قصه قديمه

[بنت الاصول]

قصة صديقين يرويها احدهم فيقول

أنا وناصر قاعدين بالصّفِّه والشمس منطالع حروره ..بدا ناصر يحوقص يسار ويمين ويشيل الطاقية ويرجعه كان متغلدمن من الحر ..قلتله نروح نسبح ببركة خالي ونتحالت بالشبا ؟
.التفت علي وقال : السيكل حقي خربان وتسان تبي نروح بسيكلك أنا اللي أسوق وأنت الرديف .بغيت أكمخه مع دميجتوه .. قلت وش خايفن منه ؟

المهم اتفقنا على انه يسوق نص الطريق ويردفن وأسوق أنا النص الثاني وأردفه

قال أجل قووه

نزلنا من الصّفِّه و رحنا للسيكل .. لقينا الكفر القدّامي منسم ..لا حول من وين نجيب طرنبة هواء ؟! :dbash;

قال ناصر خابرن عند قرنبع طرنبة .. تبينا نروحله ؟
رديت .. قلت قرنبع تعرف وش هو ..ولو رحناله حوم اتسبدنا من طمالته .. نسيت يوم يدود بنا يوم تروح تبي تشري منه الطزق

قال اي والله البحلة ..أجل وش السوات ؟

قلت خابرن به بنشري قريبن من هنا وش رايك نروحل لموه ؟
نروح ليش ما نروح

تناوبنا مسك السيكل لمين وصلنا البنشري .. بس لقيناه صاك :dffd;.

أبن " ........." ما عمري مريت من عنده الا وهو فاتح ويوم بغيناه لقيناه صاك بنشره !!

اقترحت على ناصر اننا نروح رجليه
ناظرن وناظرن ورد : بس بشرط نمر على الفلايح ونسرق رمان ونفرط من السكري والبرحي

مشينا رجليه .. وما كنا لابسين نعال .. والرمضاء ذبحتنا .. وقفنا عند مسيد بجنبه زير شربنا لين تغرنا مع إن بوه علق .. بس ناصر ما يترك نجاسته .. يوم قضى شارب تسثح باقي الماء بوجهي وهج

قلت بيني وبين نفسي خلنا ناصل البرتسة ويصير خير .لأني خابرن ناصر دمار بالسباحة .. حده ساس جدار البرتسه يتشعمط بوه

وصلنا مزرعة السماثا .. وما دريت الا ويطلع ناصر نباطته ;nba6 .. وشبك ؟
إص .. إص .. شف هالتسحالي .. غدين أصيده ..

حط ناصر حصاة مدوّرة بقبة النباطة .. وغمض عين وفتح الثانية .. ومغط السيور .. ودب ولاه بالأرض .. بدا ناصر يناقز من الفرحة .. أخذ التسحالي ونتف الريش .. وشب ضو وبدا يشلهبوه

غثيتن تراك يا ناصر .. ترانا ماحناب واصلين البرتسة الا حول مسيان .. التفت علي وقال تلايط بس لا أفقش رأسك بالنباطة ;nba6 .. قلت هيّن يصير خير :dfd2:

لفلفنا التسحالي .. ومرينا على شجرة ترنج وأخذنالنا كم ترنجِه .. وعلى شجرة رمان ومكعنا كم رمانة ..

مشينا بين الفلايح وناصر ما غير ماسكن نباطته وينبط العصافير وأم سويد ..وما درينا الا واحدن بساقتنا يطامر معه جذمار يوحش يبي يدبغنا ;shi6any:

أثر ناصر ينبط وطيح التمر فوق رأس اللي يروس بالحايط

لحط ناصر :dfd2: على ظهره وما سمعت الا اععععععععع ععععع .. والغبرة ورانا ..

بدا المطامر للتسلالي والتزلق بالمديان لين لهثنا و قلنا واووووووك ;dmo3: ..

التفت على ناصر وقلت ما تبي الحين الحطك لما تتوب .. ذبحتنا تراك .. تنبيط وتفريط كل ما شفت نخله وفوقه عصفور نبطته ؟

وصلنا فلاحة خالي ..

يوم وصلناه لقينا خالي مطفي المكينه والبرتسه فاضية .. كان الوقت حروة مسيان .. ومالنا الا الرجعه ..

ان رجعنا يبي يلحق علينا الظلام .. وهذا يعني اننا نبي نمر مع المتسان اللي به التسلابه المغلوثه اللي يوحشنا به ولد عمي الحمدي .. وحنا مامن قلوب ..كل واحدن أذرق من الثاني .. ;as:

وش السوات ؟ :dffd;.

فكرنا همن قررنا ننام عند خالي .. بس شلون نعلّم أهلنا ؟! اي والله البلشة !
ذاكالحين ما كان به تلفونات وما هنا الا دسسن ولد خالي ..قلت لناصر هقوك يرجعنا للحارة ؟ :dffd;.

قال خن نجرب :dfd: .

دخلت بيت خالي وتنحنحت وقلت : يا ولد ;y7oly:
ردت علي مرت خالي مزنة وقالت من أنت ؟
قلت خالي بوه ؟
قالت لا . ;fjfre:
قلت الدحمي بوه ؟
قالت : ما بعد جاء من الحصاد !

التفت على ناصر وبغيت أكمخه

الحين وش السوات ؟

ان احترينا ولد خالي صيفنا على أهلنا .. وان تشجعنا ورجعنا لحالنا نبي نصير لقمه للتسلاب المغلوثه ..

أذن المغرب .. وتلاه العشاء .. وحنا نحتري ولد خالي .. وما جاء الا عقب الصلاة .. وهذا حده بالعادة .. يتعشى وينام

شافنا وسلّم .. وسألن منهو هالشيفه ذا - يعني ناصر- قلت ذا رفيقي ناصر ساكنن بالبيت اللي عقب بيتنا .. قال وش جابكم اليوم ؟ قصيناله القصة ويوم قضينا مات من الضحك وقال قوموا أوديكم ;sea:

دسسن ولد خالي بابين .. قلت لناصر اركب أنت وخلك حول القير .. ناظرن بضيق وركب وهو ساكت :dffd;.

ولد خالي جلف وجثه والظاهر إنه يبطي مايتسبح وناصر منحشر وخشمه لاصق بباط ولد خالي ماصدق إننا ناصل :dffd;.

وصلنا الحارة .. ويوم نزلنا قلت لناصر لعاد أشوف رقعة وجهك .. ومن ذيك اللحزة وحنا متزاعلين ولا تصاحبنا الا يوم تشاوفنا بالجامعه عقب 12 سنه

[صياد دمشق]

قصة فكاهية ومضحكة مع اني لم افهم بعض الكلمات لكن اضحك الله سنكِ وجزاكِ الله كل الخير والله يعطيكِ العافية

[بنت الاصول]

المشاركة الأصلية كتبت بواسطة صياد دمشق   قصة فكاهية ومضحكة مع اني لم افهم بعض الكلمات لكن اضحك الله سنكِ وجزاكِ الله كل الخير والله يعطيكِ العافية

هههههههاي

فعلا فيه بعض الكلمات مافهمتها انا
شكرا لك اخي صياد على المرور والتعليق الرائع

جزاك الله كل خير

[نور الأصايل]

قصة ممتعة
واضحة اللهجة القصيمية
لكن بعض الكلمات غير مفهومة للبعض
وهذا أخونا العزيز أبو هاني
مثل
الصفة ، يحوقص، متغلدم ،رديف ، كمخة ، دمجة ، قرنبع ، البحلة، صاك، الرمضا،
علق ، تسثح ، هج ، برتسة , يتشعمط ، السماثا ،التسحالي ،يناقز ، نتف
غثيتن ، مسيان، أفقش ، مكعنا ،لهثنا ، مطفي ، أكمخه .. الــخ
ياليت من يتعرف على معنى بعض الكلمات أن يساعدنا في تفسيرها

شكرا مشرفتنا على الطرح

[بنت الاصول]

المشاركة الأصلية كتبت بواسطة نور الأصايل   قصة ممتعة واضحة اللهجة القصيمية لكن بعض الكلمات غير مفهومة للبعض وهذا أخونا العزيز أبو هاني مثل الصفة ، يحوقص، متغلدم ،رديف ، كمخة ، دمجة ، قرنبع ، البحلة، صاك، الرمضا، علق ، تسثح ، هج ، برتسة , يتشعمط ، السماثا ،التسحالي ،يناقز ، نتف غثيتن ، مسيان، أفقش ، مكعنا ،لهثنا ، مطفي ، أكمخه .. الــخ ياليت من يتعرف على معنى بعض الكلمات أن يساعدنا في تفسيرها شكرا مشرفتنا على الطرح

بعد البحث والتحري عن هذه المفردات حصلت على بعضها

الصفة === المجلس
، يحوقص=== يدور حول الشيئ ليتقرب منه
، متغلدم === زعلان
،رديف ===الراكب خلف من يقود السيكل او الماشيه
، كمخة===خبل
، دمجة ،=== الراس
قرنبع ،=== خربانه
البحله===البلشه
صاك،===مفلق
الرمضا،=== حرارة الرمل
علق === الطحالب
، تسثح === رمى الماء على وجهه

، هج ،=== هرب
برتسة ====بركه
, يتشعمط ==== يتسلق
، السماثا ===اسم اصحاب المزرعة
،التسحالي=== ذكر العصافير ابو لحيه
،يناقز ،===يطامر
نتف=== اخذ
غثيتن = == بلشه
، مسيان=== قبل غروب الشمس
، أفقش === اكسر
، مكعنا === قطفنا
،لهثنا ،==== مات من الطش
مطفي ==== مسكر النور
، أكمخه .. ===اضربه

ارجو انني افدتكم اخي الكريم نور

شكرا لك ولمرورك مشرفنا الكريم نور

باررك الله فيك وجزاك كل خير

[نور الأصايل]

حياك مشرفتنا الفاضلة بنت الأصول
انت ذكرت أن معنى الصفّه المجلس
اسمحي لي أن الإجابة خاطئة

في البيوت القديمه عاده ما يكون للبيت دورين الدور الاول هو مكان توضع فيه بعض الحيوانات الكبيره من ابل او بقر او حمير..ويوجد فيه بعض الغرف تسمى الصفاف وهذه الغرف تستعمل لخزن الاعشاب التي جلبت من البر واللتي تخزن لتقتات منها الحيوانات اثناء تواجدها بالمنزل ويخزن فيها ايضا ما يتبقى بعد موسم الحصاد من تبن وهو عيدان القمح وما يتبقى ايضا من سيقان الدخن والذره وغيرها من الحاجات الخاصه للزراعه وغيرها..والصفه يكون لها باب خشب كبير وقوي وعاده ما تكون الصفه كبيره وفي وسطها عامود يحمل السقف يسمى ساريه..اي ان الصفاف عباره عن مستودعات لبعض اللوازم اللتي تخص الفلاح
وكانت هذه الصفاف كما تسمى معروفة في الروضة القديمة
كما تم شرحها آنفا

بالنسبة للأسم السماثا فكانت نكتة على عائلة غربية تسمى عائلة [ سميث]
ومن باب النكتة يسمونهم [ السماثا]

شكرا لك مشرفتنا
هذا ما أحببت أن أوضحه
فعلا هذا الموضوع دسم ويحتاج أن يستفيد منه القارىء
ليتعرف على بعض الكلمات التي كانت دارجة بين اللهجات
آن ذاك.

[بنت الاصول]

اخي الكريم انا اعرف على حسب كلام والدتي ان الصفة مثل ماقلت فعلا بس هاذي عندنا في سدير


اما ماعرفته من وحده قصيميه من عنيزه تقول ان الصفه هي المجلس او الغرفه والله اعلم


شكرا لك احي الكريم على التوضيح الرائع

بارك الله فيك وجزاك كل خير

[نور الأصايل]

المشاركة الأصلية كتبت بواسطة بنت الاصول   اخي الكريم انا اعرف على حسب كلام والدتي ان الصفة مثل ماقلت فعلا بس هاذي عندنا في سدير اما ماعرفته من وحده قصيميه من عنيزه تقول ان الصفه هي المجلس او الغرفه والله اعلم شكرا لك احي الكريم على التوضيح الرائع بارك الله فيك وجزاك كل خير

أكيد
يمكن يختلف المعنى حيث اختلاف اللهجات
والمسميات بين مناطق المملكة
وكلامك صحيح
والقصة أصلا من القصيم هذا ما أستوضحته من اللهجة
شكرا لتعقيبك وتفهمك
وجزاك الله كل خير

[بنت الاصول]

العفو اخي الكريم
وشكرا لك