ترى حنا سبيع اللي لنا تاريـخ مثـل الشـاش""هل الفعل المشـرف والوفـا بالعهـد فزنابـه
معسفة المهـار المسرجـة حمايـة الابـواش""هل المثلوثـة اللـي ميـزت لابةعلـى لابـه
واهل عشر الركاب اللي صدفهم فاخر المطراش""ثلاث الاف خصمًًًًًًًٍٍٍٍ(ن) بالعداوة يفتـل اشنابـه
ويوم الله نصرهم خلًًص الديـان نقـد وكـاش""وصـارت معجـزة والفعـل هـذا مايحلابـه
ومن يلجأ لقبـر فهيـد يعفـى عنـه ماينـاش""كذلـك يعتبـر هــذا تـفـرد وانفردنـابـه
وابن هملان راعي ملقه اللي دون ذوده هـاش""حماها في ديار القـوم وانهـى مـن تهقوابـه
وعجران العمى وعلومه اللي ينعشـن انعـاش""وبن قطنان زيزوم الكـرم والمجـد يحظابـه
مزايا من مشاهير المراجـل ماتـروح بـلاش""تقدرها الرجال وكل راعـي طيـب يجزابـه
فقط سجلت رؤوس اقلام تكتب في بياض الداش""قليل(ن) من كثير ولادعى الداعـي هرجنابـه
وحنا مانخون بعهدنـا لاخـان ولـد الـلاش""وناصرنا الامـام بعهـد صـادق والتزمنابـه
نمثل جيش اخو نورة مع المهجـاد والمغبـاش""من اول مابدا لين خضعت لـه روس حرابـه
وخضبنا القنا والسيـف لامدفـع ولا رشـاش""ورا صقر الجزيرة لين جاب الصيـد مخلابـه
وتم النصر والتوحيد والقايـد بنصـره شـاش""نصـره الله ليعلـي كلمتـه ويحكـم كتـابـه
مئة عام وثلاث سنين مجد(ن) ينقشـه نقـاش""على صم الصخور بريشته وإمـلاه واعرابـه
ترى حنا سبيع اللي لنا تاريـخ مثـل الشـاش""هل الفعل المشـرف والوفـا بالعهـد فزنابـه
الشاعر/ مفرح بن عبدالله بن بداح