رحله الى شاطى نصف القمر في العيد

[المجهول]

زحمة في الشاطى
رحت انا وخويي وصديقي راشد للشرقيه ووصلنا هناك الساعه تسع الصبح وكان الجو مافيه احسن منه .... وكان راشد معصقل مره .. وكان اسمن مني شوي يعني انا وياه كنا رقم 64 بتقولون وش معناته اقول لكم مدري بس حبيت اغير ذبحونا العالم دايم كنكم رقم 11 كنكم رقم 11 المهم انا وراشد ماننام الا لازم متعشين علشان مايطيرنا الهوى ...وفرشنا مراقدنا ونمنا وما كان فيه ناس واجد ... وما قمنا الا الساعه 5 على ازعاج خلق الله وطليت من تحت الكنبل اليين فيه امم لدرجة ان المكان الي بيني وبين رفيقي راشد قعدت فيه عائله ومن زود الميانه ابوهم متركي على راشد خويي وهو نايم وامهم منومه ولدهم الصغير معي وملحفته وبنتهم الصغيره تلعب في رجلي مره تدفنهم ومره تطلعهم لا وتضحك تقول لبوها اليين دفنت رجلي يبه تحداني اطلع من تحت التراب ضب وتكب مويه على الرمل اليين تطلع رجلي وابوها الدلخ قاعد يكركر ويضحك وانا والرشدي ما نقدر نقوم معهم حريم فاتشين . .. وما خفت الا من بنت معهم دبا .. اخاف تبرك على هالكنبل تحسب ماتحته احد ...
والجماعه والله ماهمهم ولا كنا موجودين بيني وبينكم انا ماخوفني الا الين جو يروحون اخاف يضفونا مع عفشهم
وش نسوي وش الدبره و جى المغرب قلنا زين بيروحون هالحين جا الليل خلاص وش يقعدهم ... و يوم ناظرنا اليين الربع ماطرى عليهم يروحون لا وبيتسبحون الام والبنت المهم لبسو لبس السباحه الميوه ولبسوا عليه شلحه ودراعه وبشت (متعبين انفسهم شارين ميوهات ) ..... وقلنا زين بيروحون يسبحون وننحاش من هنا.... و يوم جو يروحون قال ابوهم روحو انتم انا ابقعد هنا احرس العفش .. وقعد ابوهم الدلخ يحرس عفشهم الي هو انحن
.... والله المشكله وش يفكنا من هالدلخ ... و الرجال قام يحاسي نفسه يقول والله فيه شوي هوا وراي مارجع السياره شوي تذري عنا.... و الدلخ المهبول قام وشغل السياره ... وقام يرجعها شوي شوي المهم انه ما وقف الا عند رقبة رويشد ... و الدلخ يوم حول مااعجبته التلبيقه قال لنفسه خل ارجع السياره شوي ...... وكل هذا وانا ورويشد نتنافض من الخوف وعرقانين الناس جايه للبحر تسبح فيه وحنا جنبه سابحين عرق .... و الحمدلله يوم جى بيشغل السياره مره ثانيه جت مرته وبناته خالصين سابحين و حول وجلس معهم وكل ذا وولدهم الصغير نايم جنبي ... المهم ان بنتهم الدبا الي انا خايف منها قعدت علي رويشد خويي ... كنت خايف ان ابوها يوطاه بالسياره وياليته وطاه كان اريح له من هالرصاصه ... وكل ذا وابوهم وامهم وباقي بنيهم فرحانين ويسولفون .... لا وبنتهم الدبا تسولف وفرحانه وتقص على ابوها وشلون سبحت وكل ذا ورويشد تحتها ... والمشكله وش اقول لهله ..... وكان معهم بنت زينه هي الي مهونت مصايبي شوي ياهو فيها زين مابعد شفته ... و البنت الزينه قالت لامها فيني النوم ابنوم ..قالت امها عندس واحد من هالكنابل تلحفي واحد منهم ونومي واختارت الكنبل الي انا تحته وفصخت عبايتها ونقابها وجت ...بنتهم الزينه الي اعتقد ان الزين مسمى عليها والعطر مطلع منها رفعت الكنبل الي انا تحته بتنوم معي .... احمدك يارب صبرت ونلت هالحوريه رزق من الله .. يوم توها بتنوم يوم ناداها ابوها الدلخ يابنت لاتنومي احنا طالعين للبحر علشان تنامين تعالي اجلسي معانا ... ويافرحه ماتمت... لكن يكفيني انها بغت تنوم جنبي...
و الدبا مازالت منوخه على رفيقي رويشد وش الي بيقومها لا وتثاوب يالله سترك عسى ماتفرش عليه وتنوم ... و قربو العشا والشاهي .. والدبا تعشى معهم وهي على صديقي رويشد... يعني كملت الناقص... تصدقون انها عقوبة على خويي رويشد ... خويي رويشد يشتغل على ميزان التريلات الي على الخط السريع يتجاوز عن الوزن الزايد وبسببه تحفر طريق الشرقيه وكل الناس يدعون عليه ..... وسبحان الله يمهل ولا يهمل ذا الدبا خذت حق الميزان والطريق والناس.... وابوهم الدلخ قعد يسولف عليهم يقول يابنات يوم كنت شباب عمري في حدود 24سنه كنت نايم في المحل هاذا وفجئه اليين ذيك الحوريه تصحيني من النوم ... تعرف اسمي تقول يادلخ يادلخ قوم قوم من النوم المهم يوم قمت ماصدقت الي انا اشوفه ايش هاذا الجمال ايش هاذا الجسم ياهووه ....و طارت بوهتي فيها وماعرفت اتكلم
وقالت لي ليش انت نايم هنا ... برضه ماعرفت ارد عليها قالت لي بعد ماقربت وقعدت جنبي وحطت يدها على فخذي .... شكلك حيران ولا تعبان ايش فيك.. اخيرا قدرت ارد وقلت لها مافيني شي طيب وبخير ... قالت اطلب مني 3طلبات في حدود دقيقتين واحققهم لك .... وقلت ياواد ايش تطلب ايش تطلب مامعي الا دقيقتين ... وقاطعتني وقالت بسرعه ترا بروح واخليك ... المهم انا كان طموحي قصر اسكن فيه وشركه اديرها جنب البيت . وقلت لها الامنيه الاولى ان تبنين لي قصر كبير ... قالت القصر ابنيه هالحين وش امنيتك الثانيه ...قال ان يكون تابع للقصر ملحق لرويشد ...قالت بنينا الملحق .... قال الامنيه الثالثه ان اكون انا المسئول عن رويشد ... قالت اعتبر نفسك المسئول ومن ذاك اليوم وانا احب هالمكان واتمنى ان تطلع مره ثانيه علشان اشكرها تلقون هالحوريه كبرت وطاحت سنونها ولابسه نضارات اييه الله يذكرها بالخير ........ المهم ابوهم قام يتثاوب ويحق في اسفل بطنه ( سعودي معروف وين يحك اما مدخل يده في خشمه ماترده الا الكبكات والا يحك اسفل بطنه صالخ الدعوى )وبيني وبينكم اذا جى الواحد في الشارع تلقاه يمعر وخصوصاالي صالخين الدعوى تلقاهم يحكون كن بينهم تحدي .... والخوفه لو يطلع على واحد منهم المارد من كثر الحك....
المهم ابوهم قال ليش يامره ماجبتي معنى الا كنبلين لوس جايبه عددنا كان نمنا هنا ..قالت المره انا ماجبت ذا الكنابل مهوب انت الي جايبهم قال لا... قالت ياخزياه كنابل الناس وقاعدين عليها قوموا نمشي قبل مايجون ..وكل ذا وهالمساويك الي هم حنى تحت الكنابل ... و يوم سروا قمت بسرعه ادور خويي رويشد رفعت الكنبل مالقيته ... والله المشكله اكيد ناشب في بنتهم الدبا وش السوات .. وقعدت ذيك اليله ابكي واطلب من الله ان الحوريه تطلع علي واطلب منها انها تهد القصر .. و يوم رفعت الكنبل اليين رويشد لازق في الكنبل جنب صورة النمر والبنت الدبا قامطه على راس رويشد .. ادعي الله انها تفك الجلنط عشان يطيح الضعيف
وضفينا عفشنا ورجعنا لقريتنا الله لايخلينا منها

( اخوك الصغير المجهول )

[ابن ماضي]

هههههههههههههههههههههههههه
اما لازق في النمر ههههههههه الله يرجك


تسلم اخوي المجهول اسلوب ساخر وممتع

[المجهول]

الله يرجك



قازيت النمر هههههههههههههههههههههه \