هل للأسهم نهاية ام لا؟؟؟؟؟؟؟؟؟

[ستااار]

[align=center]نرى في الأونة الأخيرة طفرة الأسهم وتداولها من قبل الناس
الي ماخذ قرض والي حاط دراهمه كلللللللللللللللللللها والي باع سيارتة حتى وصلت بالواحد انه يبيع بيته
وش رايكم هل لها نهاية قوية ام لا؟؟؟؟؟؟؟
لا تبخلون علينى برايكم[/align]

[الصحراوية]

ابعطيك رايي المصون >>>>الله يعافيس خلي ها الاشياء لأهلها

بصراحه من كثر ما اشوف الناس جاها جنون الاسهم ,, لدرجة ان اليوم اشوف في برنامج العربيه حق الاسهم يقول المقدم ان الرجاجيل اللي حريمهم حاملات<<<<جمع حامل

يوعدها بنسبه زينه من ارباح الاسهم اذا ولدت قبل الاكتتاب في اي مساهمه قريبه ,, عشان يقدر يستخدم اسم المولود الجديد

غير كذا الناس صارت تحسد الرجال اللي عياله كثيرين عشان الاكتتاباب


واتوقع ان الاسهم الحين في عزها عن جد ارباحها صايره خياليه ,, بس بعدين اتوقع بعد 5ـــ6 سنوات راحت تطيح طيحه قويه <<<وجه بومه

لان مافيه شي يستمر على حاله,, <<<<جبت شي جديد

تحياتي لك ..

[ستااار]

[align=center]مشكورة يالصحراوية على تعقيبك
وكلامك والله كله صح بنسبة للي ينتظر زوجتة تولد علشان الأكتتاب[/align]

[حمد]

هذي طفره

فتره اتوقع ان لا تستمر اكثر من سنه

لأن القيادة الإقتصاديه للدوله لا تسمح بمثل المضاربات الخياليه هذه ، بالتأكيد كان له أثر كبير على اقتصاد البلد طبعا بالسئ ، لأن الناس بدل ما تفتح اسواق وتشري بيوت جديده واراضي والعقار يتحسن وضعه ... الناس راحت لمحافظ الأسهم و معدلات ربح خياليه اذا قارناها بالعقار في وضعه الحالي خصوصا مع وجود الحراميه في الشركات العقاريه اللي ياخذون دراهم خلق الله علشان مساهمه

وفي الأخير يا يحط رجله برى الديره ... او تلقاه فاتح محفظه من فلوس خلق الله

[جورية]

الله يكفينا شر فتنة الاسهم

احيانا تجيني رغبة اني اتعلم على سوق الاسهم واتحمس واقول لرجلي ابيك تعلمني

ولا جاء من بكره عقب مايقول تابعي السهم الفلاني والعلاني ضاق صدري وقلت له هونت

مشكور اخوي ستار

وتم نقل الموضوع لمنتدى الاسهم

[ستااار]

[align=center]مشكور اخوي الصيدلي على المرور

ويعطيك الف عافية[/align]

[ستااار]

[align=center]الجوري

انا من رائي انك ماتدخلين

والله يعطيك العافية على المرور[/align]

[أمير سدير]

والله ارى ان الاسهم مستمره دام ان اقتصاد المملكه قائم

ولن يطيح سوق الاسهم الا بعد تدني السيوله لدى الافراد


وعندكم خير مثال شوفو الاسواق الامريكيه واليابانيه مع انها من اقدم الاسواق في البورصه عالميا يعني قبلنا بكثير مره


ومع ذلك سوق الاسهم عندهم جميل ورائع

وذلك ماسار الا بقوة اقتصادهم


وبس هذا كل اللي عندي وشكرا

[سعود الخليل]

حسب تصريحات خبراء السوق اللي نتابعهم في القنوات الفضائية ان السوق السعودي لازال في بداية المشوار يعني المؤشر الآن وصل 19500 ومع ذلك فيه خبراء يقولون يبي يوصل المؤشر إلى 30000 وهذا طبعاً دليل على المبالغ الخيالية اللي تدعم السوق كل يوم ...

والله يستر لا يجينا مثل سوق المناخ اللي في الكويت ...!!!

[الوحش]

[align=center]وانا مع اخي راعي الاوله

السوق السعودي فيه سيوله كبيره

وهالسيوله تأثر أيجابياً على اسعار الاسهم

من مدة سنة ونصف تقريباً كان التداول من مليار إلى ثلاثه مليار في اليوم

والأن التداول يصل إلى أربعين مليار ريال

والمؤشر أن شاء الله إلى 30000 نقطة بإذن الله[/align]

[حمد]

والله من شاف البيشه وهي بـ 1500 ما رجاء خير


اجل بيشه راسها براس سابك ؟؟


يا ناس وين تجي هذي ؟


اليوم الأحد كل الخشاش نسب او قرب على النسبه

وهذا في نظري يدل على ان جني ارباح سيكون غدا او بعده بالكثير