مـــوقف مـحـرج ..... ( الله لا يوريك ) !!!

[ابن سدير]

يقول صاحب القصة وهو مؤذن مسجد في ديرة (ما )في دولة (ما )في حي( ما ) << بيكب العشاء ويجيب اسمه ورقم جواله ،

كان خوينا هذا مؤذن وش حليله وكان سهران ذيك الليلة نام قبل صلاة الفجر بقرابة نصف ساعة وهذي نومة قاتلة للعزم يعني خيرها كفاية شرها ،

أذنت المساجد وقمز قمزة الذيب على المسجد وأذن وهو ينود المهم انتظر الإمام يجيء انتظر ،

يناظر الساعة ،

بدأت أدعية الكرب تجيء على لسانه ، يا شيخ والله تعبان ونعسان وشلون بأصلي بالجماعة ، مع إنه حافظ للقرآن لكن التعب مسيطر عليه ،

وقربت الإقامة والسي الإمام ماجاء ، ياولد وش الدبرة ؟ ما فيها خلاص قم أقم يا رجال وصلي بعباد الله ،

قام الحبيب وأقام وبتثاقل << تراني سامعها وودي أدخلها بالموضوع بأي شكل ، تقدم بالجماعة وبصوت خافت ( الله أكبر )

قرأ الفاتحة ، وأثر ذيك القطوة وفي رواية ( البسة ) وعند قوم في أفريقيا ( كديسة ) تمشي عند المايكرفون الصغير اللي لإسماع تكبير السجود والرفع منه ،وهالقطوة مشخصة وهات يا ( نياو نياااااو نيااااااااااااااو ) والصوت طالع برى المسجد ،

ياولد وش العلم ؟ ماهي الدبرة ؟ < يسمع بالنابغة ،

هل أصفعها كفا ؟ أم أشوتها ركلا ؟ أم أعزرها شلوتا ؟ يا للهول ،

جاءت الحبيبة وبدأت تدخل بين رجليه وتتلزق به وتلحسه ههههههههه تراه سعودي ماهو دينماركي أحد يظنه جبنة بوك ،

خوينا مشغول بالقراءة وتعبان ونعسان وهالقطوة كملت الباقي ، وبلين دفهاااااا برجله - أعزكم الله - إلى أن أبعدها عنه وعن السجادة ، وركع رجعت ، رفع منه دفها أبعد من الأولة ،

وسجد خوينا ، وهنا تبدأ المعانااااااااااااااااااااااااة ،

الحبيب سجد ومادرى إلا شيء يدخل فيه من جهة رجلينه ويوصل لركبه يوووووووووه وش هذا لا يكون أحد من الجماعة قرر يسوي لي عملية منظار !!

ومادرى إلا بـ( نياو ، نياااااااو ) تصبب عرقه ، غلى دماغه ، انتفخت أوداجه << جاز له الوزن ،

يحاول يطلعها ، ياولد ، وش الحل ؟!!!! ، وهو كان يخاف يقوم للجلسة يـ(فغصها ) بصريح العبارة ، طوّل السجود ، وتأخر الوقت ، وطوووول كمان ، والجماعة ساجدين ، وقرر أنه يقوم ويجلس على أطراف أصابعه عشان ما يضغط على القطوة ، واستعان بالله و ( الله أكبر ) ،

وما أمدى الجماعة يرفعون وراءه إلا وانفجروا الشيبان ( ككككككككككككككككككككككككككككككككككككك ) ،

والشباب ( خخخخخخخخخخخخخخخخخخخخخخخخخخخخخخخخ ) ،

ياولد وش في إمامنا ، طلع له ذيل !!!!!!!!!!!!!!

أثر الحبيبة مدخلة جسمها وما طلع من تحت رجول خوينا إلا الذيل وهو يتحرك يمين يسار ، يمين يسار !

قطع الصلاة وهو كاره ٍ عمره ، وشال القطوة من آذانها وعلى الشارع وشوتة إنما ايه ،

رجع وأقام وأعادوا الصلاة والجماعة يتضاحكون ، ويكركرون ،

وسلامتكم .

---------------------------------------


يالله ألي عنده مـــــــــواقف محرجة و طريفة يقولها لنا !!!!

[أمير سدير]

هههههههههههههههههههه


قصه مضحكه

شاكر لك

[A_I_O]

هههههههه

المشاركة الأصلية كتبت بواسطة   ياولد وش في إمامنا ، طلع له ذيل

تجنس عليهم ههه



يسلمووو القصة الخطيررره ...


تحياتي

اخوووكم ايو

[شايل همومي]

ههههههههههههههههههه

الله يرجك .... بس حلوووووة طلعة ذيل ...

تسلم على الموضوع

[ابن سدير]

شكرآ اخي "امير سدير"

على مروووووورك

محبكم/ ابن سدير

[ابن سدير]

مشكور اخي على المروووووووور

تراني ما عرفت اسمك خخخخخخخخخ

محبكم: ابن سدير

[ابن سدير]

شكرا أخي "اللص المحترم"

ومشكوووور على المروووور

محبكم/ ابن سدير

[مرهف]

يا الله

أشين شي الاحراج !!

شكرا أخي الكريم ..

ميشو

[سديم الليل]

مسكين والله موقف محرج مره
زين ما فقد عقله
مشكور اخوي ابن سدير على هذا الموقف

[فروحة]

يحاول يطلعها ، ياولد ، وش الحل ؟!!!! ، وهو كان يخاف يقوم للجلسة يـ(فغصها ) بصريح العبارة ، طوّل السجود ، وتأخر الوقت ، وطوووول كمان ، والجماعة ساجدين ، وقرر أنه يقوم ويجلس على أطراف أصابعه عشان ما يضغط على القطوة ، واستعان بالله و ( الله أكبر ) ،


خخخخخخخخخخخخخخ والله مسكين
صراحة لو اني بدلة كان هجيت ولاكملت الصلاة اسغفر الله

[فوشيه]

يووووه موقف نو تعليق

نياااووو نياو مياو<<<يعني تشكراتي لك ابن سدير

[جنون]

[GRADE="00008B FF6347 008000 4B0082"]ههههههههههههههههه
مسيكين..
والله موقف محرج من قلب..
ذكرتني..
مره كنت اصلي في المسجد..
ودخلت قطوه..
وتعال استلم على اعصابي لاتجيني القطوه..
ومادريت الا القطوه تحت رجليني على قولتك تلحس وتحوس حول رجليني واشوتها بكل هدوء ابيها تروح والله مافيه امل..
والله يستر..
والحمد لله..
جاء واحد بزر صغير<<اكيد بزر صغير والا وش بيصير؟؟
وشالها الله يجزاه خير..
وفك الازمه..
وكملت الصلاه وانا مرتااااح..
تشكرات اخوي على الموضوع الحلو..
وبانتظار الباقي منك..[/GRADE]

[ورود]

موقفه فعلا مضحك و طريف



خليني أقول موقفي المحرج

أنا صار لي موقف في الجامعة

كنت رايحة للكفتيريا عشان أتغدى بين الساعة 12 و 1 لأن عندي محاضرة من 1 _ 3 و ما أقدر أغيب عنها لأن غيابي

فيها وصل ثلاث و اذا غبت فبينزل لي حرمان

و جلست على الطاولة ببلوزة بيضاء و قدامي صينية الأكل و عادة ما آكل الكتشب لكن ذاك اليوم

اشتهيته و قلت يالله بسم الله

أخذت الكتشب و جيت اخضه (( اخضض ما عندي )) و عينك ما تشوف إلا النور

أثاريه ما كان مغطى زين و الكتشب طشر على شعري و بلوزتي البيضاء و تنورتي

المكان كان شبه فاضي يومها إلأ من شلة ما قصروا فيني حسيت كأن أمة محمد موجودة

و يوم شبعوا ضحك قامت وحدة تسألني عندك محاضرة 1؟

قلت ايه ... قالت طيب شرايك أبدل و إياك البلايز ؟!!


و سلامتكم !!

[بسمة سدير]

هههههههههههههههههههههههههه


والله يا إني ضحكت عليه


مسكييييييييييين


أجل قطع الصلاة >>> ماعنده وقت


مشكوووووووووووووور يابن سدير على هالموقف المضحك


على فكرة يا ورود تراي متحمسة معك وش سويتي

[ابو محمد سدير]

الله يرجك والله الموضوع مقلع هههههههههههه

تشكر اخوي ع الموضوع المقلع واللي لحقته كامري المرور 996 بس ماأمداها عليه

وتقبلوا مني انا خالص وارق التحيات