[poem=font="Simplified Arabic,5,black,bold,normal" bkcolor="transparent" bkimage="" border="none,4,gray" type=1 line=1 align=center use=ex num="0,black""]
السلام عليكم ورحمة الله وبركاته..
بلامقدمات .. فمتواضعتي تحكي عن نفسها ..
سمعت البارحه علمٍ يضيق الصدر باسبابه = وانا سالي وداله والحزن والهم مالي به
اعرف الله ومتمسك بديني وارجي ثْوابه =ومن يعفو عن اخطائي ابدعي يالله تثيبه
تكدر صفو بالي والزمان مكشر انيابه=وليل البارحه ماطاع يسري .. وين ابسري به؟
تناقله الاذاعه والقنوات اتّوصى به = احد زاده واحد نقّص واحد يهذي ويهذي به
وحنا مانثبت علم لينه حضرة اجْنابه= يصرح في التلفزون السعودي عقب ندري به
ملكنا خادم البيتين يمر بعارض أصابه!! = هذا حال الزمان اللي تدوربنا دواليبه
بكل وضوح ماخبى على شعبه وش أعيابه= يقول بخير شوفوني .. عن الشك وعن الريبه
لكن..عرق النسا من وين جاني شالذي جابه!؟= وانا آخبر النسا مامنهم الا الخير والطيبه
وانا ودي اقوم لضيف قصري واتحفى به ! = لكن هذا حكم ربي وانا مومن وراضي به
خطاك السو ..وان تعب الأسد تتعب له الغابه = ولا يحكم ثراها غير اسد ..مايحكمه ذيبه
يابومتعب جناب العز يزهابك وتزهابه= ملك مثلك يحق لنا نفاخر به.. نماري به
صفاتك لو باعددها يابو متعب وش ابدابه ؟!=اقول الطيب والا العطف والا العـز والهيبـه!!
بعضها لو يعدده الذهين .. ينوخ ركابه = اجل وشلون باقيها .. وانا وش عاد باجيبه!
سماحة وجه .. طيبة نفس .. وحب الله وكتابـه=وأسمى وصف لك خدمة حرم مكه .. حرم طيبه
طهور ومايجيك الشر يابوي وخذنـي عصابـه=عصابة راس ياجعلي فدى هالـراس والشيبـه
نحبك ونعرف بانك تحـب الشعـب وادرى بـه=لو ان بعض الوجيه السود تزرع شر ومصيبـه
عساهـم فـي قلايـع وادريـن وحـدر دبابـه=ومن يزرع سواد الوجه يجنـي عقبـه الخيبـه
خذوا منا مفاتيـح الوطـن وانفتحـت ابوابـه=يبون الشعـب يغفـى بيـن تغريبـه وتغريبـه
وش بترجي من نفوسٍ ..تغذت .. سرق ونهابه= يبون الغرب يحكمهم .. بااسالبيه ..والاعيبه!
يابومتعب .. معك شعبٍ يشوف الموت ماهابه= تحت امرك ورهن اشارتك .. والكايد يجيبه
تبينا سلم.. سالمنا ..تبينا حرب وطْلابه = (معاً ضد الفساد ) وكل نابح نقطع ذنيبه
وطن مانحمي ترابه ..حرام نعيش بترابه = ولا نْكدر مشاريبه .. وننهل من مشاريبه
طلبت الله .. ومن غير الله المعبود .. نلجا به = الهي وانت جاهي طالبك تشفيه وتجيبه
لنا سالم .. ومتعافي وأجر ماجاه وآصابه= عسى عرق النسا يبلى خبيث النفس ويصيبه
يابومتعب ..متى ترجع .. وطنك اسمرّت ثيابه = متى بنغني لشوفك: هلا يامطول الغيبه
[/poem]