الله يوفق الي ترد00ابغي طريقه الهريس

[لمسه حنونه]

الله يساعد ويحقق الي تبي الي تقول طريقه هريس اسدير مابغي هريس الكويت ابغي هريس سدراوي لانه طعم000ولزانيا 0لاني كلما سويتها طلعت عجين يعني تنعلك مو زي المطاعم00تكفون الي تسويها تكتبها لي0وجزاكم كل خير

[ام سديـم]

حياك الله

عندي طريقة للازانيا واعتمدها دايم

اول شيء تسلقين اللازانيا بموية وزيت .. انا أكثر زيت عشان ما تتلصق

الحشوة سهلة وبسيطة :

تكشنين بصل وثوم و تحطين اللحم المفروم والصلصة وبهارات طبعا

وبقدونس او كزبرة وممكن فلفل بارد قطع صغيرة

طريقة الباشميل او الكريمة

تسيحين زبدة و ملعقة ونص دقيق

وتصبين عليها كأس حليب وتبشرين عليها ماجي وفلفل أسود

وتحركين اذا بدى يثخن صبي عليها كريمة خفق تطلع ألذ


الحين جيبي صينيتك وحطي بالترتيب .. صفي اللازانيا وبعدين شوي

حشوة وفوقها شوي باشميل وهكذا الين مايخص اللي عندك

وطبعا فوق تصبين باقي الاباشميل وتبشرين معه جبن مازورلا أو تشيدر

وتدخلينها الفرن

وممكن تسوينها بطريقة الرول

تجيبين المكرونة وتحشينها باللحم وتصفينها بالصينية وتصبين فوقها الباشميل والجبن المبشور

وتدخلينها الفرن


وبالعااااافيـــة

صح هي دسمة بس لذييييذة مرة

[شـمـ إمرأة ــوخ]

.
.
.



ياسلام عليك يــ أم سديم

شغل تمام الله يحفظك يارب

بالنسبه للوجه حلو لو حطيتي فوق الباشمل
قشطة وفوقها تبشرين الجبين

او تحطين على وجه الباشمل بالفرشه صفار بيض
ثمن تبشرين الجبن يعني لزوم جذب الأنظار وفتح الشهية


بالتوفيق يالغلا


.
.
.

[لمسه حنونه]

الله يعطيك الف عافيه يام سديم00طيب كم مده السلق يصير لونها ايش اذ استوات علشان ماتتقطع00وا00سلقها في صنيه00معليش طولت00وشكر شموخ امراه على المرور

[ام سديـم]

الله يسلمك

يكون باين من استوائها يعني يتغير حجمها شوي ولونها يتغير

انا اقطع قطعة صغيرة من الزاوية و اشوف مستوية والا لا

وزي ما قلتي الأفضل تسلقينا بصينية عشان ما تلتصق اذا كانت بقدر

موفقة

[أم فيصل]

لي عوده للموضوع بإذن الله ..

: )

[أم فيصل]

عدنا :

بالنسبة للهريس هذي الطريقه اللي اسوي ولذيذه مره ..

اغسلي الهريس ..

جيبي دجاجه واسلقيها ونتفيها وشيلي العضامه برا ..

في نفس القدر اللي فيه مرق الدجاج حطي الهريس والدجاج بعد ما تنتفينه والملح والزيت وكزبره ناشفه مطحونه ..

حطيه على النار الين يغلي وبعدين خليه على نار هادئه لمدة 4 - 5 ساعات والنار هاديه مره ..

وطبعا كل نصف ساعه تدقين الهريس بالمدق ..

وعند التقديم يوضع عليه الزبده ..

وبس واي سؤال تحت امرك ..

واذا حصل فرصه ان شاء الله اسويه واصوره لك ..

واللازانيا ما قصرت ام سديم ..

لكن انا اضيف جبنة المزريلا بين الطبقات بعد مو فوق بس وتطلع لذيذه ..

وبالنسبه للسلق يفضل يكون بصينيه او قدر وسيع وتكثرين الزيت عشان ماتلصق ببعض ..

وايضا ماتكثرين السلق عشلن ما تتقطع عليك ..

: )

[لمسه حنونه]

الله يعطيكم العافيه00طيب يام فيصل الهريسلامايحط فيه لبن علشان يصير ابيض00وتسلم يدك

[أم فيصل]

لا ابد ما نحط فيه لبن ..

هو فيه ماده نشويه تطلع مع الطبخ ويصير ابيض ..

عكس الجريش هو ..

[قمر توب تن]

يا قلبي يا أم فيصل الهريس وشو أنا ما أعرفة وهل يختلف عن الرز المصري ووش أسمه في البقالات ويعطيك العافية يا أم فيصل

[أم فيصل]

ياهلا قمر ..

الهريس اسمه حب هريس وليس الرز المصري ..

ماتلقينه بالبقالات ولا السوبر ماركت ..

بصراحه امي اللي تجيبه لي ماقد شريته ..

تجيبه من الديره سوق الديره ..

ولا اعرف وين بالضبط ..

بس اتوقع انه من عند المطاحن اللي تبيع الجريش وخلافه ..