مرحبا حبيباتي واخواتي الغاليات في أكلة موجودة في أكثر من دولة وكل دولة لهم طريقة خاصة في اعدادها ، بس ألذ طريقة وجدتها من بلاد فلسطين وهي مشهورة جداً شهرة الكبسة عندنا هنا وما تعمل إلا للغاليين ولغلاتكم بعلمكم عنها خلنا نغير في مطبخنا الخليجي شوي عن اكلات الرز( الكبسة ) ومشتقاتها مع احترامي الشدييييييييد لها .
الكسكسو للي ما تعرفة موجود في أي سوبرماركت في باكيت مثل باكت اللقيمات الجاهزة ولونه أحمر وأصفر أو أخضر وأصفر ومكتوب عليه كسكسو ومرسوم عليه جمل واسالي عنه باسم الكسكسو المهم الباكت الواحد فيه بركه ويغدي عائلة مكونة من 6 أشخاص ( مو مفاجيع مرة ) هههههه
المهم في الكسكسو انه ما يطبخ في أي قدر لأ لازم قدر خاص وهو عبارة عن قدر وفوقة قدر اخر مشخل ( مخرم مثل المصفايه ) ويلبس القدرين في بعض القدر تحت والمصفاة فوقة وتكون محكمة حسب التصميم وتكون في جميع محلات الآواني المنزلية
المقادير
باكيت كسكسو( أو حسب الرعائلة )
دجاج أو لحم مقطع أرباع
برطمان حمص حب مسلوق جاهز
4 بصلات مفرومه ناعم (عليها ملعقة من كل / قرفة ، كمون ، فلفل أسود ، ملح ، عين جرادة حب إن وجد )وملعقتين زيت .
2 بصلة ، 2 طماطم ، 2 بطاطس ، 2 جزر جميعهم مقطعة أرباع أو قطع كبيرة نوعاً ما
البهارات المستخدمة للبصل نفس بهارات سلق اللحم والدجاج فقط نضيف ( ملعقة بهار حلو ) عند العطار أو المحامص
التحضير
في البداية مرة
نضع الكسكسو في وعاء غميق ونبلله في الماء ( يكون الماء مغطي الحبات بالضبط مثل الرمل المبلول ) ما يكون الماء كثير ونحط معاه ربع كوب زيت وملح حسب الرغبة ويترك لمدة نصف ساعة حتى تتفتح الحبة وتحسينها زي العجين بس ايبس مو مهروسه علشان كذا اقولك ما نكثر موية في النقع
نحضر من 4إلى 5 بصلات وتفرم ناعم مثل الحمسة على اليد مو بالخلاط وبعدين نحط عليها ملعقة كبيرة كمون مطحون وملح وفلفل أسود وزيت ولو في عين جرادة حب مو خضرة وتكون عند العطارين مثل الحبوب بيضاوية صغيرة رمادية اللون واسمها (عين جرادة )اذا ما في مو مشكلة عادي وتهرس البصله وتدعك زين بالبهارات هذي لين تحسين صار فيها مويه شوية ونخليها على جنب
التطبيق
ناخذ القدر الخاص حق الكسكسو
نبدأ بتقطيع بصله في القدر اللي تحت وتحوس بقليل من الزيت ثم نضع الدجاج أو اللحم حسب الرغبة ويشوح 5 دقائق ثم نضع الماء وبعد الغليان نرفع الزفرة ونضع البهارات وهي ( ملعقة أكل من كل من / فلفل اسود ، قرفة ، كمون ، بهار حلو ، بهار مشكل ) وملح ونغطي القدر بالمصفاة اللي فوق بس تدهنها قبل بشوية زيت من كل الجهات( مثل قالب الكيك ) وننتضر لما نشوف البخار حق المرقة طلع من كل الخروووم حقت المصفاة ناخذ نصف كمية الكسكسو ونحطها على المصفاة ونغطي كل الخروم حقت المصفاة ننثر نصف الكمية نثر ( لا تخافو أن الحبوب تطيح من الخروم لا ما تصير المهم نضع نصف الكمية ثم نحضر البصل المفروم ناعم اللي مع البهارات وننثره فوق طبقة الكسكسو ثم نجيب النصف الباقي من الكسكو ونضعة فوق البصل يعني صار عندنا (3 طبقات أول كسكسو وثانيه بصل مع البهارات والثالثة كسكو )وتترك على النار ونلاحظ بعد فترة خروج البخار من فوق الكسكسو عبر هذه الطبقات علشان كذا ما يتغطى القدر من فوق ابداً وطبعاً ما ينشف سبحان الله وعند نضوج اللحم أو الدجاج ينضج الكسكسو يبيلة ساعة إلا ربع وإذا نضج ناخذه ونقلبه في وعاء وسيع شوي وله حواف ويفتت باليد مثل الفرك علشان يختلط البصل مع الكسكسو ونذوق الملح ونرش رشة زيت خفيفة ويترك لحين التقديم
يعمل خلطة توضع على وجه الكسكسو عند التقديم وهي زي المرق حقنا مكون من اغلب أنواع الخضار وتكون مقطعه قطع كبيرة وهي ( في قدر نحط شوية زيت ثم نقطع بصلة زي الجوانح بس كبار أو أرباع وحبتين طماطم ارباع وتقلب قليلاً ثم نضع حبتين بطاطس مقطعة كبير ولو في قطع قرع أصفر تمام ما عندك نضع جزر مقطع كبير نوع ما بس نضع عليها مرقة من مرقة سلق الدجاج وعند الاستواء نفتح برطمان الحمص الحب ونحطة مع الخضار
التقديم
الحين نسكب الكسكسو في الصحن المفروش ( حق الكبسة ) ونسقيه بالمرق حق الدجاج كمية بسيطة بالمغرفة نشيل شوي مرق وننثره على الكسكسو ( يعطيه شوية طراوة وطعم ) ثم نضع الخضار فوق الكسكسو في الوسط مع القليل من المرقه حقت الخضار ثم نرص قطع اللحم أو الدجاج بعد التحمير وهي رووووووعة وبالهنا والشفا