رحلة الـ 5000 كيلو

[عبدالعزيز]

السلام عليكم

اسعد الله اوقاتكم مشاهدين هذا الموضوع بكل خير

في البداية وش هالبرد عندكم في سدير

الحمد لله على سلامتنا بعد رحلة دامت حوالي اسبوع ومشي حوالي 5000 كيلو

الرحلة تخص شمال المملكة العربية السعودية << بالله

ثاني العيد صباحا الساعه 7 انطلقنا من ديار العز سدير

ونمر ديره يقال لها طابه وحولها فوهه بركانية قديمة



قبل مانوصل حائل مرينا كم ديرة حولها

ومن اهمها النعي بشد العين حيث ابز معالمه وجود قبر عنتر بن شداد الله يذكره بالخير

ونروح لشعيبنا المفضل مشار

الله يحلل جو سدير هالايام برد عظيم حيث اني ماخليت خلق مالبسته فروه وكوت وبجايم الدنيا

ويوم اصبحنا ننطلق متوجهين لتبوك

وفي الطريق شاهدنا هالاجرام



محمل ابو الموتر غضا

مرينا تبوك وهالديار اللي حولها

اعتذر عن انقطاع الصور لان هالمناطق مافيها شي وانحن نبي شمال زيادة

ونمرح عند ديرة صغيرة نسيت اسمها

ونصبح ونكمل مسيرتنا المبجلة

ونوصل بالسلامة الى حقل

حقل تقع على خليج العقبة يعني هي ارفع شي في الخليج حيث يوجد فيها منفذ للاردن

صورة من جبل لمدينة حقل



المهم نوقف ونضبط هاك القبابيط



رحنا نتمشى العصر

ومار نمر سفينة قد غرقت قبل سنوات عدة



اعتذر عن عدم وضوحها ماوصلنا لها الا متاخرين شوي

ويوم جاء الليل نشوف انوار الاردن ومصر وفلسطين للاسف ديرة اسرائيلية

المهم ذاك اليوم كان هواء قوي ونطق رواقنا واشوى كنه ذراء شوي

ونصبح وننطلق ونمر جبال اللوز

وكانت رفيعة جدا

ونلقى جليد فيها مع اننا وصناها متاخرين تقريبا 11 الظهر



ونمشي ونلقى مصري قحطاني فاتح بقالته والرجال عز يقهوينا بس عيينا لان النهار لازم نمشي عشان نشوف الطريق والمناطق الحلوة

ونمر كم ديرة على البحر ونتمشى فيهن

ونلقى عين تنبع موية





ومستغلينها يعبون خزان

المهم نروح لم ديرة يقال لها مقنا

وفيه جبل معروف يسمونه طيب اسم يتميز بالضيق والجبال المرتفعه وفيه عيون تنبع

ذكرني بجبل لجب في جيزان شي عجيب سبحان الله




حجم السيارة عند الجبل



واحد من العيال يغسل بموية العين



الجبل تمشي تقريبا كيلو بعدين يجي حصا توقف عنده السيارات

طبعا حرس الحدود مشددين هناك مره لانهم يقولون يجي معه مهربين

المهم يوم وقفن الشيارات قالوا ربعنا بنمشي على رجلينا ونسال ولا طولة تقريبا 4 كيلو

ومار نمشي في البطحاء والله ياحولت عيوني من المشي

ساعه رايحين وساعه راجعين

وكنك يابو زيد ماغزيت اول 500 نفس اخر شي

ونروح نعين من الله خير ونمرح

ونصبح وننطلق للحنان

وشو الحنان !!

هذا رمل اذا حفرت بيدينك يطلع صوت

ومار نوصل وقعدنا نحفر كننا بزران

وخذ يا اصوات



المهم فيه طعس كبير

قال واحد من الربع خل نرقاه

قلت اسمحوا لي معي الكاميرا وفية هواء اخاف تخرب << مقصر اصلا منيب فاضي ارقى

المهم يوم رقوا شوي ومار يقصرون وكمل واحد منهم اللي مصملنا ماشاء الله عليه



العجيب في الامر

خوينا يوم وصل للقمة قعد وقام يتزحلق الجدير بالذكر يوم وصل نصف الطعس طلع صوت قوي مره كنه دباب

واخيرا نوصل للي نصف الرحلة عشانها قرية الديسة

ماهي الديسة ياترى << مسوي بيشوقكم

الديسة شعيب بين جبال وفيه عين تنبع قوية طول العام وكنها سيل يمشي



وهذي صورة للشعيب من زاوية اخرى



وجيناك بعدها نازين جنوبا

ونمر ضباء والوجة واملج

ونقف في ينبع

ونتمشى على الشاطئ ونقلى هاللي مسوي دعاية لعكازة



وتعشينا ونزلنا جنوبا الى تعدينا المدينة المنورة بـ 100 كيلو ونوقف وننام

ونصبح ونحرك الى ديرتنا

وهكذا انتهت رحلة الـ 5000 كيلو

اتمنى ان ينال الموضوع اعجابكم

واعتذر عن القصور

[عبدالله الفـارس]

هههههههههههههه

دخلتوا موسوعـة قينيس هع هع

ما استغربت إلا من الرمل الي يطلع صوت

يعطيك العافية شيخو وتقرير ابدااااااااع

تسلم والحمدلله على سلامتكم

: )

[هاجوس.]

المشاركة الأصلية كتبت بواسطة   هههههههههههههه دخلتوا موسوعـة قينيس هع هع ما استغربت إلا من الرمل الي يطلع صوت يعطيك العافية شيخو وتقرير ابدااااااااع تسلم والحمدلله على سلامتكم : )

اخوكم ومحبكم:هاجوس.

[أنس بن عبد الله]

ماشاء الله رحلة جدا جميلة حسيت أني رايح معكم

وهالأماكن مغيبة عن الناس إعلاميا ولا نعرف عنها شئ أبدا

وشوقتنا ياشيخنا لهالأماكن



روووعة هالصورة ماشاء الله

تقبل تحياتي ومروري يالغالي

[أمير شقراء]

الحمد لله على السلامة
وتسلم على الصور الاكثر من رائعة
وارجو ان تتقبل مروري

أخوك :: أمير شقراء

[سعود الخليل]

ماشاء الله عليكم يا شيخو ....

عز الله انها رحلة موفقة ...بصراحه اول مره نشوف هالمناظر وهالمناطق ..

بيض الله وجهك ..

والحمد لله على السلامه ...

[أبو زياد]

[align=center].. هلا وغلا والحمد لله على السلامه ومشكور على الموضوع والتغطيه يالغالي ..[/align]

[عبدالعزيز]

عاشق ديرتي



حياك الله يابعدي

فعلا الرمل اللي يطلع صوت كنا حريصين جدا لروحة له

شاكر لك يابعدي

[لهفة الخاطر]

[align=center]الحمد لله على السلامه ياشيخ شمر

بصراحه رحله رائعه وممتعه بصراحه عشت جوها ...

السفينه هذي شلون قايله يعني ياليت توصف أكثر وتحدد المكان بالضبط ...

رائعه والله يعطيكم العافيه يارب ...

يعطيك العافيه على هذا التقرير والمتعه التي أستمتعنا بها معكم ...

بارك الله فيك ورعاك [/align]

[عبدالعزيز]

نصراوي سديراوي

ياهلا ويامرحبتين

الله يسلمك يابعدي

وشاكر لك تواجدك

[فهد المنيع]

ماشاء الله عليكم

فيكم صبر وجلد .. تذكرني بايام شبابي


صراحه رحله مكوكيه ومناطق جميله ..


حلو الواحد يسافر ويكتشف اماكن جديده وناس جدد


مشكور شيخو ..

[X-Ray]

ماشاء الله

والله ياضربتم مشاوير ميب سهلة ..

تقرير جميل استمتعت بمطالعت..

يعطيك العافية شيخنا

[يـــزيـــد]

السلام عليكم ورحمة الله وبركاته

ماشاء الله تبارك الله

اولاُ الحمد لله على السلامة >> كنك ماتصلت علي من حقل يوم توصيني على ذيك الشغله >> بتوجعهم بطونهم ادري

==

رحلة موفقة ومميزة وبصراحة انا اول مرة ادري ان عندنا هالحركات الحلوة

وبالتأكيد المملكة العربية السعودية فيها العديد من المناطق الرائعة ولكننا للأسف نفتقد السياحة ومقوماتها ..

[أمير سدير]

رحله حلوه ماشاء الله

موفقين

[M.M.Z]

[align=center]وعليكم السلام والرحمة

رحلة شكلها رائعة وتقريرها حلو وجميل ، بس الله يحفظ الجميع .

رحمت أهاليكم صراحة أحس قلوبهم كانت مقبوضة أثناء تلك المغامرة حتى وصلتوا لهم .[/align]