على صوت الــ غ ـــرام اللي سكت لحظه التوديع
على درب الفراق ودمعة المــ ح ـــروم وآهاته
جلست أجمع فرح عــمر وسنين مالها تجميع
وأقول الله على غــالي تبي تبعد مسافاته
أنا كيف أتركه يرحــل وأهيم برحلة التلويع
وكيف أترك وليف لي وأرضى في نهاياته
وأنا ماظن لي قلب على هم الفراق يطيع
وأنا ماظن به قلب يعيش بدون نبضاته
أروح أعاتبه ؟ وألا أعــيش بواقع الترويع
وأنا وشلون أعــاتب والعيون تشوف دمعاته
أنا أشهد لحظه الفرقى بها كل العلوم تضيع
يتوه الهرج في حلقي ونوب تموت كلماته
ترافق ضيعة علومي دموع مابها ترجيع
معاها حرقة تصرخ تدك الصمت وسكاته
تعال أطلق عنان الدمع مدام بدمعنا تمتيع
مدام الوقت ظالمنا فلا تغريك ضحكاته
هموم جالت بصدري تقطع بالأمل تقطيع
وأنا هالوقت يصدمني تضيعني متاهاته
أمل قربي مع إنسان تربع بالحشا تربيع
بعد هذا كيف الرجل تمشي في نهاياته
ترى هالخوف والريبه حشا ماهي للتوديع
أخاف أن غادر الغالي تسوق الرجل خطواته