اولاد سدير.... وش قدموا لها؟؟؟؟؟؟

[مفتون صيد]

ياشباب ودي اسمع بعض التعليقات او الردود بشأن موضوع ذابحني مره ومن زمان ودي اقوله وهو :-
الان منطقة سدير ما شاء الله طلعت ابناء اصحاب مناصب قوية ورفيعة في الدولة اما فنياً يعني عمل ميداني مثل الطب وغيره او مناصب في الدولة سواء وزراء او مدراء او اعضاء مجلس في الشورى او رجال اعمال ومشهورين دولياً بدون مبالغه ......انتم معي .....زين طيب ودي اسأل وش وكم ومتى وهل .....الى اخره من صياغات السؤال والتسأولات ...... مسوي فلسفه لكن ترى ما حولك احد ....... المهم ياشباب وش فعلوا لديرتهم دون ان يلح اي احد عليهم او يبين لهم يعني يجي الشيء من نفسه ومن سمحت خاطره وين لمساتهم وبصماتهم على ديرتهم واين رد الجميل لها .........على سبيل المثال وليس الحصر او من باب التقليل من شأن هذه المنطقه الغاليه .......خذوا مثال قارنوا الان منطقتنا ومنطقة القصيم مع انا نملك مساحة اكبر ولكن ما سوينا مثلهم او حولهم في الوقت الحالي ونفس الظروف اللي عندهم وخدمتهم هي عندنا ......ارجوا ان لا يزعلون اخواننا اللي في القصيم واللي ويشاركون معنا الان في هذه المنتديات ....اخاف يقولون انتم تحسدونا .... بس ما نقول الا والله هنيئاً لكم بخدمة منطقتكم وجعلها من ابرز مناطق المملكه ..... وزي ما قلت ليست حصراً عليها وفيه احلى منها واشين منها ومننا ولكن حنا يهمنا وضعنا الان ....... وارجوا انه يكون نقد بناء وهادف بدون ذكر اي اسم بعينه ......يعني اتوقع ذكر العائلة ما فيه بأس بس بدون اي سب وانما ذكر ما وصل اليه ابناء هذه العائلة الكريمة
ولا ابغى يجي واحد يقول لي شف الروضة او الحوطة او المجمعه او العوده او ..........او ........ الى اخر بقية القرى او المراكز انا ابغى ......(( منطقة سدير كلها )) ...... والله ياشباب عيالها ما بعد التفتوا لها مضبوط .... والا لو ينفعونها والله تعطيهم اكثر وغيرنا سوّها ونجحت وسبق ذكرت مثال

تقبلوا تحية مفتون على الطريقة الصينيه

[غويمض]

والله يامفتون صيد انا امبح حليقي وانا انزل موضيعات مثل هذي لكن لا حياة لمن تنادي للجيل اللي موجود حاليآ
والبركه ان شاء الله في الاجيال القادمه
امعط تحياتي على الطريقه السديراويه

[مفتون صيد]

مشكور غويمض
بس اسئلك بالله ما تنقهر وانت تشوف النعمه حولك وانت منت قادر تعرف وشلون تاخذها او تستفيد منها
وين تجار الحديد وين اصحاب البنوك والارصده وين الوزراء وين الاعضاء وغيرهم واللي لهم علاقه مع ولات الامور وينهم عن تطوير مدينتهم

[غويمض]

لا لللللللللللللللللللللللللللللللللللللللللللللللللل للا
لا للمخدرات
لا لا حياة لمن تنادي

[مفتون صيد]

اخوي غويمض وسع الصدر والله لو اننا ما نصبر كان علوم لكن ودي يلتفتون قبل ما يفوت الصوت


=============
اخوي ابا المياه تراك قسيت عليهم .........ما ودنا اننا نظلمهم لكن انا اوافقك ان بعضهم يتنكرون او يتناسون ديرتهم



وتقبلوا التحية;)

[ولد الديره]

لا ياشباب يمكن قسيتو عليهم فيه عوائل ما قصرو واذا كنت تقصد منطقة سدير بكاملها فا أكبر مثال الروضه وميقدمه أهلها لها والحوطه بد ولله الحمد اصحاب المناصب ورجال الاعمال بالالتفات لها والمؤامل منهم بأذن الله الكثير وليس المطلوب من الرجال أصحاب المناصب العمل لبلدهم بل الموظف في عمله يمثل أهل بلده وللمعلوميه فأن اهالي وسكان سدير يشار لهم بالبنان في الكرم والجود والاخلاق الكريمه
وختاما ً أسال الله أن ينفع برجال سدير القائمين عليها الأن وهي ولله الحمد بخير ولهيب بحاجت أحد بأذن الله والي يعمل عمل أول شي يفكر في عمل الخير وان لا يكون تفكيره المدح من الناس
أعذروني أذا كان الكلام ركيك لاكن الموضوع جيد وأشكرك أخوي مفتون صيد على طرح هذا الموضوع

[مفتون صيد]

هلا اخوي ولد اليره ولا شكر على واجب وهذا من باب الحرص والواجب لكم ولها هذه المنطقه الجميله
وانا معك ان اهل الديره ملتفتين او بدأو الالتفاف لها ولكن ليس كل المناطق ........الروضة وجلاجل وتمير حهم على جنب ما شاء الله بس الحوطه والعودة والعطار والخطامة ووووووو وعد واغلط

حنا نبي سدير منطقة وحده ما يفرقها اي شيء ودنا يقال منطقة سدير في التلفزيون في الاخبار

واهل سدير اذا ما كان الكرم عندهم ......... من عنده اجل ؟؟ صدق اخوي ولد الديره


مشكور على مشاركتك وصراحه رفعت المعنويات والامال

وتقبل التحيه ;)

[هادي]

ليش ما يكون هناك تجمع كل ثلاث شهور بين المسؤلين واهل البلد ويتدارسون فيه اوضاع سدير من جلاجل وحتى تمير ويكون كل فتره على مركز من المراكز وتحت ضيافتهم
هذا اقتراح ولحد يزعل مني

سلام

[Sub_Zero]

لو على يدي ان كان خليت منطقة سدير كنها الرياض وفتحت فيها مثل الفيصليه والمملكه
وخليت شوارعها كنها شوارع التخصصي


معليش على اللقافه بس والله لو تحتسي الى باتسر محد راد عليك

لكن ان شاء الله فيه أمل من هالمسؤلين

واضم صوتي لصوت الاخ هاادي

[هادي]

فيه ناس حالتها المادية زينة وعندها استعداد تخدم سدير بعيونها بالمشاريع بس تبي ناس تاقف معها وتروح لها وتطلب منها ( تراني مجرب في مهرجانات سدير ودعمهم السخي لها )وانا مستعد باللي تبون عندي لسان ينقط عسل واواجه اكبر تاجر بس ابي شابا معي

انتظر الاقتراحات