كان في بنت بدوية من بدو هاك السنين الاولين وهالبنت الله يسلمكم متزوجة رجال ماهوب من قبيلتهم يعني من قبيلة(ن)
ثانية ...الوكاد ان صار بين قبيلة الرجال وقبيلة البنت اللي متزوجها خلاف ومشاكل بين القبيلتين
(عاد القبايل منول اذا صار خلاف بين قبيلتين يغزون بعض ويسرقون حلال بعض )
المهم الله يطول بعماركم ...جاء اخو الزوجة يسأل البنت عن أبل قبيلة زوجها يبي يسرقها بسبب الخلاف اللي بينهم
والبنت ما تدري وين أبل القبيلة فيه ..!! قالها اخوها روحي الحين لمنازل قبيلة زوجك وانشدي عن أبلهم وابجي
بعد كم يوم للمنازل وتكون بيننا كلمة سر وهي اني لا اقبلت على منازلكم ابعوي
مثل عواء الذيب وانتي ردي علي أبيات شعر تبين فيها مكان أبلهم قالت طيب .
المهم يوم جاء هاك اليوم غابت العين واقبل سود الليل عليهم وطلع اخو البنت قاصد مضارب اخته والله ويومنه قرب من
عندهم شوي قام يعوي كنه ذيب وتقحص اخته وتقول :
[poem=font="Simplified Arabic,4,black,bold,normal" bkcolor="transparent" bkimage="" border="none,4,gray" type=1 line=0 align=center use=ex num="0,black"]
يا ذيب ياللي جر صوت عوى به = ما ادري ظما والا من الجوع يا ذيب
يا ذيب لا تطــردك عـنا المهـابه = طــرش العـرب بالـبر كلـه عـوازيـب
تلقى العشا لك في خشوم العقابه = في روضة الرواح وان تهـت يا ذيب [/poem]
عاد الحين بينت لخوها وين مكان الابل
بس البنت سمعتها عجوز كانت بجنبها وسمعت الابيات العجوز وسمعت عواء الذيب هالعجيز ما هيب بسيطه
عرفت السالفه كلها وعرفت ان هذي خطة(ن)مدبره بس مع من مدبره ما تدري العجوز ...؟
وقالت العجوز هالابيات تحذر فيها البيت يوم تقول :
[poem=font="Simplified Arabic,4,black,bold,normal" bkcolor="transparent" bkimage="" border="none,4,gray" type=1 line=0 align=center use=ex num="0,black"]
يا بنت حذرا لا يعضك بنابه = ترى معض الذيـب ما به تطابيـب
يترك مثل البكرة اللي جلابه = ليا حافها السوام يلقى عذاريب
يخلى جنابك مثل دار خرابه = تصـير للفـار المخــرب ملاعـيـب [/poem]
وقامت البنت وقحصت وطامرت من الخوف ومن الابيات اللي قالتها العجوز وعرفت ان السالفه
خلاص تبي تنكفش بس البنت صارت ذهينه ما هيب مثل عجوزنا ردت بعد بأبيات تبيرى ذمتها يوم تقول :
[poem=font="Simplified Arabic,4,black,bold,normal" bkcolor="transparent" bkimage="" border="none,4,gray" type=1 line=0 align=center use=ex num="0,black"]
وحياة جلاب المطر من سحابة = اني سليمة ما بعد عضني ذيب
واللي ظلمني جعلها في شبابه = وتحـدره من عـالـيات المراقيب
أنا كما عــد عــذي شــــرا به = ما تارده بالقيظ حرش العراقيب
سبع العجايز دايرات للمـعـابه = سود المقانع يابسات العصاليب
[/poem]
عاد العجوز اخمدت بعد ماسمعت الابيات اللي قالتها البنت وكن الشك زال عندها
وسكتت العجوز والظاهر انها كبتتها نومه والله والعالم والبنت طلعت اذهن منها