استشاره يالربع

[شوزن 5]

السلام عليكم

الله يعطيكم العافيه
اخواني انا محتار في شراء بندقيه للصيد وبحيث تكون مناسبه وعرها زين
هل اشتري خرازه او اشتري شوزن ام وحده
ارجو الرد عاجلا وشكراً55

[ابوعمر]

حياك الله في منتديات سدير أخوي شوزن 5.


و أتمنى أن يعجبك هذا المنتدى الغالي.


أنصحك بأن تشتري شوزن علشان يصير سميك خخخخخ


تراي أمزح.


بصراحه أنا منيب خبير في البنادق بس أظن الخرازه أحسن و الله أعلم


أخوك ابوعمر

[اتيكا]

وعليك السلام ورحمه الله وبركاته

وياهلا بك أخوي شوزن 5 في منتدى الرحلات والصيد

ويسرنا أننا نخدمك بما نستطيع بس حدد إنت وش تتصيد بالسلاح علشان أشور عليك بالزين

أو تبغى بندق مثل التي في الصورة تشتغل على خطين



إذا بغيت مواقع أسلحه فهذا الرابط بيخدمك لتبحث فيه عما تريد

http://www.findesemanatv.com.ar/direc_utiles.htm


وتقبل التحيه

[مفتون صيد]

هلا بك اخوي شوزن 5
عزالله انك حيرتنا بين مزيونين الخرازه والشوزن

بس مثل ما قالك اخوي اتيكا وش انت اللي تبي تصيده كل سلاح وله صيده

[المولع]

الخرازه تنفع لصيد الارانب و الضبان و الوبر وكذلك تنفع لصيد القميري .
الشوزن ممتازه لصيد الحجل و كذلك القميري اذا كان فرقه ( يعني تسدح لك قميريتين ثلاث مره وحده ) .

هناك ميزه لصالح الخرازه وهي توفر الرصاص بقيمه مناسبه مقارنة مع سعر رصاص الشوزن ، يعني الدسته من رصاص الخرازه فيها خمسين رصاصه و سعرها من 45 الى 60 ريال . بينما دستة الشوزن 25 رصاصه و بقيمة 85 الى 90 ريال ....

للمعلوميه الخرازه تشيكية الصنع قيمتها تقريبا 1600 ريال .

[مفتون صيد]

انا اضم صوتي لصوت المولع ما شاء الله عجل في الرد (شقردي )

بس ابقول شي عن الخرازه ولا اعتبره تخطيه او نقض لصوت اخوي المولع وهو انها تسوق مسافات طويله قد تصل الى الكيلو وشوي وتكون خطيره يعني اللي بيظرب يكون محتاط وغير كيذا يبيلها بواردي ..........

انا لو ردت لي اخذ ام خمس روسي علشانها ارخص وحلوه ما اشتكى منها احد والخرازه ..........( طماع ) ;)

[ابو دحيم]

تحيه طيبه



هلابك ا خوي شوزن 5 وحياك بين اهلك واحبابك في منتداك .

ما قصروا الاخوان لا كن ولانيب افهم منهم فلك مشورتي :

البين انك منت مولع في الصيد ولو كنت ولع كان عند ك الثنتين لذلك انصحك ان تشتري شوزن لا سباب :
1/ تقدر تصيد بها والطير والظب واي شيء تريد .
2/ سعرها مقارب للخرازه .
3/ الشوزن تغنيك عن الخرازه وليس العكس .
4/ الي مثلك -من غير حقران - كما قلت ليس مولع بالصيد ما تفرق عنده سعر الرصاص لا نه ليس يستخدمها كثيراً .




لك تحياتي وتقدير ي

[المولع]

صدقت الافضل انك اذا طلعت للصيد يكون معك خرازه و شوزن . وكلامك كله صحيح من ناحية انه الشوزن تنفع للطيور و للضبان وكذلك لصيد الارانب . وكذلك الخرازه لاكن انا افضل الشوزن لرمي الطيور فقط (( و خاصه اسراب القميري الكبيره و فروق الحجل ))لانها تنتشر طلقتها خلاف للخرازه التي تكون محتاجه للدقه في التصويب على الصيد و الا راح عليك .
من رائيي الخرازه افضل لرمي الضبان و القميري اذا كانت القميريه على الشجره لحالها .

[شوزن 5]

اشكركم على الرد على موضوعي
وصراحة أثبتو ان منتداكم منتدى متميز وانا صراحة استفدت منك كلكم بدون استثناء علشان ما احد يزعل
وما قصرتو كفيتو ووفيتوا


مشكورين مره ثانيه

[مفتون صيد]

لا شكر على واجب واحنا نتشرف اننا نخدمك على قدر اللي نقدر عليه
ونرجو انك تتواصل معنا دائماً وابداً ان شاء الله

[متعلم]

أشور عليك تاخذلكأشور عليك تاخذ لك ناري وابعد عن الشوزن .... والسبب ان الناري خفيفة الشيل ومسافتها بعيده يعني لو صيدك ابعد تقدر تجيبه بإذن الله بس لازم عليها دربيل وانت بواردي .. كثر التمرين على الرمايه يخليك بواردي لا تخاف 0 أما الشوزن ليش تبعد عنها لأنها اول شي ما تطول رميتها وثاني شي انها رفاسه تكسر متنك وصوتها يفجر اذنك .. ولك تحياتي

[أبو ماهر]

.


الحين الي يشوفكم وانتم تتكلمون في ذا البنادق يقول ذول ومايقدرون يبعدون عن البر دقيقة والصيد


وإذا جيت للجد والله انكم من جنبها...

[مفتون صيد]

كنك بديت تبربس يابوماهر وبعدين هذا منتدى رحلات وصيد..... هالمره نبي نفوتها المره الثانيه ياويلك;)

وبعدين حنا جالسين نتكلم بجد موهب جالسين نهزر (بالمصري).... وبعدين اللي يشوفك يوم تقول... هاللي ما يبعدون على البر... فعلاً انا ما اقدر اجلس فتره طويله بدون ما اطلع البر وللصيد