صحيح زعلان ما تمزح ومن جدك
ودك تطير عصافيري من اغصانك
ماودك اسعد بشوف الورد في خدك
ولا تبيني اشم عطرك وريحانك
إنك تحاول تعودني على صدك
ارجوك مايحتمل خافقي هجرانك
مااقدر اصبر وابي ياصاحبي ردك
اهواك واخشى من جحودك ونكرانك
أعطيت لك قلب أبيض ينبض بودك
يمين بالله ما عافك ولا خانك
انك تقدر شعوري مد لي يدك
واصفح وسامح وراع شعور خلانك
ترى المسامح كريم وجيت لي وحدك
فلا تسكر بوجهي كل بيبانك
معقول ما فيه شي فيني يشدك
وآنا الذي بعت العمر من شأنك
ان كنت فعلا تظن ما في احد قدك
غلطان لا تحسب الميدان ميدانك
يقسى عليك الزمان إبيوم ويحدك
على التراجع ولكن بعد ما هانك