الولد لاطاب طيبه من خواله

[ابو عبد العزيز]

الولد لاطاب طيبه من خواله









الصبي وان طاب طيبه من خواله .. وان تردى فاعلم انهم خايبينـي
أشرب الفنجـال واكـب البيالـة .. طيـبٍ واحـب سلـم الطيبينـي

[ السلام عليكم ورحمة الله وبركاته ]

من لا يعرف .. هذين البيتين .. بيتين اشهر من نار على علم ..

قد يجهل البعض قائلهما .. ولكن اكيد سمع بالبيتين من قبل ..

حتى اصبح مضرب مثل يتداوله كثير من الناس ..


قائل هذين البيتين ..

الشاعر / راشد بن حسن بن مانع بن رحيان الضاعني الملقب بــ ( ابن الذيب ) ..


وقيل انه توفي عام 1986م وهو في نجران وكان شايل معه شخص موصله الى قرية في نجران وحصل عليهم حادث وتوفي رحمه الله ..




راشد بن حسن .. كان يشتغل في شركة ارامكوا السعوديه .. وكان يملك سيارة الشركه (جمس ارامكوا) .. وكان كل ما شاف له رجلي والا طرقي على الخط يبي احد يوصله يقوم ابن الذيب ويوصله بدون مقابل .. على سيارة الشركه ..

حتى اشتهر عند البدوان .. لا جا احد يبي يروح مكان ولا عنده مطيه والا موتر .. يمشي في طريقه ويقول عسا يلقاني (ابن الذيب) على الطريق والا انا القاه .. ويشيلني ويوديني للمكان اللي انا ابيه .. حتى قاموا الناس يطرونه ويحكون فيه وهم لا يعرفونه ولا قد شافوه ..

جاء يوم من الايام الا عجوز وعندها غنم شوي تعد على الاصابع .. و (راشد بن حسن) .. كان مشغول ومتأخر على الدوام شوي .. وشاف العجوز وشاف معها غنم تعداها وهملها .. عقب حزت في خاطره واستحى وراعي الطيب ما يجوز عن طيبه وقف الموتر ورجع للعجوز ..

يوم جاها قالها يامره انا ابشيلك وبوديك المحل اللي تبينه لكن بدون غنمك .. انا متأخر على الدوام واخاف غنمك تأخرني زياده ..

قالت له العجوز .. خلاص رح الله يستر عليك يا ولدي .. انا جالسه هنا انتظر ( ابن الذيب ) .. هو اللي بيجيب العلم وبيوصلني المكان اللي انا ابيه انا وغنمي .. وهي ما تعرفه .. ولا تدري انه (ابن الذيب) .. هو نفسه اللي هي تكلمه ..

يوم انصدم (راشد بن حسن) بقولها .. وتعجب !!

قال اركبي يا خاله انا (ابن الذيب) وابشري بعزك .. ابوصلك انتي وغنمك ..

وكانت انظمة ارامكو تمنع السائقين ان يشيلو الرجليه اللي يوقفون السواقين ويطلبونهم توصيلهم على طريقهم .. وشلون توصيل الغنم ؟؟


وصل (راشد بن حسن) العجوز إلى منصاها والمكان اللي تبيه ..



حتى وصل علم .. لشركه بفعل (راشد بن حسن) .. وهدد بالفصل من الشركه اكثر من مره .. وبعض رؤساءه يأسوا من المحاوله معه .. واعجبتهم شهامته ..



وقال هذى القصيده






قالهـا ابـن الذيـب مـن هاجـوس بالـه
كلـمـةٍ يـلـعـب بـهــا والـبــال زيـنـي


قـالـهــا يــومــه طــرالــه مـاطــرالــه
مـن هواجـيـسٍ تشـيـب المرضعيـنـي


حـالـفٍ مـاخـذ عـلـى الطـرقـي ريـالـه
وبـالـثـلاث مـحــرم أنــــه مايـجـيـنـي


لا لقيـت اللـي علـى ( السكـه ) لحالـه
يلـتـفـت ويـقــول ويـــن المستحـيـنـي


أوقـف المـوتـر حـيـا وأبــي الجمـالـه
يــوم ولــد الــلاش وجـهــه مايلـيـنـي


الطـمـع فــي كــروة الرجـلـي رذالـــة
خـص وان جـابـه مـجـال الغانميـنـي


والــردي فــي حـالـةٍ مـاهــي بـحـالـه
واعـويـنــه مــــن كــــلام الطيـبـيـنـي


الـــردي لـــو بـــان مـايـذكـر عـمـالـه
مـايـعـد الـــلاش مـقـصـور اليمـيـنـي


أركـبــه لـعـيـون مـــن زيـــنٍ دلالــــه
ماتـحـاكـوا فـــي قـفــاه الرامـسـيـنـي


مابـغـى غـيـري وانــا مابـغـى بـدالـه
قـاعــدٍ لـــي بـالـرجـا مـــدة سنـيـنـي


الصبـي وان طـاب طيبـه مـن خوالـه
بـالـخـوال يــســال قــبــل الـوالـديـنـي


أشـــرب الفـنـجـال واكــــب الـبـيـالـة
تــابــعٍ سـلـمــي ســلــوم الأولـيــنــي


ولا قـعـدنــا بـالـعـمـل بــنــا الــرزالـــة
نـاخــذ العـلـيـا طــريــق الفـايـزيـنـي


غـرنـي بـعـض الـرجـال بكـثـر مـالــه
مادرى ان المـوت فـي حبـل الوتينـي


كيـف ينفعنـي وابـا(..........) خـالـه
مايـقـوم البـيـت دام الـسـاس طـيـنـي


مـاش ويــن الـلـي عـوايـده الجمـالـة
مثـل ابـن ظافـر حـمـد ليـتـه يجيـنـي


الـثـنـا والـجــود دايـــم فـــي خـيـالــه
عـلـمــه ظــافــر ســلــوم الطـيـبـيـنـي


جـــــوّد الـعـلـيــا ولـزمّــهــا عـيــالــه
وادركــوا مــن علمـتـه دنـيـا وديـنـي


واهنـي مـن بـاع حظـه واشتـرى لــه
وسار في درب النبي وأخزى اللعيني


مـوقــفــه مــاكـــل رجــــــال يــنــالــه
مــن بـغـى مـمـشـاه يـقـعـد مرتـيـنـي


كـم ذبـح مـن حـايـلٍ مــن حــر مـالـه
وعـادتـه لـطـمـة خـشــوم العايلـيـنـي





و البيتين اللي بأول الموضوع يقال انهم محرفين .. والبيتين الصحيحين كما ذكروا فالقصيده ..


مــــــلاحـــــظـــــه


الشاعر راشد بن الذيب هو والد الشاعر المعروف حاليأ

محمد ابن الذيب

[إسماعيل الحجري]

إي بالله يابوعبد العزيز


الصبـي وان طـاب طيبـه مـن خوالـه
بـالـخـوال يــســال قــبــل الـوالـديـنـي


أشـــرب الفـنـجـال واكــــب الـبـيـالـة
تــابــعٍ سـلـمــي ســلــوم الأولـيــنــي



صح لسان قايلها


...............


بصراحة يبوعبد العزيز أنك حيرتني

ودي أعرس على وحدة بس أخوانه لك عليهم

ما صدقت لقيت وحدة متدينه وعليها الكلام ..

بس

أخوامه ماش

وش رايك أنت يالأخو

[يـــزيـــد]

السلام عليكم

يعطيك العافية ابو عبدالعزيز

شكرا

[المكيظم]

شكر الله لك أخي أبو عبدالعزيز

سبحان الله كنت قبل أشهر في مجلس وقالها أحد الأحبة لكن لايدري لمن هي !!

فجزاك الله خيراً على الفائدة ، وباالأخص القصيدة كاملة .

لك من ( المكيظم ) تحية عطرة .

[بنت المناااعير]

ونعم والله بابن الذيب وجماعته

وهو من قبيلة _ ال عجمان _ من فخذ الضاعن _

وابن الذيب الكبير مناسب _ ال مرة _ وهم خوال عياله .. ولايهون الجميع ..


بالعون انها قصيدةٍ جزله , صح لسااانه .. ويسلم قالله ..


تسلم يابوعبدالعزيز وماقصرت ..
بيض الله وجهك على التوضيح ..

[القاصف]

[align=center]الكثـير لا يعلَم معنى البيت المشهـور !!

الكل يعتقِد بأنّ المقصود هو ( شِف هالولَد .. طيّب طالِع على خواله )

لأنّ الدليل واضِح وهو حرف الجَر ( مِـن ) .. الناس تقرأها :

الولَـد وإن طاب طيبه مِـن خواله *** وإن ترَدّى فاعلم انهم خايبينـي

بينما الصحيح هو :

الولَـد وإن طاب طيبه مَـن خواله *** وإن ترَدّى فاعلم انهم خايبينـي

( بغضّ النظر عن تغيير بعض المُفرَدات كالصبي والبعض قال أنها خلَت مِن كلمة

خايبيني .. إلاّ أننا يجب أن نركّز على " من " )

والصحيح -كما سمعتها مِن شيباننا- هي ( مَـن ) بالفتحة .. ولا أقصد أنّ الشاعر يسأل :

مَـن خوال الولَد ؟!

بل المقصـود هي ( مَـن ) مِن المِنّـه !!!

أي أنه ( حسَب تفسيري اللغوَي لكلام الشيبان ) : أنّ الولَـد كلما ازداد طيبه ؛ فإنه

سرعان ما يمنّ على خواله بهذا الطيب ويُبالِغ بالفخر فيه !!

أنا مسجّل هذا النِقاش لبعض الشيبان الكبار ، لكن الأشرطة كثـيرة ومُتشابِهة ،

وتحتاج وقت طويل لإيجاد المادّة المطلوبة !!


( هذا واللـهُ أعـلَم ) !



على العمـوم .. ألـف شكـر أسـتاذي القديـر :

~*¤ô§ô¤*~( أبو عبد العزيـز )~*¤ô§ô¤*~

على اتحافنا بهذه القِصّة والقصـيدة


واسمح لنا بنقلِها إلى ( عيـون الشِـعر ) حيث التخصّص


أكـرّر شكـري لك






فـاصــل مِن الدوخـة :
------------------------------

يا الحجـري .. احوَلّت عيوننا مِن هالتوقيع
[/align]

[( عابرة سبيل )]

/
\



قصيده رائعه ..,
ولفته طيبه منك اخي الكريم
دائماً تتحفنا بـ روائعك
دمت بـ خيرات اخي
وزادك تميزاً

:
:


<< همسه >>
واللي ماعنده خوال وش يسوي

:
:

دمتم

[أم الزبير الكويتي]

[align=center]بو عبدالعزيز ..

سلمت يمينك على نقل هذه القصيدة واعتقد والله اعلم لايوجد من شيابنا لا يعرف هذين البيتين ..

فالوالد رحمة الله كان يرددها على مسامع اخوتى حفظهم الله ورعااهم للعلم بأنهم شغوفين بالخواال ...

فجزيت الجناااان بو عبدالعزيز [/align]

[اللقايد]

السلام عليكم

يعطيك العافية ابو عبدالعزيز

شكرا

[الوعد]

المشاركة الأصلية كتبت بواسطة   الصبـي وان طـاب طيبـه مـن خوالـه بـالـخـوال يــســال قــبــل الـوالـديـنـي

وأنا أشهد وصح لسان من قالها

تسلم و لاعدمنا ذوقك...........