ديوان الأمير والفارس ( عبيد العلي الرشيد )

[القاصف]

[align=center]إخـواني / أخـواتي

أحبَبت أن نجمَع أكبَر عدَد مِنَ دواويـن الشيـوخ والفرسـان في شِبه الجزيرة العربيّة وما حَـولَها .

ليتسنّى للمُتصـفح سهولة البحث ؛ أفضَل مِن تشتّت المواضيع في أكثر مِن موضـوع .

واليوم نلتقي مع أحَد أشهَر الشعَراء والفُرسان ، وأحد أشهَر أمَراء بني رشـيد .. وهو :


(( عبيـد العلي الرشـيد ))


واسمحولي بالبدايه [/align]



[poem=font="Simplified Arabic,4,blue,bold,normal" bkcolor="transparent" bkimage="../backgrounds/20.gif" border="none,4,gray" type=0 line=0 align=center use=ex num="0,black"]
القلب مِـن كِثـر الهَواجيـس قـزان=مايستريح من الدهر رُبـع ساعـه
ياغافر الـزلاّت ياوالـي الإحسـان=تجعل من التقوى لنفسـي بضاعـه
أنـا علـى لانٍ وربعـي علـى لان=متخالف(ن) رايي وراي الجماعـه
أنـا ولـد علـي سلايـل كحيـلان=الله خلقـنـي للسبـايـا وداعــه
ماني هتيمين يربـت علـى الضـان=ويعطي لطـلاب الجنايـا رتاعـه
أضرب على الكايد الا صرت بلشـان=عند الولي وصل الرشا لانقطاعـه
الناس ماترويك لا صـرت عطشـان=لاصار مافعل الفتـى فـي ذراعـه
عيب(ن) على اللي ينثني عقب مابان=ويرضى بطمان النفس عقب أرتفاعه
أما نجيب عقود حصنـن ومرجـان=والاّ فهي لبليـس طـار بشعاعـه
وا طربة الدنيا مـع الفجـر دخـان=واكرارة(ن) بطراف خطو الصعاعه [/poem]



[align=center]قصيـدة أخرى :

يُقال إن فيه رَجّـال مِن وُجَهاء بريدة يدعى عبدالمحسن آل سيف كان يتردد على
مجلس آل رشيد . وفي أحد الأيام سأله أمير حائل طلال بن عبدالله الرشيد عن عيوبه
وعيوب عمه . فجاوَب بعد أخذ الأمان : أنت يا طلال عيبك الوحيد عدم تقديرك للأجاويد
وخيار الناس عندما يعتَريك الغضب . وأمّا عبيد ففيه جميع الخِصال الحسَنه .
وسيئته الوحيدة هو عِظَم تقديره للصلبي ساهي اذا دخل في المجلس أقربه حوله
وادناه بجانبه .
فقال عبيد : نعم يا عبدالمحسن فهذا رجل طيّب وفيه شجاعه وهمّة عاليه ونفس أبيّه عن
الأدناس وأنشد هذه القصيدة :[/align]

[poem=font="Simplified Arabic,4,blue,bold,normal" bkcolor="transparent" bkimage="" border="none,4,gray" type=0 line=0 align=center use=ex num="0,black"]
طلبْـت ربّـي عالِـم السِـر والغيـب=يقبَـل صلاتـي ولـه يقبـل صيامـي
ويجعل لنا عرض نزيه عـن العيـب=ويفكنـا مـن شـر سـو الآثـامـي
ابـن ادم ملفـي الخطـا والعذاريـب=لو ما فعـل رميـت عليـه التهامـي
جليت عن نفسي شبا الشـك والريـب=ولا حسب يلقون العرب بـي كلامـي
وربعي لقوا بي عقب ما شِبت أنا عيب=بتسطيـر كتـب مفسريـن الاحلامـي
قلت : اخبروني ويش مغضى هكا العيب=قالوا : علـى ساقـة رفيقـك تحامـي
قلت : ان هذا مـن قديـم لنـا عيـب=مستارثينـه مـن خـوال وعَمـامـي
العيب تـرك المعرضـة بالمواجيـب=والا الرفيـق بفزعتـه مـا نـلامـي
رفيقنـا كنـه بــروس الشخانـيـب=فـي راس حيـد نايـف مـا يظامـي
رفيقنـا مـا نجدعـه للقصاصـيـب=يجبـر بنـا لـو مكسـره بالعظامـي
ورفيقنا لو هـو مـن الجـد بصليـب=متجـود مـنـا بــراس السنـامـي
والشـر مـا نسعـى لجـره بتقريـب=ونـذرا الـى هبـت لنـا بالـولامـي
هـذي قدايمنـا الا عـدوا الطـيـب=وكـل يريـع لفعـل اهلـه القدامـي
ويوم الوغى مـا نستشيـر الزواريـب=لاا طار عن سـود العيـون اللثامـى
مرطاضنا يشبع بـه النسـر والذيـب=ونروي معاطيش السيـوف الظوامـي
نلحق علـى سـرد يجنـك جناديـب=بمطارق مـع مثـل صـف النظامـي
يتلـون ابـو بنـدر ربيـع السعابيـب=اللـي علـى ميـره تعيـش اليتامـي
فان سلـم راس مبيـد الكنـس النيـب=حريبنـا مــا يهتـنـي بالمنـامـي
عنوا بهـا ركـاب عـوج المصاليـب=من مصـر الغربـي الـى دار يامـي
شارخ اخذنـا بـه زيـون المهاليـب=وش جاب سطوة مطلب وابـن سامـي [/poem]

[align=center]يتـبع ،،[/align]

[أنــ(تويمي)ــا]

الله يعطيك العافيه أخوي القاصف
وإسمحلي بإضافه:

نبذه :

الأمير عبيد العلي الرشيد، أسس حكم دولة آل رشيد التي كانت عاصمتها حائل (1834 - 1922)، قال عنه أمين الريحاني - تاريخ نجد ص286 -:
"امتاز عن أخيه بأمور ثلاثة - تغلوه في الدين - و بخشونة طبعه- و بنزعه شديدة إلى الجهاد في سبيل الله والتوحيد
وكان رسول النجديين الأكبر في الجبل، وكان بيته محط رحال النجديين في حائل و مرجعهم الأعلى . وهو فارس من
أبطال الفرسان و شاعر من فحول الشعراء". وقد قام الأمير عبيد بعد وفاة أخيه بتعيين ابن أخيه
طلال العبد الله الرشيد لحكم حائل.

مولده:

الرآي الراجح انه ولد سنة 1206هـ (1792 م) وبنائا على هذا يكون عبيد الرشيد اصغر بسنتين من اخيه عبدالله الرشيد
وأمهم هي الأميرة علياء بنت عبدالعزيز بن حميان من الجعفر من عبده من شمر.
اما ابوهما علي بن رشيد فكان رجلا متديناً وتوفي والدهما في حائل سنة 1240هـ / 1824
قبل حكم اولاده بعقد من الزمان.

[السنايدي]

الله يعطيكم العافيه ياخوان

وجزاكم الله خير

والشاعر مشهور

ولا عليه كلام


تحياتي للجميع

[القاصف]

[align=center]تسـلَم أخي :

( أنــ(تويمي)ــا )

على المُشارَكة في الموضـوع

ولكن مؤسّس دولة بني رشيد هو أخوه عبد الله العلي الرشيد



مِن قصـائده ؛ هذه القصيده التي قالها في معركة بقعاء سنه 1257 هـ :

[poem=font="Simplified Arabic,4,blue,bold,normal" bkcolor="transparent" bkimage="" border="none,4,gray" type=0 line=0 align=center use=ex num="0,black"]
يا مـل قلـبٍ فيـه تسعـة وتسعيـن=هجـسٍ وهاجـوسٍ وعـدلٍ ومايـل
يديرهـن دولاب الافكـار تسعـيـن=بالصـدر ينشـر دقهـن والجـلايـل
واصبحت منهن خالـيٍ كـود ثنتيـن=سعدى ومصقولٍ ( 1 ) يداوي العلايل
وخماسيٍن( 2 ) غمقٍ صوابه وجوزين=إلى جذبوا شـروا بـروق المخايـل
يا دارنا مـن جـاك جينـاه عجليـن=بالليـل نسـري والصفـر والقوايـل
فإن كانهـم عنـا بالانشـاد محفيـن=من الراس مـا يحتـاج رد الرسايـل
حضر الجبل والبـدو نـاسٍ صليبيـن=يتلننـا حمـلات ســود الجـدايـل
جينـا صبـاح وهـم لنـا مستكنيـن=وثار الدخن من حـر صلـو الفتايـل
وحصل لنا عقب المواصل وفا الديـن=وراعي السـف رده عليـه الجمايـل
ومن فضل رب العرش عدل الميوازين=صارت على القصمـان وأولاد وايـل
عجاجة ٍ تجلى صدى القلب يا حسيـن=دبيـلـة ٍ مــا مثلـهـا بالدبـايـل
كـم خيـر ٍ داجـه عليـه الغلاميـن=خلـوا دماغـه عـن علابيـه مايـل
ربعـي مرويـة السيـوف المسانيـن=خلو صفـا بقعـا مـن الـدم سايـل
واللي ذبحت بشذرة السيـف تسعيـن=ايضا ولانـي عـن طردهـم بسايـل
ذبحت أبو صالح صعـوط المجانيـن=واودعـت دم الشيـخ بالقـاع سايـل
واللـي وطينـا مـا تشوفـه محبيـن=والكـذب تنفـاه العلـوم الصمـايـل
جيته بمقدم سربة وقـم الالفيـن( 3 )=كن الشهـر بـه ديدحـان الماسيـل
جونـا يبـون ديـارنـا والبساتـيـن=يبغـون منزلـنـا قـفـارٍ وحـايـل
يقولون جده يوم صولـة هـل الديـن=قـادو عليهـم ذاهبـيـن الحمـايـل
ودلا على ربعه يسـوق الفراميـن(4)=فيـد عمـاهـم تايهـيـن الـدلايـل
ويصيح مثل البارحه مـا هنـا شيـن=ولا حصل يا كـود قطـع الوصايـل
واليـوم يبغونـا وحـنـا معيـيـن=نسند بحد السيـف مـن جـاه عايـل
ويلا عطوا حـق الديـار الهزازيـن=فحنا الـى عـدت رجـال الحمايـل
ربعي على حرب المعادي ضريريـن=هـم مـن قديـم كاسبيـن النفـايـل
أغـراه بالمكحـول خـرط الفراقيـن=وعرضاتهـم بمشـرفـات النثـايـل
أطـاع حكـي الذايـدي والسلاطيـن=كـم واحـدٍ قبلـه رمـي بالحبايـل
نـاسٍ يبـون العـز منهـم ذليليـن=وش قال مشعانٍ( 5 ) بهـم بالاوايـل
عند اهله اللي يلبسـون التواميـن(6)=إلى اجذبوا شروى بـروق المخايـل
يتلون عيد الضيف ريـف المساكيـن=الشيخ أبو متعب(7) عزيـز النزايـل
الى سلم راس الشيخ حنـا عزيزيـن=نرجيه من معطي العطايـا الجزايـل
إلى بغا أمـرٍ مـا يطيـع المشيريـن=الحيـد شيـال الحـمـول الثقـايـل
وصلوا على قنديل سكـن الحجازيـن=راعـي المقـام المعتلـى والرسايـل
ومني عدد ما شمّـع اللبـن بالطيـن=او مـا لبيـت الله تشـد الرحـايـل [/poem]


هـامــش :
- - - - - - -
1/سعدى ومصقول : سعدى فرس عبيد بن رشيد .. ومصقول سيفه
2/ خماسي ٍ : يقصد البواريد.
3/وقم الالفين : حول الالفين
4/الفرامين : الأوامر السلطانية .
5/ مشعان : هو مشعان بن هذال .
6/ التوامين : السراويل .
7/ ابو متعب : هو الأمير عبداللي العلي الرشيد اخو عبيد .


يتـبع ،،
[/align]

[القاصف]

إحدى قصائده بعنوان ( ضياغم ترخص حلاله والأرقاب ×× ودون الرفيق ابمالهم مايدارون ) :

[poem=font="Simplified Arabic,4,blue,bold,normal" bkcolor="transparent" bkimage="" border="none,4,gray" type=0 line=0 align=center use=ex num="0,black"]
يالله ياللي للجزيلات وهابت=عطي ولاجزل العطا منك ممنون
ياغافر الزلات يارب الأرباب=ياناصر موسى على قوم فرعون
تفتح لنا من باب نصرلنا باب=واصحاب بدر وأن فتحته يحضرون
آمين ياقاض الحوايج والأنواب=ياوامر وامرك على الكاف والنون
ياراكب اللي لامشى يوثب أوثاب=لاشفتزوله يختفق تقل مجنون
عقب أربع يلفي عزيزين الأقراب=اللي على الديره قديم يحامون
قل بدال ماكزيت خط ونجاب=لابد مانمسي وناصل على الهون
ان كان تشكي لي خليف وحطاب=فالله خبر بعهود اللي يبوقون
وان كان تنخاني فانا عوج الأطنابولا وسيفي لك على الضد مسنون
حنا هذولا مجهدين بالأطلاب=نتنا مراسيل من الهند يلفون
ان سهل الباري وجينا بالآطواب=السعر ماينقص عن اللي تعرفون
آتيك بجموع يعيون الآداب=واويل من باشناف نزله يحلون
ضياغم ترخص حلاله والأرقاب=ودون الرفيق بمالهم مايدارون [/poem]

[القاصف]

[align=center]يفتخر بقوّة قـومه وبكرمهم :

[poem=font="Simplified Arabic,4,blue,bold,normal" bkcolor="transparent" bkimage="" border="none,4,gray" type=0 line=0 align=center use=ex num="0,black"]
نفسي تمنيني لرقي السنودي=من لابه توزي نفوسه على الكود
بحرابنا نرعى الحجر والنفودي=رغمٍ على الزعلان والخد ممدود
من فوق قحص كنهن الفهودي=وملبوسنا بظهورهن صنع داود
وبايماننا شغل العجم والهنودي=وشلف نرهمهن على ركبة العود
ومخيضنا دايم على الضد يودي=ونصبح على كبده مع الصبح بجرود
والضيف ليا جانا نرحب وزودي= ونحط له بالعسر من كل ماجود
مستارثينه من كرام الجدودي=طبع لنا من خلقة الحمد محمود
وأفعالنا عند العدالة شهودي=وقولٍ بلا فعل على الرجل منقود[/poem][/align]

[القاصف]

[align=center]وهذه أحدى قصائد الامير عبيد الرشيد .. قالها عندما طلب منه أحد ولاة الاتراك فرسه أن
يبيعه له فجوابه بهالقصيدة :

[poem=font="Simplified Arabic,4,blue,bold,normal" bkcolor="transparent" bkimage="" border="none,4,gray" type=0 line=0 align=center use=ex num="0,black"]
يابيه أنا لكروش* معطي ولا بيع=قبلك طلبها فيصل وابن هـادي*
يابيه لو كثـرت بالقـول ماطيـع=ياحيف تبغانـي أسلـم جـوادي
يابيه مايرهم على مثلهـا البيـع=ولا يجي مثلـه بقـودة مهـادي
ما جمع أصله بالقراطيس تجميـع=أصله يعرفونه جميـع البـوادي
باغ(ن) الى مالقموها المصاريـع=وصاح الصياح وثار عج الطرادي
أنهج عليها واتعـدى الترارتيـع=مثل الفحل لاصار وقت الهـدادي
وأصلها لعيون بيض(ن) مفاريـع=فوق الحنايـا والسبايـا غـوادي
هذاك بيعـه والصبـاي مفاريـع=بين القنـا ومخفـرات الهنـادي
هذاك بيعه كـان ماتفهـم البيـع=ليامنهن جِلبنّ بسـوق المـزادي
يابيه أنا ماسمع كلامك ولا طيـع=هرجك مقلة ناظـري والفـؤادي
ياسابقي مانرخصـك بالمطاميـع=حتم(ن) ولو قيل أرفعوا بالجوادي
أبقي الى ثار الدخـن بالزعازيـع=وحطن على عجلاتهن والعـدادي
بيوم(ن) يشيب من حذاه المراضيع=حدن وحاديهن من الخوف حـادي
أنطح ورا ربعي وجيه المداريـع=وأقضي عليها دينهـم والعبـادي
وانشد عني وعنها بعاد المفازيـع=هو هرجنـا كذبـن والا وكـادي
من لابة بالحرب ماهـم مطاويـع=ولاتحسب المداس هـو العـوادي
حلفت مايطري علينا بهـا البيـع=الا الحشر يفخت سواده سـوادي
ما دام راسي للريـاح الذعاذيـع=بالعون طالبها من النـاس غـادي
وصلوا على محمد خير المشافيـع=اللي لنـا يشفـع بيـوم التنـادي [/poem]



هـامــش :
- - - - - - -

* (كروش ) = وهي اسم فرس عبيد
*(فيصل وابن هادي ) = يعني بهم فيصل الدويش شيخ مطير ،، ومحمد بن هادي القحطاني[/align]

[القاصف]

[align=center]نسيت أن أقدّم نـبذة عن السيرةِ الذاتيّة لبَطَـل هذا الموضوع


مِن كتاب قالت الصحراء
للكاتب : بدر الحمد

هُوَ الأمير الفارس الشاعر {{عبيد بن علي الرشيد ************ .
و الرشيد كما هو معروف فخذ من آل جعفر من عبده أحد بطون قبيلة شمّر .
ولد عبيد تقريبا عام 1220 هـ ، و يعتبر من أشجع فرسان الجزيرة العربية في ذاك الوقت .
يقول عنه طلال السعيد في الموسوعة النبطية الكاملة - الجزء الأول - :
" كان بسيفه يشكل الدعامة الأساسيّة لحكم آل رشيد بحائل ، و كان قائدا للجيوش و محارباً
صَلباً . علّق روحه على طرف سيفه و خاض المعارك بجرأةٍ وإقدامٍ قلّما يوجد لها مثيل وهو
مِن الرجال القلائل الذين امتازوا بالقوة الذاتية و الجسارة و المهارة الحربية منقطعة النظير".
ولد عبيد في زمن كله حروب و اضطرابات ، و كانت الحروب على وقتهم مثل شربة الماء ..
( أسهل شي عندهم انك تحارب ! فما يمدي حرب تطفى إلاّ و ثارت حربُ أخرى ) .
وعبيد نشأ على هالحياة و على هالحالة ، على صوت الخيل و قرقعة السيوف ، اللي جعلَت
مِنهُ فارساً شُجاعاً .. يقول في وصف احد الحروب :
[poem=font="Simplified Arabic,4,blue,bold,normal" bkcolor="transparent" bkimage="" border="none,4,gray" type=0 line=0 align=center use=ex num="0,black"]
أصبَحْت مِنهن خالي كود ثِنتين=سعدي و مصقول يداوي الغلايل[/poem]
( يقصد بـ " سعدي " فرسه ، و المصقول هو سيفه اللي يداوي الروس ) . كقول عنترةَ
بن شداد :
[poem=font="Simplified Arabic,4,blue,bold,normal" bkcolor="transparent" bkimage="" border="none,4,gray" type=0 line=0 align=center use=ex num="0,black"]
و سَيفي كان في الهَـيجا طبيبـاً=يُداوي رأس من يشكو الصداعا ![/poem]
حـووووك

*** *** ***
و لعبيد بعض القصائد الغزَلية النادرة ، و هو مُقِلّ من ناحية الغزل ، و قال هالقصيدة
بعد رجوعه من إحدى الحروب البعيدة, يقول ياصف الضلع اللي مر عليه :
[poem=font="Simplified Arabic,4,blue,bold,normal" bkcolor="transparent" bkimage="" border="none,4,gray" type=0 line=0 align=center use=ex num="0,black"]
لي بأيسره من لابسات العشاريـق=خشف يخلط المسك والزعفرانـي
وش عيشتي لولا رجا ذابل الريـق=لولا رجا لامـا زريـف المثانـي
ابـو قـرون كنهـن دفـن الهيـق=وامجدل فوق المتـن لـه وقانـي
من حط فوق الصدر زين العشاريق=حص ومرجـان زهـا بالبيانـي
روض البخَتري زاهي بالزماليـق=و امفلجـات بـه كمـا القحويانـي
هي نقوتي من لابسـات العشاريـق=من مصر إلى غربه لشرقي عماني[/poem]
( هو يوصف زوجته بهالقصيده ) .

وفي آخر أيامه له هالقصيده اللي تَحوي الكثير من الحِكَم . ومِثل ما هي عادته يعتزّ
بنفسه ويفخر بأفعاله الحميدة ؛ و يحق له الفخر و الإعتزاز , لأنه كان قول على فعل :
[poem=font="Simplified Arabic,4,blue,bold,normal" bkcolor="transparent" bkimage="" border="none,4,gray" type=0 line=0 align=center use=ex num="0,black"]
طلبت ربي عالـم السـر والغيـب=يقبل صلاتي لـه و يقبـل صيامـي
ويحعل لنا عرض نزيهٍ عن العيـب=و يفكّنـا مـن شـرّ سُـو الأثامـي
بـن آدم ملفـا الخطـا والعَذاريـب=لو ما فعل رميـت عليـه التهامـي
حميت أنا نفسي عن الشك و الريـب=ولا أحسب إن يلقا بعرضي كلامـي
ربعي لقوا بي عقب ما شبت أنا عيب=تسطير كتـب مفسريـن الحلامـي
قلت اخبروني يا مـلا وش ذا العيـب=قالوا علـى ساقـة رفيقـك اتحامـي
قلت ان هذا مِـن قديـم لنـا عيـب=مستارثينه مـن خـوال وعَمامـي
العيب ترك المعرضـه بالمواجيـب=والاّ الرفيـق بطاعتـه مـا نلامـي
رفيقنـا كنـه بـروس الشخانـيـب=في راس حـد نايـف مـا يظامـي [/poem]


يتبـع بعَـونِ الله ،،[/align]

[محمد المحارب]

[align=center]الله تسلم اخوي القاصف
الصراحة كفيت ووفيت ......والشاعر غني التعريف ......ويستحق الثناء ......تقبل مروري.[/align]

[الأستاذكومبيوتر]

مشكووور أخوي القاصف على تزويدنا بقصائد هذا الشاعر المشهور والمعروف جهد رائع وفقك الله لك تحيتي

[القاصف]

[align=center]أخَـواي العزيـزين :

( محمد المحارب )

و

( الأستاذ كمبيوتر )

لم أكتفِ بسرد قصائد الأمير عبيد الرشـيد بعد ؛ لأنها كثـيرة وتتكلّم عن أحداث مهمّة

أشكر لكُما اطّلاعكما على القصـائد .. وبارَك الله فيكما




تابع ..

عندما مرض الأمير عبدالله الرشيد مرض الموت كان عنده اخوه عبيـد يُواسيـه ، وكـانت
زوجـة عبيد متوَفيَه ، وتزوّج بعدها اخـتـها ، ومـن كثـر جلـوس عبيـد عنـد اخوه قـالـوا الـنـاس
عبـيـد مايبـي المرَه ، لـكـنه خــذاها عـلـشــان تْراعـي لعـيـال إخـتــها ، وفي ليله من الليالي
تأخر عبيد عند اخوه عبدالله ،فأرسلت له ولده حمود ، وقالت : قله خالتي مريضه وتوِن .
راح حمـود لأبـوه وقـال لــه الـخـبـر ، فـرَدّ عـبـيـد بهالأبـيـات .. يــقــول :

[poem=font="Simplified Arabic,4,blue,bold,normal" bkcolor="transparent" bkimage="" border="none,4,gray" type=0 line=0 align=center use=ex num="0,black"]
ماهّمني ياحمـود لـو ونّـت أمـك=ولو أزعجَت بالصَّوت بأعلى الوِنيني
ماهمِّنـي ياكـود ونّـات عـمـك=الونّه اللى حرّكـَت مَـوق عَـينـي
اللى نقـل ياحمـود همـي وهمّـك=حيد(ن) يشيل الحِـمْل ماهـو دوينـي
ياما على الأمتـان ياحمـود زمّـك=وقام يتمشى بـك بهـاك البِطينـي [/poem]

*** *** ***

هناك مَن يزعم بِأنّ عبيد الرشيد - رحمة الله على روحه - بعض الأحيان يجور في حكمه ،
ومن اللي يَروُونه عنه القصيدة هذي عند غزوه لأحدى الديار :

[poem=font="Simplified Arabic,4,blue,bold,normal" bkcolor="transparent" bkimage="" border="none,4,gray" type=0 line=0 align=center use=ex num="0,black"]البارحة يوم الخلايق نعوسي=حذرت للديرة بسيفن و فردين [/poem]
إلى أن يقول :
[poem=font="Simplified Arabic,4,blue,bold,normal" bkcolor="transparent" bkimage="" border="none,4,gray" type=0 line=0 align=center use=ex num="0,black"]قالت لصيح قلت منتـي عروسـي=والله لصيح الا بغيتـي تصيحيـن
قالت يجونك قلت مانـي نسوسـي=والله ان يحظر بليس و أنتي تشوفين [/poem]

وهو هنا يروي قصّته يوم دخل البيت على المرَه ، وقالت له انها تبي تصيح إن كانه
سوّى فيها شي ، قال : أنتي منتي عروس ، وأبصيح بصياح أعلى من صياحك إن بغيتي
تصيحين ! قالت له إن قومها يبي يجونك على صوتها ، قال لها إنه مهوب خوّاف ويحتري
حضور ابليس إذا جَـو وهي تشوف .

وأيضاً قالوا إن عبيد الرشيد شُبِّه حكمه بحكم الهزازين بالحريق اللي كانوا جبّارين إذا
حكموا .. وإذا غزوا .. يقول الأمير عبيد في ذلك :

[poem=font="Simplified Arabic,4,blue,bold,normal" bkcolor="transparent" bkimage="" border="none,4,gray" type=0 line=0 align=center use=ex num="0,black"]مادّا حقوق الدار كود الهزازين=و حنا ليا عدوا رجال الحمايل [/poem]

و هو يعني بهذا إن شغل الهزازين في الحرب و السلم هو الشغل المضبوط .

ونحبّ أن نبيِّن لمن ظنّ أنّ عبيد الرشيد جاير بحكمه .. إنّ عبيد رحمة الله عليه رجل
ديّن ( صاحب دين وصلاح ) .
والدليل على هذا إن أغَلب كُتُب التفسير والحديث هي أوقاف من عبيد .
فمثَلاً .. أول طبعه لتفسير الطبري كانت مقابلة على نسخة من أوقاف عبيد العلي .

ونترك للقارئ الكريم حرية قبول ما يقرأ، مع التوضيح والبيان ، فمِثل هؤلاء
الأشخاص المهِمّين ، والمؤثرين في تاريخ الجزيرة العربية تحتاج سيرهم للتوثيق
وأعمالهم للجمع والبحث والتحرِّي عن قصائدهم ، و مدى صِحّة نسبتها لهم و أشهر
قصصهم برواياتها المختلفة .
فلا أظن أن صفحة أو صفحتان تكفي عبيد الرشيد ، أو تُوفيه حقّه وتنشر الأوضاع
التي كانت تعيشها الجزيرة العربية في تلك الأوقات , بما فيها من أدب وشعر
وقصص تحتاج للمزيد من الجهد لجمعها و تدوينها التدوين الوثيق ، و هذا ما أردنا إيضاحه
مِن خلال هذا الموضوع .


يتـبع ،،[/align]