شريك العاقل (قصة من الخيال العلمي) (مكتمله)

[شريك المشاكس]

شريك العاقل (قصة من الخيال العلمي)



شريك طلع عاقل !!!

قل قسم !!

مو معقول


والله لو وش يصير عااقل

قسمن بالله جعل امير سدير الفطسه انه صدز >> اعضاء المنتدى مهب مصدقين العنوان

احم احم .. بسم الله نستفتح :

شريك المشاكس كائن حي بشري خنفشاري برمائي >> يدلك انه يتروش ولا يغرق ، المهم ذا الادمي ماله إلا هدفين في الحياة أنه يقوم وياكل ، وبعد ما ياكل ينوم

والا باقي الاهداف الثانية تطلع تسلل والا ضرب بدون الكوره >> بتنقشع القصة للرياضي

المهم

ذاك الصباح من الاصبحه >> ابو من علمك الجمع

كنت نااااااايم وفاقن هالخشه فاغرا اثمي كأنني ذئب ينبح بس انه اطرم >> عفط المعنى علشان يجيب تشبيه قوي

وبينما كنت في احلامي العميقة والتي جعلتني انا والوليد صدقان وربع الروح بالروح وما يجي يوم ولا صبح ولا ليل الا ويدق علي ونستهبل على بعض ، وخصوصا العصر اذا جت الاسهم قمت خفست بالاسهم 3 الاف نقطة استهبل عليه
وحتى في الجو وانا بطيارتي اشطفه عند مخرج السعودية واضرب له بوريين يقوم يكبس ويمسك الاصفر ويدعس يعني صدقان بقوووه >> حتى الحلم يتبخر منه حشيش

شوي والا الوليد صاطرني بشبشب الحمام !!!

الا واطيح من فوق السرير ، وأشوف الوليد قدامي صروال ابو سنه وفنيله طالع منها كرشته في راسها حفرة صغيرة يسمونها سره يباع فيها قطن خام !!

واتمقل اتمقل إلا والوليد لم يكن سوى ماي فاذر ، وانا اقول ايه الوليد المملوح الابيضاني الوسيم مهب جاي جنب هالشايب الي كنه علبة تايد وحاطين لها يدين ورجلين gِ

المهم واستفيق صح على زعاقه ، والا هالشايب مستلمني ، ورى ما تدور وظيفة وتصير مثل الاوادم بدال منتب قاعد على النت

واقوله: يا بيي اني احاول بس تخبر ما تلقى فرصة والنت ذا استفيد منه في وظايف عالمية
عاد يلسبني بالشبشب الثاني واموه عليه لين تتعداني واقوله: وش رايك بالحركة ، يرد علي بكل برود : لا يكثر ، هالحين تسذب علينا وظايف عالمية وانت ما غير تدربي هالراس في هالمنتديات والله يستر لا يكون لك يوزر في سدير بعد >> لولا ان ابوي افدغ والا قلت انه السبعين
قلت: وش سديره وش شريكه >> كمخه

المهم واخربها وامسك لي وحدتن من هالشباشب واطيرها على الشايب مير انه وخر ويطلع الشبشب من غرفتي ويروح لغرفة اخوي (آدم) الي قدام غرفتي مباشرة وسماه ابوي ادم لانه عجاااااز وتقل انه سوداني عاد من قرادة حظه وعلى غير العادة كان ادم توه قايم من النوم من ساعتين وتوه يوصل الباب حتى من زود العجز ما صكه ، المهم ما يدري الا والشبشب مشلفح في جبهته من قوتها سدحته على الارض لين قال: وجبت >> وكمل نومته الحبيب

شوي الا ابوي حقد على هالحركه ويمسك الاب توب ويذبه علي وامسه بحركه بهلوانيه واطيح على الفراش واشوف الجماهير في الحاره تصفق ، وشوي وأروح لطرف السرير كني ستيف أوسن وأطب عليه كانها ضربه النهاية الا ابوي الله يهديه وخر شوي الا واشوف قدامي الدريشه مفتوحة على الاخر وانا طاير في الهواء منفرد فيها قلت يا ولد انت طايح طايح بس سو فيها حركات فنية علشان تصيح الطيحه محترمة وتوني استهبل مثل حسين هادي الا واخم في طرف الدريشه الي فوق عرفت ان حسين هادي ماله أي حظ في الدنيا

يوم هدت الامور، قلت لابوي روق المنقا لا تنقلب جد وكل واحد يصلح سيارته جاني ابوي قال رح لعمك تراه يحتريك في المكتب داقن علي يقول خله يجي نشوف له وظيفه ، اومأت برأسي موافقاً >> وش رايكم بأومأت ما تحسون اني زارفها من المنتدى الادبي

واطق لي أفخم ثوب مافيه إلا شك بسيط بسبة شروخه العيد قبل الماضي ، وأطق ذيت الغترة واروح لمكتب عمي الي في شمال العليا حول الصحافة وشوي من الزمن إلا وأنا واقف قدام مكتبه وعليها لوحة كبيرة : مشرك المهايطي للعقار والمقاولات ، على طاري اسمه النحس ترى مكتبه ذا تفجر حول سبع مرات من بتوع القاعدة يحسبونه مهب مسلم
وادخل عليه سيده ويسلم علي سلام بارد زي وجه همن استلمني نصايح وما نصايح وانني شوهت سمعة قبيلة المهايطي العريقة بتصرفاتي الرعناء >> طالعن فيني ثقافة اليوم
واني لازم اترك عني الاستهبال واني اصير عاقل يشار اليّ بالمصابع ، واصير رجل اعمال مثله عاقل وراكد ومتزن ، والعم وهو يسولف طلع لي صندوق صغير الي في الافلام يحطون فيه سجاره بنية طويلة يسمونها سيجار كوبي ، إلا أن عند عمي حاط فيها حشيش معتبر ، واخذنا نكمخ فيها لين خليت عمي خوي للوليد معي

يوم ركدنا يلتفت علي عمي ويقول : هالحين لك في العقار ؟

قلت : استغفر الله مالي في المخدرات حدي حشيش وبس

قال: يامتخلف يا منحط .. اقصد العقار الاراضي !! يعني زي البيع والمشترى والسوم والحد ؟
قلت: لاوالله
قال: طيب تعرف اراضي مخططات ؟ زي الصحافة مربع ثلاثة والا ستة والا اربعة ؟

قلت: وش ذا يا عمي اشوفك قلبتها مباراة كورة ناقلتها الاذاعة ما بقى الا تجيب محمد رمضان

شوي الا عمي راح ياكل له عشرين حبه ضغط وسكر همن رجع مع واحد ابيضاني طويل وشعره اصفر وعيونه خضر >> ما يحتاج اعلمكم منهو

الا عمي يقوله خذ ولد اخوي وعلمه اصول الشغل وابيه يطلع رجالن فاهم لك اللحم ولنا العظم

وياخذنا هالشامي الي ماهنا ازين من ريحته ، ويدخلني على مكتب ويجيب لي ملفات واوراق ومخططات وقد يشرح لي حبه حبه ، وش مصطلحات السوق وش الوضع وش الناس يبون ليييييين قلت بس ، عاد هو بدا يشتغل معي على كبير ومشاريع كبرى وكل شيء ، وصرت رجال فاهم واجي دايم وحريص على الشغل وصار عمي يسوي زي الافلام يقعد عند الباب يشوفني اشتغل يهز راسه ويروح >> قاهرته هالحركه hٍ

وصرت انا وهالشامي (رامي) ربع ونتعشى ونفطر مع بعض وكل شي لين جاء اليوم الي قال ان هالصفقة راح تنقلنا من عالم التجارة الى الهوامير والاقوى شي >> ماعنده مصطلح يخدم :ـ.:

الا يوم جاء واحدن شامي مثله يجر وراه جيش مستشارين ومهندسين ، المهم عرفني رامي عليه طلع المهندس امير دمشق ، وعرفني على بقية المهندسين الي معه

المهندس مثل النخيل خلقت: مهندس معماري متخصص في تصميم ملاعب الكورة
المهندس: أبو ابراهيم مهندس صوتيات بس علشانه مهندس جابوه والا مهب لم السالفة
المهندس: المصمك مهندس في التصميم المعماري القديم

وغيرهم من المهندسين ، وجلسوا لهم ساعتين يقرقون وانا ما أدري وين الله حاطني فيه !!

الا رامي يتغامز وياهم وياشر ومدري وشو !! المهم لين فهموها وطلعوا وودعناهم على امل اللقاء بهم في مشاريع ثانية، والتفت على رامي واقول له وش السالفة؟

عاد قالي ان هذولي مهندسين عارضين لنا قطعة أرض في البحر علشان نستثمرها وناجرها على السياح وزي تسذا وراح تدخل لنا مبالغن وااااجده ، قلت والله حلو خلنا نسعى في الموضوع بس وش قصة هالارض يقولون دولة وما دولة ما نبي مشاكل دولية الله يرحم والديك !!
قالي: لا لا حبيب ألبي .. الارض هذي كانت عليها دولة استراليا ومالكها اجرها على الدولة بذيك القيمة بس هم الله يهديهم ما التزموا بالاجار فقرر يطلعهم بعد مالعب عليهم وقال ان ولده بتزوج فيها >> أقرب مخرج لحقين العقار

قلت له: طيب خلني اعلم عمي عن الموضوع بحكم خبرته وو ...

قال : لا يا حبيبي هذي الضربة بالذات هي الي تخليك كبير عن عمك ويثق فيك بانك عاقل وكبير ومكسب له، وانا اتفقت معه انه يدعمنا بكل ما يقدر في هالمشروع رغم انه ما يعرف عنه ولا شي
قلت اجل توكل على الله وخلنا نشتري هالجزيرة كودنا نترزق الله فيها

قالي خلاص بكرة بأضبط جوازاتنا وازين رحلتنا على ذيك الديرة ونشوف الوضع .


قلت قدامنيشن


انتهى الجزء الاول

[عبدالله الفـارس]

خخخخخخخخخخخ

الله يصلحك أنت وآدم ...........

المشاركة الأصلية كتبت بواسطة   الا واطيح من فوق السرير ، وأشوف الوليد قدامي صروال ابو سنه وفنيله طالع منها كرشته في راسها حفرة صغيرة يسمونها سره يباع فيها قطن خام !!

لا تـعـلـيـق

[أبو إبراهيم]

المشاركة الأصلية كتبت بواسطة   المهندس: أبو ابراهيم مهندس صوتيات بس علشانه مهندس جابوه والا مهب لم السالفة

الله يرجك أجل انا مانيب لم السالفه

وكمل الجزء الثاني خلنا نعرف وش سالفة الصفقه

[أمير سدير]

خخخخخخخخخخخخخخخخخخخخخ


الله يرج مندوبك بلا

الموضوع مثبت لابداعك

شاكر لك

[روح سدير]

هههههههههههههههههه

الله يرجك يا شريك

نحتريك في الجزء الثااااااني

[بدر]

تسلم يا شريك..

[عبدالله الفـارس]

دخلت المنتدى أدور موضوعك يمين ويسار ما لقيته قلت عساهم ما حذفوه وليش يحذفونه ما فيه شيء أثاريه طلع مثبت وأنا ما أدري لكن قصتك وموضوعك يستاهل .........

ننتظر الجزء الثاني بس حطني معكم ...خخخخخخخخ ......

[الصحراوية]

ههههههههههههههههههههه اما اخوك ادم اهنيه على الاسم

وبعدين حرام عليك وش ذا التشبيه اجل ابوك كنه كرتون تايد له يدين ورجلين ههههههههههههههههههههههههههههههههههههههههههههه هههه مت ضحك على هالوصف

المشاركة الأصلية كتبت بواسطة   ابيضاني طويل وشعره اصفر وعيونه خضر وهالشامي (رامي)

متاكد انه موب ايرلندي ؟!

خخخخخخخخخخخخخخ يله بسرعه حط الاجزاء الباقيه تراني مره تحمست لاتصير مثل غيرك وتنزل بالقطاره

تحيااااتي.

[مثل النخيل خلقت]

هههههههههه

الله يرجك ياشركرك ..

بس احلى شي انك حاطني مهندس !!

من قدي ..

على فكرة ..

استاد الملك فهد انا اللي صممته ..

يمديك على الخيام !!

حتى ملعب برلين حق نهائي كاس العالم انا صممته ..
ماتشوف ايطاليا فازت !!

بس الصدق حبيب ربي ..
مهوب انا اللي حطيت عصا هتلر !!

****************************************


الف شكر اخوي شريك لرسمك الابتسامه على شفاهنا ..

ابداع جديد غير مستغرب على موضوع يتصدره اسم شريك المشاكس ..

وبانتظار الاجزاء القادمة ..

[A_I_O]

هههههههه

رهيييييبة

بانتظار الجزء الثاني على احر من الفحم << اذا صار فيه جزء ثالث بيصير جمر


تحياتي للمقلع شروكي

وللجميع .........

[سُـقـرَاط]

أجل ناوي تسير عاقل يالذيب............


احتري الجزء الثاني...............

[هرمنا]

شريكوووووووووووووووه

مهوي؟؟؟ لا مايكفي

منتهي؟؟؟ كلمة غير دقيقة ..هات اقوى

محشش؟؟ ؟ ماجبت شي جديد

منسم ؟؟ هذي خالصين منها

طامر سطر؟؟؟ الا قل طامر مجلد كامل

هههههههههههههههههههههههههههههههههههههههه

الله يرج مندوب مندوب مندوب ابو اللي عرفني عليك خخخخخخخخخخخخخخخخخخخخخخ

قسم بالله دموع من الضحك
==================

مقاطع تسدحت فيها من الضحك :

المشاركة الأصلية كتبت بواسطة   المهم ما يدري الا والشبشب مشلفح في جبهته من قوتها سدحته على الارض لين قال: وجبت >> وكمل نومته الحبيب

<<< قام يعض المخدة من الضحك

المشاركة الأصلية كتبت بواسطة   شوي الا ابوي حقد على هالحركه ويمسك الاب توب ويذبه علي وامسه بحركه بهلوانيه واطيح على الفراش واشوف الجماهير في الحاره تصفق ، وشوي وأروح لطرف السرير كني ستيف أوسن وأطب عليه كانها ضربه النهاية الا ابوي الله يهديه وخر شوي الا واشوف قدامي الدريشه مفتوحة على الاخر وانا طاير في الهواء منفرد فيها قلت يا ولد انت طايح طايح بس سو فيها حركات فنية علشان تصيح الطيحه محترمة وتوني استهبل مثل حسين هادي الا واخم في طرف الدريشه الي فوق عرفت ان حسين هادي ماله أي حظ في الدنيا

نعنبو ابليسك ..وين جبتا حسين هادي منه خخخخخخخخخخخخخخخخخخخخخخخخخخخخخخخخخخخخخخخخخخخخخخخخخخ خخخخخخخ

والله وانا اكتب هالرد اني فاطس ضحك

اجل حسين هادي ماله حظ في هالدنيا هههههههههههههههههههههههههههههههههه

الله يرجك الله يرجك الله يرجك
======================

المشاركة الأصلية كتبت بواسطة   يوم ركدنا يلتفت علي عمي ويقول : هالحين لك في العقار ؟ قلت : استغفر الله مالي في المخدرات حدي حشيش وبس

لا تعليق ...بس فاك كشرتي واضحك


=================

المشاركة الأصلية كتبت بواسطة   قلت: وش ذا يا عمي اشوفك قلبتها مباراة كورة ناقلتها الاذاعة ما بقى الا تجيب محمد رمضان

اجل تتابع المباريات في الرادو ؟؟ خخخخخخخخخخخخخخخخخخخ كل انواع النفضة اذا قال زاهد قدسي : ماجد يدخل في مربع رقم 7

ذهب الذين يُعَاش في اكنافِهم
===============

المشاركة الأصلية كتبت بواسطة   رجع مع واحد ابيضاني طويل وشعره اصفر وعيونه خضر >> ما يحتاج اعلمكم منهو

واسمه رامي بعد؟؟؟

قد مرت علي هالاوصاف ..بس مدري وين

==============

المشاركة الأصلية كتبت بواسطة   الارض هذي كانت عليها دولة استراليا ومالكها اجرها على الدولة بذيك القيمة بس هم الله يهديهم ما التزموا بالاجار فقرر يطلعهم بعد مالعب عليهم وقال ان ولده بتزوج فيها

خخخخخخخخخخخخخخخخخخخخخخخخخخخخخخخخخخخخخخخخخ

تكفون احد منكم يدق على المكافحة الان

================

المشاركة الأصلية كتبت بواسطة   يله بسرعه حط الاجزاء الباقيه تراني مره تحمست لاتصير مثل غيرك وتنزل بالقطاره

والله انك صادقة يالصحراوية

ترانا نحتريك

عجل يادب

[أمير سدير]

المشاركة الأصلية كتبت بواسطة   قسمن بالله جعل امير سدير الفطسه انه صدز >> اعضاء المنتدى مهب مصدقين العنوان

ولك وجهه تقولها

انا اوريك

[شريك المشاكس]

كيف الحال


والله اني مستانس يوم اشوف التفاعل ، قلت يا ولد لازم نغير الخطة شوي علشان الاعضاء ما يملون، تخبرون اني اسوي طريقة استاذنا الكبير السبعين >> صفقوا يا عيااااال

واني انزل الاجزاء همن اتفرغ للردود ، لكن قلت يا ولد الى متى وانا اعيش في جلباب السبعين >> صورة محمد رياض يكلم نور الشريف

فقلت خلني اغير الخطة الى 442 اثنين مع التركيز على الاطراف >> تركي الصويلح يسوي تمرينات اطاله


فالان بارد على كل الردود الي فوق همن بأنزل الجزء الثاني ، هاه وش قلتوا ؟


وحبيبنا عاشق ديرتي مرحبن بك وحياك الله وخلينا نشوفك داااايمن

[شريك المشاكس]

أبو بريه

كن ماجاز لك الوضع ، تبيني احطك زعيم المافيا ما عندي مشكلة >> وجه يغمز يقول هاه وش رايك



حياك الله بو ابراهيم وانتظر الجزء الثاني والاخير