انا عزيمتي احلى

[فقيدة امها]

انا عزيمتي احلى


مثل ماهو مكتوب في الموضوع ( انا عزيمتي احلى )
في الآونه الاخيره الناس صاروا مايطلعون
ولا يجتمعون مع بعض كلهم مسكرين على انفسهم
بهالبيوت بين اربع جدران .. والسبب ؟؟؟
الحين راح نعرف


للأسف راحت أيام البساطه والجمعه
على قهوه وتمر وشاهي وكيك او نوع واحد حلى
واذا ماجتهدتي وتكلفتي في عزيمتك
طلعتي بخيله أو مو مقبوله عندهم
وينفشون راسهم على اساس هم المتميزات
الخطيرات .. اللي يعرفون كل شيئ

لما تفكرون بالعزيمه شوي ترا الهدف منها
الجمعه والسواليف اللي توسع الصدر
مو المغاير والمكايد والتنافس
يعني الناس مو ميتين جوع أو مايعرفون شي
او ماعمرهم شافوا شيء
لكن للأسف راح زمن أول
زمن البساطه والولفه والمحبه
من اول تدق الجاره ع الجاره وتجي بنفس اليوم
بدون ماتكلف على جارتها

والحين جاراتي وصديقاتي مايعلمون ع العزيمه
الا قبلها بأسبوع عشان يبدا الاجتهاد
والتكلف والمبالغه وعزميتي أنا احلى !
للأسف صار استقبال الناس صعب جدا في بيتك بهالزمن
لازم تسوين خرابيط كثيره
طبعا الناس طايحين اول ماتدخلين عصير معه حلى
او كابتشينو بعدين قهوه ومعها مية الف نوع
حلى وحلويات بعدين شاهي مع معجنات
ومقالي من كبه وسمبوسه و ..... الخ

بعدها عشا بوفيه مبالغ فيه من جميع الأصناف
طبعا غير التفنن في اشكال الصحون والمواعين والأكواب
يعني هالعزيمه كلها خساير في خساير
وبعدها الحرمه تسكر بيتها ولا فيه اجتماع الا بعد سنه

واللي اشوفه الحين جاراتي كل وحده قطعت العلاقه
او هربت عن طريق غير مباشر وسكرت على نفسها
وعيالها في البيت عشان ماتعزم احد
وتتكلف ولا احد يعزمها

بالنسبه لي كنت اسوي نوع حلى واحد مع القهوه
وخفايف بسيطه مع الشاهي
بس بطلت غصب عني لأني مجبره أجاري حريم المجتمع
ولا بيقولون عني بخيله وانا هدفي كله
عشان ماأسد انفسهم ع العشا وياكلون

وطبعا بعد ماتكلفت واجتهدت زيهم صرت معد اعزم احد
الا بالسنه حسنه وهم برضو كذلك
والعلاقه صارت شبه منقطعه
بعد ماكنا على قلوب وحده ونضحك ونسولف
ونغير جو للأسف

اما الرجال ماشاء الله علاقتهم مستمره
ومافيها رسميات وماعندهم شي اسمه ( انا عزيمتي احلى )
او مبالغات .. وموسعين صدورهم ويجتمعون
على دجاجه ورز بخاري او شاورما وبروستد وهم مبسوطين
الله يعين الحريم على انفسهم في الدنيا والاخره

مجرد فضفضه وحنين للماضي هذا الواقع ع الجرح انكتب

ليت الزمان يعود يوما

موضوع مهم جداً حبيت انقله لكم

[بنت الاصول]

ماقصرتي حبيبتي فقيدة موضوعك في قمة الروعة



فاللمّة في القديم كانت لأجل ( اللمّة ) نفسها

واللمّة في عصرنا الآن لأجل التباهي لا غير

واليكي هذا التلخيص لما أتا به موضوعك ياغالية

قديما بعد أن تعود المرأة من زيارة جاراتها أو صديقاتها
تبدأ في سرد السوالف والقصص التي جمعتهن من أخبار ونكات وكلام يشرح الخاطر

واليوم ما إن تعود المعزومة لبيتها أو تلتقي قريباتها
إلا وتبدأ في وصف الطعام والأثاث والبيت كاملا
وكأنها كانت ذاهبة للتحقيق وجمع أدلة الإدانة
فلا تترك كبيرة ولا صغيرة إلا وترصدها بمجهرها الخاص ( البصر والتخزين الدقيق في الذاكرة )
تلك الذاكرة التي لا تذكر أن الزيارة فيها الأجر والثواب وليس لجمع السيئات

ربما العقول تغيرت , وأيضا ساهم في ذلك التغيير الجذري لوسائل الرفاهية
اظهري عليّ بمستواك العالي
وأظهر عليك بمستواي الأعلى

ووداعا للمّة القلوب بالحب والود والصفاء
وشكرا لك وتقبلي مروري المتواضع

[فقيدة امها]

تسلمين غاليتي بنت الأصول على مرورك الجميل ومتابعتك الأجمل

لك مني باقات من الشكر والتقدير..

[فريدة مصطفى]

مشكوووووور والله يعطيك الف عافيه