سبع وخمس سنين ياهي مريره*1 ...مابين خسف صاب دنياي وكسوف
يوم أنطفت شمس الجزيرة ظهيره ...وعني رحل فيصل وجت عجة ظروف
صارت حياتي لكل الأهات ديره ...وكنت الحزن كله تعابير وحروف
ودعت أبوي ولابقالي قلب غيره ...الا خفوق كنت به دوم محفوف
حضن الأمان اللي وهبني ضميره ...واللي سقاني كل طهر ومعروف
وأصدق شعورلفني في حريره ...وأحن صدر ضمني وأعـــــــــــذب وصوف
أمي ,بكل الأوصاف توصف كبيره...ومن غيرها يقدر يبرد على الجــــــوف
بنت السمو اللي زهت به مســــيره ... وأم الجريح اللي من العمر محــــذوف
سبت فجعني والمناياشطيــــــره ... وحتوف لاحل القدر طاحت سيوف
سبت لحق سبت وتاهت بصيره ...ورجعت أون ,وعود الوجه مخطوف
اصيح وأشهق والسعيره سعيره ... ويارب صبرني ...يارب ملهوف
فقدتها يارب هدي السريره ... ماابتل ريقي,وينها؟ وياضما روف
كن القمر من عقبهامات طيره ...وتوشح ثياب الكدر واقبل خسوف
عزا ...وعزتني صفوف كثيره ...ومافهيم اللي رد صبح لمكفوف!
ماعادت ديارالسهاري منيره ...ظلما هنا وهناك .والباقي طيوف
وذكرى تزلزلني ,ودمعه غزيره...وطفل يتيم هده البعد والخوف
مكسورولاتنفع بكسره جبيره ...مقهور ,مابيده ولاشئ,مكتــــــــوف
لبست ثياب أحرام عمره اخيره*2...وصار الكفن في عرش رب السمايطوف
ربي يتقبل نــــــــــــــيتك يالفقيره ... وحنا برجوا خالق العالم ضعوف
يمه:صمت, وموجعــات عسيره ...وضيقه وراضيقه,وهم,وعاصـوف
يمه:وداع ,وخيرة الله خــــــــيره ...وفي ذمة الله كلنا بـأرضه ضيوف
أقول وش أقول :راحت (منيره)...يعني فقدت النبض والسمع والشوف
مشاعر ابنك الداعي لك بالرحمة طول العمر
نواف بن فيصل بن فهد بن عبدالعزيز
أيضاح بعض الأبيات
*1سبع وخمس سنين :منذ وفاة الأميرفيصل بن فهد من 12 عام رحمه الله
*2 كانت رحمها الله متجهه للعمرة لبيت الله الحرام قبل دخولها المستشفى أسكنهاالله فسيح جناته
000000000000
يعلم الله ان دموعي نزلت بحرقه وانا اقراها ظهر اليوم