عضوة في دائرة الضوء

[الملتمس]

ام عبد الله 000 الله حيها 000 وشلونتس عساتس طيبه 000 وين الله جابتس 00 هذي والله الساعة المباركه 00

اولاً آسف على التأخير في المشاركة 00 لأني كنت مشغول في تلقيح النخل 00 وتفقد المزرعة عقب هالسيول وهالخير اللهم لك الحمد 00

وخذي هذي اسئلتي وجاوبيهن كلهن 00

1 - هو انتي تعرفين تطبخين طبخ الأولين 00 والا انتي من فيدين كتاب ابله نظيره < همه بطنه

2 - وش ازين وقت تقعدين فيه عند الكمبيوتر 00

3 - وشو في رايتس افضل طريقه تخلي المنتدى يشعلل ولا ينام بعض المرات 00

4 - وراتس ما تسيرين علينا في منتدى الديره ( سؤال مهم )

5 - وش هو التصرف اللي تبين تسوينه في هالموقف ( 00 شبيتي على الغدا ويوم بدا يجهز قصرتي على الضو علشان يشرب الرز 000 والدجاجة حطيتيها في الفرن عشان تحمر 000 ورحتي تخلصين بعض شغل البيت 00 وجا عبود الله يصلحه ولعب في القز 00 ورفع على الضو 00 وانحاش 00 ولا انتبهتي لين اروحتي ريحة الحرق 000 وابو عبد الله بادزي له شوي ويجي ويبي الغدا على طول 000 وش تسوين 00 ( ملاحظة على افتراض ان ابو عبد الله ما يحب اتسل المطاعم )

جاوبي على ما سبق 00 ولي عودة

لتس تحياتي

[هرمنا]

هلا ام عبد الله

س1 : وش سالفة اسمك القديم سيرينا ووش معناه؟

س2:لو طلبوا منك مدرسة عبودي قطة للمدرسه 1000 ريال وش رايك؟تدفعين والالا؟

س3 : تنقلتي في الاشراف على ثلاثة اقسام .وش القسم اللي تحسين انه قريب لك؟


ودي اسال اكثر بس الاخوان سبقوني في الاسئلة اللي بغيت اسالك فيها


تحياتي

[من يفهمني]

احم احم تغطو يا بنات انا جيت
انا عندي سؤل؟؟ ليه تفحطين في البيت لما تجبين الغداء او العشاء لماذا؟؟
السؤل الثاني :كم عدد اصابع الخروف؟؟
السؤل الثالث :ليه القطوه تقول مياووو؟؟
السؤل الربع : ليه تخافين من الضب؟؟
السؤل الخامس : ليه ما تعرفين تطبخين المرقوووق؟
السؤل السادس: ليه يحترق معك الكيكه؟؟
السؤل السابعه: كم عدد اسنان البطه ؟؟
السؤل الثامن : ليه تشربين المويه اذا صارتي عطشانه؟؟
السؤل التاسع: هل تويدين الزوج المبكر !لماذا؟؟
السؤل العاشر: لماذ تكلين في الملعقه بدل ايدك :
السؤل : ليه ما تحطين خيار وليمون وطماط و بصل علي الرز؟؟
اعزرني مستحي ان اسال اكثر من كذا

[سعود الخليل]

بصراحه كنت ناوي اقدم بعض الأسئله لك يا ربى الجنان لكن والله يوم شفت هالأسئله رحمتك وقلت ما يحتاج الشباب ما قصروا معك لذا أدعو الله ان يكون في عونك وان تجاوبي عليها كلها ..،،،،،


تحياتي .

[ربى الجنان]

اخوي الملتمس حياك الله ...ويسعدنا ان تطرح أسئلتك..
اولاً آسف على التأخير في المشاركة 00 لأني كنت مشغول في تلقيح النخل 00 وتفقد المزرعة عقب هالسيول وهالخير اللهم لك الحمد 00 ======>تقهرني يعني!!



1 - هو انتي تعرفين تطبخين طبخ الأولين 00 والا انتي من فيدين كتاب ابله نظيره < همه بطنه
الصراحه راحه ماعرف للمرقووق والمطازيز والقرصان ..أعرف بس أبل القرصان اذا القرصان جاهزه .زأعرف جريش ورز ..
2 - وش ازين وقت تقعدين فيه عند الكمبيوتر 00
اذ نامو عيالي الله يصلحهم ...

3 - وشو في رايتس افضل طريقه تخلي المنتدى يشعلل ولا ينام بعض المرات 00
أمممممممممممم كثره المشاركات و الردود يعني اذ ا نااام المنتدى نقعد نررد على هالمواضيع أو نرسل للاعضاء نتفقدهم

4 - وراتس ما تسيرين علينا في منتدى الديره ( سؤال مهم )
هااااااااااااااااااو ماعاد ورى همااي مشاركه في موضوع الملف الصحي وشكرتك وموضوع مهرجان متوسطة الحووطه وموضوع السيووووووووووول ...وكلش بس مواضيع ماعندي ...

5 - وش هو التصرف اللي تبين تسوينه في هالموقف ( 00 شبيتي على الغدا ويوم بدا يجهز قصرتي على الضو علشان يشرب الرز 000 والدجاجة حطيتيها في الفرن عشان تحمر 000 ورحتي تخلصين بعض شغل البيت 00 وجا عبود الله يصلحه ولعب في القز 00 ورفع على الضو 00 وانحاش 00 ولا انتبهتي لين اروحتي ريحة الحرق 000 وابو عبد الله بادزي له شوي ويجي ويبي الغدا على طول 000 وش تسوين 00 ( ملاحظة على افتراض ان ابو عبد الله ما يحب اتسل المطاعم )
عاادي أحط خبزه على الرز عشان تنشال ريحة الحراااااااق وناكله

جاوبي على ما سبق 00 ولي عودة
]

[ربى الجنان]

أهلن بالغائب الحاضر ..السبعين..


س1 : وش سالفة اسمك القديم سيرينا ووش معناه؟
ماله أي سالفه مره ولدي يطالع رسووم متحركه بات مان والحرمه اللي معااه أسمها سيرينا وأنا ماكنت لاقيه شي أسجل به ويووم سمعت الاسم على طووووول سجلت به ..

س2:لو طلبوا منك مدرسة عبودي قطة للمدرسه 1000 ريال وش رايك؟تدفعين والالا؟
بالنسبه لي بدفع بس المشكله أبوووه مارح يدفع ..بيقعد سين وجيم..

س3 : تنقلتي في الاشراف على ثلاثة اقسام .وش القسم اللي تحسين انه قريب لك؟
قسم شباب سدير ========>بتنطق من ثلاثتهم ...
تبادل وادي ابا المياه رح لقسم المراءه وانا هنا...

[ربى الجنان]

حي الله من يفهمني...

ليه تفحطين في البيت لما تجبين الغداء او العشاء لماذا؟؟
عشان يبرررد أسررع لهم ياكلونه
السؤل الثاني :كم عدد اصابع الخروف؟؟
الظاهر خمسه
السؤل الثالث :ليه القطوه تقول مياووو؟؟
دلع
السؤل الربع : ليه تخافين من الضب؟؟
عشانه يلفط
السؤل الخامس : ليه ما تعرفين تطبخين المرقوووق؟
عشان صعب رقه بالايدين
السؤل السادس: ليه يحترق معك الكيكه؟؟
ولدي يطووول على الفررن
السؤل السابعه: كم عدد اسنان البطه ؟؟
هي لها أسنان؟
السؤل الثامن : ليه تشربين المويه اذا صارتي عطشانه؟؟
من قال لك أنا أشرب عصير
السؤل التاسع: هل تويدين الزوج المبكر !لماذا؟؟
نعم ....عشان الفرصه مرره وحده مهوب قبل يجي الرجل
السؤل العاشر: لماذ تكلين في الملعقه بدل ايدك :
يدي مجروحه بسم الله علي...اها بس ماعمري كلت بالملعقه الا في العزايم يعنني عند الناااس
السؤل : ليه ما تحطين خيار وليمون وطماط و بصل علي الرز؟؟
أحس انه قديم........
كل ذا ومستحي؟؟

[ربى الجنان]

أحوووووول راعي الاوله أسئل عااادي ..

راس مالها أسئله

[ابو دحيم]

تحيه طيبه



هلا بك اختي ربى والشباب وفو وكفوووو بس عندي بعض لاسئله ولو كانت جديه شوي الشباب والشابات ما قصرو عطوك .



س / ما رأيك في دخول المرأة لنت ؟؟؟؟؟؟؟
س / هل استفدتي من النت ام هو تسليه ؟
س / في زواجك وغربتك عن موطنك الاصلي سدير هل هي تجربه تنصحين بها ( يعني تنصحين الزوجه تذهب مع زوجها لاي مكان يذه بسبب عمله )
س / ما رأيك في وضيفة المرأه التي تتخالف مع متطلبات زوجها واولادها .
س / لو كان عند ولدين متقارين في السن مختلفين في الطباع واحد اقشر والاخر هادء الطباع والاول دايم يغلط على الثاني فكيف تتعاملين معه بتوبيخ الاول دائماً ونصرت الثاني ام كيف ؟؟؟؟؟
س / هل انتي مشتركه في منتديات غير سدير وان كنتي مشتركه فهل تتفاعلين معه كما هنا ؟؟؟؟؟
س /لو فرضا فرضاً كان ابو عبد لله عصبي ومعاني لا قدر الله كيف تتعاملين معه ؟؟؟؟؟؟
س / هل تتاثرين بالاخرين ؟؟؟؟؟ وفي ماذا ؟؟
س / هل انتي ممن يعكف عند التلفزيون وماهي البرامج التي تشدك فيه ؟؟؟؟



ملاحظه :

1 / الاسئلة يحتاج لها تفصيل وبرايت قلم كم مره .
2 / لك الحريه في الاجابه على اي اسئله مما تريدين والي يزعجك تناسيه .



لك مني كل التقدير والاحترام

[ابو دحيم]

تحيه طيبه


نسيت



الاخت شمعة سدير والله الموضوع جداً رائع .

ارجوا منكم الاستمرار.




لك تحياتي

[ربى الجنان]

حياك أخوي أبو دحيم..



س / ما رأيك في دخول المرأة لنت ؟؟؟؟؟؟؟
هااو وش تبين أقول لك يعني عيب ..والله إذا المراءه ظابطه نفسها ومحترمتها فلا مانع لدي سعادتي..
س / هل استفدتي من النت ام هو تسليه ؟
صراحه أستفدت الكثيرررررررررر
س / في زواجك وغربتك عن موطنك الاصلي سدير هل هي تجربه تنصحين بها ( يعني تنصحين الزوجه تذهب مع زوجها لاي مكان يذه بسبب عمله )
اكيد أنصحها تكون معاه في السراء والضراء بس اهم شي يكوون محترمها وحاشمها ومقدر تغربها عشانه
س / ما رأيك في وضيفة المرأه التي تتخالف مع متطلبات زوجها واولادها .
بصراحه أنا ضد الشي هذا ...وللمعلوميه مادخلت الجامعه عشان الشي هذا..
س / لو كان عند ولدين متقارين في السن مختلفين في الطباع واحد اقشر والاخر هادء الطباع والاول دايم يغلط على الثاني فكيف تتعاملين معه بتوبيخ الاول دائماً ونصرت الثاني ام كيف ؟؟؟؟؟
لا بحاول أبوبخ الاول لاكن بلطف وأفهمه غلطه وين ..
س / هل انتي مشتركه في منتديات غير سدير وان كنتي مشتركه فهل تتفاعلين معه كما هنا ؟؟؟؟؟
نعم ..........ولاكن تفاعلي قليل جدا..
س /لو فرضا فرضاً كان ابو عبد لله عصبي ومعاني لا قدر الله كيف تتعاملين معه ؟؟؟؟؟؟
مدري
س / هل تتاثرين بالاخرين ؟؟؟؟؟ وفي ماذا ؟؟
أتاثر اذا وحده من صديقاتي عندها مشكله مع زوجها
س / هل انتي ممن يعكف عند التلفزيون وماهي البرامج التي تشدك فيه ؟؟؟؟

أحب اطلع الافلام وبعد مافتحو mbc2خلالاص صرت معسكره عندها..اللحين أرد وأطالع فيلم..




يسلمو أبو دحيم................

[ســحــاب]

يوووووووووووووووووووه ياكثر الاساله ياربى عليك
انا عندي سوال واحد بس
وشو اللي جاء قبل الثاني البيضه والا الدجاجه مع الشرح وبالرسم
(اختبار وزاره )
واذا جاوبتي بجيب لك كم سوال بعد

[شمعة سدير]

اشكر جميع الأعضاء الذين شاركوا

واشكر أختي الغالية أم عبدالله


وهنا تنتهي اختنا ربى من الأسئلة بعد الإجابة على سؤال سحاب

[ربى الجنان]

المشاركة الأصلية كتبت بواسطة   باقتباس من مشاركة ســحــاب يوووووووووووووووووووه ياكثر الاساله ياربى عليك انا عندي سوال واحد بس وشو اللي جاء قبل الثاني البيضه والا الدجاجه مع الشرح وبالرسم (اختبار وزاره ) واذا جاوبتي بجيب لك كم سوال بعد

اذا عرفت علمتك
تبي رسمه ..
!!!