ليلة العيد !! فراغ ...وش أسوي !!

[الضحاك]

الموضوع طويل شوي .. ..


--


الساعة الان التاسعة من مساء ليلة العيد .. !

وش اسوي ؟

فراااااااااااااااااااغ قااااتل جدا !!

الاهل مسافرين ..

ابوي كاشت .. وسيارته بالعمل ..

أخوي كان بالمدينة ورجع أخذ سيارتي وراح للقصيم ..

وانا قاعد هنا لحالي ..


حالتي ما توصف .. طفش غير طبيعي .. !

الله يعين ..

نشوف لنا شغلة نتلهى بها الليلة .. وبكرا يحلها 1000 حلال ..

--

الشبكة مشغولة ..

ياشين ليلة العيد .. وياشين الاتصالات ذيك الايام .. !

دخلت الانترنت .. طبعا المنتدى ..

فاضي .. مافيه أحد ..

قفلت النت ..

طلعت للحوش ..

رقيت غرفتي ..

أخذت كتاب ..

مالي نفس أقرأ ..

--

وأنا جالس بالغرفة .. قعدت اتفرج على غرفتي ..

طبعا غرفتي هي انظف غرفة .. وأرتب غرفة بالعالم <-- ايه هين

التفت على الطاولة .. اشوف عليها كتاب مهدين اياه " هيثم " ..

كم هو رائع هذا الهيثم ..

كتاب عنوانه " خواطر في زمن المحنة لنوال السباعي " ..

غلاف اسود .. وخط ثلث بلون احمر ..

كان بجانب الكتاب ..

اوراق مكتوب عليها :

أ ب د د د ر هـ ل ع ع ع ع ع ع ع ع ع

بخط ديواني ..

يوووه .. هذي أوراق الخط <-- قاعد يتعلم خط ..

قصبة للكتابة .. ومحبرة سوداء اشتريتها من مكتبة قريبة ..

فيه شريط " يا رجائي " .. اشتريته من الكويت .. اللي فيه نشيد امي فلسطين ..

وفيه مقص أظافر ..

وفيه شاحن الجوال ..

وفيه وفيه وفيه ..

أشياء كثيرة ..



التفت على الجهة الاخرى ..

واحصل ثيابي مرتبات .. !

غريبة !!

يووه .. تذكرت اهلي اليوم مسافرين .. يعني ما امداني احوسهن


--

دق الجوال

الحقيقة انه انسان موفق اللي يدق جواله في هذا الوقت !

واحد من الشباب الافاضل من كتاب المنتدى قديما .. وصديق عزيز ..

قال ابمرك الحين .. قلت حياك الله .. ابركها من ساعة ..
بس الله لا يهينك جب معك عشاء .. مثلك خابر عزوبي منتف ..

قال طيب ..

وصل خوينا ..

وتعشينا ..

ودخلنا النت سويا ..

وش سوينا هناك ؟

وش صار لنا ؟

وش دخل عمتي فطيمة ؟


انتظرونا ..


" القصة طويلة وهي جاهزة عندي .. لكن ودي انزلها على كم رد علشان ما اطول عليكم بالقراءة "



أرجو أن يكون هناك " انضباطية أكثر " بالردود ..

دمتم لمن تحبون .. والمعذرة على الاطالة .. من زمان ما كتبت موضوع زي كذا ...

[الضحاك]

طيب نكمل لكم القصة .. وشاكر لكم تفاعلكم يا حبايب .. ( مصدق )


--

أنا وخويي دخلنا النت .. طبعا الصحوة كان مفتوح .. وتجي رسالة خاصة ..

قال خويي افتحها

قلت موب الحين بعدين

قال اقول افتحها بسرعة ..

قلت : طيب

--

فتحت الرسالة وكانت من ( يا شباب الموضوع منقول واسم العضو اللي انا مسحته يطابق اسم عضو هنا ؟؟
الموضوع من منتدى الصحوة .. عشان كذا مسحته )

المهم قال اضفني على الماسنجر ..

قلت طيب .. واضفناه ..

قال خويي خلنا نشوف وش عنده (فلان ) هذا ..

قلت نشوف نشوف .. وش ورانا !!



سلمنا واللي منا بخير ..

سألت (فلان ) عن معلومة قديمة عندي وهي اسمه ..

قلت انت فلان ؟

قال ايه ..

قلت فلان الفلاني ..

قال (فلان ) ايه

طلع خويي .. من نفس العائلة

قلت والله النشبة !!

الحين بنبلشبهم !!

المهم .. انت ولد فلان انت ولد علان ..

لين طلعوا يعرفون بعض .. الظاهر عيال خوال ..

نسأل الله ان يجمع بينهم على خير



--

انتهت المحادثة على خير .. وطلع خويي من البيت بعد ان طردته شر طردة

لأنه بكرا عيد وودي انام منب فاضي له


يوم رجعت ..

انسدحت بالفراش .. والله ماجاني نوم ..

قلت يا ولد الحين الساعة وحدة ونص ..

ادخل النت لك شوي ..

وشف وش صاير ..

دخل النت . ما فتحت الصحوة قعدت ادور شوي بكم منتدى وكم موقع ..

المهم قلت قبل اطلع ابشيك على الصحوة ..

وادخل واحصل مواضيع وردود ...

الشاهد اني ما دريت الا والمؤذن يؤذن الفجر !!

قلت والله هذي النشبة !! ( هو يقصد بالنشبة : انه لم ينم ويبي يتوهق في العيد . ولو غيرها كان افضل )

وش السواة ؟

انام بعد الصلاة والا اصلي العيد واتعيد مع عماني ؟

يوم صليت .. قلت ابغير ثيابي الحين وافكر ..

يوم جيت افكر قلت افضل طريقة للتفكير هي الانسداح ..

يوم انسدحت ما انتبهت الا والناس يؤذنون العصر خوش عيد والله

واقوم واصلي الظهر والعصر جمعا وقصرا ..

الحين الدعوة دردبيس .. وش نزين ؟

قلت يا ولد .. شف الناس اللي تطولهم على رجلينك وسلم عليهم .. والبعيدين لاحقين عليهم ان شاء الله ..

[الضحاك]

قمت لصلاة العصر .. وانا مابين مصدق ومكذب .. !

يعني اقول لنفسي يا اخي استح على وجهك وش هالعيد !!


المهم ..

طلعت لأكبر واحد من عماني .. شايب كبير ومسكين يالله يخدم روحه .. يعني بعربية وحالته حالة مسكين ..

طقيت الباب .. فتحوا لي عياله ..

هلا بالدكتور .. <-- للفائدة فقط .. كل عائلتنا يسموني الدكتور

قلت هلابكم ..

وعايدتهم .. واللي منا بخير ..

المهم عمي هذا الله يشفيه دائما يضيع بالاسامي ..

قال : من أنت ؟

قلت : ابراهيم يا عم ..

قال : وش ابراهيمه ؟

قلت : ابراهيم العبدالرحمن ..

قال : ما اعرفك

قلت :


وش دعوى يا عم ؟

قال : ما اعرفك .. الدعوة مهيب غصب !

انا مت من الضحك

المهم .. قلتله اخوك ابراهيم صح ؟

قال : ايه اخوي ابراهيم الله يرحمه ..

قلت له ولد اسمه عبدالرحمن صح ؟

قال : ايه صح له ولد اسمه عبدالرحمن ..

قلت : له ولد اسمه ابراهيم صح ؟

قال : ايه له ولد اسمه ابراهيم ..

قلت انا ابراهيم ..

قال : نصاب ..

انا ما بين ودي اضحك .. وما بين اني منقهر ليه ما عرفني

قال واحد من عياله .. يا دكتور مشيها .. قلت نمشيها ليه ما نمشيها ..

المهم وانا اسولف مع عيال عمي .. كان عمي ساكت ..

فجأة قال : وشلون عمتك فطيمة .. !

قلت : يا سلاااااااااااااااام أخيرا عرفني عمي ..

قلت : والله يا عمي الى هالحين ما سلمت عليها .. بعد شوي ابروح ان شاء الله ..

انا قلت هالكلمة يا شباب والا ما قلتها ؟

وياتيني سيل من الشتائم واللعنات

يا قليل الادب .. ياللي ما تستحي .. ياللي فيك ما يخطيك ..

وانا مدري وش السالفة

بعد سؤال وتحري ..

صار عمي يظن اني واحد ثاني .. علشان كذا في البداية قال : نصاب ..

وعلشان كذا زعل ليه ما سلمت علي عمتي فطيمة بدري ..

عموما ..

حبيت راس عمي .. وطلعت ..

وأنا طالع بالشارع .. قاعد افكر وين اروح ؟

قلت يا ولد .. مالك .....

مالك الا عمتك فطيمة








--

واطلع من بيت عمي .. لبيت عمتي فطيمة ..

وهناك ..

اعلمكم وش صار ..


في الجلسة القادمة ان شاء الله ..

[الضحاك]

أذكركم يا شباب ان الموضوع منقول . من منتدى الصحوة .
بتصرف يسير . وانا بانتظار الاخ ( ........) اللي اسمه يطابق اسم الشخص اللي ورد في القصة .
وهو عضو في الصحوة ؟؟؟

اقول يا (.......) قاعدين ينكتون على السديراوية فيذاك

ولو ردودك انت والعبقري حلوة .

[الثمــــين]

والله إنك مهستر يالضحاك




وش اللي خلاك تنقل هالموضوع


ايه هو انا نفس العضو اللي هناك

وأدعوا الشباب للمشاركة معنا بنفس المنتدى شرط بينبسطون
ديوانية الشبااااااااااب
http://www.sahwah.net/sahwah/forumdi...?s=&forumid=14

شكرا لك أخي الضحاك
وعلى فكرة قصة الرجال حقيقية

[الضحاك]

طلعتا انت العضو .

اللي خلاني انقله ان القصة اعجبتني .

واحسن شي :

رجعت من الصلاة وقلت افكر . ثم قلت الانسداح احسن طريقة للتفكير . ثم انسدحت وما قمت الا العصر

والله يا هو مسكين خويكم .


بعدين تعال القصة حقيقة اكيد والا فيه بهارات ؟


اقول والعضو ( خلوها ) سديراوي ؟


شكرا لك اخوي وعساك استانست

[الثمــــين]

ياكثر أسئلك

انا ماعشت معه عشان اقولك هي حقيقية والا لا

لكن الرجال قال حقيقية ونحسبه من أهل الخير والله حسيبه .. ولا يمكن أن يكذب



لا ماهوب سديراوي قصمنجي

وأقول خفف من أسئلك تراي عطيته رابط الموضوع وسجل معنا تحر له بيرد عليك



شكرا لك اخي الضحاك

[الضحاك]

وداعا أخي العزيز ( سنومي )

أودعك وأطلب منك إكمال القصة ونقلها . لكن نحن بانتظار ( خلوها ) وفجريته اللي ما بغت تجي

سأفتقدك سنام الاسلام .


في أمان الله .

[خلوها]

خلوها