الماصلين school (( كاملة))

[شريك المشاكس]

الحين وش بيكون مستقبلنا



بنصير مدرسين؟!

بنطلع مدرسين رياضيات وحنا ما نعرف نتيجة ضرب 4×3 ؟

طيب نطلع مدرسين جغرافيا ؟!
يالله عاد خذ ما نعرف الا الرياض وسدير لو نتعدى المجمعة ضيعنا

طيب طيب

نطلع مدرسين رياضة وشلون عاد وحنا ما نعرف نلبس كنادر ورجولنا مليانه شطوب :1108013278:

تصدق عاد ولد عم ابو جدي يشتغل في سابك ويقول تعال واوضفك

طيب معليش يا حبيبي اشتغل في سابك بس بصراحة منيب فاضي كل يوم اعبي لي 11 مليون برميل يومياً نفط ما تشوفني الا مصفط كمومي لألألأ شف غيرها



^^^^^^
هذا الكلام المكتوب فوق ما هو الا حوار بين السبعين وشريكوه تحت العبرية المقدسة في مدرسة الفاروق

كل سنه قبل الاختبارات على هالحال، يفكرون في مستقبلهم وهم من جنبها في الدراسة لين يرسبون ويعيدون السنة وينسون الموضوع، كانوا شايلين هم الأمة العربية وودهم يخدمونها بأية طريقة >> كيف الحال بس عساكم طيبين


في أواخر عام 1407 تقريبا" كان زملاء شريك والسبعين تخرجوا من الجامعة لا وبعضهم طلعوا مسؤولين في الدولة >> منهم هاشم يماني كان يدرس معنا ويطفي المكيفات اذا خلصنا عينوه في شركة الكهرب ويوم شوفوا الزرفات جامدة قال ياجماعة ذا ينتعلم منه حطوه في وزارة التجارة

[color=#333333]وبعد مرور سنوات عديدة كان لا يزال الحال كما هو عليه، السبعين وشريك في 6/ب ، وإذا تطوروا راحوا 6/أ ، وما صار عليهم أي تغير حتى جاء ذاك اليوم الي جانا فيه المطنوخ

المطنوخ هذي صفه للدراهم الي عنده ويسمونه ايضاً أبو جبهه [/color]>> يحلفون أن جبهته من كبرها تعاقدوا معه شركة صلة علشان يستفيدون منها كلوحات اليكترونية في الملعب .

المطنوخ هذا نشوفه قليل في الحارة واحيانا يجي المدرسة بس هو ما يدرس عندنا يدرس برى السعوديه بس احيانا يعطلون قبلنا ويجي ويتميلح عندنا

ذاك اليوم قابلته عند بقالة ليبتون وانا قاعد اشرب ببسي عسكريم >> ببسي عسكريم ذا الي هو تحط الببسي في كيسه لحم الصغيرة وتشق شق بسيط في الزاوية وتقعد تمزمز كنك بزر يرضع من ديد

قالي: تصدق يا شريك انك انت موهوب

انا: قعدت التفت وراي وش هالسبة ذي ؟!

لا ياخووووووووي مهيب سبه ذي مدحه انت ياخي ولد موهوب وكل المدراس تتمناك بس

الله يسلم عمرك بس وش الي كل المدارس تتمناك؟! يعني البنات الحين سموهم مدارس ؟!

لا ياااااااااخي اقصد انك واحد كويس وكذا ولازم تنمي مواهبك وانا جاي علشان كذا

شلون يعني مافهمت ؟!

اقصد .. زي الكشافين الي يحضرون مباريات الحواري

اهااااااا قصدك يعني يلعبون في الليل ومعهم كشافات ؟!

لحوووووووووووول اقصد الكشافين ذولي ناس يدورون اللاعبين


افاااااا ليش ضايعين اللاعبين ؟!

>> طمب طن طج طراااااااااااااااااااااااااااااااااخ >> المطنوخ يدبج شريك

شريكوه ووجع نعلبوك انت مافي امل تفهم انت ووجهك الي كنه وجه بعير مشلول

لا يكثر أنت وجبهتك الي كنها لوحة امامك دوار


قام ومسكني على جنب وقعدنا نتمشى في الحارة وهو يعبي في راسي كلام اني احسن واحد وان هالمدرسة الي انا فيها ماتستاهلني

قلت شلووووووون ما تستاهلني؟!

قالي شف انت الحين راعي مواهب وكذا ولا استفادوا منك يعني لاحطوك في النشاط او المسرح

قلت: صحيح بس هم مستانسين علي

قالي كذا بهدوء: يا شريكوه يا عمري انا اول كنت بهالمدرسة ونشفوا كل المواهب الي عندي ان كانك تعرف المدير او واحد من الادارة ضبطوا وضعك، اما وانت كذا والله محد يعطيك وجه انا الحين ادرس في مدرسة عالمية في ايرلندا


المهم ذا المطنوخ عطاني مميزات مهيب صاحية واقنعني اقناع اني اسحب ملفي من الفاروق واشب فيها بعدين اسافر، عاد قام يوسوس بي ويزين لي المدرسة الي باروح لها وانها برى السعودية لأنه يشملنا قرار مجلس الابتعاث وهو واحد من ثلاثة أمور يجب أن تتوفر في المبتعث:

ـ أن يكون حائزا" على نسبة عالية
ـ خريج جامعي أو ثانوي
ـ مصاب بعاهة نفسية وتربوية


وأعتقد أنكم تعرفون أي بند يقبلنا فيه

المشكلة مهيب كذا المشكلة وش يقنع ابوي بالسفر، اجلت مناقشة ابوي بعدين لما اخلص كيسة العسكريم الي معي


وانا راجع للبيت افكر في الحوار الي بيصير بيني وبين ابوي، احتياطا ً طلعت مقص الاظافر وسحبت السكين الي يجي معه وخليته متولم لأي ظرف >> خريج سجون


وانا توني بادخل البيت نافخن صدري واقابل ابوي وامي في الساحة يتقهوون واقول لهم:

سلامون على من اتبع الهدى

ناظرني ابوي من بعيد وقال: وعليكم السلام تسيف الحال؟!

قلت: والله مدري >> انواع التضييع في هالراس.

ثم قلت ما بدهاش بادخل عرض في ابوي ، واستلمته حكي:

شوف يا والدي العزيز الوضع الان ما يطمن خصوصا المجتمع الان يعاني من بوتقة حضارية ويجب أن ننظر لها نظرة فاحصه وكوننا نعيش في الشميسي يعني ان هناك يوجد مشكلة ولاني بصراحة ما اجسر أن ابو متعب يسويها ثانية ويقعد يدخل بيتنا ويلقى ملابسنا منشورة وكلها شرابات العائلة.

أبوي: هيه هيه وش السالفة

انا: جايك يابووووي .. المقصد اننا في عالم فسيفسائي ممزوج بالقرف ولذلك فان معطيات مدارس الفاروق ما تؤهلك إلا فراش في وزارة النقل تصب قهوة لموظفي الصادر والوارد، ولاني مؤمن بابداعاتي فانا اطمح للابتعاث والاستشراف من الواقع الفيسولوجي المعاصر

أبوي: ما خلصت !

أنا: باقي شوي الله يحييك

عاد اشوف امي قالبة الطوفرية وكاتبة عليه 03 >> يعني الوقت البدل الضائع لا وتلف بها يمين ويسار، وابوي كل دقيقة يناظر لأمي ويشر على الساعة يقول: الوقت يا حكم

كملت كلامي:

ولأني مفتح فاني انظر لافاق دي اس ال ....... اقصد افاق منفتحة نحو الامبريالية اللبرالية وثق تماما ان الهيئه مالها علاقة في موضوع تسكير بقالة ابو حميد الجيزاني فما ذنبه اذا كان اللحم غالي وشاهي البنتيليز يعقد بسرعة فما ان تشرق صباح كل يوم الا وانت تتنظر لبن الخرج الي يذكرك بديد بقرة جدي في الروضة ، بالعربي يا يبه ابي اسافر لايرلندا اكمل دراستي

ناظرت امي وطالع شكلها كنها لطيفة المجرن في مسلسل خليجي انواع الفهاوة :1108013278: أما ابوي فقال:

طس طس لابوك لابو ايرلندا لابو فسيلوجية البمريالية حقتك >> لعبت في اعصابه


وفعلاً ما صدقت خبر رحت وجمعت ملابسي وقبل ما اسافر عطاني ابوي خمسين ريال قديمة ومعفطة >> يقاله يساعدني في الحياة

المشكلة الحين وش يفكني من صقيقي الصقوق السبعين الي بيفقدني وبيفقد جلسة النخلة السكرية في باحة مدرسة الفاروق والعبرية الباسقه الارجاء >> ما يعرف يعبر


رحت لمه وقعدت احاول واضح له ان جد امي من الرضاع جته جلطه يوم دبج من درج بيتهم في ايرلندا ورايح هناك علشان ارافق معه، والسبعين بدى يفق خشته وكأنه بادي تأمل نبراس حياته !! أي تنح بالعربي .. قمت ولخمته: وش رايك نلعب ببسي قال قدام !! وبعد انتهاء اليوم الدراسي احتضنت السبعين بكل اخوية مودعه وزارف منه الخمسة ريال الي كانت في جيبه
ورجعت للبيت وشلت عفشي ورحت مع التكاسي الصفراء للمـطار



وأدخل المطار بكل قوة وهيبة وانطل عليهم جوازي اقول لهم : يالله يا وقح انت وياه خلصوا اوراقي تراني مبتعث منيب مثلكم ملحط في السعودية يالله لك الحمد

ناظرني موظف الجوازات ويتأمل في وجهي والجواز يقول مهب معقولة انه انت ؟! ياخوي وجهك وسيع المفروض انت يصورونك صورة بانورامية ويالله يطلع كل وجهك >> وجه حويلم وسعد وذيب داخلين الموضوع علشان البنورامية

ضحكوا الي عنده والي وراي في الطابور ضحكوا .. والمطار كله قام يضحك .. وسواقين الرياض يضحكون .. وطلعوا الناس من بيوتهم تضحك وموظفين الوزارات على غير العادة يضحكون، والي يقرون الموضوع في سدير ضحكوا ، والديوان الملكي وقف شغله وقام يضحك، وطلع في شريط قناة المجد هههههههههههههههههههههه لين التفت لهم وقلت: بسسس

ركبنا الطيارة وقعدنا 9 ساعات وما غير وجبه وحده تونة مطبوخة وخس وزبدة مدري هم شايفين قطو في الطيارة علشان يطبخون هالعشاء الله يكرم النعمه

وصلنا لامريكا >> شريك يتسائل

قالي المطنوخ لا يا غبي هذي ايرلندا

قلت: وش دراني ما اعرف برى السعوديه الا امريكا الي ازعجونا عليها

قالي: لا وييين هذي ايرلندا راح تنسى ايام السعودية يا شيخ هنا ناس يقدرونك ويحترمونك

رحنا للمدرسة وكانت مدرسة الماصلين سكول




-- - - - - - - - - - - إلى هنا ينتهي الوجه الأول - - - - - - - - - - - -
- في الوجه الثاني نرى ما حكاية هذه المدرسة وما قابلها بطلنا شريك ماوكلي في تلك الرحلة

انتظروووووووووووووونا

[شريك المشاكس]

حمد:

تيقا هي ..

المشاركة الأصلية كتبت بواسطة   ايه وش فيه المدرس :: مهوب ذاك يقول قم للمعلم وفه التبجيلا

يا رجال عساك سالم .. المدرسين صدز من اول انت تشوفه يمشي عقب العصر ان تطقك النفظة لليوم الثاني لا يقول لك شي

الحين المدرس ما يقدر يقول في المدرسة اي كلمه على الطالب .. أما انه يغلط عليه والا يجيب ابوه من بكره شلون عاد لو شافه برى >> أيقونة طالب شايل حديده وينتظر المدرس يطلع من بيتهم

المشاركة الأصلية كتبت بواسطة   يا ويلك نصف المنتدى مدرسين هههههههه

ايه انا اقول لك قم للمعلم وفه المدري وشو >> توهق

المشاركة الأصلية كتبت بواسطة   يا لحظ هذه المدرسة العظيم التي انجبت العظماء من امثالكم وياللعبريه الجميله التي كنتم تفطرون تحتها

والله اني مشتاق لها بس يوم رحت لها ولقيت مطرسة المبزرة غسلت يدي منها ، وتصحيحا لمعلوماتك العبرية هذي مهب فطور تقول حلا .. نقنقه قبل الغداء >> شف على ايامهم فقر ومع ذلك موسعين صدورهم يالله النجاة من النار

المشاركة الأصلية كتبت بواسطة   لو فرضنا مثلا ان عمرك ذاك الوقت 12 يعني يطلع عمرك الحين 33 سنه ما شاء الله كبير يا شركرك

فضحتنا

>> ايقونة واحد يقول هذا عمره12 اذا افترضنا انه ما رسب شلون عاد لو انه مدقر في كل سنة مرة او مرتين

المشاركة الأصلية كتبت بواسطة   مدري ليه عندي احساس ان غازي القصيبي متخرج من الفارق ؟؟ ما شفته يوم فاسح وإلا شئ

لووووووووووووووووووول >> ضحكة المتحضرين
خخخخخخخخخخخخخخخخ
اجل فاسح

يلعن ام القاموس يا شيخ وين طلعت فاسح منه ذي لو يشوفها غازي بينهبل

>> امس والله العظيم محلم في الليل بغازي وهو نازل من الدرج مستعجل ولا عطاني ولا دقيقة اكلمه يقول بعدين بعدين >> فسرت الحلم اني بافضل عاطل

غازي ذا يمكنه دارس معنا والوكاد انك بتشوفه مبدع في كتاب القراءة والمحفوظات >> طراها ان ابيات الشعر ما تعوق معه

المشاركة الأصلية كتبت بواسطة   نسيت سالفه الرمان

وش سالفة الرمان >> شايب ينسى علطول

المشاركة الأصلية كتبت بواسطة   في بالي شئ واحد وهو اصلا ملامحك ايرلنديه ؟ يعني ما اتوقع عندك مشكله في التأقلم على العيش هناك صحصح وإلا غلط !

ايه صحصح >> يدق

السبعين خواله من ايرلندا وبما اني خويه اكيد باخذ منه شي


حمد لقد اسعدتني يا فتى

[لهفة الخاطر]

[align=center]هاه هاي هي

بصراحه البدايه كذا أجل وشلون لمن وصلت ...!!

المشاركة الأصلية كتبت بواسطة   وفعلاً ما صدقت خبر رحت وجمعت ملابسي وقبل ما اسافر عطاني ابوي خمسين ريال قديمة ومعفطة >> يقاله يساعدني في الحياة

في هذي صادق أجل تبيه يعطيك أكثر علشان ....

المشاركة الأصلية كتبت بواسطة   ناظرني موظف الجوازات ويتأمل في وجهي والجواز يقول مهب معقولة انه انت ؟! ياخوي وجهك وسيع المفروض انت يصورونك صورة بانورامية ويالله يطلع كل وجهك >> وجه حويلم وسعد وذيب داخلين الموضوع علشان البنورامية

بصراحه في هذي ضحكت وماقدرت أمسك عمري بصراحه وليش ماقلت له طلع الكاميرا وصورني خخخخخخ________-[/align]

[عطر المحبه]

الله يعطيك العافيه

[Sub_Zero]

[align=center]

شريك والسبعين يتابدلون اطراف الحديث تحت شجرة العبريه المقدسه وتبدو في يد احدهم كريمة المراعي

سأعود لاحقا حينما تكتمل اطراف القوصه[/align]

[شريك المشاكس]

لهفة الخاطر:


مشكورة على المرور وان شاء الله الجزء الثاني يجوز لتس



عطر المحبة:

حياك الله

وتلحف زين يقولون هالايام برد

[أموَآج الحَنِين]

ما تضحك


<----هذه العضوة ستتسطر قريبا ,,,



في أواخر عام 1407 تقريبا" كان زملاء شريك والسبعين تخرجوا من الجامعة لا وبعضهم طلعوا مسؤولين في الدولة >> منهم هاشم يماني كان يدرس معنا ويطفي المكيفات اذا خلصنا عينوه في شركة الكهرب ويوم شوفوا الزرفات جامدة قال ياجماعة ذا ينتعلم منه حطوه في وزارة التجارة



ما سمعتو الجيران انجبو طفلة اسمها امواج.,,, وقتها,,,


صراحه قصه مسليه خخخخخخخخخخخخخخخخخخخخ

نتتظر البقيه

في اووووووووووووووووووووووووووووووووووووووسع الصبر












دمتا بالف خير

امواج

[مــقــلــع]

سيسي شريك

المشاركة الأصلية كتبت بواسطة   نطلع مدرسين رياضة وشلون عاد وحنا ما نعرف نلبس كنادر ورجولنا مليانه شطوب

وش هي الشطوب:1108013278:

المشاركة الأصلية كتبت بواسطة   طيب معليش يا حبيبي اشتغل في سابك بس بصراحة منيب فاضي كل يوم اعبي لي 11 مليون برميل يومياً نفط ما تشوفني الا مصفط كمومي لألألأ شف غيرها

اي مصفط كمومك وبغضارة تنسب في ذا النفط

المشاركة الأصلية كتبت بواسطة   ذاك اليوم قابلته عند بقالة ليبتون وانا قاعد اشرب ببسي عسكريم >> ببسي عسكريم ذا الي هو تحط الببسي في كيسه لحم الصغيرة وتشق شق بسيط في الزاوية وتقعد تمزمز كنك بزر يرضع من ديد

ياقدمك بعيدن ترى كان يحط توت مب ببسي >>>احس تقول وش يبي لد التحليه

المشاركة الأصلية كتبت بواسطة   الله يسلم عمرك بس وش الي كل المدارس تتمناك؟! يعني البنات الحين سموهم مدارس ؟!

انا اقول انك تروح لشيخ يقرا عليك

المشاركة الأصلية كتبت بواسطة   قالي شف انت الحين راعي مواهب وكذا ولا استفادوا منك يعني لاحطوك في النشاط او المسرح

تكفى يا مسرح لا يدري عنك عادل إمام ثم يعتزل بس

المشاركة الأصلية كتبت بواسطة   وانا راجع للبيت افكر في الحوار الي بيصير بيني وبين ابوي، احتياطا ً طلعت مقص الاظافر وسحبت السكين الي يجي معه وخليته متولم لأي ظرف >> خريج سجون

اقول اذا جيت من عند النسيم الشرقي وين اقرب طريق للنسيم الغربي

المشاركة الأصلية كتبت بواسطة   شوف يا والدي العزيز الوضع الان ما يطمن خصوصا المجتمع الان يعاني من بوتقة حضارية ويجب أن ننظر لها نظرة فاحصه وكوننا نعيش في الشميسي يعني ان هناك يوجد مشكلة ولاني بصراحة ما اجسر أن ابو متعب يسويها ثانية ويقعد يدخل بيتنا ويلقى ملابسنا منشورة وكلها شرابات العائلة.

متعوب عليها بوتقه وبقووة بعد


ههههههههههههههههههههههه

اجل يدخل عندكم ويشوف شراب العائله عسى ما يشوف علوم ثانيه

المشاركة الأصلية كتبت بواسطة   انا: جايك يابووووي .. المقصد اننا في عالم فسيفسائي ممزوج بالقرف ولذلك فان معطيات مدارس الفاروق ما تؤهلك إلا فراش في وزارة النقل تصب قهوة لموظفي الصادر والوارد، ولاني مؤمن بابداعاتي فانا اطمح للابتعاث والاستشراف من الواقع الفيسولوجي المعاصر

اقول اتحداك تعرف معنى فسيفسائي و الفيسولوجي

ناد امير سدير وخويه المتفلسف يعلمونك معناها

المشاركة الأصلية كتبت بواسطة   ولأني مفتح فاني انظر لافاق دي اس ال ....... اقصد افاق منفتحة نحو الامبريالية اللبرالية وثق تماما ان الهيئه مالها علاقة في موضوع تسكير بقالة ابو حميد الجيزاني فما ذنبه اذا كان اللحم غالي وشاهي البنتيليز يعقد بسرعة فما ان تشرق صباح كل يوم الا وانت تتنظر لبن الخرج الي يذكرك بديد بقرة جدي في الروضة ، بالعربي يا يبه ابي اسافر لايرلندا اكمل دراستي

اقول حشش يا ....... الين يجيك الربيع(1)

(1)الربيع الي هو الدي اس ال


اقول انت منفوحه او الشميسي

>>مشكلة الي يكتب قصه ثم يحشش مع اخوياه في الليل ويجي يكملها ويحس انه يكتب وحدة جديدة

المشاركة الأصلية كتبت بواسطة   وفعلاً ما صدقت خبر رحت وجمعت ملابسي وقبل ما اسافر عطاني ابوي خمسين ريال قديمة ومعفطة >> يقاله يساعدني في الحياة

تقصد تجمع شراب العائله

ترى راس مالها سروال مشقوق من عند الركبه وفنيله تمسح فيها المواعين احيانا يعني لاتسوي


والخمسين مب متعفطة وقديمه فيها ريحه بعد

المشاركة الأصلية كتبت بواسطة   وبعد انتهاء اليوم الدراسي احتضنت السبعين بكل اخوية مودعه وزارف منه الخمسة ريال الي كانت في جيبه ورجعت للبيت وشلت عفشي ورحت مع التكاسي الصفراء للمـطار

السبعين كان ولد نعمه يرجع للبيت معه خمسة ريال>>شكله زارفها من واحد من المدرسه انت وياه ما بان عليكم عيال نعمه

المشاركة الأصلية كتبت بواسطة   ضحكوا الي عنده والي وراي في الطابور ضحكوا .. والمطار كله قام يضحك .. وسواقين الرياض يضحكون .. وطلعوا الناس من بيوتهم تضحك وموظفين الوزارات على غير العادة يضحكون، والي يقرون الموضوع في سدير ضحكوا ، والديوان الملكي وقف شغله وقام يضحك، وطلع في شريط قناة المجد هههههههههههههههههههههه لين التفت لهم وقلت: بسسس

يا زعيمنا خل عنك الهلس الي حتى المحشش ما يهضمة


موضوع الرياض تضحك ما يخالف لكن الديوان الملكي وقف شغله يضحك ذا هلس كبر ابليس

>>>>>بعدين من قالك ان الديوان الملكي يشتغل اصلا


آخبر المجد الفضائيه ما فيها شريط لاتكون تقصد مجد الأطفال





لاتأخر بعيدن اقرأ القصه من جديد لاتروح وتكتب قصه جديدة وتقول ذي التكمله




ثاانكيووووو

[هرمنا]

shareek yakhei mdree wsh 6a3oon aljhaz


magdeer aktoob 3arbi


i cannt write arabic , i have problem in my pc


reserve place & am cooming later

[شريك المشاكس]

الوجه الثاني:

في الوجه الأول تكلمنا عن تأثر شريك بكلام المطنوخ ومرافقته للدراسة في الخارج وخصوصا ايرلندا وفعلا وصلا هنا إلى مدرسة: الماصلين سكول:






كانت هذي المدرسة يسمونها مدرسة داخلية يعني فيها فصول تحت وفوق غرف نوم يعني تعيش وتدرس في نفس المكان >> وجه خطاب ناط في حلقي يقول زي جامعة الامام فيها سكن

قلت من اولها مباني مستأجره .. لا تقولي بتدرسونا في المطبخ !! ومير توني داخل والا اشوف بنات قمت اتغطى !! وهن قامن يضحكن >> شف نكسة الفطرة

قالي المطنوخ: وش فيك انت غبي ؟! ترى الوضع فري هنا

قلت: يا ويلك من الله وش ذا !؟ ياخوي مسوي فيها متحضر قبل امس انت في الرياض

قالي: يا خوي ما طلعت من السعودية الا بسبة البنات .. أنا رجال ادور سعة الصدر ونص البنات الي اعرفهن جايبهن هنا في المدرسة لا ومشبك الأساتذة علشان يحطونهم عريف على الفصول .. صدقني يا شريك والله الدراسة مع البنات تفتح النفس وبعدين تراك شكلك رومانسي وكيوت

وين رومانسي معه انت الثاني .. ما شفت خشمي المايل الي كنه حويط بن قعيد كل ما جاء سيل قض نصه ؟!

قال المطنوخ: ياخوي وش يعرفك صدقني لو تدرس هنا تتعود على البنات اصلا نص البنات الي هنا مشبكهن مهب يوم كنا في السعودية طفشوني وشوتوني على كم بنت


ووداني للادارة والقى واحد وجهه صارم تقل عسكري على جبهه حرب >> على طاري الجبهه حتى هو جبهته ما عليها ناظرت للمطنوخ وقلت له:


ما شاء الله شكله يقرب لك ؟!

قال المطنوخ: ليش ؟!؟!

قلت: ما يحتاج عليكم جبهه لو تصفون جنب بعض طلعت اصطبات لكزز 430 موديل 2003

ناظرني المدير كذا باحتقار عقب الذبه وسلم علي بطرف اصابعه وهو يقول: يا حليلك شكلك جاي طازه ما تعرف وش السالفة

قلت له: أنا الي ما اعرف وش السالفة والا انت ووجهك الي كنه مخطط سكني وفوقه قطعة ارض للحكومة.


قام يضحك: بالله تذب احلف عاد انت وخشمك الي كنه امبير سرعه >> صادق الي حاطه مدير مدرسة الماصلين حتى ذباته ماصلة

قلت: من زينك الحين أنت وخشمك نعلبوك صكيت على امير سدير أول مره اشوف خشم ماخذ فياقرا

طنقر المدير وقالي: ورى ما تنثبر لامسك خشمك واكتب على الجدار يعيش نادي أرطاوي الرقاص

قلت له: طيب باسكت ، بس بصراحة انت ما تصلح تلعب هجوم

قال: ليش؟!

قلت له: بيطلع خشمك دائم في موقف تسلل

قالي: يا حليلك والله مسوي ستظرف انت طالع كنك ضفدع في برنامج مواهب وافكار

ناظرت له بحقد وانا اقول: تراك أنت بادي بالحتسي انت ووجهك الي كنه مركى في استراحة عزاب

وتوني اشوف الشرر طالع من عينه الا المطنوخ يحاول يضبط الامور ويعتذر للمدير بحكم اني توني جديد على المدرسة.



وفعلا دخلت هالمدرسة ومن أول الأيام وانا انوم بثوبي لين بدا ذا المطنوخ يعلمني الاتكيت واني لازم البس بجاما وان نظام المدرسة الإيرلنديه فيها تطور يا حبيبي أي أتكيت بس لو يشوف المشط وفيه بقايا القشرة الي تسنّها يد واحد ماكل جريش ورقد ما غسل يده :1108013278:

يعني فيه فصول كثيرة .. فصول لتعليم الرقص .. والخياطة .. والرياضة .. والرسم وفنون مختلفة .. وطبعا لكل فصل عريف مسؤول عنه وذا المطنوخ مشبك كل المدرسة وطايح غزل فيهم وانا قاعد ادعي الله لا يخسف بنا

دخلت حصة الرسم .. وعطوني كراسة والوان .. ياربي وش ارسم ؟! أرسم لهم ددسن 85 مسحب السست ؟!

والا ارسم لهم جبل وطعس وضبان ؟! وش يعرف هالايرلنديين بالصحراء !؟ نعلبوا ابليسهم عندهم خضرة تقل داخل سوق خضار !؟ حتى المواصير طالع فيها شجر

حاولت اغش من الي جنبي الا وهو راسم صورة بنية وحركات ؟! ..

وجع حتى في الرسم ما قد شافوا بنات ذولي ؟! في الأخير قعدت اشخبط في هالكراسة لين طلع معي خريطة المملكة .. من كثر شوقي لها .. يوم وريتها المدرسة عفطت برطمها وقالت وش هالمتخلف .. وقامت سوت الورقة زي القمع ولبستني إياه وحطتني في الزاوية وكاتبه عليه انا بليد


قالي المطنوخ ذات فسحة

شف شريكوه .. هذي المدرسة مهيب مثل مدرسة الفاروق او مدارس السعودية لازم تكون سلس وتكون متفاهم واجتماعي وتضحك مع أي ذبه لأي بنت ولازم تعرف تتكلم وخل عنك القروية

وفعلاً دخلني في فصله الي هو عريفه كان فصل الثقافة

وكانوا يجيبون ابيات لنزار قباني وخرابيط والله مدري وشي


قال المطنوخ
انني احبك كعذوبة المطر المنهمر في شلال يبكي من الصخور الشاهقة :1108013278:


وقالت سماهر

ايها الرجل الشرقي بملامحك الجذابة ايها الشمس الحارقه التي تنتزعني من عميق أشجاني وتطير بي حيث العش الوليد :1108013278:

وبربروا كم واحد ثم في الاخير قاموا يناظروني ؟!

قالي المطنوخ شارك معانا ؟!

وش اقول لهم ذولي: نحمد الله جت على ما تمنى ؟!

في الاخير الهمني الله اني اقول:

لقد احببتك حتى دقرت في حبك فوضعته في الثاني وزدت في حنحنه حبك حتى طلعت من تغريز العشق

وقاموا يناظروني معجبين فيني والمطنوخ يغمز لي

يوم طلعنا قال ما شفت سماهر ؟!

قلت لا وش فيها

قال: وينك فيه ذي تتاملك وتناظرك ومعجبه فيك


وما صدقت على الله بغيت اسعبل .. وقلت له: بالله ذي الخنبقه ذي وش سالفتها

التفت علي المطنوخ وهو يضحك: يا حبيبي وش يعرفك هذه لغة متقدمة

ناظرت له وانا فاك كشرتي: اجل لغه متقدمة وقبل امس في الشميسي حدك تقرى الكتابة الي على كيسة الخبز







صاروا يقعدون عندي في الفسحة وانا اسولف لهم .. قلت انا راعي سفريات لدرجة اني سافرت لهايبر بنده >> وهم يقولون اووووه نايس
والله ان الهايبر ذا يا فيه براد تقل مكينة صراف

واكتشف ان التماسيح الي في المدرسة حاقدين علي من قلب، اول شي راعي ذبات ولا احب حركاتهم، وهم شابين في المطنوخ يقولي ما لقيت تجيب الا هذا ومن هالحتسي

صحيح أنهم حطوني عريف فصل الحشيش ، بس ولو ما خلوني في حالي ، كانت الادارة رغم انها مفوته الا متشددة على عدم تعيين بنات عريفات فصول ولكنها تخلت عن ذلك بسبب المصلحة العامة

بعد ما درسنا بفترة سووا لنا حفل تعريفي وجاتك الأسئلة .. وش رايك بالصداقة البريييييييييييييئة

يعني ذولي لو تقول لهم أحبكم في الله خربت جوهم .. لا ومن زين الطبايع وحده تسأل تقول وش هواياتك .. أقولها هوايتي الأثيرة مشاهدة الخيول في المنعطف الأخير أنكب عفش الرومانسية الي يعرفونه

المشكلة ان لي قصص مهيب صاحية مع المدرسين وزيادة على ذلك المدير لا يزال مستقعد لي لدرجة انه قام يذب علي في حفل التعارف وهو يقول:

اجل بالله تفكر بمستقبلك في هالمدرسة ما قد شفت وجهك ذا الي كنه فيل فرحان داخل الروضة

ناظرت له بهدوء وقلت له: تكفى عاد انت يالي مستقبلك زين كنك بتطلع ملك ، ما قد شفت شكلك طالع كنك قرد توه داخل معهد الادارة

شوي شب علي مدرس الاتكيت السوري: ولااااااااااااااااااااااااااااك ليش ما تحترم مدرسة لعمى ضرب عيونك يا كحلي

ناظرت هالسوري وقلت له: الحمد لله بس .. انتبه يا الشامي لا يطق فيك عرق انت ووجهك الاحمر الي لو طقه برص طلع شكلك كنه شماغ البسام بلص

ويجي عاد المطنوخ بدال ما يضبط الامور معي صار مع الادارة ضدي، خلاص صرت عندهم زي المكروه

صرت كرت محروق بالنسبة لهم

بس حلو ما عندي أي مشكلة ما دمت ثابت على مبادئي

كملت الدراسة وبصراحة المدرسة ذي ما تعتد بجهدك في المدرسة بحسب تشبيكك للأساتذة وبعلاقاتك تكسب .. يعني العريف ما ياخذها بجهده الا بحسب علاقاته.. خصوصا ان هالسمرمد كل ما طق عود بحصاه فتحوا لهم فصول خاصة وحطوا فيها أي شيء وحطوا الي يبون عريف

في اخر السنة داج كالعادة يعني لا في التعليم الصدزي فالح ولا في التميلح فالح

لمحوا لي المدرسة انهم ما يبوني ولا يبون مواهبي الي يغروني فيها من الاول وقررت اني ارجع لمنتديات سدير .. عفواً ديرتي السعودية >> خلل مطبعي

ورجعت لمدرستي الي تقدرني وتحترمي حتى وان ما حطتني عريف، لكن يكفي شوفة زملائي وخصوصا السبعين ولا انسى بقالة ليبتون وببسي عسكريم والشهادة الفيسلوجية الي ينظرها ابوي واليي لعبت عليه في الاخير وقلت شكلها ضاعت في البريد العاجل يوم ارسلوها

وشلونكم طيبين :1108013278: >> ياشين الي ما يعرف يختم الموضوع وش بقيت لبنت الشيوخ بس خلاص خخخخ

[فهد المنيع]

h3 h3 h3 h3

allh ygt3 shetank ya alza7f

m3lesh ma a3ref akteb 3raby


anta nafr mzboot---------> yslk h3 h3 h3


slaam 3lekm

[عبدالعزيز]

افحزوا لي بجي

[أمير سدير]

هع هع هع

احد يحش في خشمي؟

تبي الصدق عاد

ودي تسولف علينا عن رحلاتك ( بحكم انك الرحاله بن شروكه )

---

خاص لمقلع

تستظرف انت باللهي؟

هع هع

ياحبي لك والله <<< انت وذباتك

شكرا

[شريك المشاكس]

المشاركة الأصلية كتبت بواسطة   ههههه لا تخربين المسلسل الحلقه قديمه يعني اسود + أبيض ما بعد طلعت الكريمه هذي

لا فيها دناو ككاو >> طراها ابيض واسود


>> برااااااا

[مــقــلــع]

المشاركة الأصلية كتبت بواسطة   قلت: من زينك الحين أنت وخشمك نعلبوك صكيت على امير سدير أول مره اشوف خشم ماخذ فياقرا

خخخخخخخخخخخخخخخخخخخخخخ

الله يرجك بس العبرة بــ ..........وش

المشاركة الأصلية كتبت بواسطة   يا حبيبي أي أتكيت بس لو يشوف المشط وفيه بقايا القشرة الي تسنّها يد واحد ماكل جريش ورقد ما غسل يده

خخخخخخخخخخخخخخخخ


شكلك مجرب

المشاركة الأصلية كتبت بواسطة   لقد احببتك حتى دقرت في حبك فوضعته في الثاني وزدت في حنحنه حبك حتى طلعت من تغريز العشق

ياخي هم وش دراهم حركات التعشيق والكلام الفاضي


اقول انت طلعت من العشق مع اي باب بس

المشاركة الأصلية كتبت بواسطة   صاروا يقعدون عندي في الفسحة وانا اسولف لهم .. قلت انا راعي سفريات لدرجة اني سافرت لهايبر بنده >> وهم يقولون اووووه نايس والله ان الهايبر ذا يا فيه براد تقل مكينة صراف

هههههههههههههههههههههههههههههه

ايه سعودي ما يطبخه الا الشمس

بس ترى حركات هايبر بنده قديمه يعني شغل تبادل الشناط هناك ذا موضه قديمه يعني المباحث يعرفونها

المشاركة الأصلية كتبت بواسطة   لمحوا لي المدرسة انهم ما يبوني ولا يبون مواهبي الي يغروني فيها من الاول وقررت اني ارجع لمنتديات سدير .. عفواً ديرتي السعودية >> خلل مطبعي

بدأ شغل التشبيك مع راعي الاوله

المشاركة الأصلية كتبت بواسطة   ورجعت لمدرستي الي تقدرني وتحترمي حتى وان ما حطتني عريف، لكن يكفي شوفة زملائي وخصوصا السبعين ولا انسى بقالة ليبتون وببسي عسكريم

هينا يلمح بيب يصير مشرف لكن ابطة

المشاركة الأصلية كتبت بواسطة   وشلونكم طيبين >> ياشين الي ما يعرف يختم الموضوع وش بقيت لبنت الشيوخ بس خلاص خخخخ

والله اني حاس ناهية ذا القصه خنبقه






نبارك عودتك لنا ونتمنى رؤيتك قريبا وترى نفتح الجمعه





ثااانكيوووو