تعريف الفشيلة.......!!

[وراءالكواليس]

الفشيلة


هي المواقف المحرجة التي تمر علينا .. وقالت العرب تفشل الرجل أي طاح وجهه وفي رواية ضاع وجهه

وقيل ايضاً فشل الرجل زوجتة أي قال لها انثبري وانطمي ولا كلمة...... قدام أهله

وفشٌل الرجل ولده أي قفل الخط في وجهه ... الله يرجه اكيد قال ابي فلوس

والفشيلة مأخوذه من الفشل ... والفشل .. هو صفة تطلق على مؤتمرات القمة العربية وهي مرتبطة بالشجب فيقال شجب الحكام العدوان الاسرائيلي أي فشلوا



ويمر على الانسان الكثير من المواقف المحرجة التي تصيبة بالفشيلة وكما قال محمد عبدة لا لا تردين الفشايل وش اسوي بالورق

ومن المواقف الاخيرة التي مرت علي وفشلتني ... قبل كم يوم رحت السوبر ماركت اشتري اغراض للبيت ... ودخلت واخذت العربية احط فيها اغراضي ليش اسمها عربية مهيب انجليزيه يمكن لانه لازم احد يحركهاويمشيها على كيفة!!!!

المهم بديت امشي بالسوق ... وكم من طفل كدت ادعسه بالعربية لاني معرف اسوقها وكم من امرأة بغيت اتوطا عبايتها

خلصت الاغراض ومن ضمنها شفرتين حلاقة صغيرة لي وجيت عند المحاسب وجا دوري وكان وراي بنات ... المهم المحاسب سعودي ... حسب اغراضي وخلص وحطوها بالاكياس وجيت اخذها واطلع ....

وفجأة !!!!

المهم احد الهنود اللي يشتغلون بالمحل ..

قال ..





صديق طلع شفرة من جيب ...



انا كنت ناسيهن في مخباتي ولا حاسبت عنهن


... وحسبوني سارقهن !!!


وتعال دور وجهي قدام الناس وسمعت صوت ضحكة ناعمة اتت من وراي لكن ما بغيت التفت لها حتى ما تشوف وجهي ويقولن لبعض خدوده صارن طماط (ايه هين طماط هو بصراحه اقرب للبيدجان!!!) ودفعت ريالين وطلعت ما ادري وين طريقي بسبب واحد رفيق ..جعله المصع

ومن المواقف المحرجة المفشلة التي قرأتها وسمعت عنها <<<(خطيرة هالكلمة ..صح)

قصة مريم والرضاعة ..!!

مريم فتاه بالعشرينات ... لها عائلة كبيرة واقارب كثيرون وخاصة من الرضاعة وهي لاتعرفهم جميعاً بسبب كثرتهم ... وفي احد الايام اتاها والدها وهي تجلس بغرفتها تمشط بقرونها الطويلة استعداداً لقصهن مدرجات ولا والا كراسي مسرح..

وقال يا مريم ... قالت لبيك يا ابتي ... قال بنتي روحي وسلمي على اخوانك وقرايبك من الرضاعة ... قالت استحى ياابي لا اعرفهم .... قال لاتستحين ولاشى ذولى اخوانك ..... قالت ابشر يبة وراح ابوها لغرفته يجيب شي....(وش عليكم منه).... المهم نزلت مريم للمجلس ولقت اخوانها اربع شباب سلمت عليهم وباستهم لانهم اخوانها بالرضاعة وجلست تسولف معاهم شوي المهم رجعت لغرفتها ... وجاء ابوها بعد شوية قال وينك ما سلمتي على اخوانك قالت توني رحت المجلس وسلمت عليهم يبه...؟؟؟؟

وينفجع ابوها ويصرخ فيها يا بقرة اللي بالمجلس ذولي ربع اخوك!!!! اخوانك بالرضاعه عندي بالملحق ....


اخويا اخوها ما صدقوا خبر (ادري فيه ناس بيقولون ليتنا معهم!!!)

وتستمر الفشايل جيل بعد جيل

ومن ضمن الضحايا المعلمة نوال .... في احد الايام تصحو نوال متأخرة عن دوامها ... وتردتدي ملابسها على عجل او خروف وتبلش وهي تصك السحاب دبة الله يرجها (مو دبه يعنى شوى سمينه لا لا تخينه لا لا اقولكم وارمه) ... وتنطلق الى مدرستها الثانوية ومباشرة تتجه لفصلها لان لديها حصة اولى وتدخل على البنات وعندما تدير نوال وجهها للسبورة تنطلق ضحكات عالية من كل ارجاء الصف وتتعجب نوال من هذا الامر فهي شديدة وشخصيتها قوية .... ماذا جرى للبنات .... فلماذا تلك الضحكات .........؟؟؟؟؟؟؟؟؟؟؟؟؟؟؟؟؟؟؟

لأن نوال نسيت ان ترمي بنطلون بيجامتها ولبست التنورة فوقة والمشكلة انه طويل اطول من التنورة والادهى والامر ان لونة اخضر وفيه نقط صفرا .... قبحها الله وش هالمزاج ياليته برتقالي مع اخضر كان تنبلع هي وبنطلونها الله يسعدها محلاها .

هذه بعض المواقف المحرجة التي تمر على الناس دائماً.... بس ما تلقاهم وتمشي



وتقبلو تحياتي

[بطيف]

مايحتاج تعرفها لانها اشهر من نار على علم ويامى صارتلنا مواقف

وتقبل بطيف

[Sub_Zero]

فشل يفشل فشيلة فشلانا فشلونا

تشكراااااااات وراء الكواليس على هيدا الموضوع الحلو

[وراءالكواليس]

ولو ....فيه ناس ودها تعرف بعض التفاصيل..



اسالني




******************


اوخيتي صب زيرو...يالله حيها...


انتي فيذا...


يسلمتس ربي على هالمسيار الزين


وترى توقيعتس ابطى... وش ذا المطبعة المدحدره الي مسويته عندها..


والا توهقتي وقلتي لربى الجنان ...فتيتت الفوتو شوب

....<<<<<انطم لا يجيك اكثر<<<<<مسج جاي من ام عبود

[المعنّى]

الله يرجك على المووووضوع الحلووو وخصوووصا المعلمه نوال الله يخارجنا

ما لقت الا اللون هذا

اما بالنسبه لذي
والفشيلة مأخوذه من الفشل ... والفشل .. هو صفة تطلق على مؤتمرات القمة العربية وهي مرتبطة بالشجب فيقال شجب الحكام العدوان الاسرائيلي أي فشلوا

انصحك تراجع نفسك فيها لان دايم عندنا استقبل وودع وشجب وبقوه ....!

يعني انتبه منها

ويعطيك العافيه على هيك مووووضوع
وتقبل تحياتي اخوك المعنى

[الوحش]

حسبي الله عليك وراء الكواليس تقطعت مصاريني من الضحك

بس خل عنك شفرات الحلاقة ياما صارت لي مثلها

أذكر مره رحت لم محلات أكسترا وشريت منهم كم غرض

من ضمنها شريط المهم رحت أحاسب أثر فيه قطعه لازم يشيلها المحاسب

والدلخ ابوهنود ماشالها وفيه جهاز عند الباب تمر عليه قبل ما تطلع ويم مريت

ويقعد ذا الجهاز يون ويجيني السكرتي قال وش معك قلت مامعي الا اللي في الكيس

واشوا اني ماخذ فاتورة من المحاسب واوريه ايها لاكنه ماصدقني ونروح لم المحاسب

ويقعد يتاسف لي المحاسب (لاكن وش عقبه عقب ماطاح وجهي )

واخوك في الله جتني عقده من ذا الجهاز الحين كل مامريت معه قلت يبي يصفر

تشكراتي على الموضوع

[وراءالكواليس]

والله يعافيك على مرورك وتعقيبك....

ومشكوور على النصيحه.....>>>>>افلقني ان سويتها..

[وراءالكواليس]

والله الفشيلة وش كثرها....>>>>الله يستر علينا بس ما يمر يوم ما نلقى اذن طايحه والا خشم متدودل



ويعطيك العافيه على مرورك

[وراءالكواليس]

ويعطيك العافيه...
ومشكور على مرورك