الدهناء والثلوج

[عبدالعزيز]

السلام عليكم

مساكم الله بالخير والرضا والعافية

اليوم اعرض لكم رحتنا للدهناء ليوم الاربعاء الموافق 8\1\ 1429هـ حتى يوم الخميس يوم واحد

الغرض من الرحلة مشاهدة الثلوج + تلقيط حطيبات

طبعا طاقم الرحلة اللي هم 4 اشخاص وسيارتين كانوا مصرين على الكشتة ومواجهة الثلوج بصدر رحب رغم الظروف القاسية اليكم التقرير

يوم الاربعاء حركنا من سدير الحبيبة قبل صلاة المغرب متجهزين ومتلبدين بهالخلاقين

صلينا المغرب في الطريق وقال واحد من الشباب برقع الكفر والحقكم قلنا قدامك انحن

المهم وصلنا لام رجوم نبي ندخل الدهناء ويدق علينا قال خرب الدينمو في مبايض

قالوا بنرجع نجيب سيارة ثانية وانا وخويي دخلنا شوي للدهناء نحطب حق الليل

المهم بعد ساعتين تقريبا التاقينا بربعنا حوالي الساعة 9.30 ودورنا مكان ذاري ونثرنا عفشنا

قبل مانثرنا قشعنا قال خوينا لنا سالفة يقول : قال لنا باكستاني في المحطة ايش سعودي مهبول انتا في بيت مكيف دفاية ايجي هنا برد عاد يقول والله اعلم ان ميت 3 هنديين وسوداني من البرد في الدهناء << بغينا ماننزل العفش بنرجع للديرة >> امزح ترا

السالفة اننا شبينا على القهوة والشاهي والعشاء

المهم راح واحد من الشباب بيعبي موية الساعه 11 تقريبا ولا التانكي حق الموية مثلج

نتوقع ان درجة الحرارة 15 تحت الصفر يعني برد لايمكن ان يوصف

وفي سدير اللي هن القرى معروف انها ادفى من البر وصلت درجة الحرارة 8 تحت الصفر

نبدا الصور

عشانا حول مايستوي



المهم تعشينا وعينا من الله خير

قلنا خل نرقد

وننام طبعا اول مره في عمري اشوف مثل هالبرد والحمد لله رجعنا سالمين

قمنا الصبح وكنا متوقعين المشاهد التالية









جاني البرد يوم شفت الصور

المهم هذي غضاره ولا طاسة سموها اللي تبون اهم شي شوفوها





طبعا بما اننا قراوى ولا نعرف للثلوج غلطنا غلطة وهي اننا ماسكرنا كبوت السيارة يوم جينا ننام

واليكم نتائج فعلتنا الشنيعة



انفصل الخرطوش





لا وبعد مثلجة الموية الخضراء

وفي الختام لايسعني الا ان اشكركم على متابعتكم

[مصوت بالعشاء]

[align=center]هلا أخوي شيخ شمّر

الحمد لله على السلامه ..... وش مطلعكم في هالصريمه .. يخوك أقضب بيتك وريّح عميرك !!! ما حدك الله على هالطلعه!

يخوك من شفت هالصور طقطقت ضروسي من البرد

مشكور على الصور
ولك مني أرق تحيه
مصوّت بالعشاء[/align]

[بندر المنيع]

الحمد الله على السلامه

اخوي .. شيخ شمر

ماشاء الله عليكم وشلون تحملتوا هالبرد والله انكم قويين

يعطيك العافيه ع التغطيه

[سعود الخليل]

الحمد لله على العقل !!!

منتب صاحي يا شيخ شمر ؟! احد يطلع للدهنا في هالبرد ؟!

الناس مثلجين في بيوتهم!!!


لكن فككم الله ولعد تتعود لها ... والحمد لله على السلامه ..

[السنايدي]

الحمد لله على سلامتكم

صور رائعه

[فهد المنيع]

مجنون


جاني البرد وانا اقرا التقرير



يعطيك العافيه والله يستر عليكم

[أنس بن عبد الله]

الحمد لله على السلامة

عندي سؤال شلون تتوضون للصلاة

ولا جمعتوا صلواتكم كلها بالديرة

تحية لك يالغالي وللي معك على مغامرتكم وتحديكم للبرد

[بن جعيثن]

كنها كيكة مرشوش(ن) عليها دريم ويب ...

شيخ شمر صدق الباكستاني إنكم مجانين ...

تقبل مروري ...

محبك ...

بن جعيثن ...

[مصعب بن عبدالله]

شيخ شمر
ما عليك منهم
ما يعرفون علوم الرجال
أجل الي يطلع للبر صار مجنون
والله حاااااااااااااااااااااله



تبي الصراحه والله أنكم

[شعيب سدير]

مغااامره .. جنونية ..

برد جمده .. الله الي فككم ما جاااكم شي ..

عموماً الحمدالله على السلامة ..

الا على فكره ما علمتنا عن درجة الحراره .. اتوقع 6-

يعطيك العافية اخوي .. شيخ شمر ..

[سديراوية]

وش اللى 15 تحت الصفر

والله انكم مهبل

تطلعون بهالبرد


بس ونااااسه احس >>> تناقص

الحمد لله على السلامه

[الـــشـــامـــخ]

حمدلله على السلامة
الله يعطيك العافيه ياشيخ شمر
على التقرير
تقبل مروري

[أبو زياد]

[align=center]... كفوا والله ياذيب تقرير ولا أروع يعطيك العافيه وتقبل مروري يالغالي ...[/align]

[منيف المنيف]

منت صاحي يا عبدالعزيز ولا الى معك اظن ما معت بالبيات الشتوي فيه احد يطلع في هالاجواء الباردة
::
زين ما رجعوكم قوالب ثلج الله يسلمكم من كل سوى
والحمد لله على السلامه
::

[يـــزيـــد]

السلام عليكم

يالله صلاح العطاء ناس تكبر وتعقل وانت تكبر وتنهبل ياعزوز

صاحي تروح للبر هالايام امس مكلم واحد يقول 35 راس من الغنم ماتت من البرد

المهم بس الحمد لله على سلامتك ولازم السبت نسوي لك احتفال هع

الصور جميلة وخصوصا الثلاث صور الاولى جميلة ولكن فيها عزل نتيجه لعدم استخدامك لفتحة عدسة ضيقة بنظري

الله يعافيك ياشيخوهـ