جميع الحقوق محفوظه لـ شوشة منفوشة

بقلم دكتورة الأعصاب / شوشة

[الحازم]

الله يعافيك على الموضوع الشيق الذي يحمل في طياته المأسي

كل الشكر لكِ ولقلمك المشع

[زهرة]

عليكم السلام ورحمة الله


ياحبيلك ياشوشة كلامك في الصميم واحس انه مقبول هنا أكثر مما لو كان بالشرعي

سواليفك والله رهيبه

واللعان يالله ياهونها هالأيام !!!!

اذكر وحده قالت لصديقتها الله يلعنك ..قالت لها لاتلعنين الله يلعنك
والأدهي حين يلعن والديه فترجع اللعنه لوالدين اللاعن نفسه ...كيف يرضى بطرد امه وابوه من رحمة الله...لكن تهاون ولامبالاة وعدم حساب لألفاظهم والله يعافيهم ولايبلانا

تسلمين ياوخيتي واصلي

[أم فيصل]

ابداااااااااااااع ..

كلامك السابق فيه من الفوائد الشئ الكثير ..

اعجبني الصراحه ..

[أنس بن عبد الله]

صحيح

هاللعان اصبح دارج على السن الكثير

واصبح شئ عادي


مشكوره شوشه على الكلام المفيد

وبإنتظار جديدك

[vIm5]

مشكوووووووووووووووووووووووووووووووره أختي ع الموضوع ......
والله يجعله في موازين حسناتك......
تقبلي خطمتي ....
أختك Vim 5

[FATA--JALAJEL]

السلام عليكم

والله مشكله الشباب في ذا الوقت ما يمشون إلا باللعان

أنا سمعت بعيني أأأ قصدي بأذني سمعت واحد يلعن واحد الثاني يرد عليه يقول لا تلعن الله يلعــ....

للأسف ما تقدر تقول تنصح أحد أنا يوم جيت واحد أكلمه أقول ما يصلح تقول كذا قالي أنقلع الله يلعــ ... أنت بعد

هذا إللي قدرت عليه

مشكورة على الموضوع .. مع أن مكانه مو هنا لكن يبقى موضوع مميز

لا تحرمينا من جديدك

[تميـ 506 ــمي]

مشكووووووووره يا أم شوشه منفوشه

[عمر بن عبدالعزيز]

الله يجزاتس خير ياشوشة

كلام جميل جداً

عرضتيه عرضاً رائعاً يشد القاريء

واصلي هالإبداع

[بسمة سدير]

[align=center]



وش يدريتس إني معقدة خلق الله


إذا جو بيلعنون .. وشافوني .. قالوا .. أأأ الشيطان


يعني حلّوها ؟؟


شوشة .. من طول الغيبات جاب المواضيع


حياتس الله وأنا أختتس .. ومرحبااااا بتس


اقتراحي للموضوع القادم ( العروس .. والخـرق اللي يسمونها ملابس )
[/align]

[شوشة منفوشة]

الحازم

المشاركة الأصلية كتبت بواسطة   الله يعافيك على الموضوع الشيق الذي يحمل في طياته المأسي كل الشكر لكِ ولقلمك المشع

حياك الله وبياك ..أخي الفاضل ..
شاكره لك على المرووور ..وفقك الله ..

[دلوعة جلاجل]

يسلمووووووووو يائلبي

على الكلام اللذيذ<<<<<<<<<<طالعه مصريه الأخت

بجد مضوعك حلوووووو ونعاني منه كثير

كل شلتي من يوم يدخلون للكليه الين يطلعون وهم يلعنون بالدكتورات وربي ينرفزون أؤي أؤي

الله يهديهم ويصلحهم وجميع المسلمين وان شاءالله يتعدلون في السنه الجايه بجد يرفعون الضغط بكلمتهم

تسلم أناملك يائلبي على طرررحك اللذيذ مثلك

دمتي بووووووووود

[امير الظــــلام]

الله يعافيك يا شوشه

علىآ النبيه والموضوع الرااااائع

[بنوتة المجمعة]

السلام عليكم

موضوع مميز

أشكرك غاليتي

بصراااحة

أنا أتضايق كثير لما أشوف طفل صغير كل كلامة لعن

وحدة من صديقاتي قالت لي : مرة شافت وحدة صغيرة دائماَ تلعن

الكبير والصغير وعلى أي شئ لما صار لسانها متعود ع اللعن

لدرجة أنها مرة من المرات لعنت المصحف !!

لا حول ولا قوة إلا بالله

الله يصلحــــهم

قولوا آميييين

[شوشة منفوشة]

مـــشرفتنا القديرة ///// زهره وفقها الله >>>>>>>> تكتب خطاب خخخخخ

شاكره لك يا أستاذتي على مروورك .. والله ان الصفحه منوره بوجودك ..

المشاركة الأصلية كتبت بواسطة   ياحبيلك ياشوشة كلامك في الصميم واحس انه مقبول هنا أكثر مما لو كان بالشرعي

تصدقين أحس اني منب متجرأة أكتب بالشرعي

المشاركة الأصلية كتبت بواسطة   اذكر وحده قالت لصديقتها الله يلعنك ..قالت لها لاتلعنين الله يلعنك

خخخخخخخخخ ياني ضحكت ضحك .. مهب صاحية ذا البنت

يامال العافيه على هالقوووووووووووووصه