مرثية الشاعر ناصر السعيد في ناصر الرميح- ابوسهيل (رحمه الله)

[سعود الخليل]

مرثية في ناصر بن محمد بن عبدالله الرميح الذي وافاه الاجل في يوم الاربعاء الموافق 13/10/1431هـ

ابـو سـهـيـل



[poem=font="Simplified Arabic,5,black,normal,normal" bkcolor="transparent" bkimage="" border="none,4,gray" type=0 line=0 align=center use=ex num="0,black""]
عفا الله عن عيونٍ كل يومٍ تنثر الدمعات=تخفف عن سراجيفٍ كثير الهم حاديها
الى منك فقدت الصاحب اللي غاليٍ بالذات=تجرع في ضميرك من لهيب النار حاميها

والا اكود من لهيبٍ يستعر من صيحة الغفلات=الى جاك الخبر وانتا عن الهقوات مقصِيها
ولكن القدر ما عنه لاروحه ولاجيات=لزومٍ ماكتب للنفس ياصلها وياتيها
ولا ينفعك يالمخلوق كثر النوح والصيحات=قضى الله ماقضى والنفس ماترجع لغاليها
ولكن لافقدت من هل الفزعات والشيمات=رفيقٍ عاليٍ قدره دروب الطيب ماشيها
يحير الدمع في عينك ولاتقدر على السجات=تذكر سيرة اهل الطيب حاضرها وماضيها
عليك الله يابو سهيل يومٍ تنشر الصفحات=يظلك في ذرى عرشه اله النفس واليها
عليك الله ياللي سيرتك بالجود والطاعات=عسى ربي يجازي راعي الحسنى بحسانيها
صحيح ان الرفيق اللي صدوقٍ صافي النيات=فراقه فجوةٍ ماكل خلق الله تغطيها

وصحيح ان الرفاقه ماتجي بالمال والفزعات=ولاكل النفوس اللي تجي معها تصافيها
وصحيح ان الليالي ماتجي بالكيف والهقوات=ولاتدري عن صروف الليالي ويش خافيها
وصحيح ان القلوب الصافيه من غالي العملات=مثل روس الجبال الشامخه تثبت مباديها

وصحيح ان العمر لو طالت الايام له وقفات=ولايبقى سوى وجهه جميع الخلق يفنيها
عنت كل الوجيه لواحدٍ تخضع له السادات=الاجل جلاله باعثٍ خلقه ومبديها
تعالى الله نخضع له خضوعٍ يكسر الهيبات=الهٍ خافضٍ رافع مسيرها ومجريها
ولايخدعك لو طاب الزمن والكيف والسهرات=ترى الدنيا لها انيابٍ يروع القلب شاضيها
الا وحر كبدي يوم قيل اللي تعزه مات=اجاذب عبرتي واشكي على نفسي واعزيها
ولا تنلام عيني لو تهل الدمع والعبرات=اي والله تبكي عيوني غزير الدمع يشقيها
يقولون الرفيق اكبر عضيدٍ حزة الشدات=ولا يجبر غيابه قاصي العالم ودانيها

وانا لو قلت ابمسح دمعتي وسج لي ساعات=يجي للنفس طاروقٍ يبَّعدها ويدنيها
هواجيسٍ تدك بخاطري واجاذب الونات=تزاحمني على نومي ولا ادري وين اوديها
وانا وشلون عيني تهتني بالنوم والغفوات=الى مني ذكرت ربوعي اللي غاب طاريها
وانا خابرك يالدنيا على ماقيل لك ميلات =ولا يامن حبايلها سوى اللي جاهلٍ فيها
امد حبالي قبالي و هي من خلفي مطوات=يروح العمر والايام تمضي مع لياليها
الى شفت الزمن يضحك تذكر هادم اللذات=على ما قيل ما تصفى ولاتخدعك امانيها
وهي كم فرقت جمعٍ عزيزٍ يعتلي الهامات=عقب هاك القصور العامره تخلا مبانيها
تصير جموعهم عقب المفاخر والسعود اشتات=وهذي سنة الله بين كل الخلق يجريها
ولاينفع اذا جاك القدر فزعه ولانخوات=ولا حتى دموع العين لو تنثر مباكيها
الا يالمرقب اللي نايفٍ بالشرق له طولات =الا ياطول ما تصبر الى هبت ذواريها
تذكر سيرة الماضي ولا تبكي على مافات =رعيت اجيال واجيالٍ على الساقه تراعيها
صبورٍ ما يهزك لا عواصيفٍ ولا موجات=انا مثلك ابصبر وادفن الاحزان واكميها
وابطلب واحدٍ فردٍ صمد لاضاعت الحيلات =عظيم الشان سبحانه جميع الخلق محصيها
الى ضاقت على المخلوق ربك يقضي الحاجات=لطيفٍ يرحم عباده الى ضاقت مواطيها
الا يالله يالمعبود ياللي تسمع الدعوات =الهٍ يعلم الخافي ودار الخلد منشيها
عسى ابوسهيل ينزل في مقام الصدق والجنات=الا يالله يللي تدمح الزله وترفيها
عسى الله يرحمك في ساعةٍ تحتاج للرحمات=مقامك جنة الفردوس تقطف من مجانيها
انا ارثي واحدٍ غالي بنى بالقلب له ساحات =وانا لابدني ميت يجي للنفس راثيها
جعل مزن الحيا باول ليالي الوسم له طشات=يلوح البرق بجلاجل يعل السيل واديها
عسى هاك القبر يسقيه هتافٍ من المزنات =عسى هاك المداهيل الشقر تروى مفاليها
بعد هذا صلاة الله عدد ماهبت النسمات =على محمد نبي الله بعث للناس هاديها

الشاعر : ناصر بن عبدالله السعيد
[/poem]


القصيدة بصوت الشاعر هنا:
http://www.sudeer.com/vb/showthread....71#post1356271

[عنقود]

يا الله !!!!!!!!

لله درك يا شاعرنا الكبييييييييييييييييير
والله يحفظك بحفظه دوما رائع يا أبا عبدالله
شاعر رقيق ومُلهم وصاحب وصول سريع وفعال الى القلوب
أعلم أن شهادتي فيك مجروحة وأنت غني عن شهادتي لكنه الإعجاب اللامحدود بشاعريك ايها المبدع
ناصر السعيد
أشكر يا راعي الأولة
ورحم الله الغالي ناصر الرميح رحمة واسعة ... آمين

[مشاعر إنسان]

صح لسانك

[لهيب الجليد]

عسى ابوسهيل ينزل في مقام الصدق والجنـات ........... الا يالله يــلــلــي تـــدمـــح الـــزلـــه وتـرفـيــهــا
عسى الله يرحمـك فـي ساعـةٍ تحتـاج للرحمـات........... مقامـك جـنـة الـفـردوس تقـطـف مــن مجانيـهـا

الله يغفر له ويرحمه

شكراً أخوي راعي الأوله وللشاعر المبدع ناصر السعيد

[خفوق إنسانة]

الله يرحمه ..
صح لسانه ع المرثيه المعبره ,, وتسلم إستاذي الكريم ع النقل ..
بإنتظار روائع إختيارك القادمه ...

[ابو ريما]

صح لسانك

[سعود الخليل]

يعطيكم العافيه ومشكورين على تواصلكم ..

[نهآية حلم]

الله يرحمه ويغفرله وجميع موتي المسلمين

[سعود الخليل]

وسام البراءة ..

حياك الله وشكراً لك ولمرورك الكريم ..

[أبو حمـد]

قصيدة رثاء مفجوع ،، أبكتني ولم أقرأ مثلها ،،

رحم الله الشيخ ناصر بن محمد بن عبدالله الرميح وغفر له ،، وتغمده في واسع جناته وجميع المسلمين ،، وأسأل الله أن يلهم أهله وذويه ومحبيه الصبر والسلوان ،، وأن يرزقهم الثبات وحسن اليقين ،،

وجزاك الله خير أخوي الشاعر ناصر بن عبدالله السعيد ،، وأحسن الله عزائكم في الشيخ ناصر ،، ووالله أنها لقصيدة كُتبت من قلبٍ محروق على فقد رفيقه الذي أحبه ،، وأسأل الله أن يلهمك الصبر والسلوان ،، وأن يجبرْ مصاب المسلمين في كل مكان في فقْد أحبابهم و يثبّتهم ،، وإنا لله وإنا إليه راجعون ،،

شكراً لك أخوي أبو عبدالعزيز ،،

[عابررسبيل]

رحم الله أبو سهيل واسكنه فسيح جناته

[أبو شايع]

قصيدة رائعة .. بروعة الشاعر ..
حق لك من قرأها أن تذرف دموعة ..
قوة في أبياتها ونظمها ..
رائعة في معانيها ..
في كل بيت منها ( ألف حكمة وحكمة )
لقد خرجت هذه الأبيات من نياط القلب .. وحشرجات الصدر ..
لأن الخبر مفجع .. والمفقود غالي ..
هذه الأبيات بقوتها أغلى وأعظم تعزية لأهل الميت .. لا حرمك الله الأجر


الاستاذ / ناصر السعيد .... لله درك .. وعظّم الله أجرك ..

شكرأ لك أخي راعي الأولة

[عبدالله القبيلي]

بسم الله الرحمن الرحيم
السلام عليكم ورحمة الله وبركاته
مشكوووووور والله يعطيك الف عافيه

[سعود الخليل]

عابر سبيل

ابو شايع

عبدالله القبيلي


حياكم الله ومشكورين على تواصلكم ....