ارجوا قرائتها للفائده المرجوه...
رجعت ذاك اليوم للبيت وانا مطفر كالعادة الشهريه عفوا كالعاده وامبير البنزيم مصفر والموتر يمشي على الريحه سلمت على اميمتي ودخلت الحجره حقتي ابنام والى دحيم اخوي سابقني على السرير ونايم...ما عندنا الا هو.. قمت وتعوذت من ابليس ومن دحيم وفرشت المطرحه اللي تحت السرير واولع اللمبه السهاريه وانسدحت ( على بطني ) وصرت افكر ؟؟ الى متى وانا داج وداشر في الشرَع ؟ ليه ما اشتغل واعرس ؟ والاني اسمع صوت امي وهي تدخل علينا صويلح ..قلت سمي فيه عشا .. قالت فيه غش يغش بطنك وين هو منه ..من طحانة امك ..انا جايت اقلك اني لقيت لك شغل!! قلت بس ... طيب وين في اي مكتب وكم الراتب ... طيب دوام ولا دوامين ؟؟ قالت مالت عليك يالجامعي ؟؟ اسمع بس بدال ما تسرسر في هالكسره اللي مسميها سياره .., قلت لها ها عاد عن الغلط انتي عزيزه وغاليه خلينا حبايب ( والله لو قلتها كان تفلت في وجهي ) قالت وش رايك توصل بنات الحاره لمدارسهم ؟ منها تستفيد بدال جلستك ؟ قلت ليه ابو رويشد على غفله ؟ لا ماني موافق قالت ياوليدي هم ثلاث بنات ؟ بنت فلان وبنت فلان وبنت فلان << بس يوم قالت بنت الاخيره وانا الي افز تسني مهبول و انقز على السرير وعلى كرشة اخوي دحيم ويقوم المسكين يشاهق من الوطيه , قلت انا موافق والبنزين بعد على , بقت امي عيونها وقالت سبحانه !! المهم في ذيك الليله ماذقت النوم اسال نفسي كيف بترضى تركب معي في هالكسره طيب كيف البق عند بيتهم ؟؟ هو بيتهم لو جيت من عند جهة المخبز يصير على يساري ؟ بس انا بجي من اليمين من جهة دكان اليماني ..ايه البق من جهة اليمين وهي تركب في ( المرتبه اللي ورى ع اليمين ) تمام واطالع قزازة الطيب اللي شريتها من عند المسجد واقول اكيد هي مهيب مستحمله ريحت الزيت والبنزين باابخ على مرتبتها بختين كل يوم ايه تستاهل ..المهم ذيك الليله نمت في الجالنت ( من الخرمه ) الين طلع الصبح ( الاخ مايصلي ) وانقز احمي الموتر وابخ ذيك البختين اللي ترد الروح وانطلق ومع ان بيتهم ابعد بيت الا اني مريتها اول وحده تعرفون الحب وش يسوي ابي نكون مع بعض لحالنا ولو لحضات واوصل البيت واصفط الموتر من جهة اليمين وانتظر ... حتى من حبي لها ما سطيت اضرب بوري مابيها تطلع وهي مخروشه ابيها على راحتها وانتظر اللحظه ... وتطلع واحط عيني في عينها اقول هي ولا يبون يغشوني ويجيبون خدامتهم ؟؟ والله وتطلع هي اموت انا عليها ..وهي ولا على بالها .. ايه هذا هو الذهب الاصلي وتفتح الباب اللي ماانفتح من سته شهور وتسمع صرصرته تقول باب خشب( من قلت الشحم ) وتقعد على المرتبه ..قلت صبحتس بالخير ..واشكل ..تقول محاتس اصقه .. وادوس على البنزيم والفلف على الناس يمين يسار وهي مع كل حركه اسويها تقول ( بسم الله .. الله يستر يالله العافيه .. وش ذا الخبل ) وانا اسمعها واتشقق ايه خبل والف خبل هماه منها.... وامر على دكان ابو يمن مع اني اتنحش عنه يطلبني قروش ..الا اني في ذاك اليوم مبسوط وطقيت له سلام جمهوري بعد ..
المهم وامر على البنات الثانيات واضرب بواري واخرشم مانيب فاضي وللي تتأخر ثواني او ما احصلها عند الباب احرق ام البواري ..وانا الي اركبهم وامشي وكنت كل ما اوصلهم على الطريق اذا جيت ابا الف على اليمين طقيت ذيك النظره ولا احد عندك لا واحيانا اتعمد ما اعبي الرديتر عشان تحتر السياره وانزل انفخ قدامهم...
ومرت الايام وانا على هالحاله حتى الصبح صرت اصحى اول واحد يعني صارت عندي وظيفتين سواق وديك .. وديكنا من شافني اقوم قبله دلا معاد يذن ... المهم ضاقت بي الدنيا وقلت ياولد ورى ما تعرس عليها ؟؟وتفك نفسك من التلفت ورى والله ارقبتك ما عاد تلف يسار صارت كلها يمين ..واذا اعرست عليها تبي تصير تركب قدام ايه زوجتي .....
وذاك اليومارجعت للبيت وانا ارقل من الخوف..واشوف ابوي في المجلس متركي وانا اللي اسلم عليه..رد علي وهو يقول وش عندك يالورع قلت ايه مدام هذي بدايتها ورع عزالله ما عرسنا...خل اروح لااميمتي هي اللي فاهمتني
واقابلها وهاك ياحب على راسا وعلى يدها وركبها وهي تقولي وراك ياوليدي بسم الله عليك عساك منتب حاس بمنيتك ..قلت لها لا يمه ابي اعرس..ابي ولدي يسوق من بعدي ويريحني..وهي اللي تفك ذيك الابتسامه من الاذن للاذن وقالت هذي الساعه المباركه .. ومن المسيكينه ذي اللي بتقدر تدف معك الموتر كل صبح ؟؟؟ قلت سوير بنت جيرانا . قالت منهي ؟؟؟!! قلت لها كلامي ما ينعاد ( مسوي عريف فصل ) قالت لا ياوليدي الزواج قسمه وبن نصيب .. الزواج قسمه ونصيب قلت لها وش السالفه ؟؟قالت عرفت رويشد الدلخ ولد جيرانا .. قلت ايه .. .. اللي عنده جلنت 2000 ( الحاره كلها متسوبيشي ) قالت ايه تراه عقد عليها. وانا الدنيا تقفل في وجهي قلت... خيييير وادخل الغرفه والقى اخوي نايم على السرير ( 24 ساعه نايم ) وانا اللي اولع اللمبه و اتركا على الجدار وفيني الجوع( قصدي الصيحه ).. ليه حضي تسذا وليه الدنيا مقفله بوجهي ليه انا من بد البشر مادرست ولا تعلمت وعندي موتر 85 والقهر ذهبي ويوم جيت افرح بدنيتي عطاني الحظ دبل كيك..
وما ذقت النوم في ذيك الليله واروح الصبح على الجلنت واناظر في المرتبه اللي ورى ع اليمين وتنزل الدمعه وكان ودي اخلع ام المرتبه بس ماعندي سكاريب سرقها سعيد ولد جيرانا راعي السياكل .... حرام واحد يجلس عليه بعدتس..ومن القهر فكرت اقلبه صندوق؟؟ واروح اجيب قزازة الطيب وابخ المرتبه 17 بخه قلت عساها تحن وتفهمني.. وامرها وانا مضيع دروبي وبردااان واصفط في نفس المكان ولا تقول اختبار موقف في دله وانتظرها.. عساه اخر يوم تركب معي وينفتح الباب ......البقيه لاحقاً
سوف نكمل لاحقاَ...
16-03-2004, 03:20 PM
ههههههه خهه
العرض العادي
