مسلسل زيارة ابو براهيم

[الملتمس]

مسيكم بالخير جميع 000
الف شكر لجميع الاخوان والاخوات اللذين اتحفوني بردودهم 00 وتعقيباتهم وتشجيعهم 000 والله لا يحرمني اياكم

واليكم الحلقة الثالثة 00

وقفنا في الحلقة الماضية على ( اذا جت الزيارة الاخرى ابجيب معي لك قاسمت الله كودك تاكل 00 ترى العافية في الأتسل 00 ولا يهمونك هالدخاتر وخرابيطهم 000


الحلقة الثالثة ( ما قبل الأخيرة ) 000


ويوم جا من باتسر وانا اللي اخذ معي لبو براهيم هاك المريدزيدزة ( المريقيقه ) اللي محموستن بودتسه ( الودتس = الودك = دهن يستخرج من شحوم الغنم والجمال ) وعليه قطيعات قفر من لحمة هرش ( قفر = لحم مجفف ) ( هرش = الكبير من الجمال ) يحبها قلبك 00 وانا اللي اجيبها 00 ويوم دخلت مع باب الصحية 00 يوم جاني هالأقشر اللي قالي امس ان الزيارة مابعد بدت 00 وقلت له : وش تبي ؟ تراني جاي في وقت الزيارة 00 قال : مهيب مشكلة 00 بس وشو هاللي معك ؟ 00 قلت له : ابد هذا اتسل جايبه لرفيدزي ابوبراهيم اللي مرقد عندكم 00 قال لي : ممنوع 00 ما يمكن انك تدخل معك اكل للمستشفى 00 قلت له : من يقوله ؟! قال : التعليمات كذا 00 قلت اها وهالناس اللي داخله وايديهم مليانتن اكياس 00 ورا ما تقول لهم شي 00 ورا ما رديتهم انت وتعليماتك 00 او بس جوداك علي انا ؟! قال : يا عم هذولا جايبين معهم مويه وعصير ومناديل 000 وهذي ما فيها شي 00 بس الأكل ممنوع 00
قلت اها الحين وش الدبرة ؟! قال خل الأكل هنا 00 واذا جيت طالع خذه معك 00 قلت له : معصي 00 تبي تاكله 00 اكيد انك مروحن ريحته وجايزتن لك 00 قال اجل وده للبيت لأنه ما يمكن انك تدخل به 00 قلت له : زين زين ابا اوديه واعود 00 واطلع واتوزا ورا الباب لي شوي 00 واقوم واوزي الأتسل تحت بشتي 00 وامر من عند هالأقشر 00 يوم قام يناظرني وانا اللي اصد عنه تسني ما اشوفه 00 وادخل بين الناس 00 وازرق معهم في الشق اللي في الجدار 00 وانصك علينا الباب ورقينا 00

ويوم وصلت لحجرة ابو براهيم 000 والى ما عنده احد 00 واسلم عليه واطلع الأتسل اللي معي 00 واعطيهياه 00 واقول له سم يابوبراهيم هالمرقوق اللي يحبه قلبك 00 كل 00 ترا العافيه فيذا ان شاء الله 00 وقام ابو براهيم يرم ويزدغ من هالمرقوق و قطيعات القفر 00 الين دكه العرق 00 تقل في قلبه فقرتن على الأتسل 00 واقعد اسولف انا وابو براهيم عن منول وزمان منول 00 شوي يوم تغير وجه ابو براهيم 00 وقام يصاوي ويتلوى من بطنه ويصيح علو حسه 00 يوم جو الدخاتر والممرضات 00 ويناظرون 00 وشافو ماعون المرقوق 00 وقالو لي وش هذا 00 ؟ قلت هذا 00 هذا الله يسلمكم مرقوق 00 قالو من اللي جايبه 00 ؟ قلت00 انا 000 وابو براهيم كله 00 قالي الدختور 00 وش سويت 00 انت تبي تذبح الرجال 00؟؟ !! قلت : احول وش سويت انا جبت له اتسل بس 00 قالو انت ما تشوف اللوحة المكتوبة فوق السرير 00 قلت الا اشوفها 00 قال لي وتعرف وش معناها 000؟ والا اللي مكتوب فيها عبارة بالقلينزي تقول ( Nothing By Mouth ) واقعد ابحلدز فيها شوي قلت له ايه اعرف معناها 00 قال وش معناها 000 قلت معناها 00 معناها 00 معناها الله يسلمك ( نرجو الهدوء لراحة المرضى ) 00 قال لي الدختور : هذي الله يصلحك معناها ( لاشيء عن طريق الفم ) 00 يعني هالمريض لاياكل أي شي عن طريق الفم 00 قلت اها انتم تبونه يموت من الجوع 00؟؟!! قال انت وش دخلك 00 هذا شغلنا واحنا عارفين وش نسوي 00 والتفت على اللي معه 00 وقال لهم : شيلو المريض الى غرفة العمليات وسوو له غسيل معده 00بسرعة ونادو حراس الأمن يشيلون هالشايب 00 برا < ---- هذا انا
وخلو السكيورتي اللي مسئول عن باب الزيارة اليوم يجي هنا الأن 00


 ماذا حدث لأبو براهيم بعد حضور الدكتور ؟؟
 ماذا فعل حراس الأمن بالملتمس ؟؟
 وهل عاد ابو براهيم للحياه ؟؟
 وماذا حدث لرجل الأمن 00؟؟


هذا ما سنعرفه بمشيئة الله في الحلقة الأخيرة 000 فانتظرونا 0000



[mover]من تصانيف الملتمس 00[/mover]

[الملتمس]

0

[ابو عبد العزيز]

الملتمس انحن في اتتظار ابداعاتك القصصيه بس تكفى لا تحط معاني الكلمات اذا كلش ولا بد حطهن تحت يمال السلامة,

[أبو يزيد]

اشكرك

[Sub_Zero]

ابداااااااع يالملتمس

خلاص هالكلمه نشبت بحلقي
الصلنصير

انهج علينا بالباقي واللي يرحم عيالك

[الملتمس]

مسيكم بالخير جميع 0000

> isz.... شكرن على مرورك 000 وبالنسبة لمعاني الكلمات 00 انا حطيتهن عشان التالين يعرفون وش انا اقول 00 ولو حطيتهن في آخر شي 00احس ان ما لهن طعم 000 عموماً تشكر على تعقيبك ودعمك 00

> ابو يزيد 00 اشكرك على مرورك وتعقيبك ؟؟

> Sub_Zero... تشكرين يا اخيتي على المرور والتعقيب والدعم 000 وان تسان فيه ابداع 00فهو بعض مما عندكم 00 تحياتي لتس وللجميع 00

> وادي ابا المياه شكلها حامت تسبدك من رزة الموضوع في راس الصفحة 000 بس وش اسوي 000 المونتاج تأخر علينا في الحلقة الأخيرة 00 وبيني وبينك تسني شفت المنتدى هاجدن شوي قلت ياولد اصبر 00 لكن تستاهلون 00 هذي هي الحلقة الأخيرة 000


وقفنا في الحلقة الماضية على 0000

وخلو السكيورتي اللي مسئول عن باب الزيارة اليوم يجي هنا الأن 00


الحلقة الرابعة والأخيرة 00

ويوم اوفيت لي شوي 00 ويجون الربع كلهم 00 ومعهم الحارس اللي من امس وانا وياه شيل وحط 00 ويقوم الدختور 00 ويتكلم عليه ويهزئه بصوت عالي 00 وقال : كيف تسمح بدخول الأكل للمرضى ؟ 00 قال والله اني مانعه لا يدخل به بس انه طلع برا وبعدين دخل مره ثانيه وما معه شي 00 قلت يعقب ويتسذب 00 والله اني داخلن من عنده والأتسل معي 00 < --- ما قلت لهم اني موزيه
قال الدختور 00 لحراس الأمن البادزين : خذو هالشايب واكتبوا بياناته كامله وبعدين طلعوه برا 000 وامنعوه مره ثانيه من دخول المستشفى الا بعد تفتيش شخصي 00 كل هذا وانا طايرتن بوهتي ولا ادري وش السالفة 00 ثم التفت للحارس خوينا 00 وقال له : اما انت فابا احولك للتحقيق 000

المهم الحراس ما تسذبو خبر 000 لقطوني لقطة قطو ميت 00 اللي ماسكني من يمين واللي ماسكني من يسار 00 وجرجرة مع الدرج 00 تسني سجين 00 ويوم اخذو صورة تابعيتي 00 وصوروني من جنب ومن قدام ومن ورا عشان ما نحاش منهم مرتن ثانيه 00 ويوم خلصو 00 ويجيببوني عند باب الصحية 00 وينطلوني الين تكرفست وطاح شماغي 00 ونقزت عصاي بعيد 00 وكل هذا وانا ما ادري وش اللي سويته 000 المهم اني قمت ولملمت رويحتي ولبس شميغي 00 وخذت عصاي وقمت امشي وانا اعرج الين وصلت للدار 00 واقعد ادهن رجلي وتستوفي وركيباتي 00 بفقس 00 وقريمزان 00 لين تشاويت بعد كم يوم 00
عقب هالسالفة باسبوعين تقريبا جيت على العويده للمشراق والا ابو براهيم جالس 00 وانا اللي اسلم عليه واحب راسه 00 وقلت له : الحمد لله على سلامتك 00 وما ترا باس وطهور ان شاء الله 00 قال : الحمد لله اللي فكني وعافاني له الحمد والشكر 00 قلت عاد اسمع يا بو براهيم 00 لايهمونك الدخاتره وخرطهم 00 ترا العافيه كلها من الله ابرك ثم من هاك المرقوق اللي جبته لك 00 يوم التفت علي ابو براهيم 00 وناظرني هاك النظرة اللي ما ادري وش معناها 00 ولا قال ولا كلمه 000 وهز راسه 00 وقام ومشى وخلاني 00 وتسنى سمعته يبتسي 000 انا قلت عمى وش جاه هالشايب عسى ما لعبو الدخاتر في عقله 00 00 وانا قاعدن اهوجس في هاللي سواه ابو براهيم 00 وانا اللي اسمع صوت هاك الفرامل ويوم ناظرت والا هاك الموتر اللي ياقف جنبي 00 ويحول منه رجال 00 و قرب مني ويوم شفت وجهه عرفته 00 00 صار حارس الأمن خوينا ما غيره 00 قلت هلا والله 00 وش عندك بعد 00وش جايبك 00 لا تقول لي ان القعده في المشراق ممنوعة تراني ابا اهقش راسك بهالعصا00 قال : ما اقول الى حسبي الله عليك يا هالشايب المقرود 00 وش الله جابك لي ووش جابني لك 00 قلت عسى ما شر 00 وراك علي 00 انا وش سويت لك 00 قال : تدري انهم فصلوني من العمل 00 قلت : اراه ؟؟ قال : عقب سالفت مرقوقك الله لا يعيدك انت وياه حققو معي ولقو ان هذي مهيب المره الأوله 00 وفصلوني 00 قلت : افا اثرك قبلك تخق 00 ناظرني بزعل 00 وقال : كله منكم يا هالشيبان 00 المره هذي انت والمرة الأوله شايب لعب علي وقدر يدخل ومعه جريش عل خلع 000 وعطاه مريض عنده كوليسترول وضغط وسكر 00 كله ومات 00 قلت : يابن الحلال الآرزاق بيد الله 000 واصب له فنجال قهوه وامده له 00 وقلت تقهو يا وليدي وما هنا احد يموت وبادزي له في الرزق شي 00000000000قال ايه بس فيه ناس قطاعين ارزاق 00000وقام 0000 وكانت هذه آخر كلمتن سمعتها 000000 ولا دريت عن نفسي وتوعيت الا وانا في الصحية 0000 وابو براهيم جنبي ويقول 000 سلامات 000 دفع الله بها ما كان اعظم 000 ويناظرني ويضحك 000 وجايبن لي معه 00000000
0
0
0
0
0
0
0
0
0
0
0
0
000000قدر مرقوق0000000

انتهى المسلسل 000
ترم ترم تررراااممم ترم ترم تررااامممم


حبايبي الكرام اتمنى انكم لقيتو في ما كتبت ولو شوية سعت صدر 000 وترا الهدف الضحك والوناسة ولكم جميعاً الشكر والتقدير على صبركم علي وطول بالكم 000


تحياتي للجميع

[ريـال فسحة]

المهم الحراس ما تسذبو خبر 000 لقطوني لقطة قطو ميت 00 اللي ماسكني من يمين واللي ماسكني من يسار 00 وجرجرة مع الدرج 00 تسني سجين 00 ويوم اخذو صورة تابعيتي 00

خخخخخخخخخخخخخخخخخخخخخخخخخخخخخخخخخخخخخخخ

الى الحين تابعية ؟؟ههههههههههههههههههههههههههههههههههه


الله يرج شيطان مندوبك ياشيخ


رهيييييييييييييييييييييييييب قسم بالله رهيب



ماقصرت والله على هالموضوع الحلو


وارشح هذا الموضوع كأفضل موضوع في هذا الشهر

[ابو عبد العزيز]

.
الملتمس القصه حلوه بس احس انك قطعتها في النهايه .
وفي الختام لك مني احلى سلام

[عاشقة سديـــر]

وش ذا الحتسي ....يالملتمس ...!!

(حبايبي الكرام اتمنى انكم لقيتو في ما كتبت ولو شوية سعت صدر 000 وترا الهدف الضحك والوناسة ولكم جميعاً الشكر والتقدير على صبركم علي وطول بالكم 000 )<<الحين القصه من اولها لاخرها تموت ضحك وانت تقول (اتمنى انكم لقيتوا شوية سعة صدر )...

اقول بيني وبينك (كان بقى معك شوي من المرقوق حق ابو براهيم ...روحه للمنتدى ...ترى طقتني الشهوه وودي اذوقه ;) )

وبعدين لعد تكثر من متابعة (القناة الاولى )<<شكلهم اثروا عليك من كثر ما يقطعون في هالتمثليات وخذت الطبع منهم <<كمل القصه ترى بنشتكي عليك عند وزراء الاعلام في المنتدى (مشرفين شباب سدير )

ولا تحرمنا من ابداعك ....كلما سويتا مصيبه مع حدا هالشيبان اكتبها وخلنا نضحك عليك ....;) ;)

ومشكووووور على هالقصه الرائعه

[الملتمس]

مسيكم بالخير جميع 0000
بداية احب ان اشكر كل من تعنى وقرأ هذا الموضوع وكل من عقب عليه 00 وهذا شرف لي اعتبره تاج على راسي 00وشكر خاص للأخوان اصحاب الردود الأخيرة 00 ( ريال فسحة - وادي ابا المياه - isz - عاشقة سدير 00 ) تحياتي لكم جميعاً 00 وعلى امل لقاء في مسلسل آخر من مغامرات الملتمس 00



تحياتي وشكري لكم 000 والله لايحرمني اياكم 00 يا سنايدي