11-01-2012, 08:32 AM | #1 | |||||||||
المشرف العام
|
يكون في علمكم يااخواني ترى انتم تفثونا موبس احنا نغثكم
كان ياماكان بذا الايام واحدن اسمه مطاول قاعد يهايط على اصدقائه ويقول انه حزين عشان اهله ينشبون له ويوديهم السوق وغير تسذا ينقد على اللي تروح مع سواق لو انه بمحرم ويعيي بعد على الليموزين خايفن يخطفون اهله ويعيش وحيد بدون اهلن يطبخون له ابي اعرف شلون بيتقضون اهلك ..؟ ومن بيوديهم دامك ماتوديهم الا بطلعه الروح .. الكلام مامنه فايده معه .. بخش بموضوعي على طول ازين لي .. اخوي الأهبل صقعان ليش كل ماطرت عليك ماتجي يمي وتقول ياوخيتي وش بتس ضايقن صدريتس ورى ماتضفين كشتس وقوه امشيتس ليش والا الحرمه مالها الا بيتها تحرسه عشان مايجون الحراميه يسرقونه .. وشوله مطلعن سياره هاه عشان تضف مهبل خلق الله وتوزع كل واحد في بيته .. هذي امي الله يصلحها كل ماقلت لها يماااه وش رايتس نسافر للسينغال من زمان عن خالتي فطوم قالت هاوو منتيب صاحيه ونخلي بيتنا كن هالبيت فيه كنز الله واتسبرمافيه في الحوش الا غاز فاضي وزوليه متقطعه ومتفته من الشمس وعلك معجون ومثبت في الجدار وناشب فيه طرفوش صغير .. وش بيسرق هالحرامي ماعنده ولاشي يسرقه .. بس يتعذرون بكلش ولين نشبت زود قالت من بيودينا اخوتس بيروح مع اخوياه الله يحفظه خليه يوسع صدره كنه مايطلع ولا يجي ولايروح --> بتنظله .. وحنا يالبنات اللي ننلطع في البيت ونخيس لين يجينا ولد الحلال اللي يضفنا بشقه ويصك عليتس ويروح للاستراحه مع اخوياه جعل هالاستراحات تعدم .. -> عنسي بس ! والله لولا الله ثم هالدوام اللي يخلي الابيض اسود والاسود يزيد سوادا مع هالشموس تسان ماشفت الشمس تصدقون اني بالاجازه احيانا اقعد بالشهر ماشوف الشمس ابد --> مشرطنين طيقهم عقب حرب الخليج ! يعني هالدوام يخليني اشوف الناس واسولف واغير عن جو البيت المخيس نوم نت قهوه مغرب عشا نوم وعلى هالحاله لين تنتفخين نهايه الاجازه ولحد ينصك سحاب تنورتس الا لين تربطينه بحبل وتخلين امتس تجره على فوق عشان ينصك وان مانصك فهذي مشكلتس .. يعني الله يصلحه اخوي من يجي من الدوام لين الليل وهو طاس عند ربعه الله لايكثرهم ولين دقيت عليه وقلت له صقعان تعالي ودني السوق والا اي مشوار ابيه ضروري قال من قال لتس ماتقولين لي من اول قولي لي قبل بيوم الله واكبر يالمهم وش عنده الوزير على غفله تلايط بس بتجي توديني والا دقيت على ابو هنود يجي يوديني عاد هو نقطه ضعفه السواويق ينهبل ويجيتس طاير --> تسلبه ! عاد نجي لهلي اللي مايواطنون شي اسمه روحه وجيه حتى لدرجه انهم لاطلعوا اربعا وخميس وجمعه يتكسرون كنهم جايين من بر وامي تمد رجولها وتقول ايييييه يازين بويتي بس الله لايخلينا منه .. عاد اختي تقول ميد امي يمه انتي تحبين بيتس بس موب غصب حنا بعد نحبه الشعور موب متبادل بينا لازم كل واحد يروح مع الجنب اللي يرحيه .. قالت امي كلمتها المعتاده عند رجلتس ان شاء الله قالت وان جا رجلي موب صويحي قالت عادي ارضي بالقسمه والنصيب .. حتى بالسفر عندهم عقد من الطلعات مره رحنا لمكه مع بنات خالتي المهبل طبعا نظامنا في مكه ماعلينا من الحريم كلن يطلع على كيفه ازين شي مافيه احد يحكمتس .. المهم ان نظامنا مشى الحريم يطلعون اوقات وحنا اوقات طبعا جا يوم من الايام جو خالتي وامي قالوا مادريتو شفنا وحده مخطوفه وتصارخ ولحد يمها ذي اول فقشه .. جت خالتي تقول والله اني شايفتن بنيه كبركم ابد اهم شي كبرنا تمشي ومع وخيتها توها بتشتري من البساطه تلفت مالقت اختها وينها وينها ضاعت شكلها مخطوفه طبعا كل سواليف الرعب ذي اللي تروعتس نصب بس عشان مانطلع طبعا حنا مااثر فينا قمت انا وشفت خشتي بالمرايه واتمقل فيها والتفت عليهم واقول ذي خشه بالله تنخطف والله هالحرامي اللي ناوي يخطفني من بيشم ريحتي الا وهو حاطن رجوله روقونا تكفون .. اذكر وحده تسولف لي تقول رحنا الشرقيه المهم اهلها من النوع المتشددين مره مره مره حتى البحر مايشمونه .. المهم تقول نشبنا لين طلعونا البحر ويوم طلعنا طبعا كالعاده حجروا لنا بالسيارات من كل جهه مافيه ولانفس ... تقول لي عاد جا اخوي يصارخ من بعيد ومير نطل نلقاه يلاغي بنات واقفين على البحر مغطسين رجولهم قلت وش عنده الاخو يمون اثاريه مشبهه علينا يحسبهم حنا ناويين نهج .. والله الحقنه بعد .. شوفوا انا مااقول اني اصير حره طليقه اروح واجي واطلع لا احم ولا دتسور بالبيت بس يعني طلعونا شممونا هواء امنيتي اروح السوق يوم ما اركض دايم ادخل وانا اركض عشان اسباب مثل خشه اخوي .. يعني بعض المجتمعات الله يهديهم فري بزود تطلع مع السواق وتعزم صديقاتها على موتسا بارد ويطلعون ويروحون يتعشون في مطعم والله ياان بنات السعوديه لين تمدنوا ماينبغون .. ماجو علي لين ركبت السياره ماغير طايره عيوني اخوي يقول خلي عيونتس يمين ويقول ميد اختي صقعه خلي عينتس يسار ليش طيب عشان تشوفون لنا مطعم رز نشتريه ونتعشى عليه وش تبون بس بارد .. انا ابي ببسي ماسمع الا امي تصارخ من طريت الببسي وشو وش السالفه قالت والله مايطب فمتس وتلفت على اخوي والله ان جبته لكبه في مغاسل المجلس مير مسدوده خليه يفجرها .. وش الحل معكم يعني يااخواني الموقرين .. لازم يصير الاخو قريب من اخته يلبي لها طلباتها يشوف وش تحس فيه وهي تستشور كشتها .. ثاني شي لازم بعد يصير الاخو موب رسمي مع اخته كنها واحد من الموظفين اعرف لكم واحد تسذا مع خواته رسمي لو يبون اي شي يقولون ميد امهم عشان تقول له ولو قالوا له لبى لهم طلباتهم المهمه بس وغيره يقول وشوله .. لكم حريه المناقشه في هالموضوع المخلط .. ملاااااااااااااااااحظة مهمة جداً.. اتمنى مااحد يقرأ ويطلع لو بأيقونة تردين ترى انا اكتب واتعب وربي بس عشان اخلي البسمة ع شفايفكن فأتمنى تقدرون هالشي |
|||||||||
11-01-2012, 11:28 PM | #2 | |||||||||
عضو نشيط جداً
|
رد: يكون في علمكم يااخواني ترى انتم تفثونا موبس احنا نغثكم
صااادقه والله صاادقه |
|||||||||
12-01-2012, 12:56 PM | #3 | |||||||||
المشرف العام
|
رد: يكون في علمكم يااخواني ترى انتم تفثونا موبس احنا نغثكم
نبضها نادر
اهلا وسهلا بك وبمرورك وتعليقك الرائع اشكرك على ذالك بارك الله فيك وجزاك كل خير |
|||||||||
12-01-2012, 09:27 PM | #4 | |||||||||
عضو رائع
|
رد: يكون في علمكم يااخواني ترى انتم تفثونا موبس احنا نغثكم
ايييييه يختي نعيف وانا نحكي .. |
|||||||||
12-01-2012, 10:34 PM | #5 | |||||||||
المشرف العام
|
رد: يكون في علمكم يااخواني ترى انتم تفثونا موبس احنا نغثكم
غاليتي وفاء قلم
كل الي قلتيه يحدث في اغلب البيت السعودي وبعض البنات اذا تزوجت مايحجبها الا ولدها الله يصلح من فيه خير لاهله شكرا لك غاليتي على مرورك وتعليقك الرائع سلمت وسلمت اناملك |
|||||||||
مواقع النشر (المفضلة) |
|
|