جولة في مدينة شانق ماي الساحرة من (عدستي)

[فهد المنيع]

السلام عليكم ورحمة الله وبركاته

كانت لي زيارة لمدينة شانق ماي الساحرة والواقعة في الشمال التايلندي قبل ما يقارب سنة ونصف ----> توها تطري عليه ينزل الصور


فحبيت اقدمها لكم من خلال هالتقرير المختصر وان شاء الله راح يعقبها تقارير عن مدن أخرى ..

شانق ماي Chiang Mai

شانق ماي مدينة تقع في شمال تايلند وتعبر ثاني اكبر مدينة في تايلند وطبيعتها جبلية وتتميز بطبيعة ساحرة من جبال وانهار وشلالات وجوها روعه .. جلسنا فيها 4 ايام ما شفنا فيها الشمس الا 10 دقايق تقريباً

اول ما وصلنا بعد الراحة أخذنا جولة في النهر وقصينا التذاكر بـ 250بات يعني بحوالي 28 ريال للشخص ..

ركبنا قارب طويل ومعنا مجموعة من السياح ومشى في النهر بسرعة بطيئة والجميع يصور ويتفرج على المدينة وعلى الصيادين والمطاعم وبيوت الأثرياء والفنادق والجو كان غائم والهواء يالله براد الجنة وهذي بعض الصور

من هنا الانطلاق



صور القارب من الداخل



باقي الصور توضح المكان بشكل عام




















في صباح اليوم التالي كانت الرحلة الأولى وهي عبارة عن: (عروض الفيلة-ركوب العربات اللي تجرها الجواميس-ركوب البامبو في النهر-عروض الفيلة-وجبة غداء) قيمة الرحلة 1400 بات ما يعادل 159 ريال للشخص شاملة المواصلات والغداء من 9 صباحاً الى 5 عصراً...


صور من الطريق










وصلنا للموقع وكانت البداية بعروض الفيلة ..


















بعد عرض الفيلة توجهنا لركوب العربات الخشبية اللي تجرها الجواميس وكانت تجربه مضحكة وممتعة في نفس الوقت















بعدها وقفنا في مكان فيه محلات تبيع ملابس ومشغولات يدوية وريحنا فيه بعض الوقت









وبعدها ركبنا الفيل ..











بعد الفيلة ركبنا البامبو وهو عباره عن قارب من القصب يمشي في النهر وسط الجبال وبين الاشجار والجو لطيف مع بعض الرذاذ















بعدها قدموا لنا وجبة الغداء ... الله يكرم النعمة ما اكلنا منها شي .. اسوء مافي تايلند الاكل ..


وبكذا انتهينا من الرحلة ورجعنا للفندق .. وفي الطريق مرينا معرض للزهور الدخول بالمجان فقلنا نتفرج شوي على بعض الزهور .. بس طلع خاص بزهرة الاوركيد وهذي بعض صور الزهور


















يتبع
7
7
7
7

[فهد المنيع]

رحلة الشلالات وزيارة أعلى قمة جبل في تايلند

في اليوم الثاني من تواجدنا في شنقماي حجزنا رحلة للشلالات وزيارة اعلى قمة جبل في تايلند مع وجبة غداء شاملة المواصلات من وإلى الفندق وسعر الرحلة للشخص 1200 بات = 136 ريال من 8.30 صباحاً الى 5 مساءً ..



وفي الوقت المحدد صباحاً انطلقنا بسيارة ميني باص وكان الطريق طويل يعني تقريباً مشينا 50 دقيقة الى ان وصلنا للجبل والطريق ملتوي وكل ما ارتفعنا كلما زاد الجو برودة والرذاذ ينزل باستمرار لكن متعة الطبيعة تنسيك طول المسافة .. وهذي صور من الطريق















وصلنا لاول محطة وهي عبارة عن شلال توقفنا عندة لمدة نصف ساعة تقريباً ..









بعدها استمرينا في الارتفاع والطريق كله انحناءات بس المناظر جميلة وما تشوف الا اللون الأخضر .. ومع الارتفاع وصلنا للغيم وصار الطريق كله غيم والجو بارد إلى أن توقفنا في مكان وسط الغيم فيه كوفي شوب ومحل ملابس ..














كملنا الطريق باتجاه اعلى قمة جبل في تايلند ..


الى ان وصلنا وهذي صور للمكان اخذتها بكميرا جوال N95 لاني خفت على الكميرا من الرذاذ في الجو ..









وهذي صورة اعلى قمة جبل في تايلند





بعدها رجعنا نازلين ومتوجهين للشلال الكبير وتناول وجبة الغداء (ضمن التذكرة)

في الطريق توقفنا عند محلات تبيع الفواكه وبعض المشغولات اليدوية والتحف ونزلنا نتمشى فيها شوي ونشتري ..











بعدها وصلنا لمكان الشلال وهو عباره عن منتزة فيه مطعم ودورات مياه (تكرمون) وشلال كبير .. .. المهم وقفنا للغداء وطلع السواق جايب معه غداء مخصوص عبارة عن رز وربيان وسلطة وفواكه والسبب ان الاكل اللي في المطعم ماهو حلال












خلصنا الغداء ولله الحمد

واخذنا الكميرا واتجهنا للشلال وصراحة مكان روعة والشلال كبير وصوته قوي لدرجة اننا ما نقدر نوقف قدامه لان الرذاذ مالي الجو بسبب قوة اندفاع المياه لذلك ما قدرت اصور زين لان الكميرا بتخرب من المويه والعدسة اساساً يطلع فيها قطرات الرذاذ في ثواني ورحت جبت كيس لبست الكميرا فيه لعل وعسى نخفف من المشكلة ... و هذي بعض الصور صورة توضح المكان والشلال ..

[فهد المنيع]

اليوم الرابع من تواجدنا في شانقماي قررنا ما نروح رحلات لاننا مجهدين وحبينا نريح وناخذ لفة في المدينة .. قلنا نغير من التكاسي وناخذ جولة في المدينة على التوك توك وهو عبارة عن دباب ووراه زي العربه تاخذ شخصين .. قلنا تجربة جديدة خاصة ان الجو في شنقماي روعة وغيم ومطر

جولة في المدينة على التوك توك

في الصباح الباكر وبعد ما انتهينا من الافطار في الفندق نزلنا للشارع لقيت لي واحد معه توك توك وقلت له ابي آخذ لفه على المدينة قالي تدفع 200 بات الف بك و اوديك لمصنع الحرير ومصنع الجلديات والتحف والعسل والذهب وشغلات واجد وقال بتقعد ساعه او ساعتين او عشر بنفس السعر.. قلت له 100 بات ركبنا معك والا مشكور ... قال بـ 200 بات ... ما دريت الا عجوز طالعه لنا ما ادري من وين وتكلمه وتهوش عليه هع هع طلعت امه ناطله اذنها عندنا وجت تهوش عليه وتقول خذ 100 لا اتوطى في بطنك خخخخ المهم وافق على 100 بات (ما يعادل 11 ريال) وركبنا

وهذي صورة التوك توك مع الاجودي اللي ودانا

يا حليله مغمض من زود الادب

شغل الدباب ودعس بنا والهواء يهفهف وبراد على كيف كيفك ...

قعد يتمشى بنا في شوارع شانقماي وبصراحة متعة ذا التوك توك خاصة اذا كان الجو حلو وانصح زوار تايلند بتجربته وبالتحديد في شنقماي لان الجو يساعد ..

وصلنا لمعرض الحرير وهو عبارة عن معرض كبير للحرير من ملابس ومفارش واقمشة والعاب وهدايا وبراويز واشياء كثيرة مصنوعة من الحرير ..مسوين هم حركة حلوة تفيدهم وتجذب السواح ... اول ما توصل يستقبلونك استقبال حلو ويدخلونك ويمرون بك على كل مراحل صناعة الحرير من شكل الدود في البداية الى كيفية تكوين الحرير ويورونك الآلات والناس وهي تغزل الحرير ويشرحون لك كل المعلومات من إلى ...

وفي الاخير تدخل المعرض اللي فيه منتوجاتهم وشي طبيعي بتشتري لانك بتستحي عقب هالشروحات تطلع ما شريت هع هع

المهم تفرجنا على منتوجاتهم وشرينا بعض الاغراض وهذي صور للمكان

وهذي صور المعرض او الحرير في شكله النهائي

بعدها رحنا لمحل يبيع العسل واستقبلونا استقبال مميز كعادتهم وجاء واحد يتكلم لغة عربية وقال تفضلوا ودخلنا في غرفه مكيفة وفيها طاوله وكراسي وقعد يشرح عن العسل وانواعه وقعد يذوقنا .. طبعاً انا اقدر اقوله شكراً وامسك الباب ولا يقدر يقول شي لان المسألة حرية شخصية .. لكن ماخذينها على سعة الصدر ونحاول قدر المستطاع ما نأثر على الميزانية ... المهم الرجال ذوقنا من العسل وقال انه يجي من الجبال وطبيعي جداً وبدون سكر وشريت منهم كيلو بـ 160 ريال تقريباً وبصراحه بعد ما رجعت تحسفت اني ما اخذت اكثر لجودة العسل ولرخص سعره مقارنة بالاسعار عندنا .. وهذي صور للمكان

بعدها رحنا لمعرض الجلود وهو عبارة عن منتجات كلها مصنوعة من الجلد مثل الشنط والجزم (اعزكم الله) والاحزمة والمحافظ واشياء كثيرة

اول ما دخلنا لقينا هالمملوح عند الباب ... شكلهم مخططين على الفرو حقه

وهذي المنتجات

بس ما اعجبنا المعرض والاسعار شوي غاليه فطلعنا من المكان ..

راعي التوك توك صار ياخذ عموله من اصحاب المعارض لان الرجال اعجبته السالفه وناوي يمر بنا على كل معارض شنقماي هع هع وانا مستغرب 100 بات ولنا ثلاث ساعات معه !!

المهم ملينا وقلنا يكفي رجعنا للفندق...

وبكذا انتهى الجزء الخاص بمدينة شانق ماي وان شاء الله انزل لكم حلقات قادمة عن مدن ثانية

مع السلامة

[يـــزيـــد]

السلام عليكم

ماشاء الله تبارك الله ،، الحمد لله على السلامة

يعطيك العافية وتقرير رائع ومفصل ومميز لاهنت

اشكرك واستمتعنا

[فهد المنيع]

حياك الله يزيد ومنووور الموضوع


تحياتي

[FeRaS]

ما شاء الله تبارك الله

بس الغريبة جواميس تجرب عربات زين الي ما هاج عليكم واحد من الي راكبينه

أخوي فهد أسلوبك أضفى على الموضوع ميزة أخرى

تقرير مييز ورائع وصراحة عجبتني الاجواء أفكر أروح هناك>>> ايه هين بس

ننتظر جديدك يا الغالي

[فهد المنيع]

حيااااااك ربي يا هاوي الصقور وما تدري يمكن تروح في يوم من الايام وتركب الجواميس ويرفسك واحد هع هع


مشكووووور

[The End]

مآآشآآءاللهـ

تغطيهـ رائعهـ
سلمت

[بسمة سدير]

[align=center]
وعليْكم السّلام ورحْمة الله وبركاته


..


آآخ يا شنقماي


مدينة بدييييعة بشكل !

المشاركة الأصلية كتبت بواسطة   لاني خفت على الكميرا من الرذاذ في الجو

< تحطّ العدسة على فوق .. إذا صار فيه مطر عشان تصوّر


..







رهيييبة ، العجيب وشو ، إنّها من رسْم الفيلة !


< حنّا يا الإنس ما رسمّناها !


..






الفيلة عنْدهم كنّا قطاوتنا !


..





مثل ما ذكرت تايْلند كلّها جبال ، وارتفاعات وانْحدارات


فتمْسك قلْبك وأنت راكب فيل من أصْله يرْقل !


..






منْطقــــة أليـــــمة !!


< بس ليت الواحد ما يسوّي نفْسه فاهم .. ويرقى حول الـ 300 درجة .. ويفوّت القعْدة والجوّ .. ويكافح عشان في الأخير .. يلْقى له براحة فيها نخلة ناشفة !


..


قالوا رحتا لتايلند .. قال إيه .. قالوا ركبتاا التّوك توك ؟ .. قال لا .. قالوا ما رحتا لتايْلند


تقــــرير ممْتع ،


والحمْد لله على سلامتكم < بعد سنة ونص ،


شكْــــراً لك أخوي فهد ..
[/align]

[أميرة زماني]

[align=center]

بصراحه مدينه حلووووووه

شـكــ وبارك الله فيك ـــرا لك ... لك مني أجمل تحية . [/align]

[المكيظم]

وعليكم السلام ورحمة الله وبركاته

ماشاء الله تبارك الله

تقرير يفتح النفس

يامال العافية أخي فهد

[عبدالعزيز التمامي]

ماشاء الله تبارك الله

رحلة مميزة وممتعه واجواء جميلة

تغطية وافية ومتكاملة استمتعنا بمشاهدتها

بارك الله فيك اخوي فهد والله يعطيك العافيه

تحياتي لك

[إبراهيم ابوغانم]

ما شاء الله تبارك الله .. تقرير شامل وممتع أخوي فهد .. وطبيعة ساحرة وخلابة .. تشرح الخاطر .. الله يوسع صدوركم بالعافية ...

[فهد المنيع]

الله يعافيكم جميعاً

نورتوا الموضوع بردودكم الحلوة ..


الله لا يحرمنا هالطله ..

[مضيعه شباصتا]

وعليكم السلام ورحمة الله وبركاته


مااشاء الله


تشدك الطبيعة الرهيــــبة

رحلة رائعة ومميزة ،


"

عافااك الله