قصه لأحد اقربائي في البر (بسم الله)

[المولع]

احد اقربائي توه جاي اليوم من رحله بريه استمرت لمدة ثلاث ايام وكانت في التنهات . القصه بسم الله علينا فيها ( الجن ) ، يقول الرجال انهم كانو يوم الخميس في الليل وفي وقت متأخر شوي قاعدين يجهزون العشاء المهم يوم حطو السفره وحطو عشاهم و بدو ياكلون الا ذاك الضرب القوي يشبه صوت طق في الحديد يجي من جنب رواق الخيمه بالضبط وكانت السياره من نفس هذه الجهه ، المهم الشباب استغربوا وقالوا يمكن ناس يبنون خيمتهم قريب عندنا و هذا صوت اطناب الخيمه تدق ،قال هذا الرجل الي يقرب لي ( وهو يقسم بالله العظيم) قال كيف خيمه يطق لها طناب واحد و ما امداه يكمل كلمته هذي الا نفس الصوت يضرب بنفس القوه و من نفس الجهه ، قالوا الشباب الدعوه فيها إن، المهم قال واحد منهم اذكرو الله و كملو عشاكم ونشوف ( والله رايق هذا ) وبعد ما قضو من العشاء طلعوا يكتشفون المنطقه الي من حول الخيمه ولا شافو لا خيمه تبنى و لا ناس تخيم ، لاكن ربك ستر و جت على كذا ، يمكنهم ضايقو هولاء (الجن) حمانا الله و اياكم .

لذلك يجب عليكم اخواني رواد البر انكم تتحصنون بالأذكار و الآيات في هذا الجانب . ولا تنسى دعاء النزول في المكان ....

[مفتون صيد]

كلامك كله عينا الصواب وفعلا الاذكار مهمه ومحصنه للفرد في بر او غير بر فعلاً المولع اقول كلامك لثاني مره انه مهم ولابد من تطبيقه

[اتيكا]

مشكور أخوي المولع على النصيحة

وجزاك الله الف خير يا اخي الغالي وبارك الله لك في دينك ودنياك وفي صحتك ومالك وبارك الله لك في آخرتك انت وجميع الأعضاء يارب

وللأمام وعساك على القوه ووفقك الله وسدد خطاك للخير والصلاح


وتقبل تحيات أخوك أبو شذى

[أبو حمد]

أقول يا المولع قل لقريبك و لابعه لا ينسون دعاء النزول في الكشتات الجايه

[ابودجانه]

المولع اولا مشكور على نصيحتك بالتحصن بالاذكار وخاصة قولك اعوذ بكلمات الله التامات من شر ماخلق0




وبالنسبة لجن التنهات 0تقلوله صادق 0عاد التنهات اللى فيه 0000000دور غيرها يمكن

[المولع]

مفتون صيد ، اتيكا ، ابو حمد ، ابو دجانه

جزاكم الله خير ، واسئل الله التوفيق لي و لكم في الدنيا و الآخره . وان يحفظني و اياكم من كل شر و مكروه إنه قريب مجيب الدعاء ...