[frame="10 80"]السلام عليكم ورحمة الله وبركاته..
يسعدني ان انشر اول قصيده لي في منتداكم ..
متقبل انتقاداتكم بصدر(ن) رحب..
اترككم مع القصيده......
[poem=font="Simplified Arabic,4,black,normal,normal" bkcolor="transparent" bkimage="" border="none,4,gray" type=0 line=0 align=center use=ex num="0,black"]
غالي وهجرني مير ربي عطاني = صبرٍ على الهجران والله وكيله
بابكي عليه اسنين والا ثواني=بابكي لين القلب يشفي غليله
اصبحت منه انوح ليلي واعاني = (وافرك يديه وين بلقا بدــيله)
واشيل همي ليه خلي جفاني =كن الفلك والكون همٍ بشيله
كني مثل من سار بالليل عاني = وابطا عن عياله ليالي طويله
حتى لقو جثمان صعبٍ تباني = مبطي عليه الدود محدٍ يزيله
ولولا وجود السيف والخيزراني = دلت عليه ان كان مابه دليله
لو كان حزن عياله اللي طواني= إن كان هانت يوم حزني مثيله
كن القهر والضيق جيش غزاني = له عدة وسيوف سلت صقيله
واجهت جيش الجور شوف العياني = كيف اغلبه ياناس ولا ني عديله
وكني شجاع قرم ماهو جباني=تشهد له الهيجاء بقدح الفتيله
فارس عزيز النفس زين المعاني = خاض الحروب وذاق يوم الرذيله
أصبح اسيرٍ بعد عزه يهاني = ومات بقهر من جور خصم القبيله
استحكمت بالضيق والله بلاني = عساه بعد الضيق يفرج سبيله
اليا غشاني الليل هم غشاني= وان بان نور الصبح غمي يحيله
وأنا اتقلب بين همٍ قواني=وغمٍ يجيني مر والا بجي له
حالي تدنت دون حد الدواني=امن القهر وعظام جسمي نحيله
ملزوم منه أشوف عشري ثماني=وتبقى الثواني بين موتي قليله
# حزني حزن عودٍ عجوزه تعاني = عود وعجوز وشاة شاة هزيله
الشاة رأس المال والذيب داني =والعود شاف الذيب مامنه حيله
حتى هجم هالذيب ماله ضماني=يفرس عجوز وشاة ثم اتهني له
ومرت ثلاث أيام والعود فاني =موووت الجزع قد ذاق ياعزتي له#
كما دليل النار شوف الدخاني =أنا دليلي ليل يكثر عويله
وآخر علاجي كي خلي كواني = لكن بعد هالكي طحت بثميله
وكأس الحلا معدوم خلي سقاني= من كأس مر يدي غصب تهوي له
مانيب هاوي الضيم لكن هواني =وتفعل بي الأيام سو الفعيله
حسبي على اللي جار يومه نواني=وسط الحشا مجروح زود مسيله
لا مهتني ولا نوم ساعه غفاني =جيله عديم احساس لا عاش جيله
يكفي ياقلب هموم تكفى كفاني =لا تنتظر ياقلب وقع الهويله
حاولت ارد القلب لكن عصاني =يبي هموم احزان قلبي فهي له
* يا صاحبي للموت ليه تحداني = ليه تبتغي لي الموت بأية وسيله
وش صالحك لو بت حدر الدفاني =ترضي عذول جاك نفسه ذليله
العاذل ابن فلان وابن الفلاني = ما ينفعك حساد مابه فضيله
(( جزا وفاي ألقاه يوم تهجاني = باشكيك أنا لشعر راعي الجميله))
يا بيات شعري كان خلي نساني=انتي عزاة القلب وانتي عميلة
يا بيات شعري كيف خلي جزاني=جزا الوفا بهموم متني ثقيله
يا بيات شعري دوك حالي تراني = اغسل فراش النوم دمعي غسيله
يا بيات شعري حار جفني وشكاني =ما ذاق نوم الليل حتى مقيله
يا بيات شعري كيف محدٍ رفاني=ولا حدٍ فزع لي بكشف ذيك الجليله
يا بيات شعري ردني ما بغاني = وألبس ثياب الموت بعد الفشيله
يا بيات شعري كيف ماكان كاني=كيف العمي بيخون قلب وفي له
يا بيات شعري كيف حبه عماني=نفسي كريمه مير نفسه بخيله
يا بيات شعري صحت مما دهاني =يومه خدع وانزل بقلبي نزيله
يا بيات شعري ليت عاش بمكاني=لحظه عساه يذوق بالويل ويله
يا بيات شعري ليت يرجع زماني =وأميل عنه القلب والله لا ميله
واصلاه أنا بالنار يومه صلاني =وازود له بالموت كيلٍ بأكيله
يا بيات شعري كان خلي شواني =بنار الجفا يا بخت منهو شوي له
من حب شاف الموت والا الجناني=قاله حكيم الناس ولا خذت قيله
طاح الجواد وطحت وأفلت عناني=واشهر سيوف الموت خلي سليله
يا بيات شعري صابني ما شقاني=والقلب شاف الموت مر ورضي له
يا بيات شعري موت خلي خذاني=واليوم أشوف القلب قرب رحيله
يا بيات شعري يوم خلي رماني=بكلمته قد صاب روح عليله
والحين أذوق الموت لو صاب ثاني =ماضر صلخ الجلد نفس قتيله
وإن كان بعد الموت محد بكاني= هلي علي دموع عينك هميله
انا قتيل اليوم والخل جاني =يا كيف خل اليوم يذبح خليله
بأصير قصة حب كل رواني =والا مجلد بعد كل روي له
ويصير عنواني قتيلك(( )) =ومن الفرات يصاغ إلى حد نيله [/poem]--------------------[/frame]
07-05-2005, 05:49 AM
العرض العادي
