أنا مطلقـه ! وأهلـي هم السـبـب!؟!؟!؟!

[ملكـة سديـر]

[align=center]*
[align=left][/align]
*[/align]

أبوي !
أمي !!
أخوي !!!
ليه ضلمتوني !!!!

*

*

عائلة مكونة من :
" أبو فيصل " رب الأسرة ! شخصيته عنيد ! شديد جداً ! عصبي ألى أبعد الحدود ! عسكري متقاعد ! ماعنده يمه ارحميني
" أم فيصل " الأم الحنون مع زوجها في كل شيء تسعى لتجنب غضبه وإفراغ شحناته العصبيه فيها لدرجة أن أي حاجة غلط
يقول عنها صح تقول معه صح ! <<< وهنا الدجة الفعلية
" فيصل " الأبن الأكبر ! ملتزم ومؤذن جامع في الملز ! يقضي معظم وقته في أمور الدعوه ! طيب القلب حنون لدرجة الخيال !
وقد أثر على الجميع في البيت وأصبح جو المنزل جو ديني 24 ساعة ..!
" محمد " الأبن الثاني بعد البكر ! لدية شخصية غامضه جداً !! غير ملتزم ودائماً على خلاف مع أخوه فيصل من أجل وضع دش ممدوداً فقط لغرفتة !! وتدخل الوالد وسمح لمحمد بوضع مايريد ! ولم يستطع أحداً قول كلمة لا لقوة شخصية الوالد
" البنات " وهن بالترتيب : أسماء 26 سنه !! منال 24 سنه !! ندى 21 سنه!! ليان ولينا تؤام 19 سنه ! مها 17 سنه ! نوال 15 سنه

*

*

اليوم : الاثنين
المكان : غرفة أسماء ومنال
الساعة : 4:30 عصراً

< الأم > : أسماء جاهزه يا بنيتي ! هذا صوت الجرس شكلهم وصلوا !
أنجزي وأنا أمك معد به وقت عسى الله يكتب لك الخير
ويجعله نصيبك أن شاء الله ويفتح الطريق لخواتك الست من عقبك

< أسماء > : يوووه لها الدرجة قاعدة على قلوبكم وتبون الفكه !
طلعت الحين أنا الاشارة اللي موقفه الطريق ؟؟
وبعدين ! تونا بدري وشوله الاستعجال بس !
ترى بتصيحين يمه علي الين تشقق خدودك من دموعك علي فراقي !

< الأم > : أقول أخلصي وبسك تميلح وانا أمك !
البنت مالها الا بيت زوجها وتحسبينك صغيره !
ترى عمرك 26 سنه يامال الصلاح واللي كبرك عندها اربع
بزور وحامل بالخامس !

< أسماء > : وأذا 26 سنه !! يمه ترى الزمن تغير !
لاتحسبينه زي زمنكم تعرس الوحده وعمرها 12 سنه !!
يعني عادي لو توصل البنت 30 سنه وهي مابعد تزوجت !!

< الأم > : 30 سنه !! معد بقي الا هي ! تبين تنشبين بحلوقنا وتعنسين علينا بعد !
ماصدقنا يطق بابنا وأنا أمك ألحين الواحد يقول يالله الستر بس !
والبيوت مليانه مزاويج ولانبي نفرط في هالرجال !!
يالله بس أدحري بليس ودحدري لنا تحت الله يصلحتس
ولاتصيفين ثم ينهبل أبوك علينا !

< أسماء > : شكواي لله ! طيب طيب أبشري يمه !
الحين لاحقتك دام هذا تفكيركم وهذي حدوده !!

*

*

< ابو عبدالله > : " في طلبات مستمره بينهم اوقات مختلفه !

- وين القهوه !
- وين الشاهي !!
- وين أسماء ! خلوها تجينا المقلط بالعصير !
- أبعدو البزران ولانسمع صوت !!
- وين الدخون !!
مع السلامه !! .... مع السلامه

*

*

غرفة : أسماء ومنال
البنات كلهم وأمهم متجمعين !
أسماء مستحيه ويالله تتكلم !

< أسماء > : الله يقطع هاليوم ولايرده !! ياربيه وليش الزواج
مايصير بدون هالحركات البايخه !! بغيت اطيح على وجهي
وهو مبحلق بعيونه جعلهن !! او بلاش لايجيه شيء ولد الناس

< نوال > " أختها الصغيره " : الله الله بدينا نخاف على عيون بعض الناس ولاندعي
عليه ههههههه دنيا والله ! سبحان مقلب الاحوال ! هذا ومابعد صار شي !!

< أسماء > : نوالوه ماودك تنطمين !! بس من جد واضح انه طيب وشكله ماعليه !
بس كل هذا مايهمني !! أنا أبي أخلاقة ودينة وطبايعة تكون حلوه لو يصير
أشين مخلوق شكلاً بكيفة ! بس أهم شي يكون يخاف الله

< الأم > : الله يوفقك يا بنيتي وأن شاء الله انه بيصير زي ماتبين
وهذا مو غريب هذا ولد عمك ومنك وفيك ! والدم واحد وأنا أمك !
ومنعم عليه الله وبيعيشك في سعادة ونعيم !

< أسماء > : الله يسمع منك يمه ! وترى أهم شي الصلاة يمه تكفين
قولي لبوي يسألون عنه زين وعن أخلاقة وعن أصحابة وهل
هو راعي خراب وفساد وفجور ! تراني بذمتكم !
لايغريكم المنصب ولا الفلوس ولا القرابه
وركزوا على كل اللي قلت لكم ! لان كل شيء بيزول ماعدى
اللي ذكرته ! دينه وأخلاقة

< الأم " فرط لسانها ! "> : أساساً أبوك واعدهم يوم الخميس الجاي !
وراح تتملكين أن شاء الله ومبروك يابنيتي !

< أسماء > : أيشششش !!! كذا من الباب للطاقه !!!
طيب متى يمديكم تسألون عنه ؟؟ متى يمديكم تعرفون
وشهوا من رجال !! ليش السرعة هذي كلها !! تكفين يمه قولي
لبوي يأجل الموضوع ألين يسألون عنه إمام مسجد حارتهم !
وأخوياه في العمل تكفين لايستعجل تكفيييين

< الأم > : روحي لبوك وقولي له منيب فاضيه يصارخ علي !

*

*

جلست أسماء لوحدها بعد خروج الجميع من غرفتها ملقين عليها التهاني والتباريك ! وهي تسأل نفسها ! لماذا هذا الشعور الغريب بداخلي ! لماذا هذا الخوف !! هل هو شعور كل فتاة تريد أن تقدم على هذه الخطوه بحياتها ! أم هناك شيء يجعلني أشعر بعدم الأمان والخوف من الموضوع لسرعته !! وعدم أخذ الوقت الكافي في التفكير ! هل من حقي أن اقول نعم أو لا بهذا الزواج !! أذاً لماذا أبي لم يأتي هنا لكي يسألني عن رايي ؟ هل يومين كافية للسؤال عن أبن عمي ! وهل لي الحق أن أسأل أبي عن زوج المستقبل وقد تربيت على الحياء وعدم التحدث بهذه الأمور بتاتاً !!! أذاً لم يبقى لي سوى أخي " محمد " سوف أسأله فقد كانت له علاقة صداقة سابقة تجمعه مع " خالد (زوج المستقبل )" وسوف يفيدني عن ذالك أن شاء الله

*

*

اليوم : الاثنين
المكان : غرفة محمد
الساعة : 9:00 مساءً

< أسماء > : محمد ممكن أدخل !!

< محمد > : لاااا ضفي وجهك !! هههههه
تعالي تعالي أمزح معك أجل بالله تستأذنين
عشان تدخلين علي أنتي ووجهك !

< أسماء > : ياشينك أحرجتني وطاح وجهي !
أسمع حمودي مابي أخذ من وقتك وأحط مقدمات !
أنا جايتك ابسألك عن " خالد " أيش رايك فيه !!
بحكم أنه كان صاحبك وتعرفه ! مدري ليش أبوي مستعجل
وهو ما سأل عنه !

< محمد > : أني قايل هالأستئذان وراه شيء !
عموماً وش أنتي خايفة منه !! الرجال اللي أعرف عنه
أنه يدخن بس ! هذا اللي اشوفه وغيره مدري مادخلت معه !

< أسماء > وشو !! صادق أنت !
طيب وليش ساكت ماقلته لبوي !! وأذا يدخن أكيد فيه أشياء
أقوى من كذا ولا أبي اتورط في حياتي !! تكفى قل لبوي يا محمد
أخوي فيصل زي منت عارف مسافر ومهوب راجع الا بعد شهر
وأنت الوحيد اللي يقدر يساعدني !

< محمد > : شوي شوي كليتيني ! أنا قلت لبوي
ويدري أنه يدخن وقال تتن ولا غيره ! وطيش شباب وبيتوب
أن شاء الله ! يعني بالعربي ابوي يدري ارتاحي !

< أسماء > : من جدك انت ؟؟؟؟ طيب وأنت وشرايك ؟؟؟
عادي عندك ! وليش ماتروح تسأل
شلتك اللي كنت معهم عنه ! وتسأل عنه في عمله بعد !
وتسأل كل من يعرفه تكفى !
وتشوف وشبعد الزمن مخبي لي من مصايب !

< محمد > : اقول روقينا وفكيني يرحم والديك
مارحت اداوم عشان اروح اسأل لك عنه بدوامه !!
لاتدخليني بمشاكلكم وروحي شوفي غيري يرحم والديك
وبعدين الرجال مسلم وسعودي خلاص كافي !
لاتقعدين توجعين راسك أبوي بيوافق لو يدخل مجلسنا وهو سكران !!!

*

*

خرجت أسماء والدنيا بعيونها سودا !! تتذكر كلام أخوها " محمد " !! وتفكر بمصيرها مع شخص مدخن ! فيقطع حبل أفكارها صوت أمها بداخلها عندما قالت لها أخر مره (( عبارة الرعب ))وهي تغادر الغرفة " يابنيتي ! ولد عمك شباب خذيه أحسن لك !ولا شايب(ن) عايب يحطك أبوك عنده وتنشبين بروحك لانه مستحيل بيخليك عانس عنده في البيت " فقد تقدم لها قبل " خالد " صاحب الأب الثري الغني والذي يبلغ من العمر 58 سنه ولم يرد على طلبه حتى اليوم !!! ومن هنا ! بدءت المقارنة ! وبدء الخوف يمتلك مشاعر أسماء وكان طريق ينتهي بخالد وسجائره أفضل من طريق كبير السن المعقد ! وكانت تقنع نفسها بإن الدخان أخف من غيره ! وأنها سوف تستطيع أن تقنعه بتركه وسوف تغير من طبعه أن كان هناك مايعيب شخصه

*

*

< أسماء > : أبوي ! يعلم الله أني ترددت كثير عشان أجي
وأكلمك بموضوع زواجي وأدري عيب !!
بس الله يخليك من أشكي له ! تعبت من التفكير وأبيك
ياوالدي العزيز تسأل عنه وعن أخلاقة وحرصه على الدين !

< أبوعبدالله > : يعني أنتي أحرص منا عليك !! قومي لغرفتس
بس وخلي شغل الرجال علينا ! هذا ولد أخوي ومافيه شي
يعيبه رجال من ظهر رجال وأذا على التتن وعدني بيتركه !
وبيحطك في عيونه ومهوب أنا اللي انشد عن عيالي لان " خالد "
في مقام عيالي توكلي على الله بس ولعد اشوفتس فاتحتن هالموضوع

< أسماء > : يبه ! تكفى لاتضلمني وتشيل ذنبي كل عمرك !!
أنتبه يبه تراني أمانه بذمتك وأنت اللي فصلت وخليتني ألبس على
كيفك وأخترت على كيفك وحتى السؤال ماسألت عنه !
أبي بس أعرف هو محافظ على الصلاة !! يخاف الله !
راعي سفر وخرابيط ! في الخارج ! هل سألتم عنه في الجوازات
وين سافر وكم قعد و و و و !! ومع كل هذا !
ماراح تشوف مني الا أللي يرضيك طاعتك وأجبه واوامرك ملباه
وحتى لو يكون اللي يكون رضاك بالدنيا يابوي

< أبوعبدالله > : تخافين نزوجك مسيحي يعني !
وحتى لو أنه راعي سفر وراعي خرابيط أكيد بيعقل
أذا تزوج وحس بالمسؤولية وكلن له سوابق محدن
معصوم من الخطأ وانا ابوتس ! يالله
روحي ولعد اسمع لك حس بها الموضوع !

*

*

ملكه ! يوم الخميس !
زواج !! بعد شهرين !
سفر المعاريس للخارج !!

7

7

7

خالد : ( عبارات خرجت منه في أوقات مختلفه أثناء سفرهم )

- أفتشي يالقروية فشلتينا !!!
- خذتيني وأنا أدخن فبلاش قلق !!
- صدق بعض النسب مرض ! المفروض أني أخذت بنت راقيه متفتحه فررررري مهوب معقده كل شي حرام وكل شوي قم صل !
- أبشرب خمر قدامك أحسن من وراك ! وأعلى مافي خيلك اركبيه !! أنا كذا وأخوك يعرفني وقد سافرت معه وشربنا مع بعض ومشكلتك أنتي أن اخوك ماعلمك عشان مايفضح نفسه ! وواضح انهم ماصدقوا خبر أني تقدمت لك !
- نامي أنا ابطلع وماعليك الا العافية تراك في الفندق منتي في الشارع وابرجع قبل النور يطلع !!!!!!!! وأذا تبين تروحين معي تعالي عااادي فري ! بس بدون ازعاج وقلق ونصايح ! ابنزل للديسكو اجلس فيه شوي!
- خذي الكاس وذوقي طعمه شوي ! ترى مثل المويه بس فيه طعم يختلف شوي وبتحسين بجوك حلو مررره !!
- يكون لعلمك ترى زواجي ضغط من أهلي وعشان أكسب ودهم ويرضى علي أبوي ويعطيني أسدد قروضي وديوني واتمتع بفلوس الزواج مهوب عشان وجهك !

أسماء : (عبارات خرجت رداً على خالد )
- عزتي في حجابي ! وأذا الستر وتطبيق شرع الله أصبح في نظرك فشيله فما أحلاها من فشيله وأنا أرضي رب العزه والجلال ولم يعد يهمني أرضاءك يا جاهل !
- تمنيت أن تعتدل بعد الزواج وأن أستطيع أن أجعلك تترك التدخين بس صدق المثل القائل " ذيل الكلب أعوج ومايعتدل أبد " !!
- ليتك أخذت الراقيه ! المتفتحه! في نظرك " العاصيه لله سبحانه " فسحقاً للتفتح والأنحلال أذا لم يكن هناك من يحثك على الصلاة !
- أشرب سم أن شئت ! فلم يعد يهمني ! وأخي لو كان فيه خير ! لما أصبح صديقاً لحقيراً مثلك !!
- خسئت يا واطي فقدمي لم تحط الا على أرض الحرمين ولله الحمد شرفهم الله عن أشكالك ولن أدنس قدماي بمبتغاك يا حشره !!
- تمد لي كاس الخمر وتعتبر نفسك رجلاً !!! خسارة أنك تحمل أوصاف رجل وشكل رجل وأنت لست الا مجرد كلبً حقير ! وأعلم أن أهلي قد ربوني بغير ماشببت عليه أنت ! ولم أعرف وارى تلك الأشياء الا معك لحقارتك ومستوى معيشتك ودناءتك
- طلقني يا عاصي ! يا حقير ! فلم يعد لك قيمه ولا بوزن جناح ذبابه بقلبي ! وحان الوقت لكي أقول " سامحك الله يا أبي "

خاتمه !!

لكل أب ولكل أم الزمن أختلف والناس أختلفوا !! وكثرت المعاصي والفتن ! وابتعدوا الناس عن ربهم بحب المال وحب الدنيا ! وأصبح الخراب شائعاً بين الشباب والفتيات ايضاً ! فقبل سنين ! كان الخمر يعتبر مصيبه عضمى والأن للأسف تسمع القصص الكثيره والمخيفه ! ومشاكل زوجيه بسبب هذه البلاوي والعياذ بالله !! أنا لا أضلم جميع الشباب فيعلم الله هناك من هم أطيب الطيبين ! وأخير الناس واصحاب طاعه وإيمان ولكن للاسف الخير يخص والشر يعم ! واصبحت هذه المشاكل بشكل كبير في مجتمعنا !!
أن السماح للشاب المراهق بالسفر وإعطاءه تصريح للعبور من حدود هذه الدوله المحافظه في سنن يافع ! تتغلب عليه عواطفه ورغبته الجامعه للتجربه لكل شي ! هو المصيبه وهي الكارثه ! فتصبح من تجربه وحب استطلاع ألى عاده وأستمرار حتى داخل وطنه !! الأب لاهي وكلمة يقولها عند سؤاله لماذا سمحت لولدك بالسفر لوحده أو مع ربعه بنفس عمره !! يقول " ماعليه رجال خلوه يتعلم الدنيا بنفسه " بالعكس فقد أعدمت مستقبله وسمحت له بالانحراف برغبتك أنت يا والده !! فمن يحاسب الجاهل ! والقاصر ! من يستطيع كبح رغبة مراهق ليس هناك من يراقبه !! خافوا الله في أنفسكم وفي أبناءكم فالمشكلة ليست عليهم فقط ! المشكله انها أصبحت قضية عوائل وأطفال وطلاق وغيره ! : )

وصيه !!

لكل أب ولكل أخ ولكل أم : الفتاة ضعيفة ! وتعيش في زمن يختلف عن زمنكم القديم ! والأن إيجاد الرجل الصالح الطائع لربه والمخلص لبيته وزوجته اصبح أمراً صعباً ودوركم هو عدم الأستعجال في قرارتكم ! السؤال الدقيق عن زوج أبنتكم ألتي لاحول لها ولاقوه الأستفسار عن دينه وخلقه وصلاته قبل كل شيء " فمن لايخاف الله خف منه " صدقوني !!!! العنوسه وكلمة " لم يحالفها النصيب " أهون بمليون مره من رميها لكلابً يجرحون كرامتها !! ويذلونها ! وبعضهن ينجرفن مع أزواجهن حتى لايطلقها ومن أجل اطفالها !! وبعضهن هن أنفسهن من يجهزن الشراب والمصائب بإنفسهن أستسلاماً للحياة ألتي رميتم بها عليها

أعتذر من كل قلبي على الأطاله !!
تحياتي للجميع
سيناريو وحوار : ملكة سدير

أنتهى

[الرائد]

[align=center]السلام عليكم أختي ملكة سدير

للأسف الشديد حالة أسماء موجود منها كثير،،،

وانا أستغرب من بعض العوائل على تسرعهم في وضع بنتهم في مثل هذه البيوت،،،

يا جماعة الخير أتقى الله في بناتكم،،،

والله أنهم أمانه في في رقابنا،،،

أها ثم أها على هذا الاخ الغير ناصح "محمد" واشكاله ،،،

ما نقول إلا ما يرضى ربنا

أنا لله وأنا اليه راجعون،،،

ومشكوره أختي على هذا سيناريو وحوار الاكثر من رآئع[/align]

[ملكـة سديـر]

المشاركة الأصلية كتبت بواسطة الرائد   [align=center]السلام عليكم أختي ملكة سدير للأسف الشديد حالة أسماء موجود منها كثير،،، وانا أستغرب من بعض العوائل على تسرعهم في وضع بنتهم في مثل هذه البيوت،،، يا جماعة الخير أتقى الله في بناتكم،،، والله أنهم أمانه في في رقابنا،،، أها ثم أها على هذا الاخ الغير ناصح "محمد" واشكاله ،،، ما نقول إلا ما يرضى ربنا أنا لله وأنا اليه راجعون،،، ومشكوره أختي على هذا سيناريو وحوار الاكثر من رآئع[/align]

عليكم السلام ورحمة الله وبركاته
مرحباً بك أخوي " الرائد "
للأسف هذا الحال الكثير من البنات وزي ماتفضلت أخوي
في كثير من البيوت وللأسف يأتي الندم بعد
فوات الأوان
تلك الفتاة المسكينة لاحول لها ولاقوة وهي
أمانه برقبة كل أب ويجب عدم الإستعجال والتريث
والسؤال بدقة لانها قضايا مصيريه
شرفتني بحضورك أخوي الرائد والف الف شكر لك

[ملكـة سديـر]

المشاركة الأصلية كتبت بواسطة حمد   اقف هنا اعجابا بهذا القلم المتميز اعجبني هذ الحوار الجميل بين افراد الأســرة وشدتني تلك الخاتمه الرائعه التي تحمل بين كلماتها نصائح و توجيهات مهمه للجميع و ما أروع تلك الوصيه التي ذكرتها في موضوعك موضوع اقل ما يقال عنه انه مـتميز اشــكر لك هذا الطرح الجميل موفقين لكل خير

أهلـن بك يـ أستاذي العزيز " حمد "
وصدقني الأجمل هو حضورك وردك بموضوعي
وأشكرك على رايك اللي أسعدني كثير وأعتبره شهادة
لي من أستاذ مثلك فجزاك الله عني ألف خير
والتميز حضورك سيدي
شكراً جزيلاً

[طالبة المعالي]

ماشاءالله تبارك الله .. طرح رائع استمتعنا معه .. وموضوع يحاكي بعض واقعنا المؤلم .. فهناك شريحة من الناس بمجرد أن يأتي الخاطب مباشرة .. يعطى الضوء الأخضر وتتم الموافقة عليه !!
دون تريث واجتهاد في السؤال عنه من قبل .. جماعة المسجد والعمل .. والأصحاب والأصدقاء والأقارب !! مايهمهم هو الظاهر لهم فقط وهذه كارثة ومصيبة .. الكلام يطول عن مثل هذه الحكايا
المؤلمة لكن ندع الفرصة لغيرنا ..


أختي الكريمة " ملكة سدير " ما أروعك بقلمك السيال .. حينما يجود بسخائه علينا .. بارك الله فيك ونفع بك دينك وأمتك ..

[ملكـة سديـر]

المشاركة الأصلية كتبت بواسطة هند السبيعي   ماشاءالله تبارك الله .. طرح رائع استمتعنا معه .. وموضوع يحاكي بعض واقعنا المؤلم .. فهناك شريحة من الناس بمجرد أن يأتي الخاطب مباشرة .. يعطى الضوء الأخضر وتتم الموافقة عليه !! دون تريث واجتهاد في السؤال عنه من قبل .. جماعة المسجد والعمل .. والأصحاب والأصدقاء والأقارب !! مايهمهم هو الظاهر لهم فقط وهذه كارثة ومصيبة .. الكلام يطول عن مثل هذه الحكايا المؤلمة لكن ندع الفرصة لغيرنا .. أختي الكريمة " ملكة سدير " ما أروعك بقلمك السيال .. حينما يجود بسخائه علينا .. بارك الله فيك ونفع بك دينك وأمتك ..

صباح الخير أستاذتي ومثلي الاعلى " هند السبيعي "
لاتعلمين كيف هي سعادتي الأن وأنا أقراء حروفك مره ومرتين
وأكثر فـ أنا من عشاق حرفك حتى بردودك !

المشاركة الأصلية كتبت بواسطة   فهناك شريحة من الناس بمجرد أن يأتي الخاطب مباشرة .. يعطى الضوء الأخضر وتتم الموافقة عليه !!

صدقتي والله وأيضاً هناك من يعتقد أنه أذا كان العريس
أبن أخ أول خال فهذا شيء يجيزه عن السؤال ويصبح قريب
جداً ومنا وفينا على قولتهم وتتم الموافقه بدون الأستفسار عنه جيداً
والبعض يكتفي بطيب أب الزوج فيقال " طيبه من أبوه " فعجباً هل الأب
هو من سيتزوج أبنتك !! فكم من أخوه خرجوا من رحمً واحد فكان أحدهم
عالماً زاهداً داعيه مطيعاً لله وأخوه منحرف وذو معاصي لاتعدى ولا تحصى !

أشكرك أختي هند على المداخله وتعطير موضوعي بإسمك اللامع
لكِ مني كل محبه وتقدير وجزاك الله ألف خير

[عبدالله الفـارس]

السـؤال عن الخاطب والإستقصـاء عنه وعن أهله

أمر هام حقيقة نرى الكثير من آوليـاء الأمور ينأون عنه لسبب أو آخر

وهو أمر تترتب عليه سعادة أو شقـاء من هي تحت ولايتــه ..!!

المتألقـة ملكـة سدير

أشكر لك طرحـك الراقي

موضوع أجدتي في صياغتــه بإمتيــاز

[أمير سدير]

طرح رائع فعلا

وللاسف العنوسه تفشت لدينا بشكل كبير

بارك الله فيك

[أم فيصل]

ماشاء الله تبارك الله ..

سيناريو وحوار رائع أعجبني ..

عشت هذا الواقع المؤلم

رق قلبي لأسماء وأمثالها كثير ..

على الأهل ان يخافوا الله في هذه الأمانه التي وكلت اليهم ويتقوا الله في بناتهم فهم مسؤولون

امام الله ..

أسأل الله ان يرحمنا برحمته ..

وأن يرزق بنات المسلمين الزوج الصالح ..

ويهدي شبابنا لطريق الخير والصلاح ..

بارك الله فيك ..

[ملكـة سديـر]

المشاركة الأصلية كتبت بواسطة عاشق ديرتي   السـؤال عن الخاطب والإستقصـاء عنه وعن أهله أمر هام حقيقة نرى الكثير من آوليـاء الأمور ينأون عنه لسبب أو آخر وهو أمر تترتب عليه سعادة أو شقـاء من هي تحت ولايتــه ..!! المتألقـة ملكـة سدير أشكر لك طرحـك الراقي موضوع أجدتي في صياغتــه بإمتيــاز

الأخ العزيز " عاشق ديرتي "
فعلاً كما تفضلت أخي العزيز أن التقصي عن زوج
المستقبل لـ كل فتاة أمراً يستحق الأهتمام به ولا يصح
أخذ الأمور بتساهل وجعل روابط القرابة هي الشافع للمتقدم
للزواج ومعاملته كـ الغريب المجهول لان الناس أسرار ولايحكم
عليهم بـ نسبهم أو أبن من يكون
أشكرك على تكرمك وحضورك والرد على الموضوع
أختك ملوكه

[ملكـة سديـر]

المشاركة الأصلية كتبت بواسطة أمير سدير   طرح رائع فعلا وللاسف العنوسه تفشت لدينا بشكل كبير بارك الله فيك

مرحباً بك أخي " أمير سدير "
اللهم أرزق بناتنا الازواج الصالحين
وشكراً لك على مداخلتك وتعطيرك لموضوعي
تقبل تحياتي وتقديري
أختك ملوكه

[ملكـة سديـر]

المشاركة الأصلية كتبت بواسطة أم فيصل   ماشاء الله تبارك الله .. سيناريو وحوار رائع أعجبني .. عشت هذا الواقع المؤلم رق قلبي لأسماء وأمثالها كثير .. على الأهل ان يخافوا الله في هذه الأمانه التي وكلت اليهم ويتقوا الله في بناتهم فهم مسؤولون امام الله .. أسأل الله ان يرحمنا برحمته .. وأن يرزق بنات المسلمين الزوج الصالح .. ويهدي شبابنا لطريق الخير والصلاح .. بارك الله فيك ..

الأخت الغالية " ام فيصل " هنا !!!
يامرحباً ألف والساعة المباركة يوم شرفتي الموضوع
ولاعدمناك أن شاء الله
وكون الموضوع أعجبك فهذه شهادة أعتز فيها كون
حروفي لاقت أعجاباً منك أستاذتي
والله يتقبل دعاك أن شاء الله ويرزق بناتنا من يخافون
الله ويصلح أحوال الشباب ويهديهم أنه قادر على كل شيء
ألف شكر لك مره أخرى

[سديم الليل]

مشاء الله مواضيع جدا ملامسه للواقع
الى الامام يا ملكة سدير فانتي حقا ملكة
حفظك الله ورعاك
اختك سديم الليل

[سعود الخليل]

حقيقة وبلا مجاملة هذا الموضوع من اجمل المواضيع التي قرأتها في الإنترنت إجمالاً ويعلم الله ان هذا ليس مجامله بل لأن الموضوع لامس الواقع بإسلوب قصصي راقي مميز ..

ملكة سدير ...

بارك الله فيك وفيما كتبتي ..

موضوع هام جداً اتمنى ان يقرأه كل اب وكل ام قبل ان يرموا ببناتهم لأناس لم يسألوا عنهم ..


رساله لكل أب ولكل أم بناتكم امانة في أعناقكم فبقاء البنت في بيت والدها معززة مكرمة حتى وإن عنست خير من ان ترمى مع من لا يقدر كرامتها ويعيشها في ذل واحتقار ..

[عبدالله المهيدب]

[frame="5 80"][align=center]موضوع راااائع وسيناريو موفق وردود تثلج الصدر بارك الله فيكم جميعا

لعلي أضيف أمر مهم يغفل عنه الكثير من الأباء والأمهات الا وهو الدعاء والتضرع والإلحاح بالتوفيق لبناتنا بالزوج الصالح والحياة السعيدة والعكس وكلنا يعلم أثر الدعاء
قال تعالى:

(( أدعوني أستجب لكم ))

(( قل مايعبأ بكم ربي لولا دعاءكم ))

وغيرها من الآيات والأحاديث التي تؤكد أهمية الدعاء

ونحن هنا بدورنا نقول نسأل الله العلي القدير بأسمائه الحسنى وصفاته العلى أن يوفق بناتنا برجال نرضى دينهم وخلقهم وأن يرزق شبابنا من تكون قرة عين له ذات دين وجمال وأن يسعدنا جميعا في الدنيا والآخرة.[/align][/frame]