بعض ابيات ابن جعيثن بأهل سدير

[خفاق]

يالله بنـو(ن) للرعـد بـه زلازيــل ينشي من القبلـه صـدوق(ن) خيالـه

ينشي الضحى وهو اسود(ن) كنه الليل والبرق بـه مثـل الضـوي اشتعالـه

يحدر كونه مثـل زجـر المحاحيـل واعيـاز مزنـه مثـل دامـر حلالـه

ويلا انتهض ساق السـدى باالهماليـل مثـل النعـام اللـي تزايـد جفـالـه

من واحد(ن) ماهـوب منـان وبخيـل رب(ن) كريم(ن) وكـل حـي يسالـه

سيله يعم سديـر مـن غيـر تفصيـل عقب اربعيـن الحـول يذكـر كمالـه

الغـاط والزلفـي يحـده مشامـيـل وابـا ذريـه والوطـا مـن سهـالـه

ويضفي على المشقر الى هود الليـل يعـم شعبـانـه يـجـي باحتمـالـه

وياطا الرويضـة والحريـق مقابيـل واباالسـروج وماانحـدر مـن قبالـه

ووراط يحيي به حـلال(ن) مهازيـل حيثه هو اللـي ينطـح السيـل جالـه

والى انحدر يضفي على العوده السيل وتميـر ومجـزل تمـلـى هجـالـه

ويثني شعيب الغـاط سيلـه بتسهيـل مايتعب اللي غـارس(ن) لـه سبالـه

ويمطر على حرمه حقـوق مخاييـل يفرح بها الحرفـي وراعـي العمالـه

ويعـل وادي المجمعـه للمطافـيـل وابـا الميـاه عـلاوتـه والسفـالـه

ويمطر على هدب الغروس المظاليـل يحير سيلـه فـي النخـل والحيالـه

ووادي الفقي زين البساتيـن ونخيـل في القيض يسقي صافي مـن زلالـه

كدادهـم كنـه علـى ساحـل النيـل تسمـن معاويـده ويكـثـر ريـالـه

يرجع سديـر ويكثـرون المحاصيـل تلقـى بـه التاجـر ينمـي حـلالـه

غرايـس يازينهـا طلعـت سهـيـل يفرح بهـا اللـي جايعيـن(ن) عيالـه

للاجنبـي والجـار فيهـا مداهـيـل خشر ليالي القيض مـن لـه ومالـه

الهلـي يعطيـه الكسابـه بـلا كيـل والاجنبـي يعطـى العلـف للزمالـه

هذا يبي خضـره وهـذا لـه الشيـل وراعي الحطب له حزمة(ن) في حباله

وان جا الضعيف بارد الكـف ومعيـل يمشي علـى الرجليـن مالـه زمالـه

قليل شوف ويشتكي من ردى الحيـل ماله حـلال ويستحـي مـن ضلالـه

جار(ن) لسمحيـن الوجيـه المناويـل آهل سدير اهـل الصخـى والجزالـه

ربـع(ن) يسلونـك بكثـر التعالـيـل وكـل(ن) يوسـع خاطـره بالنزالـه

يروح وركابـه تهـادى مـن الشيـل من شـاف حالـه قـال ياكثـر مالـه

مـع ذا تراهـم للخواطـر بهالـيـل لاهل النضـا واللـي ذلولـه نعالـه

يلقى دلال(ن) باشقـر البـن والهيـل تفـوح مـع طيـب النبـا والسهالـه

يلـزم مسويهـا بغـسـل الفناجـيـل وتركـى إليـن انـه يجيـب الفوالـه

من عقب هذا السمن ومفطـح الحيـل كـل يحشمونـه علـى قـد حـالـه

رجالهـم لـو مالـه الا المعامـيـل لابـد مـع ضيفـه يسـوي جمـالـه

جدانهـم جـادو وحـنـا مواصـيـل ومن مات يظهـر مـن عيالـه بدالـه

ربعي وانـا منهـم كثيـر المداخيـل من لامني فيهـم عسـى الشـر فالـه

يستاهلون المـدح جيـل بعـد جيـل اللـي يماريهـم فهـو مـن هبـالـه