الحين النظرة الشرعية للأم وإلا للولد؟؟

[بنت عشيرة]

السلام عليكم ورحمة الله وبركاته

موضوع وصلني ع البريد وأحببت أن أطرحة عليكم


.
.

اليوم بقول لكم قصة وحدة من البنات
بس هذي القصه انا متأكده انها حاصله في كل بيت فيه بنت في سن الزواج
و اخوانا الشباب ما حسو لا فينا ولا في خواتهم

و كل ام حاسه ببناتها بس احساسهم مايغير شي بالموضوع

مابي أطول عليكم بدخل بالقصه على طول









ام عبير اتصلت عليها حرمه تخطب لولدها خالد

و تمدح فيه و تمجده كأنه أحسن ولد في العالم
وتسئل عن عبير تقول :
والله يا ام عبير يقولون بنتك عبير حلوه صدق؟؟

ام عبير ترد :الحمدالله بنتي جميله و مايعيبها شي
ام خالد : عساها طويله ؟ عساها بيضاء؟ شعرها ناعم ؟
كيف جسمها
بالله وصفيها لي

ام عبير تحاول تجامل وتمسك اعصابها

ام خالد : ها يا ام عبير متى يناسبكم نجي نشوف البنت !!
ام عبير: والله يا ام خالد عبير تفضل ان الولد يجي وبعد مانسئل عنه هو يشوفها


ام خالد : وشوووووووو من جدك اصلا البنت مالها راي الشور شور اهلها وانا لازم اشوف الي ولدي بياخذها يناسبكم باتسر؟؟

ام عبير برد لك بكرا
تنتهي المكالمه وتنادي الأم بنتها وتقولها ها وش رايك موافقه

عبير : على ايش؟
الأم :على الولد
عبير : لا شفته ولا عرفت عنه شي وشلون اوافق
الأم :خلاص بواعد اهله وشوفيهم
عبير : وش ابي بأهله باخذه هو ولا اهله
و بعدين فكينا من سالفة الأهل احنا اتفقنا اي موضوع يكون بينا وبين الولد على طول
انا ماابي اعرض نفسي على الحريم انا انسانه مو ناقه مميزه جايين يشترون و البيع ل أعلى سوم
كم مره دخلت على حرمه و حرمه يجووون ساحبين خواتهم و بناتهم وقهوه وشاهي و معجنات وحلا وكركره والفرجه بلاش
وبعدها يروحون ولا نعرف ردهم
خلاص انا مليت انا انسانه عندي كرامه و مشاعر و احاسيس مابي هذا الوضع يمه خلاص




الأم مصر على انهم يجوون وش تسوي تبي الستر لبنتها !!

عبير تستسلم زي العاده

بعد ماقالت لها امها جهزي لبسك مانبي لا بنطلون زي اول مره يمكن كان هو السبب
ولا تنوره قصيره زي ثاني مره
و شعرك لاتخلينه كيرلي هذولي يحبون الناعم
و دهني بفكس خلي لونك يفتح تراهم يحبون البياض !!!

عبير جوابها !!لاتعليق

تاخذ عبير جوالها وتكلم صاحبتها ساره
و تطلب منها لبس يناسب اصحاب المعالي لأن ملابسها ماتتوافق مع المقاييس العالميه للأم السعوديه

و يعلنون حالة استنفار في البيت لأستقبال الضيوف الموعودين

الأطفال يرسلونهم لخوالهم و صياني الحلا و الموالح تتجهز و البخور يتولع

و يجون الضيوف و تستقبلهم الأم

طبعا ام الولد و توابعها اختها بنتها بنت خالتها اللي يجي
ماهي الفرجه بلاش

بعد السوالف و القهاوي
تدخل عبير
و العيون تراقب
داخله وهي كأنها تقول شوفوني عساني عاجبتكم
عساني مطابقه للمواصفات و المقاييس !!
تطلع و يطلعون وراها

من ذلك منزل الذي احتفاء بهم وكرمهم وعرض لهم سلعه من سلعه والابن ينتظر هاه عساهم جازتلكم
(( و ((اه بس يامخفه لو بتشتري سياره انت اول من يحددها
يمر يوم يومين ثلاث اربع ولاحولك احد
محد دق ولاحد اتصل وبنت تقول خلاص ميئوس منهم
وتمر الاشهر والبحث جاري مابين بيوت خلق الله مافيه بيت ماطقوه ولافيه عائله ماشوفوا منها
والابن في انتظار
و البحث جاري و المشاعر مالها حساب عندهم
البنت تبدا توسوس وش فيني
انا شينه؟
طيب الكل يقول عني حلوه؟
ياربيه
معقوله اعنس؟
معقوله محد يبيني!!

طيب ليه ما ردو !!
ويبقى السبب مجهول

و عبير خاطرها مكسور

مين يواسيها !!
امها الي ضايق صدرها اكثر منها على كسرة خاطر بنتها ولا الخطيب المجهول !!الي يمكن حتى هو مايدري ان اهله جايين يشوفون له


طبعا محد رح يواسيها
صديقاتها مثلها ماهما سعوديات بعد و النظام ماشي عليهم
يعني لا تشكيلي واشكيلك ولا تبكيلي و ابكيلك

ولا صاحبتها اللبنانيه عشان تضحك عليها و تقولها لك شو هالتخلف

..............


يا ناس حرام عليكم
الله و رسوله ما قالو كذا

ليه أجازو النظره الشرعيه لأن الولد نظرته غير عن امه


مره حريم رايحين يشوفون وحده لولدهم و والولد هو الي موديهم
لمى شافه الأبو عند الباب سلم عليه و دخله
واعجب بأسلوبه
وقاله بنادي لك بنتي
و شافها وشافته

طلعو اهله من بيت البنت وهم يقولون
البنت ما تصلح شينه
الولد قال الا تصلح و انا شفتها و اعجبتني


و تزوجو و انسترو






مايستفاد من الحكي هذا كلو و القصه
ياناس احنا بنات حمايل ولنا نسايب وعايشين ونتنفس
اسئلو عنا وبتجيكم مواصفاتنا
بعدين يجي هو وشووله تجون
انا باخذكم واالا باخذ ولدكم
ياعالم متى تحسون بهالوضع تراه جدا مزري ومدمر نفسيا وغير لائق اخلاقيا
لا ومصيبه بعضهم يشوفونك شهر 5 ويستكون يجي شهر 12 يدقون يقولون نبغها
محلات وهي محلا 3 ايام مهله بعدها معاد يلتفتون لك وهي جماد
ياناس حسووووا
ليش مانعالج هاالمشكله
لو كل بنت ترفض ان الأهل يجون و تشرط ان الولد بس الي يشوفها رح يتغير الوضع
التعارف بين الأهل يتم ان شاءالله اذا تمت موافقة البنت و الولد وشافو بعض
كل وحده لازم تفكر في غيرها اخوك اذا جاء يخطب حاولي تفتحين مخ اهلك
الي يبغاك يجي يشوفك هذا الجاد والي شاريك وشاري اخلاقك ونسبك
واذا شافك ولد كملت وصارت لمظهرك ولو ماصار شئ فخلاص القرار صدر من صاحب الشان مو من 3 الوكلاء الي يجون
وانت ياعريس الغفله ليه ما تقرر بنفسك كم وحده ووحده راحت عليك وكان ممكن تسعدك و تسعدها و تعجبك و تعجبها بس ذوق خالتك ولا امك ما كان نفس ذوقك
انت الي بتتزوج ولا اهل البيت !!

[طالبة المعالي]

وعليكم السلام ورحمة الله وبركاته ..
أولاً التوفيق بيد الله سبحانه وتعالى لايعتمد على مقاييس الجمال وغيرها ..
فـ كم من جميلة تمتلك جميع مقومات الجمال ولكنها في حياتها لم توفق ..
والأمر يقاس على الشاب أيضاً ..

الأمر الأخر أنه للأسف في زماننا هذا انقلب الحال .. فأصبحت النظرة للأهل دون الشاب .. وهذا مخالف لتوجيه نبينا صلى الله عليه وسلم للشاب بالنظر للفتاة
النظرة الشرعية .. ( انظر إليها فإنه أحرى أن يؤدم بينكما )

شكراً لك أختي بنت عشيرة وجزيت خيراً ..

[جليسة القمر]

[grade="00008B FF7F50 008000 4B0082"]والله يا ختي قصة بجد تقهر[/grade]
[grade="00008B 008000 008000 4B0082"]
بالفعل لازم النظرة الشرعيه تكون موجوده الي هي نظرة الشاب للبنت


اكييد تختلف عن نظرة الأم

عن جد يعني قصص زي كذا تسبب احباااط شديد وتخلف نفسيه مدمره[/grade][grade="00008B FF6347 FF6347 4B0082"]الحمد لله احنا عنا الشب لازم يشووووف البنت وبالفعل اغلبنا يتزوجو من المره لاولى
وفي سن صغييير انا اتكلم عن نفسي ك شرقيه عنا لازم الشب ينظر للفتااة

مشكوووووووووووووووووووورة اختي على الطرح القيم

باااارك الله فيك[/grade]

[بنت عشيرة]

جزيتي كل خير طالبة المعالي ع ماذكرتي
يعطيك ألف عافية


عزيزتي جليسة القمر شاكرة لك مرورك

[иσᴚч ♥~]

والله كنك جالسه معنا امس

هذا كلامنا أنا وبنات خالاتي أمس

ماله أي داعي يجون الأهل

أول شيء يسأل عنه

وإذا صار كفؤ

يتفضل حياه الله ويشوف خطيبته

أما سالفة أن الاهل يجون

فاأنا معارضه وبشدة

لأن نظرته غير نظرتهم

والراحه أهــــــــــــــــــــــــــــــــــم شيء

أهم من الشكل

ربي يوفقك الجميع

وربي يسعدك ويوفقك يابنت عشيرة موضوع أكثر من رائع

ومهم في نفس الوقت

وفقك الرحمن لكل خير

[نـــــ"الوجود"ـــور]

والله أنك صادقه يابنت عشيره ..

لا واللي يقهر الاسئله اللي مدري وش تبي ..؟؟

يعطيك العافيه ..

[بنت عشيرة]

عزيزتي عشووقة
ياحبببي لك ,,أخاف إني وحدة من بنات خالتك ونقلت سواليفكم>>مسوية تستخف دمها



من جد المفروض أهل البنت يرفضوووون جية الأهل
وربي بعضهم يجون لقاآآآفة وتشفح..
المفروض يختصرون السالفة
وإذا ع سالفة التعارف الله يحييهم في الملكة أو الشبكة

حبيبتي شاكرة لك مرورك وتعليقك اللي يبرد القلب


نور الوجود..تسلمين حبيبتي ع هالمرور

[иσᴚч ♥~]

المشاركة الأصلية كتبت بواسطة   المفروض يختصرون السالفة وإذا ع سالفة التعارف الله يحييهم في الملكة أو الشبكة

+

[شـمـ إمرأة ــوخ]

.
.
.


صدقتي نظرة المعرس اهم
كنت مرة بمجلس نسائي
الا وحدة تبي تخطب لولدها
وتسولف بالمجلس والكل
يسمع رحت لبيت الفلاينه ولقيت
بنتهم وتعيب فيها الله يغفرلها
وبيت الفلاينه .. ووو

بس وفقني رب وافحمتها
ماعد تقدر تسبهم قدامي


بعض عقول النساء تمتلك
كم هائل من السخافه والحمق


لو اختصرنا المشوار من البدايه
وتكون النظره للمعرس افضل بكثير


بنت عشيره شكر لك

[أمجاد سدير]

بصراحه انا اايدك يابنت عشيره وبقووه

مع ان بعض الحالات تكون الام اولى اذا كانوا مايعرفون عن مواصفاتك شي فتجي الام وتوصفك لها او تشوف اذا كانت مواصفات الولد موجوده فيك اولا بدل مايجي حضرته وبعدين يقول ما اعجبتني والتسخير والتوفيق من الله بلا شك
اما غير كذا الي تعرفك وتجي تشوفك زياده فانا ضدها وللابد لان سبحان الله ترى نظرة المرأه غير عن الرجل وسبحان الله اذا كنت انت واخواتك تختلف نظرتكم لبعض الاشياء وشلون لوكان رجل وتفكيره يختلف عنكم كثير

والله يرزق العزوبيات ويوفق المتزوجات ياب

تقلبي مروري خيتوو

[اسيرة الحرمان]

من جد الله يعينكم بنت عمتي عندهم كذا ماتشوف زوجهاالايوم الزواج
كانت خايفه مره ماهي عارفه هوزين ولاشين يوم عرسهاالناس فرحانها وهي تصيح بس من جد لازم النظره الشرعيه 000
الحمدلله عندنا النظره الشرعيه والله يوفقكم يارب وكل بنات المسلمين
تقبلي مروري00

[اسيرة الصمت]

ههههههههههههههههههههههههههههه
والله على الجرح
عن جد
والله بهذله انا اذا طلبت أمه الشوفه على طووووووووول مااابيه

[محمود الغرب]

كنت أود أن أحكى عن الوضع فى مصر وكيفية الخطبه لكن أود أن أقول أن النظره للولد فعلا حلال ومن الشرع

مشكوووووووووووووره على الطرح القيم

[السلمان]

[align=center]السلام عليكم ... يا اخوات
واشوف كل من شارك في الموضوع تقريبا هن بنات حواء ... ولا يهون اخونا محمود


ومدام ان الشئ بالشئ يذكر وعلى قولة اخوانا اهل مصر ... اصر الكلام:
في رأيي المتواضع ان الام والاخت يقومون بزيارة عادية لا يصير فيها اي نوع من الكلافة و يشوفون البنت شوفه بلا افراط او تفريط ( لا تقول لها قومي خليني اشوف طولك او افصخي الكعب مثلا ً) وفي نفس الوقت تجلس معهم شوي علشان يتبين لهم فيها كمك او شوفة نفس او ما فيها سنع تخلي امها تصب القهوة مثلا ....

ثم يروحون ويشاورون الولد وطبعا الام ما تروح الا وهي عارفة مطالب و رغبات و لدها وبنسبة كبيرة او لا تروح لهم ... وفي حالة تمم الله او ما كتب الله لا بد وانهم اهل الولد يردون على اهل البنت في غضون ايام ولا تطول السالفة او يجحدون مرة وحده ولا عاد يتصلون ...
يا يقولون الحمد لله واسالوا عن الولد والكرة في ملعبكم يا اهل البنت ... او ما كتب الله نصيب بدون نقد او ذم.

ثم لا وافقوا اهل البنت بعد السؤال و تعرف الاب واخوانها ( ان كان لها اخوان)على المتقدم يشوفها الشوفة الشرعية ان حصل عسى الله ان يؤدم بينهم ويوفقهم.

الخلاصة في رأيي ان شوفة البنت من ام او اخت الشاب مع التمسك بالادبيات وهي عدم الافراط في الرؤية او التدقيق كن الوحده تبي تشتري سلعة والرد وعدم التاخير فيه هو اهون من ان البنت يشاهدها الشاب ثم يقولون اهله لا والله ما كتب الله ...

هذا رأيي والله يوفق الجميع

واقبلوا مني صادق الودّ

[/align]

[بنت عشيرة]

عزيزاتي شاكرة لكن تفاعلكن مع الموضوع
والله سعدت بردودكم


أخوي السلمان
مسألة الشوفة مسألة حساسة,,يمكن الينت لو ظهرت ع حريم وماعجبتهم احتمال إنها ترفض الزواج للأبد
ونظرة المرأة للمرأة غييييييييير عن نظرة الرجل
صحيح ان الرجل لابد من أن يسمع عن وصف الفتاة المراد خطبتها قبل يشوفها لكن هناك عدة طرق
مثلا: الناس اللي ذكروا الفتاة لأهل الولد يرتبوا يوم مع أهل الفتاة بحيث يجتمعون في مكان ما (منتزه أو حتى لو في البيت) بحيث ان الفتاة تتصرف ع طبيعتها وماتحس بإهانة لو ماقبلوا فيها لودهم

مجرد وجهة نظر والا وش رايكم؟