مما راق لي من الشعر

[بنت الاصول]

يقول من صابه من الامر حيره
دنيا كفا الله شرها شفتها غير

اونس بقلبي مثل نار السعيره
وبرفع على ماشافت العين تقرير

بالعين شفته شاع في كل ديره
وصار الذي هيض علينا التفاكير

من قل ماله حاربوه العشيره
ماعاد له بين الاصحاب تقدير

الناس تنظرله بعينٍ حقيره
محدٍ يطيعه لو تكلم عن الخير

ومن زاد ماله صار كلن نصيره
كلن رفيقه دام عنده دنانير

مادام عنده مال كلن يديره
كلن يصدق له ولو قال تزوير

وين الرفيق اللي قليلن نظيره
وين الرفيق اللي صفالي مع السير

احب شخص خوته من ضميره
ما صادقن عشان يقضي مشاوير

والثانيه كيف القصير وقصيره
الكل منهم شايفن منه تقصير

رسولنا خلٌف لنا خير سيره
وصى على الجيران والقول تحذير

لابد نتبع سيرته مع مسيره
الجار منا مايشوف التكادير

والثالثه هرج القفا والذكيره
لا تذكر الغياب ياكود بالخير

مجالسن للهرج سوت حضيره
ماهمهم بالناس كود المعايير

ناسٍ على نقل النمايم امغيره
شقلاتها تسطر للهرج تسطير

كم فرقو بين العشير وعشيره
وحطوا بناس اعيوب لو هم مساتير

والرابعه بالضيف قل اتعبيره
ماعادله هالوقت ياناس تقدير

كانت لنا عادات فيها شهيره
عقب العوايد قل قدر المسايير

واليوم كل الناس تفهم خبيره
لا شك ان ودي ازود بتنوير

هاذي مشاكل قلتها من كثيره
حولتها للناس والشعر تعبير

مشاكلن ياناس فينا كثيره
وهذا ترى واجب كل الشواعير

اصيح وانخى كل من فيه غيره
ينصح على مشي النشامى المناعير

يحث ربعه لا يرقد ضميره
ينصح تراها ماتفيد المعاذير

عاداتنا راحت ولا هي بخيره
سلم الاجانب لا تقولون تطوير

وصلو عاى المختا ر نور الجزيره
صلاة ربي عد مارفرف الطير


بدر الحويفي

[بقايا الذكريات]

صح لسان الشاعر وصحت يمينك بنت الاصول

ابيات جد رائعه وراقت لي ايضا

[بنت الاصول]

المشاركة الأصلية كتبت بواسطة بقايا الذكريات   صح لسان الشاعر وصحت يمينك بنت الاصول ابيات جد رائعه وراقت لي ايضا

ويمينك يالغاليه

روعة مرورك يالغاليه زادت متصفحي روعة وجمالا

شكرا لك من القلب وجزاك المولى كل خير