درب المراجل

**بنت الاصول** · 04-10-2013, 05:14 PM

درب المراجل

لو كان مقياس الرجوله بلشناب=كان الردي محسوب ضمن الرجاجيل

ولو كل طاير في السما حر وعقاب=يمكن يطير الخرب في عتمت الليل

يا صاحبي كلمه وقل قالها شاب=خذها نصيحه كان عندك تساهيل

درب المراجل فيه عثرات وصعاب=ودرب الردي معروف كله تضاليل

والحر انا خاويه في كل مرقاب=وفخر وماري به قروم المشاكيل

اطريه بزينات والخير لا غاب=واعزف على نغم المفارق مواويل

واليا لفاني مسكنه بين لهداب=واخذ علومه كلها بتفاصيل

ودرب الردي حطيت من دونه حجاب=بيني وبينه مثل ما الجدي وسهيل

اللي بعرض الناس يهتك ويغتاب=وماهوب فالح غير في القال والقيل

المرجله ما هي قلم خط بكتاب=يقراه جيل وسلمه بعده لجيل

المرجله قول وفعل اصل ونساب=والكفو يظهر حزه الضيق والويل

يا صاحبي لا تحمل بفكرك اعتاب=ولا هو بقصدي في الرجاجيل تقليل

يا كم شنب في حزه الضيق اذناب=ويا كم سفيه اليا فزع فزعه السيل

ويا كم خاين للوفاء بين لصحاب=ما يقضي لزومك فلا حتجت بالحيل

الهرج واضح والاشاره للالباب=وانته بكيفك حلل الهرج تحليل

الكفو دايم للجميلات كساب=واليا نخيته فز وسرج لك الخيل

اما الردي ما يوم ودا ولا جاب=وان جاك والله با يجيب الغرابيل

والرجل يقدم في الصعيبات ما يهاب=يمشي على دروب الشهامه ولا يميل

يا صاحبي ما كل اشناب اشناب=وفهم كلامي تعرف الراس والذيل

الشاعر بن جردان