(( حنا لنا في طاعة الله ملذات ))

[ابن شارخ]

ردا على من يمدح برامج عربسات ويمدح الحثاله بالبلدان المجاوره ، الله يحمينا وياكم:
[poet font="Times New Roman,14,darkred,bold ,normal" bkcolor="" bkimage="http://www.sdair.com/forums/poetimages/47.gif" border="none,2,gray" type=2 line=200% align=center use=ex char="" num="0,black"]
ياللي تمدح في برامج عرب سات = واضح كلامك ما يبي ترجماني
مستانس بدشك تفر المحطات = ترقص على الطبله ويالي لداني
اهل الكفر شنو حروب وغارات = وقذايفٍ تاصل هدفها بثواني
صميت أذانك ما سمعت الاذاعات = جروح الامه ما وفتها المعاني
(لك شوفتٍ وحده وللناس شوفات)= قال (السبيل) في قديم الزماني
ادعي لمن يمشي دروب المتاهات= ولا اتشمت يوم ربي هداني
اضحك من اللي يقطــــــعون المســافات = اللي صحـــب غربان واللي حَصَاني
واللي يــدور للعفون الخبيثات = يسهر معاهن وان سرى صار زاني
واللي دفع بالورد بعض الريالات = واللي سكر حتى يعيش بأماني
حنا لنا في طاعة الله ملذات = ونبني من فعول المراجل مباني
افرح اذا شفت البنات العفيفات = واضيق لا شفت العري الغواني
احرص ولا اخر عمود العبادات = واقطــف من ازهار الاجر في لساني
انزل عــلى (مكه) بــوقـــت الاجــازات = ومن الزلق لا سحت ربي حماني
نرقا مراقيب الشهامه الصعيبات = ولا ننزل دروب الخنا والطماني
فلوسنا نعزها للمهمات = لا جاء المسير وان لفا الضيف عاني
يبشر بفنجالٍ معاه ابتسامات = وشيكات ترحيبٍ عليها ضماني
ما يسّر الله نفرشه بالسماطات= واشكال والوان بهذيك الصواني
ماني ولد تاجر ولا لي عقارات= ولاني بخيل ولاني حاتم زماني
ترى المراجل ما تجي بالسهالات= يبين في الميدان طيب الحصاني

شعر/ابن شارخ

[/poet]

[هوجاس]

السلام عليكم ورحمه الله وبركاته


انت وينك من زمان يا ابن شارخ؟؟؟!!!

شعر ولا اروع !!!!

اطالب من التويم بمعاقبه ابن شارخ على تقصيره بحق المنتدى الادبي وبحقنا لحرماننا من شعره الرائع فوالله انه شاعر بكل ما تعنيه هذه الكلمه

شكراً لك يا ابن شارخ واتمنى ان تبقى معناً ولا تفارقنا

(وجود مواهب شعريه كبيره كابن شارخ وشوق القلوب ومشهور ومحمد العوهلي ودفين الجرح نقطه ايجابيه في منتدى سدير ومميزه لكن مع الاسف الشديد لم تستغل!!!!)

[سعود الخليل]

إبداع × إبداع


وصح لسانك يابن شارخ على هالقصيده الرائعه والتي تعبر عن إنسان رائع فإختيار الكلمات المضمون بحق موفق ..


هوجاس .. هههه والله ما أدري وش نقول ولكن إذا كان إبن شارخ يبي يمتعنا بمثل هالقصيد ما نقدر نلزمه بشي هو كريم وأنتم تستاهلون ..



تحياتي.

[ابوعمر]

راااااااااائعه

[فارس جلاجل]

قصيدة رائعة جداًً
وأهنيك أخي ابن شارخ على هذا الإبداع
وأشكرك على وضع هذه القصيدة في المنتدى وننتظر منك المزيد من الإبداع

وتقبل تحيات :

[shdw]فارس جلاجل[/shdw]

[ابن شارخ]

هلا وغلا اخوي هوجاس

أشكرك اخي الكريم على هذا الاطراء والوسام الذي قلدتني اياه ، انا عاجز عن الشكر

تمونون تعاقبون او اللي تشوفونه ، ابشرو بالحق وما يلحق ، انتم هلي وربعي وعزوتي وكل ما يجي منكم
احلى من العسل

تقول ويني ؟
انا يا اخي كثير السفر بحكم عملي وطبيعتي لا استقر في مكان ففي الشهر اللي يكون فيه عطلة نهاية الاسبوع وتشوفني في الدمام شئ غريب خاصة في البراد وايام الربيع
ولي مشاركات في عدة منتديات شعرية ولي فترة طويلة معهم فمن الصعب ان انسق في وقتي الضيق
انشاء الله اكون معكم متى ما سنحت الفرصه ولن اترككم
ولا تحرمني من اللي بخاطرك ترى احب الرجال الطيبين اللي مثلكم وشرواكم
تقبل خالص تحياتي

اخوك

عبدالخالق البعيجان

[ابن شارخ]

هلا وغلا اخوي من تويم

تسلم يالغالي

والله الابداع روعة حضورك وتوقيعك على ابياتي المتواضعه

وانت الكريم وحنى اللي نستاهل ، واللي عندي قليل من ما عندك

الله لا يخلينا منكم

تحياتي لك

اخوك

عبدالخالق البعيجان

[ابن شارخ]

هلا وغلا اخوي ابوعمر

ان الرائع بحضورك ، شكرا لك على هالاطراء ولا تحرمنا من طلتك

تحياتي لك

اخوك

عبدالخالق البعيجان

[ابن شارخ]

هلا وغلا اخوي فارس جلاجل

اشكرك على هالاطراء وكلي فخر ان اجد اسمك تحت قصيدتي
ولي الشرف ايضا ان اضع قصائدي في منتدى سدير

تقبل تحيات اخوك

عبدالخالق البعيجان