التقرير المصور لرحلتي الى ماليزيا ( الجزء الأول )

[فهد المنيع]

السلام عليكم

هذا تقرير رحلتي الى ماليزيا لهذا الصيف 2006 وراح يكون على جزئين عشان ما تثقل الصفحة بالصور علماً اني قللت دقة الصور لظروف التصفح ..

في البداية واجهت مشكلة في حجوزات الطيران وانصح اي واحد يبي يسافر يحجز قبل الصيف .. عموماً حصلت حجز على الخطوط السيرلانكيه .. شفت قيمة التذاكر وقارنتها بالخطوط السعودية ولقيت الفرق تقريباً 2000 ريال والله فرق مهوب سهل بس الرحله راح تتوقف في كولمبو عاصمة سريلانكا لمدة ساعة ثمن نركب طيارة ثانيه الى كولا لمبور والخطوط السعودية دايركت الى ماليزيا بدون توقف .. فدرست الموضوع وقررت السفر ..

في البداية توقعت الطيارة بتكون كلها شغالات هع هع هع لكن تفاجأت ان نصف الركاب عوائل سعودية فريحني هالشي والشي الثاني ان مستوى الخدمة ونوع الطيارات كان جيد والحمد لله ، وسمعت ان طيران الامارات يتعامل معهم او مستثمر عندهم او شي من هالقبيل ..

بعد حجوزات الطيران استشرت بعض الاصدقاء وجمعت معلومات عن طريق النت عن ماليزيا وسويت لي برنامج وحجزت الفنادق والطيران الداخلي عن طريق مكتب سياحي ..

بدأنا الرحلة من الرياض ووصلنا بعد 4 ساعات الى كولمبو وصلينا الفجر وانطلقنا لكوالا لمبور بعد انتظار اقل من ساعة ووصلنا ولله الحمد بعد تقريباً 3 ساعات ونصف وتوجهنا فوراً الى سلنجور واللي تبعد عن المطار نصف ساعه وبالتحديد الى فندق براميدا وكانت الخطة هي الراحة لمدة ليلتين من السفر ثم التوجه للجزر

تتميز سلنجور بوجود الاسواق ومدينة العاب مائية ( صن واي لوقن )






بعدها اقلعنا بالطيران الداخلي الماليزي الى جزيرة لنكاوي وكان المقرر الاقامة فيها لمدة 3 ليالي والاقامة في فندق هولدي فيلا

صراحه لنكاوي من اجمل الجزر الماليزية وتتميز بالطبيعة الجميله وبالبساطة يعني كل شي اخضر وبيوتهم اكواخ وحياتهم بسيطة وما فيه مباني كبيره وهذا اللي اعجبني فيها غير شواطئها الحلوة والنظيفة ..

اليوم الاول طلعنا في رحلة نهرية بقارب خاص وانطلق بنا في مكان ما اقدر اوصفه الصراحه يعني طبيعه خلابه وجو منعش وبين جبال خضراء




ووقفنا عند كهف مليان خفافيش هع هع هع ثمن مشينا ووقفنا عند مزرعة للاسماك وريحنا وشربنا عصير وشفنا انواع كثيره للاسماك والحيوانات البحريه وقعدوا يشرحون لنا بالانقليزي هع هع هع وانا اقول يس يس وانا مدري وين الغنم سارحه هع هع هع واكتشفت في هالرحله اننا يالسعوديين الوحيدين اللي ما نعرف انقليزي يعني كل الجنسيات من اجانب وهنود وخليجيين وعرب يتكلمون انقليزي وحنا تقل طرمان نقول كلمة ونتعتع شوي على ما نركب جملة وهذا يرجع للتعليم عندنا !!

المهم بعدها انطلقنا بالقارب وشفنا من بعيد شواطئ تايلند ورجعنا وانتهت الرحله بعد تقريباً 3 ساعات وتوجهنا بعدها الى حديقة الطيور وقعدنا نشوف اشكال وانواع الطيور




بعدها توجهنا الى الشلالات ودخلنا في وسط الغابة الين وصلنا لها وقعدنا نطافش ونشرب من هالمويه الحلوة والباردة




وبعدها رجعنا للفندق بعد يوم ممتع وريحنا وتغدينا وطلعنا لشاطئ الفندق الجميل


في اليوم الثاني رحنا شوي نتمشى ونتسوق وبعدها توجهنا للآبار السبعة وهي من افضل الشلالات اللي شفتها في ماليزيا وفيها ناس واجد اللي يسبح واللي يصور -----> مهوب انا هع هع هع




قعدنا نتأمل في هالطبيعة الزينه وتشطرنا شوي عن الناس وتوضينا وصلينا ويالله من فضلك ... وجنب الشلالات محلات صغيره شلخوا لنا جوز الهند وشربناه لاول مره وطعمة ما اعجبني مره لاني متعود على الجح هع هع هع وبعدها رجعنا للفندق وتغدينا وريحنا وطلعنا لشاطئ الفندق نكمل باقي النهار فيه والناس اللي يلعب واللي يتمشى واللي يركب دباب واللي يطافش وكان الغروب جميل




من بكره طلعنا لرحلة بحرية للجزر الثلاث بس اني نسيت اسمائهن ما عدا جزيرة المرأة الحامل لان شكل الجزيره كنه حرمه حامل وكان معنا اجانب وعرب على السفينة وقعد يشرح لنا السواق عن كل جزيرة نجيها وانا طبعاً فاهم كل شي هع هع هع بعدها توجهنا لجزيره شاطئها حلو مره وفيها قروده




جلسنا فيها ساعه واللي سبح واللي يتمشى واللي يركب دباب بحري وبعدها مشينا لجزيرة غريبة شوي في وسطها بحيره كبيره بين الجبال مويتها راكده تستاجر قارب صغير مره ياخذ شخصين وتاخذ دوره لمدة نصف ساعه في هالبحيره وصراحه كانت ممتعه مره ومناظرها خلابه وبعدها رجعنا للقارب وانطلقنا لمكان بين الجزر مليان نسور ووقفنا القارب وقعد ينطل السواق قطع سمك في البحر ثمن نزلت هالنسور تلقط السمك من الماء وحنا نتفرج ونصور




وبعدها رجعنا بعد رحلة ممتعه

في اليوم الرابع كان السفر بالطائرة لجزيرة بيننق وفي اقل من ساعة وصلنا والحمد لله

بيننق جزيرة مثل لنكاوي لكنها متطورة ومليانه مباني وسكانها اكثر وغالبيتهم من الصينيين

توجهنا الى مقر اقامتنا فندق هوليدي ان بيتش وصراحه من افضل الفنادق اللي سكنتها .. فندق نظيف والغرفه وسيعه واطلالتها حلوه وشاطى الفندق ممتاز جداً وبجانب الفندق سوق ليلي على شكل بسطات كله بضائع صينيه رخيصه بس لازم تكاسر والا بيلعبون عليك ...

مدة الاقامة في جزيرة بيننق 5 ليالي

في اليوم الاول توجهنا لحديقة الفراشات وشفنا اشكال وانواع الفراشات سبحان الله العظيم ..




بعدها رحنا لحديقة الفواكة في مكان مرتفع ودفعنا المقسوم وركبونا في باصات صغيره وطلعوا بنا فوق الجبل وقعدوا يشرحون لنا عن الفواكة وانواعها وتصدقون شفت عندهم جح اصفر هع هع هع بعدها قدموا لنا انواع واشكال الفواكة وعصيرات طازجة ..




بعدها رحنا لحديقة القرود وقعدنا نضحك على هالقرود ونصورها هع هع اعجبتني ذا القرده تفلي ولدها هع هع هع




ثمن طلعنا منها لحديقة الزهور وتمشينا فيها وشفنا اشكال وانواع الزهور .. بعدها رجعنا للفندق وتغدينا واستمتعنا باقي النهار في شاطئ الفندق وخليتهم يدلكون رجلي هع هع قعد ربع ساعه في اصابع الرجلين هع هع وناسه وركبنا دباب بحري وخيل وصراحه كان هالشاطئ متعه لحاله ..




في اليوم الثاني رحنا للقطار اللي يطلع هضبة بيننق وهو قطار يطلع لمكان مرتفع جداً والطريق كله بين الاشجار والمناظر روعه لا وكانت تمطر في نفس الوقت




طلعنا فوق الجبل وصرنا نشوف بيننق كلها وكان المنظر خيالي والجو غيم وامطار ولله الحمد وبعدها نزلنا وطبعاً كل هذا كان في 3 ساعات .. وبعدها رحنا لمعبد بوذا النائم يا عله ما يقوم هع هع هع




قالوا فصخوا نعالكم تكرمون وفصخناها ودخلنا واذا فيه تمثال كبير منسدح وفيه اصنام تحت يجون يسجدون لها وفيه ورا زي الدروج في وسطها علب وعلى كل درج صورة واحد وسألنا السواق قال هذولا اللي يموتون يحرقونهم ويحطون رمادهم في هالعلب قلت اللهم لك الحمد على نعمة الاسلام ..




بعدها رحنا لمعبد الافاعي وصاير ذا المعبد مكان سياحي كلن يجي ويصورونه مع الافاعي بفلوس طبعاً ، وخربتها ومسكت داب عريضة وصورت معها .. وقعدنا نتفرج على اشكال وانواع الافاعي ورجعنا للفندق




في اليوم الثالث نسقنا مع منظم رحلات بحريه واستأجرنا قارب خاص مع السواق وطلعنا رحلة بحريه وكان الجو غيم ومن ابدع ما يكون




وبدينا بصيد السمك وابشركم صدت سمكتين بس صغار شوي هع هع هع بعدها انتقلنا لجزيره وكان في استقبالنا عمال الشركة اللي اخذت منهم القارب وقدموا لنا الماء والفواكة وتمشينا شوي في الجزيرة الين جهزوا لنا الغداء وهو عباره عن مأكولات بحريه مشويه اشكال وانواع وبعدها رجعنا للفندق ..

والعصر كان على شاطى الفندق وفي الليل رحنا للسوق الليلي اللي جنب الفندق وهو على شكل بسطات وغالب اللي يبيعون هم صينيين وبضاعتهم صينيه والسوق مزدحم بالناس من جميع الجنسيات ولازم الواحد يكاسر لانه يقولك بـ 100 وفي النهايه تشتري بـ 20 ريال وتلقاه لاعب عليك بعد بس لو تلقى هالسلعة عندنا في السعودية بتشتريها بـ 70 ريال
وفي نفس الشارع لقينا بعض المطاعم العربية وحطيت حرتي في الرز لان الاكل في ماليزيا بشكل عام مهوب زين ... وضحكت على مصري راعي مطعم مشغل اغاني عربيه وحاط السماعه برا ومطلع ثنتين من البنات اللي يشتغلون في المطعم عند الباب يصفقون مع الاغنيه عشان يجذب الزباين هع هع مسوي ملكع الله يرجه


في اليوم الرابع رحنا لمبنى كومتار وهو من اطول المباني في بيننق وطلعنا للدور الاخير وقعدنا نتفرج على بيننق كلها




بعدها توجهنا لاحد المجمعات التجارية وتسوقنا وتمشينا وبعدها رجعنا للفندق وكالعاده باقي النهار في شاطئ الفندق

في اليوم الخامس رحنا لحديقة الحيوان وتمشينا فيها وبعدها رحنا لحديقة الاسماك وفيها احواض واسماك من كل شكل ونوع وبعدها توجهنا لاحد الحدائق الجميله وتمشينا فيها وبعدها خذنا لفه في احد الاحياء الراقيه في بيننق وشفنا بيوت التجار والسياسيين ورجعنا

بكذا ينتهي الجزء الاول من الرحله والجزء الثاني في موضوع مستقل عشان نخفف التصفح



مع السلامة



لا تعرضون تواقيعكم عشان ما تثقل الصفحه

[عبدالعزيز]

اول شي الحمد لله على السلامه

ثاني شي اشكرك جزيل الشكل على صورك الرااائعه جدا وعلى الشرح المفصل للرحله

تقبل خالص تحياتي وتقديري

[زهرة]

ماشاء الله تبارك الله

ياحليلهم حديقة الفواكه حتى الجح مقطعين<<والله مدري هو جح ولا لا

ابروح للجزء الثاني

[شريك المشاكس]

هلا هلا هلا


ما شاء الله


حمد لله على السلامه


بصراحه ديره تفتح النفس >> ناوي يخاويك السنه الجايه


اما الجح ذي ما يحتااااااااج قعدت اضحك عليها

بالله ما شفت جح ازرق >> قاتل الله التعصب



حمد لله على السلامه حويلم وبارفع ثوبي طامرن للجزء الثاني >> متعود على نظام السواقي

[مشــاعر]

السلام عليكم..


ماشاء الله تبارك الله ,, شكلكم استانستوا من جد,.,

عجبتني ساحة التزلج مررره ,, ودي أتزلج ,,

لكن الانجليزي والله فيه سعوديين يعرفون ,, بس مو كثير انت صادق,, يعني تلقى الاغلبيه مايعرفون ,,
طيب كان وديتني معاك اترجم ,, خخخخخخخخخخخ

الجح شكله يقططططر السعابيل ,’,, وش ذااا؟؟؟ من جد يشهي,, ابي,,


مشكور على هالتقرير,,


تحيتي لك

[مثل النخيل خلقت]

ماشالله ..

والله الديرة شي ثاني ..

طبيعة ولا اروع ..

يعطيك العافية اخوي حالم ليل ..

وترا السنة الجايه انا وشيخ شمر رجولنا على رجلك !!

[حمد]

ارحمونا يا شيخ




ترى نهج

من الرياض

وسدير


=======

على طاري الرياض

بعد نهايه الرحله الآن

أفضل مدينه زرتها واللي ودك انك طولت فيها ؟ وش هي

[فهد المنيع]

شيخ شمر وش السالفه صاير محترم !! هع هع هع هع


مشكور جزيل الشكل هع هع هع

[فهد المنيع]

زهره جحهم اصفر واحمر وحبيبين مقطعينه ما دروا اني احب القشر هع هع هع


الف شكر

[فهد المنيع]

شريك السنه الجايه في الصيف يبي يروح شيخ شمر ومثل النخيل للصمان خاوهم تبي تستانس هع هع هع


الله يسلمك حبيب البي

[فهد المنيع]

مشاعر اذكري الله يالشهباء هع هع هع

تبين تتزلجين اجل !!


افتحي الفريزير الكبير وخذي لتس دوره بس انتبهي توطين الدجاج هع هع هع


مشكوره

[فهد المنيع]

مثل النخيل ولم خلاقينك من الحين واهم شي القميص هع هع هع


الله يعافيك ..

[فهد المنيع]

الصيدلي احتسب الاجر ويالله حظ الآخره


جزيرة لنكاوي تمنيت اجلس في اكثر من 3 ليالي لان طبيعتها حلوه وهادي لا مباني ولا شوارع كبيره وبيوتهم اكواخ وفيها اماكن كثيره يقدر الواحد يزورها ..


مشكور

[مثل النخيل خلقت]

اجل الصمان !!


هع هع !!


كل هذا عشانا ماوديناك معنا ايطاليا هالسنة ..


خلاص ولايهمك ..

بعد مونديال 2010 بنوديك ..

بس تاخذ ايطاليا الكاس ..



ههههههههههههه

[مرهف]

السلام عليكم

ما شاء الله .. صور في غاية الجمال ... بصراحة ماكنت أتوقع مالي كذا !!

شكرا أخوي حالم ليل على الصور المذهلة ..

تحياتي الحارة !!

ميــشــو