مفاجأة رمضان : لقائي بالسبعين وجها لوجه (70+) مدعوم بالصور

[شريك المشاكس]

يوم التقيت بالسبعين وجهاً لوجه ( +70 ) الي ما يتحمل لا يدخل

طبعاً هالموضوع للبالغين من فوق سن السبعين سنه ما تصلح للصغار

همن شي ثاني

الي اتصاله دايل اب ابو سلك تلفون ذا بيفقر من هالموضوع وبيطر من المساجد ترى الموضوع طويل احفظه في المفضله واقطع الاتصال وقدم اسمك للاشتراك في الدي اس ال والواسطه موجوده وش تبي بعد


&&&&&
&&&&
&&&
&&
&



دق الجوال ؟


انا: الو

هو: سلام يا شخص

أنا: احلى بدينا بالبثاره وش تبي اخلص ؟
هو: اسمع انا ما اعرفك ولا تعرفني بس حبيت اقولك يا شريك ...
انا: لحظه لحظة يا منلحس وشلون ماتعرفني وتقول شريك
هو: صدفه ! المهم تبي تقابل السبعين
انا: السبعين !! خوينا في منتدى سدير ؟؟؟؟
هو: ايه
انا: قل قسم
هو: جعلك تغص انه صدز
انا: طيب ؟ وش العلم يابو
هو: شوف اطلع لي الحين عند مخرج خمسة على الدايري الشمالي ووقف عند عمو حمزه وباجيك بعد شوي

عاد انا ماصدقت خبر وادز لعمو حمزه واوقف عنده، ويجي راعي كامري اسود وينزل منه واحد ويوقف عند الباب ويدق بالجوال ويرن عندي ؟؟ وأرد عليه وقبل لايتكلم قلت له: خلاص شفتك يا دلخ ابو الي علمك التنكر خخخخخ

اثر الرجال قالي شف .. قبل لا نروح له خلنا نتعشى همن نحرك واقولك وش السالفة

طبعا قصده اني انا اعشيه لاني دفعت له 100 ريال حسبي الله عليه بس عادي كله في سبيل لقاء السبعين

طبعا اكتشفت من هالرجال انه منبش على السبعين وتعرف عليه واكتشف انه خادع نص اعضاء المنتدى ، الي قايل انه عزوبي والي قايل انه متزوج والي قايل انه ابو خمسة عيلان ، والي قايل ان اسمه رامي ، والي قايل صعفق والي قايل مدري وش قايل والي قايل انه شين والي قايل توم كروز ما يصف جنبه ... على فكره من توم كروز ذا

المهم الرجال بالعربي طالع البردعي كل شوي اسم وصفه مهيب طبيعيه طبعا ما احرق عليكم التفاصيل المهم وتعشينا واثرنا يوم تعشينا دزينا للسويدي !!!

احاكي الرجال اقوله وشوله جايبنا لمخرج خمسه ؟

قالي: ابد بس كنت مشتهي عمو حمزه ولقيت ذا اقرب فرع ، قلت يا منحط يا متخلف هالحين مجرجرني من السويدي للشمال علشان سمك جعلك تغص فيه بعدين فيه فرع في البديعه يا لوح اوصفه لك

المهم ورحنا بالضبط عند الدايري الجنوبي حول حمزه أو عائشه الله اعلم علشان ما افضح الرجال وان بغيتوا كروكي جبته لكم >> مسرع ما فضحته

طبعا انا حاط يدي على قلبي وانا احتري لحظه الشوفه >> كني بنت مخطوبة

عاد وارفع شعري عن عيني >> انسجم مع الدور

المهم دخلنا مع الشوارع يمين يسار لين وصلنا عند استراحة هالاستراحه بابها مردود شوي وندخل فيه ونلقى مجلس وكل شيء مضبط الا خويي ينادي السبعين يا .... يا .... رد عليه واحد كنه في استديو يقول طيب طيب شوي جايكم >> طبعا قلت استديو علشان فيه صدى والا هو مكان اخر تنابح الطبيعه فيه لين ينشق حلقها ..

اناظر الحمام والاه غريب كنه مقضوض اشوف تلييص جديد على اطراف الباب ، ما دققت رحت سيده للغرفة

واقعد في المجلس شوي شوي الا واخذ المركا واتفرج على التلفزيون ومعي هالريموت اقلب هالقنوات لييين اظلمت علي الدنيا !!
واشوف نور اللمبات اختفت ، توقعت انها شوي وبتمطر زي نظام افلام الكرتون

والتفت الا يا جماعة الخير السبعييييييييييييييين !!

مع احترامي يالسبعين الى هالسطر وانا اقدرك واجلك ولك كل تقدير واحترام والا الباقي اسمح لي

ياجماعة الخير

شفتوا هالسبعين ذا احلف لكم حلف انه ما يدخل مع الباب الا من جنب وحاط زيت زيتون على اطرافه وياااااله يخش

دب ، قسم بالله شويه دب، ربعي احيانا يقولون اني دب بس انا جنبه مثل السناني جنب الحيان ، الظاهر والله العالم يدلعونه بشبه القاره على قولة واحدن من الشباب >>الله يذكرك بالخير يابو محمد >> اسفهوه ذا زميل في منتدى شقيق

يلعن ام الووووصف شويه شبه القاره قسم بالله جابها ، يعني حتى الطقس مختلف في كل مكان من تحت لابس صيفي ومن فوق شتوي ، عاد اول كنت في نظر الناس اني سمين واني XXL لاكتشف ان ابو سبعين مكتشف قياسات ما تستخدم الا في الكواكب الثانية، يحلفون أنه إذا فصل ثوب يفصل طاقتين طاقة قدام وطاقة ورى

طبعا لو شفت فنيلة الرجل العادي تلقى فيه مقاسين امريكي وبريطاني ، الا السبعين فنيلته فيه مقاسين صح بس واحد هكتار والثاني فدان

طبعا انا تنحت شوي وجيمت وضاعت كل تفاصيل وجهي ودي أضحك نزلت دموعي ودي أبتسي قمت اضحك عفس وضعي ابن اللذينا المهم واقوم وقلبي موقف بس قاعد يدق في الوقت البدل الضايع ، وامد يدي واسلم مير تغوووص يدي ويطق لي ذيك الابتسامه الي حطيت نظاره شمسية من النور الي طلع منها


وما يحتاااج عيونه خضر >> ذي زياده من الراوي

طبعاً سلمت عليه وعرفني الرجال على السبعين باسمي الصدزي علشان ما ينصدم لو درى اني شريك ، المهم ويجي على بالي باب الحمام قلت والله بعذره ينقض كل شوي لو اني منهم احط باب سيارة وعسى >> وجه السبعين يقول يا ليت اتماتيك لو جت حالات طارئة

طبعاً جلسنا شوي نسوف وننكت على خفيف وطبعا يا حليله اذا ضحك ضحكة خفيفه طير شماغي لم الباب ، لدرجة انه يوم جاء يجلس على الكنب المخصص له >> لان نظامه فضائي مهب ارضي مثلنا مراكي ومساند

يوم رجع على ورى علشان يجلس طلع صوت الي يجي مع التريلات والدينات طووط طووط طووط

ومير يجلس طار الي في المكان خمسه سم ورجعوا ، يقولي خويي اذا بغينا نسوي بيض نناديه علشان يقلبه بهزه من هزاته الاليفه

عاد قمنا نسولف وانا منحرج من جدددد قلت لاحول لايكون ذا البثر الي في المنتدى قسم بالله عليه كرشه احلف ان بطنه متصفط سبع صفطات كحد ادنى غير الكفته الي حول السره واذا دخل يده في بطنه لا يكاد يراها

عاد عيبه الوحيد ضحكته يا ان فيها سقامه ميهب طبيعيه ، حنا الاوادم العاديين اما هههههههه والا خخخخخخخخخ اما هو خأخأخأخأخأ

المهم ونحن في غمرة السواليف ما مسكت لساني >> سديراوي متهور

طبيت في عينه: ايه يا حليلك يا السبعين

وعينك ما تشوف الا النور

مسكني مع رقبتي يا جماعة الخير كني سابه او سابن اهله

وتطلع عيونه حمررر وهو يقولي: تكلم من الي قالك ومنهو انت

وأنا قمت اناهق ما عرفت احتسي زين ، نعلبوه مسكني ثواني بس عفط حنجرتي مابقى فيها الا شوي لدرجة اني اذا جيت اتكلم اصفر >> براا

وشوي اقوله يا لوح الي جابني اكيد قايل لي ، عاد كني اشوفه الحين عاضن برطم من القهر

وشوي الا وتركد الامور واشوفه طنقر واخلاقه بريال التفت على خويه قال : صب شاهي الله يلـ ...

المهم ويستقعد لي في أي سالفة ابي اصرفها وامشي ينشب لي ومن انت وش تصير

طبعا يمكن احلف انه مافي امل يتوقع اني شريك الا اذا ضحكت يبان سجارتين حشيش في اثمي موزيها عن الشرطه

ركدت الامور شوي وهو اصلا عاقل وراكد بس لما جت الغرااااش اختلفت الامور وقمنا نكرع من هالغرش لين طلع مع اذانا لين عرفت انه السبعين وعرفت باسوورده بعد

مشكلته انه صحيّح بزوود وعلى نياته وشايل هم العالم كله يعني تلقاه يسولف لك عن فلسطين همن يكفخ على العراق ، ويدلك أنه صحيح أنه ما سألني وش معرفي في سدير حتى أني هكيت عليه وقلت: أني بس اتفرج والا ما اعرف اسجل >> استخدمت هالنصبه قبل كم يوم على احلى اثنين في المنتدى

طبعا كعادتي وكعادة أي سديراوي خمس دقايق ست دقايق بالكثير يبدى يمون وبعد ربع ساعه ينشدك وش اسم امك

لا الصحيح أني طبيت في السبعين وقعد احاتسيه عن موضوع هالسمنة ذا وبصراحه اكتشفت بما لا يدع مجال للشك ولا الريبه ان كل سمين دمه خفيييييف >> مهب يمدح نفسه ابد

بس قالي قصته انه يومه صغير كان وحيد امه وابوه ولا عندهم الا اخ كبير واخت >> أجل وحيد امه وابوه ياالمحشش

وكان اخر العنقود ومدلع وموسع صدره على الاخر وكل شي يطلبه مجاب من عسكريم وحلويات وهو قدام هالتلفزيون وإذا مل من التلفزيون شغل العائلة >> قبل لا يجي السوني ويطيح سوقه ، يعني الرجال أنس يتحرك إلا لبيت الراحة ولو حاصل له بعد أنه ... وغيره ... ما قال لا

طبعا ميزة السبعين أنه مخلد أبرز مسيرته في الحياة في صور حاطها في جواله وورانا أياها

وهذي بعض صوره

هنا نشاهد السبعين يستعد لاخذ حمام سباحه >> يحلفون ان الرشه الاخيره الي جت للرياض من طشاش المويه



- السبعين يوم بدأ يسوي فيها هاي هاي وراعي بدل .. صدقوني انه الان يدعي للي اخترع الثوب بالرحمه اثره ساترن شي واجد


- صوره حصريه من جوال السبعين يبان فيها وزنه يوم وزن الجهاز ، ومن عقب وقفته القليله خرب الميزان



-صورة تبين معاناة السبعين في الأكل طال كنه شحنة رمل منزلها السقس .. يقولي الرجال الي معي أن أمنية السبعين في حياته أنه يشوف سره


- صوره من ألبوم السبعين لجده العشرين الذي كان رمزا للسمنة في العائلة >> يحلفون أنهم يوم حطوا شجرة العائلة ما شالها إلا عشره


هذي في الشرطة للسبعين وسجله الأسود يوم كان مسرع وقفطه المرور السري


أما هذي الصورة فهي صورة يعتز بهالسبعين جدا جدا خصوصا أيام المراهقة ولاحظوا الصروال الأخضر يا جماعه منيب قايلن شي ابد ابد



طبعا وانحن في غمرة سواليفنا سمعت صافرات الانذار وكن فيه حادث برى الا هذا صوت بطن الشيخ السبعين اذا جاع ، واشوفه يلعب بجواله او اصبعه بصراحه ما بان لكنه حط شي زي الحلق في اذنه طلع جوال، وابن اللذينا جواله برج العرب مدري بيبي باندا من هالصغار ويضغط الازرار بمنقاش اسنان ، طيب يالحبيب طق لك اركسون قديم والا الكمنيكتير الكبير والا سيناو >> وش اخبارك قديييم

طبعا يا جماعة الخير سألنا وش نبي نتعشى انا والرجال الي معنا >> تراه محلفني ما أقول لو طرف من اسمه
ويقول ما عليكم مني اتفقوا انتم ، اتفقت انا وياه على بيتزا وشوية فطاير >> مع العلم اننا متعشين مالنا نص ساعه بس منحرجين منه

اسمعوا وش طلب يا جماعة الخير : حبة دجاج مضغوط ، نفر مندي، نفر أبيض، مشكل مشويات، نفر ريش، دجاجة مضبي سادة، قرصان وجريش، سلطه، حمبص، رز بيشاور ....

طبعا التفت على خويي قلت له: الظاهر الحبيب مضيع قاعد يطلب لجيراننا ؟

بعد كم طلب قال جب من المحل الي جنبكم بيتزا وشوية فطاير ولا تكثر >> ياني حقدت عليك من جد يا سبيعين تراها للحين في قلبي

قعدت اهوجس في نفسي وقلت لو صرنا اخويا من جد وتقاطينا في استراحة قطته هو بلحاله بتكون 15 ألف نعلبوه ذا بيعدمنا ويخلينا نطر عند المساجد والاستراحات الشقيقة ، العالم تطلع للاستراحات تستانس حنا تضيق صدورنا من المطامر وملاحق الغتر عند الباب >> طراها قعدته وضحكه

المهم يا طويلين العمر والسلامه يجي الطلب ومعه غرشتين ببسي العائلي ، توقعته بيحطه في ثلاجتهم وقمت انا مسوي فزعه قالي اقعد يا متخلف هذولي لي

قلت ابشر ، لو انك مختار لبن جبت لك بقرة من مزرعتنا علشان تمزمز منها رغم أني واثق ان البقرة بيجيها فقر دم على شفطك من حليبها >> صورة بقرة يدور بها راسها

قلبتها ضحك أنا خخخخخخخخخخخ وخويي هاههههههههههاي وهو خأخأخأخأ

المهم حقين المطعم جايبين الطلب بذيك السيارة الي زي الدينا بس مقفله>> ماعنده معلومات في السيارات ابد

وقعدوا ربع ساعة يصفون الاكل ، والغرفة على فكرة 4×6 علشان كذا اضطررنا اني والرجال نتعشى برى ، للنفاهه ولاحتياطات صحية !!!

وعلى طاري الاحتياطات يقولي الرجال ان استراحتهم ذي كانت اصلا في الحزم ثم قربت للشفاء وشوي شوي وصلت للسويدي وكل ذا بفضل السبعين !!

يوم قال السبعين قلت اكيد يشيلها على ظهره ويدور بها ، بس يقول لا ان الاستراحة تزحف متر بعد كل وجبه >> الي مهب فاهم باجلده

المهم ويوم خلصنا العشاء الا الحبيب توه يحلي بالجريش والقرصان ، قلت خلني استغل الوقت ونتمشى شوي ثم رحنا لمحلات جوالات ويوم رجعنا الا اشوف واحد جنبه منسدح طلعت كرشته

شوي الا الدنيا تظلم وغباااااار وانا سمعت صوت انفجار هقيت اننا جنب سكن امريكان والا شي

طبعا ما ردنا الا جدار الاستراحة واشوف فلقتني صينية مع جبهتي ويوم قعدنا ربع ساعة الا اشوف السبعين طالع من الغرفة ما يدري وش السالفة واثر شكله رجع زي اول بفرق بسيط >> يعني الكمية ذيك بس لعبت في حسبة الاستراحة اجل لو انه مجمع حق الغداء والعشاء ؟؟ عليه من الله ما يستحق

وخويي الظاهر انه متعود لدرجة اني اشوفه قام شوي ونظف ثوبه من الغبار وبدا يلم المكان ، طبعا ما يحتاج أشوف الصياني الفضية حقت الرز طلعت فحمممم سوداء والتلفزيون لزق في الجدار كنه تلفزيون سوني الي يعلق

روقنا شوي ولا كن فيه شي صاير قلنا نجي للترفيه البريء عندهم كيرم وبلوت ، الكيرم من اول ما لعبنا هونت ، أول ما لعب وضرب المضراب ما رده إلا باب الغرفة لو اني ما دنقت اصب لنفسي شاهي ولا كان علوووم ، نعلبوه كنه يلعب برجله ، لعبنا بلوت .. وبيجي امير سدير هالذكي يقول شلون تلعبون وانتم ثلاثة باقول اصلا كنا خمسة انا وخويي والسبعين عن الباقي ما شاء الله بس سوينا حركه حلوه قمت وحطيت مراية قدام السبعين بحكم انه فريق واحد عاد من ثوارته انهزم >> طراه انه خويه في المرايه يقول تراهم يأشرون قال: اسرع لا توقف لهم >> برااا

لعبنا شوي، والرجال كل ما جا يوزع وصفق بالورق قامت الثريات تتدودل من فوق على صوته كننا في منجره طق طق طق خخخخخ المهم لعبنا لين بد النوم يجيني وقمنا مودعينه على امل اللقاء به بس هو الله يهديه يوم ركبنا السياره قام يأشر بيده للوداع هز الحاره وعجعج علينا وخلنا نتقدم ونروح >> كسر قير الكابرس عليه من الله ما يستحق


لكن فجأة .. وبالحركة البطيئة .. ينزل شريك من السيارة ويتجه للسبعين الذي يطعس حتى وصل اليه في مشهد رومانصي قلما يتكرر في الشاشات العربية .. السبعين ينطلق من باب الاستراحة ليحتضن شريك الذي قدم من السيارة ركضا و .. ياللمفاجأة زلق شريك بقشرة موز كان يحلي فيها السبعين وسقط أرضا ولم يستطع السبعين أن يكمح جماحه ويهدأ من سرعته لا بريك ولا لقمه في اثنين وفجأة أفجأ من قبل قليل شريك مستلقي على الأرض وهو يترقب السبعين الذي اقترب أكثر وأكثر >> تسمع بالتفاصيل كمل الله ياخذك

لين شاف شريك رقم نعلة السبعين 73 وكانت النعله فاغصتن تمره وكان آخر شي يراه شريك في حياته








قام شريك فجأة وهو معررررق


وهو يتحسس خشته الحمد لله كلشي متواسي


ومن بعيد جاه صوت .. قم يا شريك بيذن المغرب >> يا شين الي ينوم العصر شيناااااه >> خخخخخخ وش رايكم صحيح انها جره

بس وش نسوي من هلوسه الصوم

بس الكلمة الأخيرة والصدزيه في هالموضوع كله ومع احترامي للسبعين صحيح انه متين ومعطيه الله بس مهب مثل الغورلا الي فوق ابدن ابدن هو دبدوب صغير وابيضاني ولاول مره وهذي صدز اشوف سعودي شعره نااااعم وخفيف وعيونه مدري وشي لانه كل ماضحك غاصت عيونه داخل

وله غمازات مهيب طبيعية تقل ارتوازين مدقوقين في ارض >> قل ماشاء الله

وحبيب وشايل هم الدنيا والناس وشخصيته مختلفة تماما عن المنتدى فيه ثقل وركادة بس ولو يوم حششنا طلع الي في راسه كله من قواطي وعلب مربي مصديه

[لهفة الخاطر]

[align=center]ههههههههههه الله يرج إبليسك ياشريك

بصراحه مفاجأه رائعه للسبعين
بس ماامداني لا احفظها ولا اقطع الإتصال متحمسه بالقراءه

بس من جد رووووووووووووووعه تسلم إنشاء الله
والله يعينك يالسبعين على شريك[/align]

[أمير سدير]

اول شي تم التثبيت

ثاني شي

مانيب راد الحين الا بعد ماقطع الاتصال واتمقل في سالفتك وهالصور

ههه

[مرهف]

هههههههههههه

ولو اني ما قريت

بس تطفيني الصور

تحياتي الحارة !!

[عبدالله الفـارس]

الي اكتشفت ياشريك انك أنت الدب تدري شلون بس قل ماشاء الله لاتنضلني

المهم عرفت انك دب لأنك تعشيتا أول شيء مع الي وداك للسبعين

همن تعشيتا مرة ثانيه مع السبعين يوم قابلته هع

مشكور شركرك عالموضوع الفله الله يوسع صدرك مثل ما وسعتا صدورنا ...

[عَندليب]

ههههههههههههههههه



الله يخليك للمنتدى ويخليك لهلك


تقطعت مصراني من الضحك


وباين عليك دب ماشاء الله الله يزيك من فضله


الله يزيدك كمان وكمان

[عبدالعزيز]

هههههههههههههههههههههه

قسم بالله مزعت بطني من الضحك

اجل شبه القاره كل مكان مناخ خخخخخخ

تسلم يابعدي على هالقصه الراااائعه

لكن لهالدرجه السبعين دب << 2200 ههههههه

[ماجد بن إبراهيم]

شريك ماعاد لك شوفات هناك وراك


ثانياً والله أنك قطعتا مصاريني من الضحك الله يرج عدوك


ماأقدر أكمل رد من الضحك

[بنشري حول]

[QUOTE=شريك المشاكس;341991][color=#FF0000]يوم التقيت بالسبعين وجهاً لوجه ( +70 ) الي ما يتحمل لا يدخل

لحظة خلن اتأكد من قدرات التحمل عندي

طبعاً هالموضوع للبالغين من فوق سن السبعين سنه ما تصلح للصغار

تسع وستين وكم شهر ماينفع <<<<< والفرق بعطيك اياو قروش <<< ايه هين صدقوك

هو: صدفه ! المهم تبي تقابل السبعين
انا: السبعين !! خوينا في منتدى سدير ؟؟؟؟

واضح ان استنتاجاتك قويه شكلك كنت شبعان وقته

هو: شوف اطلع لي الحين عند مخرج خمسة على الدايري الشمالي ووقف عند عمو حمزه وباجيك بعد شوي

يؤ هو عم خويك بعد وانا احسبه عمو لي انا بس <<<<<<< بس يمكن خويك اخوي

طبعا اكتشفت من هالرجال انه منبش على السبعين وتعرف عليه واكتشف انه خادع نص اعضاء المنتدى ، الي قايل انه عزوبي والي قايل انه متزوج والي قايل انه ابو خمسة عيلان ، والي قايل ان اسمه رامي ، والي قايل صعفق والي قايل مدري وش قايل والي قايل انه شين والي قايل توم كروز ما يصف جنبه ... على فكره من توم كروز ذا

بذي صدقت أنا وانا توي جديد مرسل السبعين على الخاص يقول تراني أحلى من بشير غنيم خخخخخخخخخخخ


واقعد في المجلس شوي شوي الا واخذ المركا واتفرج على التلفزيون ومعي هالريموت اقلب هالقنوات لييين اظلمت علي الدنيا !!
واشوف نور اللمبات اختفت ، توقعت انها شوي وبتمطر زي نظام افلام الكرتون

والتفت الا يا جماعة الخير السبعييييييييييييييين !!

انا لو بمكانك تسان هجيت والله ما اقعد ولا دقيقة لا وقاعد تتلفت انت ووجهك

واضح انك شجاع ولد شجعان <<<<<<< تقرب لك العرجا خخخخخخخخخخخخخ

يلعن ام الووووصف شويه شبه القاره قسم بالله جابها ، يعني حتى الطقس مختلف في كل مكان من تحت لابس صيفي ومن فوق شتوي ،

بذي صدقت حتى انا مره شفته لابس برجل زبيريه ورجل بسطار من بعدهن عن بعض <---- بدا يمون وشكله بينجلد


عاد عيبه الوحيد ضحكته يا ان فيها سقامه ميهب طبيعيه ، حنا الاوادم العاديين اما هههههههه والا خخخخخخخخخ اما هو خأخأخأخأخأ

مسكيييييييييييين شكله تطلع من سره هالضحكة خأ خأ خأ خأ خأ <<<<< شكلي بديت اضحك مثله

اكتشفت بما لا يدع مجال للشك ولا الريبه ان كل سمين دمه خفيييييف

تسلم والله شهادة اعتز بها

بس قالي قصته انه يومه صغير كان وحيد امه وابوه ولا عندهم الا اخ كبير واخت >> أجل وحيد امه وابوه ياالمحشش

عادي تصير ليش لا عندك انا اعرف ثلاثة اخوان ولهم ثلاثة اعيال عم ويقربون لبعض وكلهم عيال وبالعيد يسلمون على بعض

والله الظاهر انا اللي جبت العيد


اسمعوا وش طلب يا جماعة الخير : حبة دجاج مضغوط ، نفر مندي، نفر أبيض، مشكل مشويات، نفر ريش، دجاجة مضبي سادة، قرصان وجريش، سلطه، حمبص، رز بيشاور ....

بس ذولي اللي طلبن شكلهن مقبلات

والله شكله اذا دخل مطعم يقول بالله جيب كل اللي بالمينيو وشوي بساكيت من اليقالة اللي جنبكم

يوم قال السبعين قلت اكيد يشيلها على ظهره ويدور بها ، بس يقول لا ان الاستراحة تزحف متر بعد كل وجبه >> الي مهب فاهم باجلده

لا اشدعوه واضحة ومعروف إن العمار دايم يروح شمال


لكن فجأة .. وبالحركة البطيئة .. ينزل شريك من السيارة ويتجه للسبعين الذي يطعس حتى وصل اليه في مشهد رومانصي قلما يتكرر في الشاشات العربية .. السبعين ينطلق من باب الاستراحة ليحتضن شريك الذي قدم من السيارة ركضا و .. ياللمفاجأة زلق شريك بقشرة موز كان يحلي فيها السبعين وسقط أرضا ولم يستطع السبعين أن يكمح جماحه ويهدأ من سرعته لا بريك ولا لقمه في اثنين وفجأة أفجأ من قبل قليل شريك مستلقي على الأرض وهو يترقب السبعين الذي اقترب أكثر وأكثر >> تسمع بالتفاصيل كمل الله ياخذك

لين شاف شريك رقم نعلة السبعين 73 وكانت النعله فاغصتن تمره وكان آخر شي يراه شريك في حياته



هالقصة المفروض ينقلونها لقسم غير هالقسم <<<< لعنبوا ابليسك ثالث مشاركة وجاي تعلمهم شغلهم

خخخخخخ وش رايكم صحيح انها جره

لا قارورة خخخخخخخخخ


[color=#FF0000] هو دبدوب صغير وابيضاني ولاول مره وهذي صدز اشوف سعودي شعره نااااعم وخفيف وعيونه مدري وشي لانه كل ماضحك غاصت عيونه داخل

وله غمازات مهيب طبيعية تقل ارتوازين مدقوقين في ارض >> قل ماشاء الله

لو سمحت ممكن تعرفن عليه <<< يوووووووووووووووه وش يبي ذا



هههههههههههههههههههههههههههههه

خخخخخخخخخخخخخخخخخخخخخخخخخ

خأ خأ خأ خأ خأ خأ خأ خأ خأ خأ خأ خأ

ضحكتني بكل انواع الضحك الله يرجك يسلموا والله على الخيال العلمي المنبثق من الحضارات الإغريقية

في العصور الوسطى من أيام محاكمة المدعو صدام حسين <<< دخل بالسياسة



الله يعطيك العافية وسعت صدري الله يوسع صدرك دنيا وآخره

[سديراوي عسل]

هههههههههههههههههههههههههههههههههههههههههههههههههه ههههههههه




الصراحة فلة .....




اما الكرشة الله يستر ....



يبيني اعطية برنامج غذائي عشان ينحف يعطيني خبر........

[شريك المشاكس]

مشكورين حبايبنا على مروركن الظريف كتير كتير



وان شاء الله بنفضى لكل واحد


ونبدا بقلبي المتيم : مشكوره على المرور خالتي وإن شاء الله نرسم الابتسامه على كشرتكم الجميلة


وثانكيووو وعلى الطاري تراني احتري ردن ثاني لتس لو بغيتي ترى عادي

[سديراوية]

هههههههههههههههههههههههههههههههههههههههههههههههههه هههههههههههه


الله يرج بليسك عدوك يا شريك

فطستن ضحك >> من وين جايه الأخت خخخخخخ


بصراااحه رثيت لحاااااااااال الدباب ,,

يسلموووو شريك

وسلام مربع

[هرمنا]

مقدمة :

قال الاولون : وما آفة الأخبار الا رواتها


ولي عودة للرد هنا





السبعين في رده القادم والمفصل يطب في بطن شريكوووووووه




شفت وشلون الطبة


=========

القف تحيتي يا احلى شريكوه في العالم

[زهرة]

بعد رمضان إن شاء الله اقراها

يعني خلوها مثبته لين اقراها وأرد<<تشرط

[فروحة]

الله يرجك يا شريكووووووه


تسدحت من الضحك تلقى السبعين شاحن


عليك ( مافضت البطاريه خخخخخخخخ )



ولا شبه القارة لله عليه ههههههههههههههه

المشاركة الأصلية كتبت بواسطة   اسمعوا وش طلب يا جماعة الخير : حبة دجاج مضغوط ، نفر مندي، نفر أبيض، مشكل مشويات، نفر ريش، دجاجة مضبي سادة، قرصان وجريش، سلطه، حمبص، رز بيشاور ....

قل ماشاء الله لايطيح عليك البيت ( صورة السبعين وهو واصله معه )





الله يرجك يا شركرك


حرام عليك كل مادخلت مواضيعك الا اهلي يفطسون علي من الضحك من شكلي خخخخخ