السلام عليكم
مساء / صباح الخيرات والمسرات
اعتذر في البداية لتاخر الجزء الثالث والاخير لانشغالي وتعرفون في رمضان الوقت ضيق
للإطلاع على الجزئين الاول والثاني
http://www.sudeer.com/vb/showthread.php?t=111449
http://www.sudeer.com/vb/showthread.php?t=110906
(( ملاحظة الصور كثيرة جدا في حال عدم ظهور الصور يرجى الضغط ماوس يمين ثم اظهار الصور ,, او تحديث الصفحة ))
جزءنا اليوم عن جزيرة برتو قيليرا (وتحديداً الشاطئ الابيض) طريقة الوصول اليها من مانيلا ساعتين وشوي بالسيارة الى مدينة بتنقس ثم الركوب في القارب لمدة 1.20
مشينا من السكن الساعة 10.30ص ولمدة ساعتين بالطريق وهذي الاجواء في طريقتنا مزينه بالغيوم
وصلنا للشاطئ وطبعا شغلهم حكومي يعني موب اي واحد ينقلك للجزيرة
وصلنا تقريبا 12.40 وخذنا تذاكر وقالوا القارب يحرك الساعة 1 ظهراً قلنا كويس ماراح ننتظر كثير
المهم ركبنا القارب وكانت الغيوم شي خيالي اخذنا بعض الصور لروعة المنظر
هنا اقتربنا للشاطئ الابيض
وصلنا وكان يوم الاحد والجزيرة مليانه سياح واغلبهم خواجات 
لانها ديرة كويسة للحمامات الشمسية 
وصلنا تقريبا الساعة 2.30 ورحنا ندور سكن عشان نريح ونتغدى ونصلي الظهر والعصر
ويجتمعون عندنا يقالك مسوين مرشدين سياحيين وكلهم ماعندهم ساالفة
ومار تجوز لنا ذيك العجوز حركة وعجلة وخدومة والله وتصير صديقتنا كل مابغينا شي دقينا عليها وتجي تمشي مليون وتضبطنا 
ودتنا للسكن واخذنا شقتين جنب لانها صغيرة مافيه الا غرفة وصالة 
متجهين الى السكن خل نعطيكم معلومات عن قرية الشاطئ الابيض (الوايت بيتش )
قرية بسيطة جدا وعندهم فقر اكثر من غيرهم ومافيها الا شارع واحد رئيسي علية محلات وبقالات ومصارف وتقريبا متوفر فيها كل شي تقريبا
الشارع يقسم الديرة قسمين ,, القسم الاول اللي جهة الشاطئ وفيه السكن تقدر تقول انك مثل الكابوي بيوت خشب واكواخ مانقصنا الا نركب خيول ونروح نسرق بنك
القسم الثاني سكن اهالي الديرة وهو سكن ومعششات صغيرة
وهذي بعض صور لسكن السياح
ونوصل للريسبشن بس تكفون طااااالبكم قولوا ماشاء الله عشان ماتنظلونهم على هالمكتب الخطييييييير
مدخل الفلل ولا الشقق سموها اللي تبون
وهذا السكن بتاعنا
دخلنا السكن قمنا نتسدح وناخذ لنا غفوة على نص ساعة والغدى يطبخ وقمنا وتغدينا المهم ولاها الساعه 5 تقريبا قلنا باقي وقت قبل المغرب نبي نسوي شي ونكسب الوقت
ونروح نبي نركب المنطاد هذي بعض الصور براااااد فوق وسعة صدر وضحكنا على بعض الناس اللي خافوا يركبون لين بالطقاق ركب
قالوا كل 2 سوا كلن مافيه موكشل صديق
ونركب اول شي تحق رجليك الا 3 ثواني في البحر ثم يدعس بك ولاك واصل السماء
لحظة الانطلاق كل واحد بالع ريقة مايدري وش السالفة هي تروع ولالا
والله ويتمشى بنا تقريبا نص ساعه وفيه حركة حلوة يسويها يهدي مررره لين توصل رجليك للبحر ثم يسرع وتتجه نحو الاعلى بسرعة خيالية تتجمع مصارينك بس ولو فله
بوريكم صورة بس رجاء بدون صوت
هذا يوم جينا نهبط هبوط اضطراري يعني خلص الوقت المهم حسيت اننا بغينا ندخل في الماصورة اللي قدامي بس ربك ستر اثاريهم وازنينها صح
المهم وتركب الدفعه اللي بعدنا بعد مابغيت اشيل الماصورة
الله يرجة ذا المقلع يقول لي اقطع الحبل قلت له ايه
هذي الحركة اللي اقول يهدي مره ثم يسرع يطير بك في العلالي << العلالي ولا قودي
المهم ونخلص علىى مغيب الشمس ونمسي وعينا من الله خير ودرسنا موضوع رحلة الغد
اتفقنا على الذهاب للشلال ,, اتصلنا على مرشدتنا العجيز وتجيب لنا سيارة لان الشلال يبعد تقريبا 40 دقيقة
الصدق والله ضحكنا لين واحد من الشباب بغى ينشق بطنه بتقولون على ايش صح
ناظروا السيارة الفخمة ههههههههه
حسيت اننا عمال بلدية رايحين نكنس شارع
هذا الشارع الرئيسي حقهم
مرينا على اماكن خياااالية مره واحيانا نقرب للشاطى وهذي بعض الصور
اخر شي ملينا معد نصور وش نبدي عليه ماشاء الله
وصلنا للشلال وهذي صورة له من بعيد
قربنا ووقفنا عنده
نزلنا تحت
وهذي مثل المسابح للي يبي يطافش فيها ولا يبي يسبح ولا يغسل ملابسة ان بغى << زودها شوي
وهالمنظر تحت اذا ودك تجلس فيه جلسة حلوة وبراااااااااااد لان الشلال جنبك مره
ناظرت بنظرة سحرية ولا شايب يسبح ويسوي حركات بهلاونية يتذكر ايام اول
وتحمست شوي معهم واصورة وهو يسوي احسن حركة قدر عليها ههههههه
رجعنا ووقفنا نصور كم مرة لان السواق حس ان ودنا نصور
نزلنا شوي ولقينا شجرة ليمون موب لاحد طبعا واثر فيها ليمون ونقطف منها والله اثارية ليمون صدقي وزين عمة وهذي صورته مع السلطة << سلطة سريع سريع لاتفلونها وتحسبونها سلطة بيت
ترى الموز شارينه نجربه بس ماش مهوب مثل موزنا عطايا الله
لقطة اعجبتني ومامداني اصورها زين
وصلنا لديرتنا وندق على العجوز وتجي تمشي الف وخمسمية هذي صورتها هي وخوينا يالبيه يالعجيز خايفه على بشرتك من الشمس !!
لنا يومين ماكلنا اكل زي الناس قلنا نبي نشتري تيس عشان ناكل اكلنا المحترم
قالوا فيه مزرعة بعيدة شوي فيها تيوس وخنازير واشتروا اللي تبون قلنا الله خنازير وش خليت
ونركب دبابين صغيرات لانها وااااااااجد هناك يالله تحصل سيارة واللي خلانا نصمل ونركب عشان نضحك ونجربهن
في طريقنا للمزرعة
ونوصل بعد ربع ساعة
هذي والله المزارع مهوب حواقنا ذا اللي كلة عاقول ورشيدي 
وناخذ لنا هالتيس اللي يحبه قلبك بـ حول 200 ريال يابلاش
حصلنا بقر مدري جواميس مدري ثيران المهم انهن يسبحن وفالات ابوها في ذا الطين والحواق
وهذي صورة للخنازير الموقرة الله يكرمكم واااااااااااااااوه والله ياخيااااس غير طبيعي وانا اصور بغى يغمى علي 
اخذنا تيسنا وقلتا نبي نذبحة ويودونا للمعششات حقاتهم
وانا اللي اشوف هالبينه جالسه تعبي موية والقط لها صورة
حلوة حركة الورقة اللي تحت
اذكر قلنا بنذبحها والباقي عليكم ,, وبقدرة قادر ذبحناه وقطعناه مابقي الا نطبخه لهم ههههههههههههههههه
خلصنا وعلى طول للشقة واحلى كبسة في العالم
المهم رحنا وتغدينا وجاء العصر رحنا نبي دبابات بحرية يوم وصلنا للشاطئ قالوا مافيه اليوم الجو موب مضبوط فيه هواء
وانقهرنا وقمنا نسبح ونتسدح على الشاطئ
امسينا وخططنا لرحلة اليوم الثالث ,,
واتفقنا على الغوص وكان فيه نوعين نوع بالاوكسجين وتدخل اعماق البحر . ونوع على سطح البحر وماتغوص باكسجين ولا شي
سالنا عن الاوكسجين وقالوا لازم رخصة واللي مامعة ماله الا يبخشش قلنا خلاص نبي ولو ,, بس للاسف يوم شفنا وقتها ولاه مايناسبنا لاننا نبي نمشي ومافيه الا رحلة وحدة في اليوم ,, ولا اي احد يوديك لمدينة بتنقس
قلنا اجل العوض ولا القطيعة ناخذ الغوص السطحي والشكوى لله ,, لكن وناسة ماتوقعناها لهالدرجة ممتعة كنا حاقرينها بغينا مانركبها نقول بايخة
قمنا الصباح ركبنا القارب وانطلقنا لمدة 30 دقيقة تقريبا ,, اخذنا بعض الصور وحنا في الطريق لمكان الغوص
هذي سحابة خيالية كنا نمشي ويتغير المكان وكل ماتغير المكان خذنا صورة
هذا المكان بس من بعيد
ملك الطارة حق قاربنا
وصلنا لمكان الغوص وكان فيه قوارب كثيرة وكلن مغطس راسة في البحر وجالس يتفرج
لبسنا نظارات ولي هواء صغير عشان التنفس وسترة النجاة وطلعنا بالشكل هذا ههههههههه
تمسكنا في القارب وبدا يمشي بشوي شوي وحنا لابسين نظارات ولي للهواء صغير عشان تتنفس معه
والله مناظر خيااااااااالية مره وكان قاع البحر قريب جدا والسمك الوان واشكال سبحان الله تمسك راسك وانت تتفرج << يعني تترك الحبل اللي انت متمسك فيه ثم تمسك راسك هههههه
كل شي غريب تشوفه في البحر ,, وكل شوي يوقف راعي القارب يقول اسبحوا وسو اللي تبون ويعطينا خبز عشان نعطية السمك
ونعطي السمك خبز ويجتمع عندك اكثر من 1000 سمكة وياكلن من يدك ,, بس اتحداك تمسك وحده << جالسين يعطونهن خبز عشان يمسكونهن ولا موب لله هههههههه
جلسنا تقريبا ساعة وملينا قلنا خلاص يابو فلان نبي نمشي ,, والله ونرجع للسكن
ونرجع ونضبط الغداء ونتغدى ونمشي للشاطئ عشان رحلة العودة
قبل نودع الجزيرة احب اسرد لكم صور منوعة وحلوة مره للجزيرة
اهداء لاغلى منتدى
بعدها رجعنا للعاصمة مانيلا وجلسنا فيها 3 ايام وتقضينا وشرينا هدايا واغراض وتمشينا فيها طيلة الثلاث ايام
رحنا لبقالة مريم فيها كل شي كنك في السعودية رز ابو كاس طحينية صلصة بصل كلش مره وعندهم لحم حلال وفليناها صرنا نروح ناخذ منهم
مره رحنا للكنيسة وجلسنا نضحك على اعتقاداتهم بس ماخذنا الكاميرات معنا صورنا بالجوال << مالها داعي الكاميرات تتكسر فوق روسنا هههههه
بعدها رحنا للكنسية الصينية بس كانت مسكرة للصيانة ودخلناها بالواسطة ههههههه << ناوين يتنصرون الاخوان في الله
هذي بعض الصور لحوض الاسماك في سوق اوشن بارك
وبعد مرور ثلاث ايام اتجهنا للمطار الساعة 3م كما كان الجو ممطر عند القدوم للفلبين ايضا ودعناها في جو غائم وممطر
وكان موعد العودة الساعة 5 م بتوقيت الفلبين الـ 1 ظهرا بتوقيتنا وانطلقنا حتى وصلنا الرياض الساعه 11 مساء
وفي الختام لايسعني الا ان اشكركم جميعا على متابعة الاجزء الثلاثة 
02-09-2010, 06:51 AM
الجزء الثالث والأخير جزيرة برتو قيليرا
العرض العادي
